1 Dhiiti dwoo, Yezu nadi edjaala é dhiiti di. Dáa nyɛ nasilal ɛ, djekel'ɛ ngɔt eezɛke nɛ nɛ náá: «Ghɛŋ, lyaala bis ɛdjaala Zɛɛb, dáa Zaŋ nalyaal bɛdjekel bɛ ɛ.» 2 Yezu eezɛke nɛ nɔɔ náá: «Bi ɛ́ di edjaala ɔɔ, keka náá:

"Zɛɛb Sɛɛg'es,

Ye goka ɛ́ náá,

din ɛ lɔ di Dɛɛ ye guaa.

Ye goka ɛ, Ɛyoŋ ɛ lɔ zyɛ.

3 Djɛ bis ɛlu nɛ ɛlu edee di egoka nɛ nes ɛ.

4 Pela mesyem mes etɛɛ náá, bisɔ pe,

bis ɛpepel bot ɛ di esa bis ɛbiyo ɔ.

Sa náá, bis nàkwyekwyɛ tɔ mɛbhowal."»

5 Yezu eebaazɛke nɛ nɔɔ náá: «Djhoopookogekeka tyee náá: mot ngɔt pak'en ɛ́ nɛ sɔ, nyɛ eezɛtɔ́ pɛ daa lɛ kuku pum. Nyɛ eezɛke nɛ nɛ náá: "Sɔ'am, djema! Kola mɛ emapa elɛl, 6 etɛɛ náá, dhiiti sɔ'am ngɔt nadi é mɛndjoŋ ɔ aloo nɛ tuula nenak pɛ daa lam. Mɛ tok nɛ edee mɛ djɛ nyɛ." 7 Djhoopookogekeka náá, sɔ mot tak yala nyɛ tɔ ndjaa náá: "Beta mɛ gwyem! Ɛbɛ ɛ ndjaa moo ɛ́ kɔɔla nɛ ɛngoŋ. Bis nɛ bɔn moo ɛ́ kpop mendjaamesi. Mɛ aanàkwaawyɛl, zɛdjɛ wɔ emapa é tak!" 8 Mɛ lɛɛ bin ɛ́ tsɛɛtsɛ náá, yɛ bɛ náá, nyɛ aanàkwaawyɛl zɛdjɛ nyɛ sa nyɛ waab ɛ, kɔ ɛsu ɛ ɛsɔ ɛ bɛ nɛ nɛ ɔɔ, nyɛ waabatawyɛl, zɛdjɛ nyɛ sa tak, etɛɛ náá, sɔ ɛpenaada ɛwaab, ààbɛ nɛ sen. 9 Yɛ bɛ mam ɔɔ, mɛ kalɛɛ bin ɛ́ náá: Waabka, bi ɛ́ waadjɛaa. Saaka, bi ɛ́ waabela. Diigka é ɛbɛ ɛ ndjaa, bɛ waadii bin yɛ ɛ. 10 Yɛ ɛ́ deenek, mot aawaab ɔ, nyɛ waadjɛaa. Mot aasaŋ ɔ, nyɛ waabela. Bɛ dii ndjaŋ ɛ́, nɛ mot diig ɔ.

11 Yɛ bɛ náá, dhiiti mot pak'en ɛ́ sɛɛg mɔn ɔɔ, mɔn ɛ́ waab su ɔɔ, nyɛ nɛ ghwyil ɛdjɛ mɔn nyɔ é di tak é? 12 Yɛ kabɛ náá, mɔn waab ɛ́ ɛke ɔɔ, nyɛ ɛ́ nɛ ghwyil ɛdjɛ nyɛ baalɔl é di tak é? Yɛ aanàkwaasael. 13 Kwyii biyɔ, bɛmbee ɛ bot bi di ɛ, bi nɛ gu ɛdjɛ embɛɛ esonok nɛ bɔn bin, gwyata nɛ Sɛɛg'en di pɛ tɔ gwoo ɔ, nyɛ waadjɛ Sisim na Dɛɛ nɛ mot aawaab ɔ.»

