1 Bhii tak, Ghɛŋ eebaazɛsɛ́ɛ bɛdjekel mɛkam-mɛtɛn nɛ mɛkam-mɛmbá nɛ ebá (72). Nyɛ eezɛlwom bɛ bɛbá-bɛbá pɛ tɔ eghaada nɛ kɔ mɛl mɛ Yezu nabɛ náá, nyɛ aadhaŋ ɛ. 2 Nyɛ eezɛke nɛ nɔɔ náá: «Pyeeb nɛ bɔk. Bot ɛ mɛsa ààbu. Ye goka ɛ́ bi djaala náá, nakuma pyeeb nyɛ dhis bɛdhiiti bot ɛ mɛsa étɛp bɛ needis edee tɔ pyeeb. 3 Tɔ́ka! Mɛ kyeed bin tin ɛ́ dáa ebhata kuku eben. 4 Sa mot àànɔɔ ngwyɛ epata, àànɔɔ ɛkoo, àànɔɔ-nɔŋak dɔɔ nɛ mɛpapa. Sa mot ààbe tyɛ étɛp mɛswosel e ze. 5 Pɛ tɔ mendjaa mɛ bi aani ɛ, keka sok náá: "Betka náá, egwyem di tɔ ndjaŋ’ak!" 6 É di’enek, mot di nɛ egwyem ɛ di tin ɔɔ, egwyem bin ɛ́ waakala kɔ lɛ. Yɛ kabɛ náá, mot egwyem tok tin ɔɔ, egwyem bin ɛ́ waabula pɛ daa len. 7 Sulalka tɔ ndjaa mot egwyem é tak. Bi ɛ djɛaa mɛdii nɛ edee ɔɔ, da bi ɛ́ dɛ yɛ, etɛɛ náá, mot-mɛsa goka ɛ́ nɛ ɛbela etuud e mɛsa mɛ. Sa mot ààkɛ mendjaa nɛ mendjaa. 8 Bi ɛ ni kɔ dɛl, da bɛ ɛ́ myaal bin ɔɔ, dɛka edee bɛ aadjɛ bin ɛ. 9 Tsikeka bot ɛ mɛbɛ́ di kɔ dɛl ɛ tak ɔ, da bi ɛ́ lɛɛ bot ɛ dɛl náá: "Ɛyoŋ ɛ Zɛɛb eezekunaa nɛ nen." 10 Pɛ kɔ dhiiti mɛl mɛ bi aani, da bot ɛ́ mɛl mɛ tak ɛpɛɛ náá, bi nàsulal pɛ daa lɔɔ ɔ, tɔ́ka kɔ ɛbɛsɛɛ ɛ dɛl, da bi ɛ́ lɛɛ nɛ nɔɔ náá: 11 "Bis ɛpekut piib mɛko mes. Yɛ ɛ́ piib dɛl ɛ len zenaata bis é mɛko ɛ. Ye goka ɛ́ náá, bi gu náá, Ɛyoŋ ɛ Zɛɛb moo ɛ́ ɛkunaaɛpe nɛ nen." 12 Mɛ lɛɛ bin ɛ́ náá, dwoo Zɛɛb aazɛpɛ́ɛ bot ɛ, bot ɛ dɛl ɛlak ɛ́ waapɛ́ɛaa ɛ́ ɛlyelɛpe dhaa-dhaŋak epɛ́ɛ bot ɛ ghaada Sodɔm.»

13 «Haaa kpaa-ghoŋ nɛ nɔ, dɛl ɛ Koodazin! Haaa kpaa-ghoŋ nɛ nɔ, dɛl ɛ Bhɛtsaida! Etɛɛ náá, endem e mɛbwala mɛ nasael pɛ yebɔ ɛpedi náá, ye nasael ɛ́ pɛ ghaada Tiid nɛ yii Sidɔn ɔɔ, pe bot ɛ eghaada binɔk eeloobɔt kaad ɛpum, pe bɛ naazelɔɔba mɛsii, pe bɛ naaloozeliig elyem bɔɔ. 14 Yɛ ɛ́ étɛp tak ɛ mɛ di elɛɛ bin náá, dwoo bot aadi epɛ́ɛaa ɛ́, yebɔ mɛpɛ́ɛa waadhaa yii Tiid nɛ Sidɔn nɛ mɛlyel. 15 Kapɛlnaum! Yɛ kabɛ wɔy ɔɔ, egeka bɔ ɛ́ náá, wɔ ɛ́ nɛ ghwyil ɛbyet, tɔ́ pɛ tɔ gwoo? Wɔ waasila pɛ si, batakɛkum dɛl ɛ edim, yii bot ɛ nazegwyɛ ɔ.» 16 Nyɛ eebaazɛke nɛ bɛdjekel bɛ náá: «Mot aagwak bin ɔ, nyɛ eegwak mɛ. Mot ɛ byen bin ɔɔ, nyɛ byen ɛ́ mam. Tin, mot ɛ byen mɛ ɔɔ, nyɛ eebyen mot nadhis mɛ ɔ.»

