1 Ye nabɛ ɛ́, é sok Sezaad Tibɛɛd nadi, nyɛ moo nɛ membu kam nɛ etɛn kɔ bóó ekukuma dik'ɛ ɛ, Pɔɔs Pilat nadi ɛ́ kukuma kyee dik Yude, Eelood kadi ɛ́ ekɔk kɔ Ghalile. Yɛ kabɛ mɔn-nyɛɛg Filip ɔɔ, nyɛ nadi ɛ́ kukuma kyee dik Ituud, nɛ Talakonitid. Lizanyas nakabɛ yɛ ɛ́ kukuma kyee dik Abilɛn. 2 É ghɛŋ Han nɛ Kayif nadi eboo bɛghaa-Zɛɛb ɛ, ye nabɛ ɛ́ Zɛɛb naalii nɛ Zaŋ mɔn Zakaali pɛ tɔ bal. 3 Zaŋ zokazyɛ kɔ mɛl mɛ nadi pɛ kyee dik wat nɛ dii Yuldɛn ɛ. Nyɛ natutuud ɛ́ náá: «Liigka elyem, da bi ɛ́ kɛduwa Zɛɛb. Tin, Zɛɛb ɛ́ waapel mesyem men.»

4 É di'enek, etɛp ee nadi kwyala tɔ Mɛkana mɛ ngoolel-Mɛkpa ɛ Zɛɛb Ezayi ɛ, ye naabela ɛsuk. Ye nabɛ ɛ́ náá:

«Mot ngɔt ɛpetuud tɔ bal:

"Koobalka ze ɛ Ghɛŋ,

da bi ɛ́ tuu nyɛ mɛze mɛ na looba-looba!

5 Edi ee di na sɛbɛtɛɛ pak mɛtsok

djas ɛ, yɛ waabimelaa.

Mɛtsok nɛ eghooda djas ɛ́ waasilaa.

Memboŋ djas di é ze ɛ, yɛ waasekaa.

Mɛze mɛ di, yɛ eezepulel ɛ, yɛ waakoobelaa.

6 Tin, bot djas ɛ́ waabee tsik Zɛɛb aadjɛ ɛ.*"»

7 Mɛdhuu mɛ bot nadi ezyɛ pɛ daa Zaŋ etɛɛ náá, Zaŋ neezɛduu bɛ Zɛɛb. Zaŋ zokake nɛ nɔɔ náá: «Biyɔ mbyak mɛgel mak, ɛzɛ lyo bin náá, bi kaab ɛbuk ɛ Zɛɛb di yɛ eezekunaa yenek? 8 Lyaalka nɛ esesɛɛ bin náá, yɛ ɛ́ tsɛɛtsɛ náá, bi eezeliig elyem bin, da bi ɛ́ bet ɛke biyɔ nɛ biyɔ náá: "Dhiiti sonok aanàkwaasa mena, etɛɛ náá, Abalaam ɛ́ bhaab'enaka." Betka mɛ lɛɛ bin náá, Zɛɛb ɛ́ nɛ ghwyil ɛsa náá, mɛkok mak liiza, ye di bɛdha ɛ Abalaam. 9 Ye goka ɛ́ bi gu náá, zoŋ moo ɛ́ nɛɛga é ɛbok ɛ le, étɛp ye neetsaal ekaŋal e tak. Ele djas aadi ààdjɛ bhum ɛ, goka ɛ́ nɛ ɛtsaalaa. Bhii tak, yɛ kɛdikaa tɔ du.»

10 Wɔ gwaa, bot moo tin edji nyɛ náá: «Bis goka nɛ ɛsa dáa?» 11 Nyɛ ɛ́ boozɛbɔɔza nɛ nɔɔ náá: «Mot di nɛ ekuwa ebá ɔ, goka ɛ́ nɛ ɛgwyena wat, djɛ mot di ààbɛ nɛ yɛ ɔ. Bela náá, mot di nɛ edee e dek ɔ, nyɛ kaa nɛ bot ɛ́ di ààbɛ nɛ yɛ ɔ.»

12 Bɛnɔŋel ɛ epata e lapo zokabaazyɛ yɔbɔ zɛduwa Zɛɛb. Wɔ gwaa, bɛ dji Zaŋ Nduuel-bot náá: «Lyoel, bis goka nɛ ɛsa dáa?» 13 Nyɛ eezɛbɔɔza nɛ nɔɔ náá: «Nàwaabka bot epata e lapo dhaa yii kukuma di elɛɛ náá, bi goka nɛ ɛwaab ɛ.»

