1 Dhiiti dwoo saba, Yezu naazɛtɔ́ pɛ daa dhiiti kukuma eFalizyɛ ngɔt étɛp ɛkɛdɛ. Bot ɛ nadi é di tak ɔ moo tin dhuuu nɛ mis é nyel ɛ Yezu. 2 Dhiiti mot eezɛtyaa tetel sok bhwoob’ɛ, mot tak nabɛ ɛ́, nyel eezebeyal nyɛ nɛ ɛbɛ́. 3 É di’enek, Yezu eezɛke nɛ bɛlyoel ɛ etsi e Zɛɛb nɛ eFalizyɛ náá: «Etsi bina nɛ djɛ mena ze étɛp ɛtsik ɛ bot dwoo saba?» 4 Bɛ moo tin gwyem, ààbɔɔza. Bhii tak, Yezu eezɛmɛt mot ɛbɛ́ ɛlenɔk, nyɛ eezɛtsik nyɛ, nyɛ eezɛswaal nyɛ. 5 Nyɛ eezɛke nɛ nɔɔ náá: «Yɛ bɛ náá, ngɔt pak’en mɔn’ɛ nɛghu ngɔmbɛ yɛ eeges tɔ guk mɛdii ɔɔ, nyɛ aanàkwaalel ɛkