जकर्याह 13

मूरती पूज़ा नाश

1 "तैस दिहाड़े दाऊदेरे घराने ते यरूशलेमेरे रानेबालां केरो पाप ते गन्दगी धोनेरे लेई अक बगतो नाग निस्सेलो।

2 "सेना केरो यहोवा एन ज़ोते, तैस दिहाड़े अवं यहूदा प्रदेशे मरां मूरती केरू नवं मिटेइतां छ़डेलो, ते तैना फिरी कधे कोई याद न केरेलो। ते अवं नबी ते अशुद्ध आत्मा इस मुल्खे मरां केढतां छ़डेलो। 3 ते अगर कोई फिरी नबूवत केरेलो, त तैसेरे अम्मा बाजी ज़ैन सेइं तै ज़र्मोरोए, तैस सेइं ज़ोले, ‘तू ज़ींतो न रालो, किजोकि तीं यहोवारे नंव्वे सेइं झूठ ज़ोवरूए।’ एल्हेरेलेइ ज़ैखन तै नबूवत केरेलो, तैखन तैसेरे अम्मा बाजी ज़ैन सेइं तै ज़र्मोरोए, तैस च़िरतां छ़डेले। 4 तैस मौके हर अक नबी नबूवत केरते बार अपने-अपने दर्शने सेइं शरमिन्दे भोल्हे, ते धोखो देनेरे लेई कम्बलेरां लिगड़ां न लाएले, 5 तै ज़ोलो, ‘अवं नबी नईं, ज़मीनदार आईं; किजोकि अवं बचपनेरो देंतो होरि लोकां केरो दास आईं।’ 6 तैखन तैस एन पुछ़ू गालू, तेरी छैती पुड़ एना ज़खम केन्च़रे भेवरेन, तैखन तै ज़ोलो, ‘एना तैना ज़खमन, ज़ैना मेरे प्यार केरनेबालां केरे घरे मां लगोरेन।’"

यहोवारे पुहालेरे मारनेरो हुक्म

7 सेना केरो यहोवा एन ज़ोते, "हे तलवार, मेरे रखोरे पुहालेरे खलाफ मतलब तैस मैन्हेरे ज़ै मेरे लेई कम केरते, तैसेरे खलाफ च़ल। तू तैसेरे पुहाले कट, तैखन भैड्डां-छ़ेल्‍ली तितर-बितर भोइ गैली; ते बच्‍चन पुड़ अवं अपनो हथ खड़ो केरेलो। 8 यहोवा एन भी ज़ोते, इस मुल्खेरे रानेबालां केरि दूई तिहाई मारी गाली ते बच़ोरी तिहाई तैस मां बनोरी राली। 9 ते तैस तिहाई अवं अग्गी मां छ़ेडतां चैंदरो ज़ेरो साफ केरेलो, ते सोन्नेरो ज़ेरो परखेलो, ते तैना मेरे नंव्वे सेइं प्राथना केरेले, ते अवं तैन केरि शुनेलो। अवं तैन केरे बारे मां ज़ोइलो, ‘इनां मेरे लोकन,’ ते तैना मेरे बारे मां ज़ोले, ‘यहोवा इश्शो परमेशरे।’"✝13:9 1 पत. 1:7;भज. 91:15;यिर्म. 30:22.