Luk 20

Eghɛŋ ɛ Yezu dus wo?

1 Dhiiti dwoo, Yezu nadi edjɛ bot mɛlyo tɔ kok Ndjaa-ebuwa. Nyɛ nadi egoola bɛ Mbɛɛ Bhaadal ɛ Zɛɛb. Eboo bɛghaa-Zɛɛb, nɛ bɛghaŋ ɛ mɛkana mɛ etsi, zɛnɔɔ bɛpaa ɛ eYuda, zokazɛtuula é di’enek. 2 Bɛ eezɛdji Yezu náá: «Lɛɛa bis, kɔ eghɛŋ e zɛ wɔ di esa esesɛɛ binek? Ɛzɛ nadjɛ wɔ eghɛŋ e ɛsa deenek?» 3 Yezu eezɛbɔɔza nɛ nɔɔ náá: «Mɛ ɛpɛdji bin pe kiya wat, pookobɔɔzaka mɛ. 4 Ɛzɛ nadhis Zaŋ, nyɛ zɛduu bot Zɛɛb? Ye nabɛ ɛ́ Zɛɛb ohoo, ye nabɛ ɛ́ mot?» 5 É di’enek, bɛ moo tin esɔs pak’ɔɔ. Bɔɔ náá: «Mena ɛ keka nenak náá: "Yɛ ɛ́ Zɛɛb" ɔɔ, nyɛ waadji mena náá: "Étɛp yé bi nadi ààmyaal Zaŋ?" 6 Mena ɛ kakeka náá: "Yɛ ɛ́ bot ɛ nadhis nyɛ" ɔɔ, mɛdhuu mɛ bot bak djas ɛ́ waasaa ɛgó mena nɛ mɛkok. Etɛɛ náá, bɔɔ djas nɛ myaal náá, Zaŋ nabɛ ɛ́ ngoolel-Mɛkpa ɛ Zɛɛb.» 7 Bɛ ɛ́ boozɛbɔɔza nɛ Yezu náá: «Bis ààgu mot nadhis nyɛ náá, nyɛ zɛduu bot Zɛɛb ɔ.» 8 Tin, Yezu ɛ́ boozɛbɔɔza nɛ nɔɔ náá: «Dɔɔ nɛ mam pe, mɛ aanàkwaalɛɛ bin kɔ eghɛŋ e zɛ mɛ di esa esesɛɛ bak.»

Kana bot ɛ mɛsa bɛ na embee elyem

9 Bhii tak, Yezu eezɛlii nɛ ɛdhuu ɛ bot binɔk tɔ kana náá: «Mot ngɔt naabɛ pyeeb vin’ɛ. Nyɛ eezɛpeeb pyeeb tak, pu guk tɔ ɛkok é di bɛ aadi esyaal mɛdii mɛ bhum tak ɔ. Bhii tak, nyɛ eezɛkola yɛ nɛ bot ɛ di egu mɛsa mɛ vin ɔ. Nyɛ eezɛnɔɔ nyel, tɔ́ kɛbɔya pɛ nyɛ natɔ́ mɛdjoŋ ɛ. 10 É ghɛŋ, ɛwala ɛbɔ́k bhum tak nakakum ɛ, wɔ gwaa, nyɛ zɛlwom dhiiti mot-mɛsa mɛ pɛ daa bot ɛ nakola pyeeb ɔ, étɛp bɛ needjɛ nyɛ yɛ bim tɔ yii bɛ bela tɔ pyeeb vin ɛ. É di’enek, wɔ gwaa, bot ɛ nalik nɛ pyeeb ɔ mɛt mot tak, duma nyɛ é nyel nɛ mɛbin, bhii tak, swaal nyɛ mɛmbɔ mɛ toto. 11 Nakuma pyeeb eebaazɛlwom dhiiti mot-mɛsa, nyɛ eezɛtɔ́ pɛ daa lɔɔ tɔ pyeeb, bɛ eebaazɛbi nyɛ, zɛnyek, swaal nyɛ mɛmbɔ mɛ toto. 12 Nakuma pyeeb eebaazɛlwom nwyak mot-mɛsa tyee lwoma esok elɛl, bɔɔ duma nyɛ é nyel, baal nyɛ mɛpyoŋ, wus nyɛ pɛ kel. 13 Nakuma pyeeb vin eezɛke: "Mɛ kasa dáa? Mɛ aakakyeed ɛ́, mɔn’am ngɔt mɛ dyeebakwyɛl ɔ. Tin, mɛ bee ɛ́ náá, bɛ waakaab nyɛ." 14 Dáa bot ɛ di esa mɛsa tɔ pyeeb’ɛ nabee mɔn’enɔk ɛ, bɔɔ náá: "Yaweee! Beeka mot aalik nɛ mɛvu mak djas ɔ! Dhaka, mena góka nyɛ. Tin, mɛvu mak aakadi ɛ́ yenabɛlka." 15 Wɔ gwaa, bɛ zɛmɛt nyɛ, mwas nyɛ bhii pyeeb vin, gó nyɛ.»