17 Bɛdjekel mɛkam-mɛtɛn nɛ mɛkam-mɛmbá nɛ ebá (72) nalwomaa ɔ, eezɛbula nɛ mɛmyaala djas. Bɔɔ nɛ Yezu náá: «Ghɛŋ, dɔɔ nɛ embee esisim eelooba nɛ nes é sok bis di elii nɛ nɔɔ nɛ ghwyil din ɛ lɔ ɛ!» 18 Yezu eezɛbɔɔza nɛ nɔɔ náá: «Mɛ di ebee Satan é dus pɛ ɛko, sul pɛ kɔ bɔs tyee ngwyes bhi. 19 Gwakeka: Mɛ eedjɛ bin eghɛŋ ɛnyal bɛnyɔ, ebaalɔl, dɔɔ nɛ mɛbwala mɛ mot mɛbhuka djas. Ye tok nɛ sa yɛ aasa bin. 20 Tin, nàmyaalaka, etɛɛ náá: Embee esisim ɛpegwak bin. Bi goka nɛ ɛmyaala ɛ́, yɛ bɛ náá, min men ɛ́ kwyala tɔ gwoo ɔɔ.»

21 É ghɛŋ tak, Yezu naazɛbela boo mɛmyaala Sisim na Dɛɛ nadjɛ nyɛ ɛ́. Nyɛ eezɛtsim: «Heee Saagam, Ghɛŋ gwoo nɛ bɔs. Mɛ eeghaapɛɛ wɔ, étɛp náá, wɔ eelyaal bɔɔ dhyeeb esesɛɛ ee di syela é mis mɛ bɛtsoŋ ɛ bot nɛ bot ɛ mɛtselal ɛ. Nɛ tsɛɛtsɛ, Saagam, wɔ nɛ kwyɛl náá, ye sael deenek. 22 Saagam naadjɛ mɛ esonok djas. Ye tok nɛ mot di egu Mɔn, yɛ di ààbɛ Sɛɛg ɔɔ. Tin, mot aanàkwaagu náá, Sɛɛg ɛzɛ, yɛ di ààbɛ Mɔn, nɛ mot Mɔn aakwyɛl ɛlyaal nyɛ nwyak ɔɔ.»

23 Bhii tak, Yezu eezɛliig mis, gwyák bɛdjekel, nyɛy nɛ bɔɔ bɛmet náá: «Mɛnyɔ nɛ biyɔ, etɛɛ náá, bi ɛpebee sa bi di ebee’enek! 24 Etɛɛ náá, mɛ lɛɛ bin ɛ́ tsɛɛtsɛ náá, bɛtɛ nɛ bɛngoolel ɛ Mɛkpa ɛ Zɛɛb nɛ bɛmɛkoozi ɛbuɛpe nadi ɛ́, nɛ gwyes ɛbee esa ee bi di ebee’aak. Saabɛgɔs nɛ nɔɔ ɛ́ náá, bɛ nabɛ ɛ́ ààbee. Bɛ nadi ɛ́ nɛ gwyes ɛgwak sa bi di egwak mos’aak, saabɛgɔs nɛ nɔɔ ɛ́ náá, bɛ nabɛ ààgwak.»

25 Dhiiti lyoel etsi e Zɛɛb naazɛwyɛl, lii, étɛp ɛbowal ɛ Yezu. Nyɛ eezɛdji nyɛ náá: «Lyoel, mɛ sa dáa, étɛp mɛ neebela tsik na kɔm-kɔm?» 26 Yezu kabɔɔza nɛ nɛ náá: «Haaa, yé nakwyalel tɔ mɛkana mɛ etsi bina? Wɔ gwak dáa tɔ tak?» 27 Mot’enɔk zɛbɔɔza náá: «"Wɔ goka ɛ́ wɔ kwyɛl Ghɛŋ, Zɛɛb’ɔ nɛ lyem’ɔ djas, nɛ sisim’ɔ djas, nɛ ghwyil’ɔ djas, nɛ mɛtselal mɔ djas." Zɛnɔɔ náá: "Wɔ goka ɛ́ wɔ kwyɛl sɔ’ɔ mot dáa wɔ di ekwyɛl nyel’ɔ met ɛ*."» 28 Yezu ɛ́ bookake nɛ nɛ náá: «Wɔ eebɔɔza ɛnyɔɛpe. Sa deenek, wɔ neebela tsik na kɔm-kɔm.»

