1 Bɔn-nyɛɛg, mot ngɔt pak’en ɛ́ zɛbelaaa sa mesyem ɔɔ, biyɔ bot ɛ di nɛ Sisim Zɛɛb ɔ, bi goka ɛ́ nɛ ɛbulal nyɛ é ze tɔ egwyem. Bi ɛ́ kobaka, etɛɛ náá, biyɔ bɛmet ɛ́ zɛkɛkwyɛ tɔ mɛbhowal. 2 Kwyeelka pak’en, da bi ɛ́ bebɛpel mɛkɔm mɛ etɛp bin. Deenek ɛ, bi aakɛ dáa etsi e Klisto di elɛɛ ɛ. 3 Mot di ebun náá, nyɛ ɛ́ mot é mis mɛ bot, ghuna nyɛ ààval dhiiti sonok é mis mɛ bot ɔ, nyɛ kɔɔ ɛ́ nyel’ɛ met. 4 Ye goka ɛ́ náá, mot nɛ mot pookosiiza mɛsa mɛ ɛnyɔɛpe. Nyɛ bee náá, nyɛ ɛpekɛ ɛnyɔɛpe ɔɔ, tin, nyɛ ɛ́ nɛ ghwyil ɛmyaala nɛ nyel’ɛ met, ààbɛ náá, nyɛ kagek yɛ nɛ mɛsa mɛ bot ɛ sis. 5 Etɛɛ náá, mot nɛ mot goka ɛ́ nɛ ɛbɛp mɛkɔm mɛ etɛp bɛ.

6 Mot di elyoaa Mɛkpa ɛ Zɛɛb ɔ, nyɛ goka ɛ́ nɛ ɛkaa esa ee nyɛ di nɛ yɛ ɛ, nɛ mot di elyo nyɛ ɔ.

7 Sa mot ààkɔɔ nyel’ɛ, bɛ ààsa mɛsɛŋ nɛ Zɛɛb. Sa mot aabɛ kɔ ɛko ɛ bɔs’ak ɛ, yɛ ɛ́ sa nyɛ aabɔ́k ɛ. 8 Mot ɛ bɛ sonok étɛp ɛkwosak ɛ epuud bɛ ɔɔ, nyɛ aabela ɛ́, esa e puud, yɛ ɛ́ ɛsyee. Tin, mot ɛ kabɛ esa e Sisim ɔɔ, nyɛ aabela ɛ́, esa e Sisim, yɛ ɛ́ tsik na kɔm-kɔm. 9 Sa mena ààbula bhis é ɛsa mɛnyɔ nɛ bot, etɛɛ náá, mena aawa zii ɔɔ, mena waabɔ́keka mbɛɛ bhum mɛsa mena, é ɛwala ɛ Zɛɛb aakwyɛl ɛ. 10 Tin, é sok mena di ebela ba mɔɔ ɛpɛɛd ɛ, djhoosaka mɛnyɔ nɛ bot djas, daŋ-daŋ ɛ́ nɛ bɔn-nyɛɛg bena, bot ɛ di edum koŋ nɛ Zɛɛb ɔ.

11 Beeka, eboo ekyeeb ee mɛ di ekwyal bin nenak’aak, mɛ kwyal yɛ ɛ́ nɛ mbɔ’am met. 12 Bot ɛ di ekwyɛl ɛbesal bin náá, bi niigelaa beka ɔ, yɛ ɛ́ bot ɛ di saŋ ɛghɛɛa mɛnyel é mis mɛ bot, tɔ ɛsa mɛsa mɛ epuud ɔ. Bɛ kwyɛl ɛ́ náá, bɛ di ààtiigaa kɔ ɛsu ɛ ɛsyee ɛ Klisto é mɛlaaba. 13 Bot ɛni beka ɔ, bɔɔ bɛmet ààlooba nɛ etsi djas. Bɛ kwyɛl ɛniigal bin beka ɛ, etɛɛ náá, bɛ neediig bet kɔ ɛsu ɛ ndem di é mɛnyel men ɛ.

14 Yɛ kabɛ mam ɔɔ, mɛ diig bet ɛ́ kɔ ɛsu ɛ ɛsyee ɛ Ghɛŋ’ena Yezu Klisto é mɛlaaba. Tin, dum nɛ ɛsyee ɛ Klisto kɔ mɛlaaba, esa e bɔs djas eezegwyɛ é yam mis. Deenek, mam moo ɛ́, mɛ eezegwyɛ dum nɛ esa e bɔs. 15 Étɛp tak ɛ, ye di náá, ɛni ɛ beka nɛghu ɛdi ààni beka tok nɛ dhiiti mɛtaŋ. Sa di nɛ mɛtaŋ ɛ, yɛ ɛ́ náá, Zɛɛb djɛ mena tsik na bes. 16 Dum nɛ bot ɛ di ekɛ tɔ ɛlooba nɛ mɛlyo mak ɔ, beta náá, egwyem nɛ boo lyem ghoŋ ɛ Zɛɛb di nɛ nɔɔ dɔɔ nɛ kɔ Yisalaɛl ɛ Zɛɛb.

17 Kana mos, sa mot ààbaawa mɛ tɔ tsik mezuk, etɛɛ náá, endem* e mezuk mɛ mɛ di nɛ yɛ é nyel’am ɛ, lyaal ɛ́ náá, mɛ ɛ́ mot ɛ Yezu.

18 Bɔn-nyɛɛg bam, betka náá, enɛm nɛ embɛɛ Ghɛŋ’enaka Yezu Klisto di tɔ esisim bin. Amɛn!