14 Dhiiti dwoo, Yezu nadi esɔ embee esisim nanɛɛg dhiiti mot bubu ɛ. Wɔ gwaa, embee esisim zokawyis tɔ mot'enɔk, bubu mot'enɔk moo tin elii. Tin, ɛdhuu ɛ bot ɛ nadi tin ɔ moo tin edjoka. 15 É di'enek, bot ɛ nadi tin ɔ moo tin eke pak'ɔɔ náá: «Yɛ ɛ́ Bɛlzebul, kukuma embee esisim ɛ di edjɛ kɔkɔ yak mbi mɛbwala mɛ nyɛ di esɔ embee esisim nɛ yɛ ɛ!» 16 Bɛdhiiti nadi ekwyɛl ɛlóo ɛ nyɛ pɛ ɛko, da bwood nyɛ pɛ kyɛ. Bɛ ɛ́ boolɛɛ nɛ nɛ náá: «Sa bis dhiiti tseŋa mɛbwala di elyaal náá, Zɛɛb ɛ́ nadhis wɔ ɛ!» 17 Tin, Yezu nabɛ ɛ́, egu egeka e elyem bɔɔ. Nyɛ ɛ́ booke nɛ nɔɔ náá: «Ɛyoŋ ɛ di náá, mɛsa mɛ bot ɛ tak ɛ́ ɛwaya pak'ɔɔ ɛ, ɛyoŋ ɛ tak aanàkwaadi. Bɔn bil wat ɛ di egónel pak'ɔɔ, yenek tak aanàkwaadi. 18 Yɛ bɛ náá, Satan ɛ́ di etwak nyel'ɛ nyɛ ɛmet ɔɔ, ɛyoŋ ɛ lɛ aapyet dáa? Etɛɛ náá, bi ke ɛ́ náá, mɛ twak embee esisim ɛ́ nɛ ghwyil ɛ Bɛlzebul djɛ mɛ ɛ. 19 Yɛ bɛ náá, mɛ sɔ embee esisim ɛ́ nɛ ghwyil ɛ Bɛlzebul ɔɔ, haaa yebɔ bot aasɔ embee esisim nɛ yaa ghwyil? Étɛp tak ɛ di náá, bot bin bɔɔ bɛmet aadi ɛ́ bɛtetɛp bin. 20 Nɛ tsɛɛtsɛ mɛ lɛɛ bin ɛ́ náá, yɛ ɛ́ nɛ ghwyil ɛ Zɛɛb ɛ mɛ di esɔ embee esisim. Ye kwyɛl ɛlyaal ɛ́ náá, ɛyoŋ ɛ Zɛɛb moo ɛ́ wak nɛ nena é di wat.

21 É ghɛŋ mot ghwyil di nɛ mɛkɔɔ mɛ dɛɛb di ebaal ndjaŋ'ɛ ɔ, esa bɛ djas ɛ́ waabaalaa ɛnyɔɛpe. 22 Yɛ bɛ náá, dhiiti mot di edhaa nyɛ nɛ ghwyil eezyɛ, nyɛ kwak ɛbhaad nyɛ si ɔɔ, bhii tak, nyɛ dɛk nyɛ mɛkɔɔ mɛ dɛɛb mɛ nyɛ nadi ebebwaal ɔ, da nɔɔ esa bɛ djas ɛ́ kaa.

23 Mot di ààdi pɛ yam kyee ɔ, ye lɛɛ ɛ́ náá, mot tak ɛ́ mot di ebhina mɛ ɔ. Zɛnɔɔ náá, mot di ààkwyee mɛ é ɛsɛɛg ɛ bot ɔ, nyɛ waaz ɛ́ waazak.»