Tin, Yezu eezɛdji bɛ náá: «É di’enek, nakuma pyeeb goka nɛ ɛsa bɛ yé?» Yezu eezɛbil náá: 16 «Nyɛ waazyɛ, da nyɛ ɛ́ gó bot ɛ nadi esa mɛsa tɔ pyeeb vin’ɛ ɔ. Bhii tak nyɛ ɛ́ zɛnɔɔ pyeeb, djɛ nɛ bot ɛ sis.» Bhii bot nagwak deenek ɛ́, bɛ ɛ́ boozɛke náá: «Ààbɛ! Yenek aanàkwaasael.» 17 Bhii tak, Yezu eezɛliig mis, gwyák bɛ. Nyɛ nɛ nɔɔ náá: «Mɛkpa mɛ di ekwyala tɔ mɛkana mak ɛ:

"Ɛkok ɛ bɛsumel mwas ɛ,

ye moo ɛ́ ɛkok di epyet ndjaŋ ɛ.*20.17 Mɛd 118.22"

Ye kwyɛl ɛlɛɛ yé? 18 Mot aaduma kɔ ɛkok ɛ tak ɔ, nyɛ waabik ekyes-ekyes. Yɛ kabɛ náá, ɛkok ɛ kakwyit kɔ mot ɔɔ, yenɔk mot aatwaalel ɛ́ twaalelak.»

