1 É ghɛŋ tak, bɛdhiiti bot zokazyɛ zɛlɛɛ Yezu dáa mɛkoozi Pilat nagó bot ɛ Ghalile é sok bɛ nadi edjɛ Zɛɛb ebuwa e bɛtit ɛ. 2 Yezu ɛ́ boobɔɔza nɛ nɔɔ náá: «Bi gek bilak ɛ́ náá, bot ɛ Ghalile binɔk zukaa deenek ɛ́, etɛɛ náá, bɛ nadi ɛ́ bot ɛ mesyem dhaa bot ɛ Ghalile djas é? Ààbɛ! 3 Betka, mɛ lɛɛ bin náá, bi ɛ di ààliig elyem ɔɔ, biyɔ djas pe ɛ́ waagwyɛ dáa bot binɔk. 4 Tin, bot kam nɛ bɛtɛn nɛ bɛlɛl yii ndjaa Silowe na vyɛɛg-vyɛɛg nagó, é sok ye nabik ɛ, bi ke bilak ɛ́ náá, bɛ nadi ɛ́ nɛ mesyem dhaa bot ɛ Yeluzalɛm djas é? Ààbɛ! 5 Betka, mɛ lɛɛ bin náá, bi ɛ di ààliig elyem ɔɔ, biyɔ djas pe ɛ́ waagwyɛ dáa bot binɔk.»

6 Bhii tak, Yezu eezɛlii nɛ nɔɔ tɔ kana náá: «Mot ngɔt nadi ɛ́, nɛ le fiigh tɔ pyeeb vin yɛ. Wɔ gwaa, nyɛ zɛsaa ɛbɔ́k ɛ bhum, nyɛ kadi ɛ́, ààbela sonok. 7 Nyɛ eezɛke nɛ mot di ebaal pyeeb vin tak ɔ: "Beea, ye moo mos ɛ́, membu melɛl mɛ di ezyɛ zɛsaa bhum le fiigh'ak ɛ, mɛ ààbela yɛ. Tsaala yɛ, etɛɛ náá, yɛ ààgoka nɛ ɛnɔɔ yenek boo di tin gwyes." 8 Tin, mot di ebaal pyeeb vin tak eezɛbɔɔza nɛ nɛ náá: "Ghɛŋ, pookobaabet yɛ mbu yak. Mɛ waapu guk é mengwoob. Bhii tak, da mɛ ɛ́ wa eka nɛ ezeeza. 9 Deenek, yɛ ɛ́ nɛ ghwyil ɛwum bilak é mbu di ezyɛ yenek. Yɛ di ààkawum ɔɔ, da wɔ ɛ́ katsaal yɛ."»

10 Dhiiti dwoo saba, Yezu nadi elyo bot Mɛkpa ɛ Zɛɛb tɔ ndjaa mendjaala mɛ eYuda. 11 Dhiiti mbel moma nadi ɛ́ tɔ ndjaa tak. Kana membu kam nɛ etɛn nɛ elɛl, ye nabɛ ɛ́ dhiiti mbee sisim naazenyak nyɛ koŋ. Nyɛ nabɛ ɛ́ ààbɛ nɛ ghwyil ɛsek ɛ koŋ. 12 Dáa Yezu nabee moma tak ɛ, nyɛ eezɛdjóo nyɛ. Bhii tak, nyɛ eezɛke nɛ nɛ náá: «Wɔ moo ɛ́ pɛka si bhel ɛbɛ́ ɛ lɔ.» 13 Nyɛ eezɛkɛl mɛmbɔ kɔ lɛ, é di tak wat, koŋ eezɛsekel nyɛ. Moma tak moo tin eduwal Zɛɛb.

14 Tin, ye nabɛ ɛ́ kukuma ndjaa mendjaala mɛ eYuda naadyeebakpaa lyem dum nɛ dáa Yezu natsik mot dwoo saba ɛ. Kukuma tak ɛ́ booke nɛ ɛdhuu ɛ bot náá: «Bot ɛ́ nɛ mɛlu mɛtɛn nɛ wat bot di esa mɛsa ɛ. Dhaka zɛtsikaa é mɛlu menek, ààkabɛ dwoo saba.» 15 Ghɛŋ zokazɛbɔɔza nɛ nɛ náá: «Bi ɛ́ bot ɛ mɛdjhaaz pɛ ɛko, bhimis pɛ si. Dwoo saba, mot nɛ mot aadi etii ngɔmbɛ nɛghu an yɛ étɛp ɛkɛdjɛ bɛ edee nɛ mɛdii, etsal é? 16 Moma yak ɛ́ ngɔt tɔ bɛdha ɛ Abalaam. Tin, kabela ɛ náá, Satan naazelookɔl nyɛ, ye moo mos ɛ́ nɛ membu kam nɛ etɛn nɛ elɛl (18). Ye bɛ ɛ́ ààgoka náá, nyɛ tsikaa é dwoo saba?» 17 Bhɔɔza Yezu nabɔɔza deenek ɛ́, ye naasa bot ɛ nadi ebhina nyɛ ɔ boo sen. Yɛ kabɛ mɛdhuu mɛ bot djas nadi tinaak ɔɔ, bɔɔ naadyeebamyaala nɛ esesɛɛ e duu djas nasɛ́ɛ tin ɛ.

18 Yezu eebaazɛke náá: «Ɛyoŋ ɛ Zɛɛb kokɔa nɛ yaa mbi sa? Mɛ goka nɛ ɛgek yɛ nɛ yaa sonok? 19 Ɛyoŋ ɛ Zɛɛb ɛ́ dáa bhek na sikɛ-sikɛ di edjóoaa mutaad ɛ. É sok mot di enɔɔ yɛ étɛp ɛkɛbɛ tɔ bok ɛ, bhek nɛ kwyil, wyee, zyɛ boo le, enen lóo mɛk mɔɔ kɔ elɛɛ e tak.»