29 Ghuna ghaa-mɛkana mɛ etsi nakwyɛl ɛ́, nyɛ neebela gham. Nyɛ ɛ́ boodji Yezu náá: «Sɔ’am mot ɛzɛ?» 30 Yezu kadjɛ nyɛ kana ɛ́ náá: «Dhiiti motom nadi edus pɛ Yeluzalɛm, eesul pɛ Yeliko. Wɔ gwaa, bot ɛ djii zɛmɛt nyɛ, duma nyɛ é nyel nɛ mɛbin, bɔɔ zɛdɛk nyɛ esa bɛ djas. Bɛ eezɛkaab, lik nyɛ ekɔɔ nɛ ɛsyee. 31 Dhiiti ghaa-Zɛɛb nadi edhaa é ze’enek. É ghɛŋ nyɛ nabee mot’enɔk ɛ, nyɛ eezɛgwoob, tɔ́ yɛ. 32 Tyee wat nɛ dhiiti Levit* eezɛkwyil é di’enek, bee mot mɛpyoŋ, gwoob nyɛ, tɔ́ yɛ. 33 Tin, dhiiti mot kyee dik Samaali nadi etɔ́ yɛ mɛdjoŋ ɔ naazɛkum é ngwoob mot mɛpyoŋ menɔk. Dáa nyɛ nakabee nyɛ ɛ, wɔ gwaa, ghoŋ zɛmɛt nyɛ ɛlyelɛpe. 34 Nyɛ eezɛtiila é bhaaz’ɛ, zɛso nyɛ mɛnyok nɛ mul tɔ mɛpyoŋ, zɛdjɛl nyɛ yɛ ɛ. Bhii tak, nyɛ eezɛkɛl nyɛ kɔ yaaga yɛ, tɔ́ nɛ nɛ pɛ ndjaa bɛdjoŋ. Tin, nyɛ eezɛgwom nyɛ ɛnyɔɛpe. 35 Yii myɛn, mot dɛl Samaali yenɔk eezɛwyisal edhenye ebá e epata, zokadjɛ nakuma ndjaa bɛdjoŋ. Nyɛy nɛ nɛ náá: "Gwoma motom’ak. Epata djas ee wɔ aadi ebaawyisal étɛp’ɛ ɛ, mɛ waaboobulal wɔ yɛ ɛ́, dwoo mɛ aabula ɛ."»Mot Samaali ngɔt eekwyee mot na dumaa é nyel nɛ mɛbin ɔ

36 Yezu eebaazɛdji náá: «Tɔ bɔɔ bɛlɛl, ɛzɛ kɔa nɛ ɛdi ɛ́ mɔɔ sɔ mot bot ɛ djii namɛt ɔ?» 37 Ghaa etsi zokabɔɔza náá: «Yɛ ɛ́ mot nagek nyɛ ghoŋ ɔ.» Yezu ɛ́ booke nɛ nɛ náá: «Tɔ́a, da wɔ kɛsa deenek.»

38 Dáa Yezu nadi é ze, bɛ nɛ bɛdjekel bɛ ɛ, wɔ gwaa, bɛ zokazɛni tɔ dhiiti dɛl. Tɔ dɛl ɛ tak ye nabɛ ɛ́ nɛ dhiiti moma din ɛ lɛ nabɛ ɛ́ Maat. Nyɛ eezɛsulal pɛ daa lɛ. 39 Nyɛ nabɛ ɛ́ nɛ dhyeeb, din ɛ lɛ nabɛ ɛ́ Maali. Maali tak nadi ɛ́ si mɛko ɛ Ghɛŋ Yezu é gwak mɛlyo mɛ. 40 Ye kabela ɛ́ náá, Maat nadi eghuula étɛp ɛdjaab ɛ edee e bɛdjoŋ. Maat ɛ́ boozyɛ zɛke nɛ Yezu náá: «Ghɛŋ, wɔ ààbee dáa dhyeeb’am dhuugal mɛ nɛ bɛtɛ nɛ yak mɛsa mam mɛ ɛmet’aak é? Lɛɛa nyɛ náá, nyɛ kwyee mɛ.» 41 Ghɛŋ eezɛbɔɔza nɛ nɛ náá: «Maat, Maat, wɔ ɛpebem ba é etɛp e gwyes, lyem’ɔ ɛpesɔs etɛp ɛbuɛpe yii toto. 42 Yɛ ɛ́ nɛ sonok wat di nɛ boo mɛtaŋ ɛ. Maali eesɛ́ɛ sa di nɛ boo mɛtaŋ ɛ. Yiizaag ɛ́ di náá, mot tok nɛ ghwyil ɛdɛk nyɛ yɛ ɛ.»