Etuud e lapo pɛ daa Sezaad

19 Tin, bɛghaŋ ɛ mɛkana mɛ etsi, nɛ eboo bɛghaa-Zɛɛb nadi esaa mɛpek étɛp bɛ neemɛt Yezu é di tak wat. Etɛɛ náá, bɛ naagu náá, Yezu nalɛɛ kana tak ɛ́, kɔ ɛsu ɛ lɔɔ. Tin, bɛ nadi ekaab ɛ́ ɛdhuu ɛ bot ɛ nadi tin ɔ. 20 Bɛ moo tin ebɔŋal Yezu. É di’enek, wɔ gwaa, bɛ zɛdhis bɛdhiiti bot ɛ nadi esa mɛpek náá, bɛ ɛ́ bɛdhil ɛ bot ɔ. Bot ɛ tak nazyɛ ɛ́, étɛp ɛzɛlóo Yezu pɛ ɛko, da bwood nyɛ pɛ kyɛ, nɛ mɛdjin mɛ bɛ aadi edji nyɛ ɛ, étɛp bɛ neebela lo mɛsɔ mɛ bɛ aaka nyɛ é ghwyil mɛbwala nɛ eghɛŋ e kukuma dɛl ɛ. 21 Bɛ ɛ́ boozɛke nɛ nɛ náá: «Lyoel, bis nɛ gu náá, etɛp ee wɔ di elɛɛ ɛ, yɛ ɛ́ etsɛɛtsɛ. Wɔy ààpɛ́ɛ mot nɛ dáa wɔ di ebee nyɛ ɛ, wɔy lyo etɛp e Zɛɛb di ekwyɛl ɛ, nɛ lyem epiki. 22 Tinaak, lɛɛa bis, etsi lɛɛ ɛ́ náá, epata e lapo tuudaa ɛ́ nɛ mɛkoozi Sezaad é?» 23 Tin, Yezu eezɛgu mɛpek mɔɔ. Bhii tak nyɛ ɛ́ booke nɛ nɔɔ náá: 24 «Dhaka mɛ nɛ pata wat, étɛp mɛ neebee.» Bɛ eezɛzyɛ nyɛ nɛ dhenye wat. Yezu eezɛdji bɛ náá: «Bhwoob di sɔna kɔ pata yak ɛ, yɛ ɛ́ ɛbhwoob ɛ zɛ? Yɛ ɛ́ ekwyala din ɛ zɛ di kɔ tak?» Bot binɔk eezɛbɔɔza nɛ nɛ náá: «Yɛ ɛ́ bhwoob nɛ din ɛ mɛkoozi Sezaad.» 25 Bhii tak, Yezu eebaazɛke nɛ nɔɔ náá: «Djɛka Sezaad sa di yɛ Sezaad ɛ, da bi ɛ́ djɛ Zɛɛb sa di yɛ Zɛɛb ɛ.» 26 É di’enek, bɛ nabɛ ɛ́ ààbela di ɛmɛt Yezu nɛ mɛkpa mɛ nyɛ nadi elii é mis mɛ bot ɛ. Etɛɛ náá, gwaka bɛ nagwak deenek ɛ́, ye nabɛ ɛ́ bɛ naadyeebadjoka nyɛ ɛlyelɛpe, tin, bɛ eezɛdi gwyem.

Kiya dum nɛ tɛp ɛgom bhis ɛsyee

27 Bɛdhiiti bot tɔ lɔɔg eSaduseɛ di eke náá, bhis ɛsyee, mot aanàkwaabaagom ɔ, zokazyɛ pɛ daa Yezu zɛdji nyɛ dhiiti kiya. 28 Bɔɔ nɛ Yezu náá: «Lyoel, mɛkana ɛ Moiiz lɛɛ ɛ́ náá: "Yɛ bɛ náá, dhiiti mot naaba moma, bhii tak, nyɛ eezɛgwyɛ ààlik mɔn ɔɔ, ye goka ɛ́ náá, dhyeeb mot lik ɔ, ba kus myɛl étɛp nyɛ neekwyiida tel gwyɛ ɔ."

29 Djhoogekeka náá, ye nabɛ ɛ́ nɛ bɔn-nyɛɛg bɛtɛn nɛ bɛbá. Mɔn mɛgwyak eezɛba moma, da gwyɛ, ààlik mɔn. 30 Mot bhɔɔba mɔn mɛgwyak ɔ, nyɛ eeba kus moma tak. 31 Tin, nyɛ eebaakpaa nɛ mɛsyee, gwyɛ, ààlik bɔn. Bhii tak, nwyak yii elɛl eebaazɛnɔɔ moma tak, ye zokabaasael ɛ́ tyee wat nɛ bot ɛ naba moma tak sok ɔ, zɛnɔɔ zwaabel ɛ lɔɔg. É di’enek, bɔɔ djas bɛtɛn nɛ bɛbá kadi ɛ́, ààbya nɛ moma yenɔk. 32 Bhii bɔɔ djas, moma eebaazɛgwyɛ yɛ pe. 33 É sok bot aagom bhis ɛsyee ɛ, moma yenɔk aakadi mwaa zɛ tɔ bɔɔ bɛtɛn nɛ bɛbá? Etɛɛ náá, bɔɔ djas nabɛ ɛ́ botom bɛ.»