24 «É sok mbee sisim di ewyis tɔ nyel mot ɛ, ye dyeebawyis ɛ́ tɔ́ pɛ kyee dik bɛsyɛ di ààbɛ nɛ mɛdii ɛ, étɛp ɛkɛsaa di yɛ aakɛwala ɔ. Yɛ di ààbela di ɔɔ, yɛ kake ɛ́ náá: "Mɛ pookosik pɛ ndjaŋ'am, ndjaa mɛ nawyis tɔ tak ɛ." 25 Tin, sika yɛ aakasik ɛ, yɛ kabela ndjaa tak, toto, waabela, koobela ɔɔ, 26 É di'enek, nyɛ katɔ́ ɛ́ kɛnɔɔ edhiiti embee esisim bɛ na nyan-nyan bɛtɛn nɛ bɛbá di edhaa nyɛ nɛ embee mɛsa ɔ. Tin, bɔɔ djas kazɛni ɛ́ tɔ ndjaa tak, da be di. É di'enek, tsik yenɔk mot eezepulel dhaa-dhaŋak yii nabɛ sok ɛ.»

27 Dáa Yezu nadi elii deenek ɛ́, dhiiti moma zokazɛben gwood tɔ ɛdhuu ɛ bot, nyɛy nɛ nɛ náá: «Mɛnyɔ nɛ moma nabɛp ɛbum ɛ lɔ ɔ! Mɛnyɔ nɛ mɛbel mɛ wɔ nadɛ ɛ!» 28 Tin, Yezu eezɛbɔɔza nɛ nɛ náá: «Mɛnyɔ nɛ nen, bot ɛ di egwak Mɛkpa ɛ Zɛɛb, da bi ɛ́ kɛ dáa Zɛɛb di ekwyɛl ɛ.»

29 Dáa mɛdhuu mɛ bot nadi esaala é ngwoob ɛ Yezu ɛ, nyɛ moo tin eke náá: «Bot ɛ di kɔ bɔs'ak mos'aak, bɛ àànyɔ bot. Bɛ ɛpewaab dhiiti tseŋa mɛbwala mɛ Zɛɛb. Bɛ aanàkwaakobee dhiiti wat, yɛ di ààbɛ yii ngoolel-Mɛkpa ɛ Zɛɛb Zonas ɔɔ. 30 Deenek, tyee wat Zonas nadi tseŋa é mis mɛ bot ɛ ghaada Niniv ɛ, yɛ ɛ́ deenek ɛ́ Sɛɛŋɛlɛ Mɔn Mot aadi tseŋa étɛp bot ɛ di kɔ bɔs'ak mos'aak. 31 Dwoo Zɛɛb aazɛpɛ́ɛ bot ɛ, mɛkoozi mɛ moma mɛl mɛ di pɛ kyɛ bɔs ɛ́ waazyɛ, zɛtyaa sok bhwoob bot ɛ kɔkɔ mɛbyel mɛ di kɔ bɔs mos'aak étɛp ɛpit bɛ, deenek, nyɛ neekwyesal bɛ ndjɛ sɔs. Etɛɛ náá, nyɛ nadus ɛ́ pɛ edum e bɔs étɛp ɛzɛgwak mbɛɛ mɛlyo mɛ etsoŋ e mɛkoozi Salomɔŋ. Ye nyɔ ɛ́, bi gu náá, mot di nenak wak'aak, nyɛ eedhaa Salomɔŋ! 32 É dwoo Zɛɛb aazɛpɛ́ɛ bot ɛ, bot ɛ ghaada Niniv waazyɛ, zɛtyaa sok bhwoob bot ɛ kɔkɔ mɛbyel mɛ di kɔ bɔs mos'aak étɛp ɛpit bɛ. Tin, nyɛ waazɛkwyesal bɛ ndjɛ sɔs, etɛɛ náá, bot ɛ ghaada Niniv naazeliig elyem bɔɔ, bhii bɛ nazegwak mɛlyo ɛ Zonas ɛ. Ghuna yii di wak ɛ, yɛ eedhaa-dhaŋak yɛ Zonas!»

