जकर्याह 11

इस्राएलेरे दुश्मना केरे लेई मुसीबत

1 हे लबानोन प्रदेश, अग्गी बत दे कि तै एइतां तेरे गैइड़न भस्म केरे! 2 हे सनोवर बुट्टव, अफ़सोस, अफ़सोस केरा! किजोकि गैइड़ डुल्‍ली जेवरोए, ते बड्डे करां बड्डे बुट खतम भोइ जेवरेन! हे बाशान सूबेरे बंज़ेरे बुट्टव, अफ़सोस, अफ़सोस केरा! किजोकि घनू जंगल कट्टू जेवं! 3 पुहालां केरि चिन्डां केरो शब्द शुनोने लगोरोए, किजोकि तैन केरि शान-ओ-शोकत खतम भोइ जेवरीए! जुवान शेरां केरू गरज़नू शुनोते, किजोकि यरदन दरियारे बन्नेरू घनू जंगल नाश भोइ जेवरूए।

पुहालां केरि नबूवत

4 मेरे यहोवा परमेशरे ई हुक्म दित्तोरोए: "मारे गानेबाले गब्बां केरो पुहाल बेनि गा। 5 तैन केरे घिन्ने बाले तैन्न मारने पुड़ भी अपनो आप दोषी न समझ़न, ते तैन केरे बेच़ने बाले ज़ोतन, ‘यहोवारी तारीफ़ भोए, असां अमीर भोइ जेवरेम;’ ते तैन केरे पुहाल तैन पुड़ किछ दया न केरन। 6 यहोवा एन ज़ोते, अवं इस मुल्खेरे रानेबालन पुड़ फिरी दया न केरेलो। हेरा, अवं मैन्हन एक्‍की होरि केरे हथ्थे मां, ते तैन केरे राज़ेरे हथ्थे ट्लुवालो; ते तैना इस मुल्खे नाश केरेले, ते अवं तैसेरे रानेबालन तैन केरे कब्ज़े मरां छुटालो।"

7 एल्हेरेलेइ अवं मारने गानेबाले भैड्डां-छ़ेल्‍लन ते खास केरतां तैन मरां ज़ैना दीन थी तैन्न च़ारने लगो। ते मीं दूई लट्ठां नेही; एक्‍केरू नवं मीं अनुग्रह रख्खू, ते होरेरू नवं एकता। इन्न सेइं अवं तैन भैड्डन-छ़ेल्‍लन च़ारने लगो। 8 मीं तैन केरे ट्लाई पुहाल एक्‍की महीने मां नाश केरतां छ़डे, पन अवं तैन केरे वजाई सेइं बे सबर थियो, ते तैना मीं सेइं नफरत केरती थी। 9 तैखन मीं तैन सेइं ज़ोवं, "अवं तुसन न च़ारेलो। तुसन मरां ज़ै मरे त मरे, ते ज़ै नाश भोए त भोए, ते ज़ैना बेच़ोरी रान त रान त तैना एक्‍की होरेरू मास खान।" 10 ते मीं अपनि तै लट्ठ ट्लोड़ी छ़डी, ज़ैसारू नवं अनुग्रह थियूं, ते मीं ज़ै करार सेभी गैर कौमन सेइं कियोरो थियो, तै ट्लोड़ो। 11 तै करार तैस्से दिहाड़े ट्लोड़ी छ़डो, ते इस सेइं दीन भैड्डां-छ़ेल्‍ली ज़ैना मीं तेकती थी, तैनेईं समझ़ू कि इन यहोवारू वचने। 12 तैखन मीं तैन सेइं ज़ोवं, "अगर तुसन रोड़ू लगते त मेरी मज़दूरी देथ, ते नईं देनी त न देथ।" तैखन तैनेईं मेरी मज़दूरी मां चैंदरे 30 टुक्ड़े तुलतां दित्ते।✝11:12 मत. 26:15. 13 तैखन यहोवा मीं सेइं ज़ोवं, "एना कुम्हारेरे सामने शैरतां छ़ड," ऐह बड़ी बड्डी कीमत ज़ै तैनेईं मेरे लेई रख्खोरीए? तैखन मीं तैना चैंदरे 30 टुक्ड़े नेइतां यहोवारे भवनेरे खज़ाने मां कुम्हारेरे सामने शैरतां छ़डे।✝11:13 मत. 27:9-10. 14 तैखन मीं तै होरि लट्ठ ज़ैसारू नवं एकता थियूं, एल्हेरेलेइ ट्लोड़तां छ़डी कि मीं तै भाइच़ारो ट्लोड़तां छ़डो ज़ै यहूदारे ते इस्राएलेरे दरमियाने मांए।

15 तैखन यहोवा मीं सेइं ज़ोवं, "हुनी तू बेवकूफ पुहालेरे हथियार ने। 16 किजोकि अवं इस मुल्खे मां अक एरहो पुहाल रेखेलो, ज़ै हेरोरि भैड्डी न तोपेलो, ते न ज़ै तितर-बितर भोवरीए तैस अकोट्ठी केरेलो, ते न ज़ैना ज़खमी भोन तैन्न बझ़ालो, न ज़ैना सझ़र भोन तैन केरि देख-भाल केरेलो, बल्के ज़ैना निगर भोन तैन केरू मास खालो ते तैन केरे रौन्ने दल्‍लेलो। 17 अफ़सोस तैस निकम्मे पुहाले पुड़ ज़ै भैड्डां-छ़ेल्‍ली शैरी छ़डते! दांए ते बांए दूईये एछ़्छ़न पुड़ तलवार च़लेली, तैखन तैसेरी पाखड़ शुक्‍की गाली ते देइनी अछ़ निस्सी गाली।"