14 Esodja zokabaadji yɔbɔ náá: «Yɛ kabɛ bis ɔ, bis goka nɛ ɛsa dáa?» Nyɛ eezɛbɔɔza nɛ nɔɔ náá: «Sa mot ààbaanɔɔ sa mot nɛ bhel, sa mot ààsu mot tɛp. Bi goka ɛ́ nɛ ɛdɛ ɛ efute e mɛsa men.»

15 Bot djas nadi ebwood nɛ ɛbwaalel djas. Bot djas nagek ɛ́ náá, Zaŋ nabɛ ɛ́ Mɛsia. 16 Nyɛ eezɛke nɛ bɔɔ djas náá: «Mam duu bin Zɛɛb ɛ́ tɔ mɛdii. Yɛ kabɛ mot di ezyɛ bhis'am ɔɔ, nyɛ eedhaa mɛ nɛ mɛbwala nɛ ghwyil. Mam aanàkwaakobela-belak duu* ɛmalal étɛp ɛkotii-tiiak ekel e ekoko bɛ. Nyɛy aaduu bin Zɛɛb ɛ́ tɔ ghwyil Sisim na Dɛɛ nɛ tɔ du. 17 Tɔ mɛmbɔ mɛ, nyɛ eemɛt wal étɛp nyɛ neewa mbɛk pak ezeeza nɛ embɛɛ mɛbhek. Tin, da nyɛ ɛ́ kwom mbɛɛ bhum kɔ taa. Yɛ kabɛ ezeeza ɔɔ, nyɛ kakɛmwas yɛ ɛ tɔ du na kɔm-kɔm.» 18 Zaŋ naagegoola bot Mbɛɛ Bhaadal nɛ ɛlyo bɛ bɛtɛ nɛ bɛdhiiti mɛlyo.

19 Wɔ gwaa, Zaŋ zokazɛdul mɛkoozi Eelood mɛlɔ kɔ ɛsu ɛ Eeloodhiaad mwaa mɔn-nyɛɛg nyɛ nadɛk ɔ, dɔɔ nɛ étɛp embee esesɛɛ nyɛ nadi esa ɛ djas. 20 Tin, Eelood naabaazɛsa dhiiti mbee tɛp: nyɛ naawa Zaŋ é mbok.

21 Bhii bot djas nazeduwa Zɛɛb ɛ, Yezu pe naazɛduwa Zɛɛb. Nyɛ nadi edjaala, wɔ gwaa gwoo zɛbɛŋel. 22 Bhii tak, Sisim na Dɛɛ eezɛsul kɔ lɛ tyee ɛghum. Wɔ gwaa, dhiiti gwood zokazɛgék tɔ gwoo náá: «Wɔ ɛ́ mɔn'am mɛ dyeebakwyɛl ɔ. Mɛ eedyeebamyaala nɛ nɔ ɛbuɛpe.»