20 Yezu zokabaazɛke nɛ nɔɔ náá: «Mɛ koogek bin Ɛyoŋ ɛ Zɛɛb nɛ yaa sonok? 21 Ɛyoŋ ɛ Zɛɛb nɔŋel ɛ́ nɛ leviid moma di ewa tɔ boo ɛdham ɛ tsim nyɛ di epul, étɛp nyɛ neesa mapa nɛ yɛ ɛ. Ba ɛwala bhii tak, tsim'enek djas aadi ɛ́, yɛ eezeghamta.»

22 Yezu nadi edhaa kɔ eghaada nɛ kɔ mɛl elyo bot Mɛkpa ɛ Zɛɛb nyɛy etɔ́ pɛ Yeluzalɛm. 23 Dhiiti mot eezɛdji nyɛ náá: «Ghɛŋ, Zɛɛb aazotsik ɛ́ ba bim bot é?» Yezu zɛbɔɔza náá: 24 «Lyelka ghwyil étɛp bi neeni tɔ ɛbɛ ɛ ndjaa na maad-maad, etɛɛ náá, mɛ lɛɛ bin ɛ́ tsɛɛtsɛ náá, bot ɛbuɛpe ɛ́ waagek ɛni penek, bɛ aanàkwaakwak ɛni.

25 É sok kukuma ndjaŋ aawyɛl ɛ, nyɛ waakɔɔl ɛbɛ ɛ ndjaa nɛ ɛngoŋ. Tin, biyɔ, bi ɛ́ waalik pɛ kel. Bhii tak, bi ɛ́ waazuk é ɛdiig ɛbɛ ɛ ndjaa nɛ é ke náá: "Ghɛŋ! Diia bis ndjaa!" Nyɛ kabɔɔza nɛ nen ɛ náá: "Mɛ ààgu pɛ bi dus ɛ!" 26 Deenek, bi aakabɔɔza nɛ nɛ ɛ́ náá: "Mena naadɛka edee nɛ mɛdii é di wat. Wɔ nadi elyo Mɛkpa ɛ Zɛɛb é egba eghaada bis." 27 Nyɛ aabaazoke nɛ nɔɔ ɛ́ náá: "Mɛ ààgu pɛ bi dus ɛ, duska é mis mam, biyɔ djas, bot ɛ di esa embee mɛsa ɔ." 28 Yɛ ɛ́ deenek ɛ́ bi aadje mɛgwyɛ, nɛ ɛkwaal ɛ mɛtsok, etɛɛ náá, bi ɛ́ waabee Abalaam, Izak, Zakɔɔb, zɛnɔɔ bɛngoolel ɛ Mɛkpa ɛ Zɛɛb penek tɔ Ɛyoŋ ɛ Zɛɛb, yɛ kabɛ biyɔ ɔɔ, bi aadi ɛ́ mwasaa pɛ kel. 29 Bot ɛ́ waadus pɛ ɛdjem ɛ dwoo nɛ pɛ ɛbil ɛ dwoo, bɛdhiiti dus pɛ kyɛ bɔs nɛ pɛ ɛko ɛ bɔs. Bɛ waazɛdi kɔ mesa wat tɔ Ɛyoŋ ɛ Zɛɛb. 30 Tin, guka náá, bɛtɛ nɛ bot ɛ di mos pɛ ɛbhis ɛ lɔɔg ɔ, bɛ aakaswaala ɛ́ bot ɛ pɛ sok lɔɔg, bot ɛ di mos pɛ sok lɔɔg ɔ, bɛ aakaswaala ɛ́ bot ɛ ɛbhis.»

31 É di tak wat, bɛdhiiti eFalizyɛ eezɛzyɛ zɛlɛɛ Yezu náá: «Dusa wak, tɔ́a pɛ kyee sis, etɛɛ náá, mɛkoozi Eelood ɛpesaa nyɛ neegó wɔ.» 32 Yezu eezɛbɔɔza nɛ nɔɔ náá: «Tɔ́ka, kɛlɛɛ bɛbhɛk binɔk náá: "Mɛ ɛpesɔ embee esisim, mɛ ɛpetsik membel dwoo mos nɛ djɛmɛn. É ɛlu ɛ elɛl ɛ́ mɛ aasilal mɛsa mam." 33 Ye goka ɛ́ náá, mɛ kɛ mos, nɛ djɛmɛn nɛ bhii djɛmɛn, etɛɛ náá, yɛ ààgoka náá, ngoolel-Mɛkpa ɛ Zɛɛb gwyɛ ɛtsetaɛpe nɛ ghaada Yeluzalɛm.

34 Yeluzalɛm! Yeluzalɛm! Wɔy mot di egó bɛngoolel ɛ Mɛkpa ɛ Zɛɛb ɔ, wɔy mot di egó bot ɛ Zɛɛb di edhis wɔ bak nɛ mɛkok ɔ. É sok edhen mɛ di ekwyɛl ɛsɛɛg bot ɛ di kɔ dɛl ɛ lɔ dáa nabwa-kuu di esɛɛg bɔn bɛ si mɛbhap mɛ ɛ, biyɔ ààkwyɛl! 35 Deenek, guka náá, ndjaŋ'en ɛ́ waalik wum! Nɛ tsɛɛtsɛ, mɛ lɛɛ bin ɛ́ náá, bi aanàkabaabee mɛ, kana dwoo pan mos'ak, kɛyaka nɛ dwoo bi aake náá: "Zɛɛb eesɛɛ mɛtel mɛ kɔ mot aazyɛ nɛ din ɛ Ghɛŋ ɔ*!"»