33 «Mot aanàkwaatuub lama, da nyɛ ɛ́ butal yɛ si bhwaa, yɛ ààsael deenek. Ye goka nɛ ɛkɛlaa ɛ́, pɛ kɔ tɛɛg, etɛɛ náá, bot djas aadi eni tɔ ndjaŋ ɔ needi tɔ gwyɛ tak. 34 Mis mɔ ɛ́ dáa lama nyel'ɔ. Mis mɔ ɛ di enyaasok ɛnyɔɛpe ɔɔ, gua náá, nyel'ɔ djas ɛ́ tɔ selele. Yɛ kabɛ náá, mis mɔ àànyaasok ɔɔ, nyel'ɔ djas ɛ́ tɔ ghooghom. 35 Yɛ ɛ́ deenek ɛ́ mɛ di elɛɛ wɔ náá, wɔ di tsoŋ mot étɛp ɛbaal eselele di tɔ lɔ ɛ, ekaab náá, eselele bin ɛzɛkɛliiza ghooghom. 36 Yɛ bɛ náá, nyel'ɔ djas ɛ́ tɔ selele, ààbɛ nɛ kyee nyel wat di tɔ ghooghom ɔɔ, nyel'ɔ djas aadi ɛ́, tɔ gwyɛ, dáa lama di edjɛ wɔ gwyɛ nɛ mɛkas mɛ ɛ.»

37 Dáa Yezu nasilal ɛlii ɛ, dhiiti Falizyɛ zokadjóo nyɛ, nyɛ zɛdɛ pɛ ndjaŋ'ɛ. Yezu zokani tɔ ndjaa mot tak, nɔɔ nyel, disi kɔ mesa. 38 Falizyɛ yenɔk zokadjoka dáa nyɛ nabee náá, Yezu nabɛ ààgwyii mɛmbɔ ɛsok nɛ nyɛ nɛ dɛ edee ɛ. 39 Tin, Ghɛŋ ɛ́ booke nɛ Falizyɛ yenɔk náá: «Beeka dáa biyɔ eFalizyɛ di ɛ. Bi dyeebagwyii ɛ́ ekoŋ e ebɛɛlɛ nɛ ekoŋ e esaan. Yɛ kabɛ tɔ mɔ tak ɔɔ, bi ɛ́ tɔɔɔ nɛ ɛkwosak ɛ djii nɛ mbee lyem dhaa nyel. 40 Bi ààtselal, Zɛɛb mot nasa koŋ tak ɔ, nyɛ nabɛ ɛ́ ààbaasa mɔ tak é? 41 Djɛka bɛdjel ɛ bot esa ee di tɔ emɔ ebɛɛlɛ bin ɛ. Deenek ɛ esonok djas aadi, dɛɛ étɛp'en.

42 Haaa kpaa-ghoŋ nɛ biyɔ eFalizyɛ, etɛɛ náá, bi ɛpetuud Zɛɛb ndyaal wat tɔ endyaal kam e nadjeebe nɛ eka e na mbɛɛ mɛnuub nɛ aghomkɔtɔ, zɛnɔɔ mɛwyee mɛ di ebɛaa tɔ bok ɛ. Da bi kadi ɛ́ ààwa lyem tɔ epiki nɛ kwyɛl ɛ Zɛɛb. Yenek djas ɛ́ sa di egoka náá, bot du mɛlu djas nɛ zii, ààbet dhiiti sonok ɛ.

43 Haaa kpaa-ghoŋ nɛ biyɔ eFalizyɛ, etɛɛ náá, bi kwyɛl ɛ́, mɛbhóó mɛ pɛ sok étɛp ɛtela mɛnyel tɔ mendjaa mɛ mendjaala mɛ eYuda, bi nɛ kwyɛl ɛswosaa nɛ duu kɔ mɛbɛsɛɛ. 44 Haaa kpaa-ghoŋ nɛ biyɔ, etɛɛ náá, bi ɛ́ dáa mɛvit mɛ di àànyɔ ɛnyen ɛ, mɛvit mɛ bot di ekɛ kɔ tak ààgu ɛ!»