23 Yezu nabɛ ɛ́, nyɛ moo nɛ membu tyee mɛkam-mɛlɛl (30) é sok nyɛ nakan mɛsa mɛ ɛ, nɛ dáa bot nadi eke náá, nyɛ ɛ́ mɔn ɛ Zozɛf ɛ. Zozɛf nadi ɛ́ mɔn ɛ Eli. 24 Eli ɛ́ mɔn ɛ Matat, Matat nakadi ɛ́ mɔn ɛ Levi. Levi nabɛ ɛ́ mɔn ɛ Mɛlki, Mɛlki nakadi ɛ́ mɔn ɛ Zanayi, Zanayi nabɛ ɛ́ mɔn ɛ Zozɛf. 25 Zozɛf nakadi ɛ́ mɔn ɛ Matatyas, Matatyas nabɛ ɛ́ mɔn ɛ Amɔs. Amɔs ɛ́ mɔn ɛ Nawum. Sɛɛg ɛ Nahum nabɛ ɛ́ Ɛsli, Ɛsli ɛ́ mɔn ɛ Naghayi. 26 Naghayi nabɛ ɛ́ mɔn ɛ Maat. Mot nabya Maat ɔ nabɛ ɛ́ Matatyas. Matatyas nabɛ ɛ́ mɔn ɛ Semeyi. Mot nabya Semeyi ɔ, nabɛ ɛ́ Yosɛk. Yosɛk nabɛ ɛ́ mɔn ɛ Zodha. 27 Zodha kadi ɛ́ mɔn ɛ Yoanan. Sɛɛg ɛ Yoanan nabɛ ɛ́ Leesa. Leesa nadi ɛ́ mɔn ɛ Zoolobhabhɛl, Zoolobhabhɛl kadi ɛ́ mɔn ɛ Salatyɛl, Salatyɛl nabɛ ɛ́ mɔn ɛ Neeli. 28 Neeli kadi ɛ́ mɔn ɛ Mɛlki, Mɛlki nadi ɛ́ mɔn ɛ Adhi, Adhi kadi ɛ́ mɔn ɛ Kosam, Kosam nadi ɛ́ mɔn ɛ Elmadham. Elmadham kadi ɛ́ mɔn ɛ Eed. 29 Mot nabya Eed ɔ, nabɛ ɛ́ Zozue, Zosue nabɛ ɛ́ mɔn ɛ Elieezɛɛd, Elieezɛɛd kadi ɛ́ mɔn ɛ Zoolim, Zoolim nabɛ ɛ́ mɔn ɛ Matat. Matat kadi ɛ́ mɔn ɛ Levi. 30 Levi nabɛ ɛ́ mɔn ɛ Simeyɔŋ, Simeyɔŋ kadi ɛ́ mɔn ɛ Yuda. Yuda nabɛ ɛ́ mɔn ɛ Zozɛf, Zozɛf kadi ɛ́ mɔn ɛ Yonam, Yonam nabɛ ɛ́ mɔn ɛ Eliakim. 31 Eliakim kadi ɛ́ mɔn ɛ Melea, Melea nabɛ ɛ́ mɔn ɛ Mena, Mena kadi ɛ́ mɔn ɛ Matata. Sɛɛg ɛ Matata nabɛ ɛ́ Natan, Natan kadi ɛ́ mɔn ɛ Dhavid. 32 Dhavid nabɛ ɛ́ mɔn ɛ Yese, Yese kadi ɛ́ mɔn ɛ Obɛɛd. Obɛɛd nabɛ ɛ́ mɔn ɛ Bhooz, Bhooz kadi ɛ́ mɔn ɛ Sala. Sala nabɛ ɛ́ mɔn ɛ Naasɔn. 33 Naasɔn kadi ɛ́ mɔn ɛ Aminadaab, Aminadaab nabɛ ɛ́ mɔn ɛ Admin, Admin kadi ɛ́ mɔn ɛ Aalni. Aalni nabɛ ɛ́ mɔn ɛ Ɛslɔm, Ɛslɔm kadi ɛ́ mɔn ɛ Pelɛɛz, Pelɛɛz nabɛ ɛ́ mɔn ɛ Yuda. 34 Yuda nabɛ ɛ́ mɔn ɛ Zakɔɔb, Zakɔɔb kadi ɛ́ mɔn ɛ Izak. Izak nabɛ ɛ́ mɔn ɛ Abalaam. Sɛɛg ɛ Abalaam nabɛ ɛ́ Teela, Teela nabɛ ɛ́ mɔn ɛ Nakɔɔd. 35 Nakɔɔd nabɛ ɛ́ mɔn ɛ Seluk, Seluk nabɛ ɛ́ mɔn ɛ Lewu, Lewu kadi ɛ́ mɔn ɛ Pelɛɛg. Pelɛɛg nabɛ ɛ́ mɔn ɛ Ebɛɛd, Ebɛɛb nabɛ ɛ́ mɔn ɛ Sala. 36 Sala nabɛ ɛ́ mɔn ɛ Kenan, Kenan nabɛ ɛ́ mɔn ɛ Aalpakazaad, Aalpakazaad ɛ́ mɔn ɛ Sɛm, Sɛm ɛ́ mɔn ɛ Noe, Noe ɛ́ mɔn ɛ Lemɛk. 37 Lemɛk nabɛ ɛ́ mɔn ɛ Matusalɛm, Matusalɛm nabɛ ɛ́ mɔn ɛ Enɔk. Enɔk ɛ́ mɔn ɛ Zalɛɛd, Zalɛɛd nabɛ ɛ́ mɔn ɛ Malaleɛl. Malaleyɛl nabɛ ɛ́ mɔn ɛ Kenan. 38 Tin, Kenan nabɛ ɛ́ mɔn ɛ Enɔs, Enɔs nakadi ɛ́ mɔn ɛ Sɛt. Sɛt kadi ɛ́ mɔn ɛ Adam, Adam ɛ́ mɔn ɛ Zɛɛb.