1 सेना केरे यहोवाए फिरी मीं सेइं ज़ोवं, 2 "सेना केरो यहोवा एन ज़ोते; सिय्योनेरे लेई मीं बड़ी जलन भोइ, बल्के बड़ी जलजलाहट मीं मां पैदा भोवरीए। 3 यहोवा एन ज़ोते: अवं सिय्योन पहाड़े पुड़ वापस एवरोईं, ते यरूशलेम नगरे मां अवं बास केरेलो, ते यरूशलेमे जो सच़्च़ेरू नगर ज़ोले, ते सेना केरे यहोवारे पहाड़े जो पवित्र पहाड़ ज़ोले। 4 सेना केरो यहोवा एन ज़ोते, यरूशलेमेरे चौकन मां मड़द कौन्शां बुढे भोनेरे वजाई सेइं, अपने-अपने हथ्थे मां सोटी ट्लेइतां बिश्शेले। 5 ते नगरेरे चौकन मां खैढने बाले मट्ठन कुइयन सेइं चौक भेरतां भोइ गाले। 6 सेना केरो यहोवा एन ज़ोते: चाहे तैन दिहाड़न मां ऐह गल तैन बच़ोरे लोकां केरि नज़री मां अनोखी भोए, पन कुन ऐह गल मेरी नज़री मां भी अनोखी भोल्ही, सेना केरो यहोवा एन ज़ोते।✝ 7 सेना केरो यहोवा एन ज़ोते, हेरा, अवं अपने लोकां केरो छुटकारो केरतां तैन पूरब ते पश्चिमेरां अकोट्ठे केरेलो; 8 ते अवं तैन एन्हतां यरूशलेम नगरे मां बसेइलो; ते तैना मेरे लोक भोल्हे ते अवं तैन केरो परमेशर भोल्हो, एन त सच़्च़ैई सेइं ते धार्मिकताई सेइं भोल्हु।"

9 सेना केरो यहोवा एन ज़ोते, "तुसां इन दिहाड़न मां एना वचन तैन नेबी केरि ज़िरिये शुन्तथ ज़ैना सेना केरे यहोवारे भवनेरी मुनीयाद रखनेरे मौके मतलब भवन बनानेरे मौके मां थिये। 10 तैन दिहाड़न करां पेइले, न त मैन्हेरी मज़दूरी मैलती थी ते न जानबरां केरि, बल्के सताने बालां केरि वजाई सेइं न त एजनेबालन शान्ति मैलती थी ते न गानेबालन। किजोकि अवं सेभी मैन्हन एक्‍की होरि पुड़ चढ़ाई करातो थियो। 11 पन हुनी अवं इन बच़ोरे लोकन सेइं एरहो बर्ताव न केरेलो ज़ेन्च़रे कि पेइले दिहाड़न मां केरतो थियो, सेना केरो यहोवा एन ज़ोते। 12 किजोकि हुनी सुखेरे वक्तेरी फसल मतलब दाछ़री बागन फल लग्गेलो, ज़मीन अपनि फसल उगाली, ते अम्बरेरां झ़ड़ी बखेली; किजोकि अवं अपने बच़ोरे लोकन इन सेभी केरो मालिक बनेइलो। 13 हे यहूदा ते इस्राएलेरे लोकव, ज़ैस तरीके तुसां गैर कौमन मां श्रापेरी वजा थिये, तैस्से तरीके सेइं अवं तुश्शो छुटकारो केरेलो, ते तुसां बरकतरी वजा भोल्हे। एल्हेरेलेइ तुसां न डेरथ, ते न तुश्शे हथ ढिल्‍ले भोन।"

14 किजोकि सेना केरो यहोवा एन ज़ोते: "ज़ैस तरीके सेइं तुश्शे दादे-पड़दादे मीं सरकाते थिये, तैखन मीं तैन केरो नुकसान केरनेरे लेई थापेरू थियूं ते फिरी न पशतावं। 15 तैस्से तरीके मीं इन दिहाड़न मां यरूशलेम ते यहूदारे लोकां केरू भलू केरनेरे बारे मां सोचेरूए; एल्हेरेलेइ तुसां न डेरथ। 16 ज़ैना कम्मां तुसेईं कियोरां लोड़तन, तैना इनां आन: एप्पु मांमेइं सच़ ज़ोनू, अपने आदालतन मां सच़्च़ैई सेइं न्याय केरनो ते मेल मिलाप बनानो,✝ 17 ते अपने-अपने मने मां एक्‍की होरेरो नुकसान केरनेरे बारे मां खियाल नईं केरनो, ते झूठी कसम खाने सेइं प्यार नईं केरनो, किजोकि एन सब कम्मन सेइं अवं नफरत केरताईं, यहोवा एन ज़ोते।"

18 फिरी सेना केरे यहोवा मीं सेइं इन ज़ोवं, 19 "सेना केरो यहोवा एन ज़ोते: च़ेवरोवं, पंच़ोंव, सत्तोवं ते दशोवं महीने मां ज़ैना-ज़ैना बरतेरे दिहाड़े भोतन, तैना यहूदारे घरानेरे लेई खुशी ते आनन्द ते जशन ते तिहारां केरे दिहाड़े भोइ गाले; एल्हेरेलेइ हुनी तुसां सच़्च़ाई ते मेल मिलापे सेइं प्यार रखा।

20 "सेना केरो यहोवा एन ज़ोते: एरहो वक्त एजनेबालोए कि मुल्खे-मुल्खेरे लोक ते बड़े नगरां केरे लोक यरूशलेम नगरे मां एज्जेले। 21 ते एक्‍की नगरेरे रानेबाले लोक होरि नगरां केरे रानेबाले लोकन सेइं ज़ोले, ‘यहोवा कां बिनती केरने ते सेना केरे यहोवा तोपनेरे लेई च़ला, अवं भी च़लेलो।’ 22 बड़े मुल्खां केरे लोक बल्के सामर्थी कौमां केरे लोक यरूशलेमे मां सेना केरे यहोवा तोप्पने ते यहोवा कां बिनती केरनेरे लेई एज्जेले। 23 सेना केरो यहोवा एन ज़ोते: तैन दिहाड़न मां अलग-अलग भाषा केरनेबाले ते सेभी कौमन मरां दश मैन्हु एक्‍की यहूदी मड़देरे लिगड़ेरो कूनो ट्लाले, ‘असां तीं सेइं साथी च़लमेले, किजोकि असेईं शुनेरूए कि परमेशर तुसन सेइं साथीए।’"