1 यहोवा एक्‍की होरि दर्शने मां मीं हिरावं कि यहोशू प्रधान याजक यहोवारे दूतेरे सामने खड़ोए, ते शैतान तैसेरे देइने पासे तैसेरी बगावत केरनेरे लेई खड़ो थियो। 2 तैखन यहोवाए शैताने सेइं ज़ोवं, "हे शैतान अवं तीं झ़िड़कताईं!* यरूशलेम मेरू नगरे, अवं तीं झ़िड़कताईं! कुन एन अग्गी मरां निस्सोरू मोछ़ोवं नईं?" 3 तैस मौके यहोशू मेलां लिगड़ां लेइतां दूतेरे सामने खड़ो थियो। 4 तैखन दूते ज़ैना तैसेरे सामने खड़े थिये ज़ोवं, "एसेरां एना मेलां लिगड़ां खोल्‍ला।" फिरी तैनी तैस सेइं ज़ोवं, "हेर, मीं तेरो अधर्म दूर कियोरोए, ते अवं तीं रोड़ां लिगड़ां* लुवेइलो।" 5 तैखन मीं ज़ोवं, "यहोशूएरे दोग्गे पुड़ शुद्ध साफो बन्धा।" ते तैनेईं तैसेरे दोग्गे पुड़ याजकेरे काबल शुद्ध साफो बन्धो, ते तैस लिगड़ां भी लुवां; तैस मौके यहोवारो दूत साथी खड़ो राव।

6 तैखन यहोवारे दूते यहोशू खबरदार केरतां ज़ोवं, 7 "सेना केरो यहोवा तीं सेइं एन ज़ोते; अगर तू मेरी बत्तन पुड़ च़लेलो, ते ज़ैन किछ मीं तीं सौंफतां दित्तोरूए तैसेरी हिफाज़त केरेलो, त तू मेरे भवनेरो न्यायी ते मेरे भवनेरे अंगना केरो रक्षक भोल्हो; ते अवं तीं एन केरे मझ़ाटे एजने-गाने देइलो ज़ैना साथी खड़ेन। 8 हे यहोशू प्रधान याजक, तू शुन, ते ज़ैना तेरे साथी याजक ज़ैना तेरे सामने खड़े आन तैना भी शुन्न, किजोकि तैना मैन्हु रोड़े वक्ते हेरतन: शुना, अवं अपने दासेरी शाखी बांदो केरेलो। 9 उस घोड़े हेर ज़ै मीं यहोशूएरे सामने रखोरोए, तैस एक्‍की घोड़े पुड़ बह सत एछ़्छ़ी बेनोरिन, सेना केरो यहोवा एन ज़ोते, हेर अवं तैस घोड़े पुड़ घड़ाई केरताईं, ते इस मुल्खेरे अधर्मे सिर्फ एक्‍की दिहाड़े माफ़ केरेलो। 10 तैस्से दिहाड़े तुसां अपने भियालन दाछ़रे बुट्टे ते फैगेरे बुट्टे हैठ जो कुजाले, सेना केरो यहोवा एन ज़ोते।"