45 Mot ngɔt tɔ bɛlyoel ɛ etsi e Zɛɛb zokazɛdji nyɛ náá: «Lyoel, dáa wɔ di elii deenek'enek, wɔ lee tin ɛ́ dɔɔ nɛ bisɔ!» 46 Yezu eezɛbɔɔza nɛ nɔɔ náá: «Kpaa-ghoŋ dɔɔ nɛ biyɔ, bɛlyoel ɛ etsi e Zɛɛb! Bi ɛpekɛl kɔ ekoŋ e bot mɛkɔm mɛ na dil-dil, da bi ɛ́ kadi, ààkosɛɛb-sɛɛbak djin wat bi neekogek mɛdil mɛ mɛkɔm mɛ tak. 47 Haaa kpaa-ghoŋ nɛ nen, etɛɛ náá, bi ɛpesum mɛvit mɛ bɛngoolel ɛ Mɛkpa ɛ Zɛɛb, bot ɛ bɛbhaab bin nagó ɛ! 48 É sok bi di esa deenek ɛ́, bi lyaal ɛ́ náá, bi eemyaal embee esesɛɛ bɛbhaab bin, etɛɛ náá, bɛ naagó bɛngoolel ɛ Mɛkpa ɛ Zɛɛb, yɛ ɛ́ biyɔ ɛ kadi esum mɛvit mɔɔ! 49 Kɔ ɛsu ɛ tak ɛ Zɛɛb tɔ etsoŋ bɛ, nake náá: "Mɛ waakyeed bɛ bɛngoolel ɛ Mɛkpa ɛ Zɛɛb nɛ bot ɛ lwoma, bɛ waagó bɛdhiiti, da bɛ ɛ́ wa bɛdhiiti tɔ tsik mezuk." 50 Kana ɛkus ɛ bɔs, bɛtɛ nɛ bɛngoolel ɛ Mɛkpa ɛ Zɛɛb naadyeebagóaa, étɛp tak ɛ di náá, esesɛɛ binek djas kwyɛ kɔ elo e kɔkɔ bot ɛ di kɔ bɔs dwoo mos'ak. 51 Kana dwoo ɛsyee ɛ Abhɛl, kɛyaka nɛ yɛ Zakaali, mot nagóaa pak mesa-ebuwa, nɛ Di na Dɛɛ ɛ Ghɛŋ ɔ. Tsɛɛtsɛ nɛ tsɛɛtsɛ mɛ lɛɛ bin ɛ́ náá, esesɛɛ binek djas kwyɛ kɔ elo e kɔkɔ bot ɛ mɛbyel mɛ bot ɛ dika mos'aak.

52 Haaa kpaa-ghoŋ nɛ nen, biyɔ, bɛlyoel ɛ etsi e Zɛɛb, etɛɛ náá, bi eezediyal ze di etɔ́ nɛ bot pɛ daa Zɛɛb ɛ. Biyɔ bɛmet bi ààpakɛ é ze tak. Tin, bi ɛpela bot ɛ di ekwyɛl ɛdhaa é ze tak ɔ, ze.»

53 Dáa Yezu nawyis tɔ ndjaŋ'enek ɛ, eFalizyɛ nɛ bɛghaŋ ɛ mɛkana mɛ etsi moo tin nɛ mɛbuk tɔ elyem. Bhii tak bɛ moo tin edji nyɛ bɛtɛ nɛ ekiya dum nɛ bɛtɛ nɛ etɛp. 54 É di'enek, bɛ nadi elóo nyɛ pɛ ɛko, da bwood nyɛ pɛ kyɛ étɛp bɛ neebela mɛkpa mɛ bɛ aapit nyɛ nɛ yɛ ɛ.