1 Bɔn-nyɛɛg bam mɛ di ekwyɛl ɔ, sa mot ààmyaal mbi mɛkpa mɛ esisim mbɛs di ewyis tɔ enuub e bot ɛ. Tin, ye goka ɛ́ bi ɛpookosiiza etɛp e tak ɛnyɔɛpe nɛghu yɛ ɛ́ mɛkpa mɛ dus pɛ daa Zɛɛb ɛ. Etɛɛ náá, bɛtɛ nɛ bɛngoolel ɛ Mɛkpa ɛ Zɛɛb yii mɛkɔŋ eelwood kɔ ɛko ɛ bɔs. 2 Beeka dáa bi aagu náá, yɛ ɛ́ Sisim Zɛɛb ɛ: esisim djas di emyaal náá, Yezu Klisto mot nazyɛ kɔ bɔs nɛ nyel epuud ɔ, sisim tak ɛ yii Zɛɛb. 3 Deenek, sisim djas di ààmyaal Yezu ɔ, ye tok Sisim Zɛɛb. Tin, yɛ ɛ́ sisim mot swaka ɛ Klisto ee bi nagwak náá, yɛ ɛpezyɛ ɛ, moo ɛ́ kɔ ɛko ɛ bɔs.

4 Biyɔ bɔn bam, bi ɛ́ bot ɛ mbyak’ɛ Zɛɛb. Tin, bi naazekwak bɛmbee bɛgoolel ɛ Mɛkpa ɛ Zɛɛb binɔk, etɛɛ náá, Sisim na Dɛɛ di tɔ len ɛ nɛ bwala dhaa esisim bot ɛ bɔs’ak. 5 Deenek, bɛmbee bɛngoolel ɛ Mɛkpa ɛ Zɛɛb binɔk ɛ́ bot ɛ bɔs’ak. Tin, bɛ zobaalii ɛ́ etɛp e bɔs’ak. Deenek, bot ɛ bɔs’ak nɛ gwak sa bɛ di elii ɛ. 6 Tin, yɛ kabɛ menabɛlka ɔɔ, menaka ɛ́ bɔn ɛ Zɛɛb. Deenek, mot di egu Zɛɛb ɔ, nɛ gwak bis. Mot di ààgu Zɛɛb ɔ, nyɛ ààgwak bis. Yɛ ɛ́ deenek ɛ́ bot aawa mbɛk pak Sisim etsɛɛtsɛ nɛ sisim mɛkɔŋ.

7 Bɛwɛn bam mɛ di ekwyɛl ɔ, djhookwyɛlaka pak’enaka, etɛɛ náá, kwyɛl dus ɛ́ pɛ daa Zɛɛb. Deenek, mot di ekwyɛl bot djas ɔ, nyɛ ɛ́ mɔn ɛ Zɛɛb, nyɛ nɛ gu Zɛɛb. 8 Tin, mot di ààdi tɔ kwyɛl ɔ, nyɛ ààgu Zɛɛb, etɛɛ náá, Zɛɛb ɛ́ kwyɛl. 9 Beeka dáa Zɛɛb di elyaal náá, nyɛ nɛ kwyɛl mena ɛ: Nyɛ naadhis Sɛɛŋɛlɛ Mɔn’ɛ kɔ ɛko ɛ bɔs, étɛp bot neebela tɛtɛ tsik kɔ ɛsu ɛ lɛ. 10 Beeka sa di edjóoaa kwyɛl ɛ: Ye tok náá, menabɛlka ɛ́ nakwyɛl Zɛɛb, tin, yɛ ɛ́ nyɛ ɛ nakwyɛl mena. Nyɛ bookadhis Mɔn’ɛ, mot naka nyel’ɛ é buwa étɛp ɛpelak ɛ mesyem mena ɔ.

11 Bɛwɛn bam, dáa di náá, Zɛɛb nɛ kwyɛl mena deenek ɛ, mena gokaka ɛ́ nɛ kwyɛlel pak’enaka. 12 Mot ngɔt dinaa ààpabee Zɛɛb sok. Mena ɛ dika nɛ mɛkwyɛla pak’enaka ɔɔ, Zɛɛb ɛ́ tɔ lena. Tin, mɛkwyɛla mɛ ɛpenyen popoopwon tɔ lena.

13 Beea dáa mena di egoka nɛ ɛgu náá, Zɛɛb ɛ́ sama wat nɛ nena ɛ, nɛ náá, nyɛ ɛ́ tɔ lena ɛ: Nyɛ naadjɛ mena Sisim yɛ. 14 Bis naabee, bis ɛpebaŋa náá, Zɛɛb Sɛɛg naadhis Mɔn’ɛ dáa Mɛtsik-bot kɔ ɛko ɛ bɔs. 15 Deenek, mot ɛ myaal é mis mɛ bot náá, Yezu ɛ́ Mɔn ɛ Zɛɛb ɔɔ, Zɛɛb aadi ɛ́ sama wat nɛ nɛ, mot tak aadi ɛ́ sama nɛ Zɛɛb. 16 Yɛ kabɛ bisɔ ɔɔ, bis nɛ gu, tin, bis nɛ myaal náá, Zɛɛb nɛ kwyɛl bis. Zɛɛb ɛ́ kwyɛl, mot di ekɛ tɔ kwyɛl ɔ, mot tak ɛ́ sama wat nɛ Zɛɛb, deenek, Zɛɛb ɛ́ sama wat nɛ nɛ.

17 Kwyɛl ɛ di enyen popoopwon tɔ lena ɔɔ, mena aadika ɛ́ nɛ ɛbwaalel dwoo epɛ́ɛ, etɛɛ náá, tsik’ena kɔ bɔs’ak nɔŋel ɛ́ nɛ yɛ Yezu Klisto. 18 Ye tok nɛ bwoo tɔ kwyɛl, tɛtɛ kwyɛl nɛ dis bwoo. Etɛɛ náá, mot dyeebadi nɛ bwoo ɛ, é ghɛŋ nyɛ di tɔ bhwood feŋ ɛ. Mot di nɛ bwoo ɔ, nyɛ ààgu sa di edjóoaa tɛtɛ kwyɛl ɛ.

19 Yɛ kabɛ menabɛlka ɔɔ, mena kwyɛlelka ɛ́, etɛɛ náá, Zɛɛb ɛ naleekan ɛkwyɛl mena sok. 20 Deenek, mot ɛ di eke náá: «Mɛ nɛ kwyɛl Zɛɛb» da nyɛ ɛ́ bhina mɔn-nyɛɛg ɔɔ, nyɛ ɛ́ mot etsal. Tin, mot ɛ di ààkwyɛl sɔ mot nyɛ di ebee ɔɔ, nyɛ tok nɛ ghwyil ɛkwyɛl Zɛɛb, mot nyɛ di ààbee ɔ. 21 Gwakeka ɛtiŋ ɛ Klisto nadjɛ mena ɛ: Mot di ekwyɛl Zɛɛb ɔ, nyɛ goka ɛ́ nɛ ɛbaakwyɛl mɔn-nyɛɛg.