34 Yezu eezɛbɔɔza nɛ nɔɔ náá: «Botom nɛ boa di kɔ bɔs’ak ɔ, bɛ ɛpebael. 35 Tin, guka náá, botom nɛ boa aabela mbyok ɛgom bhis ɛsyee, da bɛ ɛ́ kɛdi tɔ tsik na bes ɔ, bɛ aanàdi tɔ mɛba. 36 Bɛ aanàkwaakabaagwyɛ, bɛ aakadi ɛ́ dáa efofop. Bɛ ɛ́ bɔn ɛ Zɛɛb, etɛɛ náá, bɛ eezedhaa ɛsyee, kɛbela tsik. 37 Moiiz naalɛɛ popoopwon náá, bot ɛ nazegwyɛ ɔ, bɛ waagom. Nyɛ nalɛɛ deenek ɛ́ tɔ Ekwyala ee di ekaada tɛp ɛkpak nadi egel ààdyak ɛ. Nyɛ nadjóo Ghɛŋ ɛ́: "Zɛɛb ɛ Abalaam, Zɛɛb ɛ Izak, Zɛɛb ɛ Zakɔɔb."» 38 Yezu naabaazɛke náá: «Zɛɛb tok Zɛɛb bot ɛ zegwyɛ ɔ. Nyɛ ɛ́ Zɛɛb bot ɛ di nɛ tsik ɔ, etɛɛ náá, yɛ ɛ́ étɛp’ɛ ɛ bot djas di nɛ tsik.» 39 Wɔ gwaa, bɛdhiiti bɛghaŋ ɛ mɛkana mɛ etsi nadi tin ɔ zokake nɛ Yezu náá: «Lyoel, wɔ eedyeebalii ɛnyɔɛpe.» 40 Deenek, bɛ moo kyee ɛdji ɛ nyɛ ekiya.

Mɛsia nɛ Dhavid

41 Tin, Yezu eezɛke nɛ nɔɔ náá: «Dum nɛ yé bot di eke náá, Mɛsia ɛ́ dha ɛ mɛkoozi Dhavid? 42 Etɛɛ náá, yɛ ɛ́ Dhavid nyɛ ɛmet ɛ nalɛɛ tɔ Mɛkana mɛ Mɛdjeeb náá:

"Ghɛŋ Zɛɛb nake nɛ Ghɛŋ’am ɛ́ náá:

Dha disi pɛ mbɔ eghɛŋ bam.

43 Mɛ waanɛɛg bot ɛ mɛbhuka mɔ

bɛ di esa ee mɛbɔ mɔ aanyal ɛ*20.43 Mɛd 110.1."

44 Dhavid nyɛ ɛmet naadjóo nyɛ "Ghɛŋ", haaa é yaa tyɛ Mɛsia aakabaadi dha ɛ Dhavid?»

Yezu eedul bot mɛlɔ dum nɛ bɛghaŋ ɛ mɛkana mɛ etsi

45 Dáa zukamwaa nɛ mot nadi tin egwak nyɛ ɛ, Yezu eezɛke nɛ bɛdjekel bɛ náá: 46 «Kyeeka bɛghaŋ ɛ mɛkana mɛ etsi, bot ɛ di ekwyɛl ɛkɛ tɔ bot nɛ ewolo ekaad na boo mɛtaŋ elyaala mɛnyel étɛp bɛ needuwalaa nɛ ɛswosaa é edi bot di esɛɛga ɛbuɛpe ɔ. Bɛ dyeebakwyɛl ɛdi ɛ́ kɔ mɛbhóó mɛ di pɛ sok ɛ tɔ mendjaa mɛ mendjaala mɛ eYuda nɛ tɔ edi e mɛbyoŋ. 47 Yɛ ɛ́ bot binɔk ɛ di edjii esa tɔ mendjaa mɛ bɛkus ɛ boa. Tɔ mɛkɔŋ mɔɔ, bɛ nɛ kwyɛl ɛdul ɛ mendjaala na "kpɔkɔlɔm", étɛp bot needi ààbee embee esa bɛ di esa ɛ. Epɛ́ɛ bɔɔ aadi ɛ́, ɛlyelɛpe.»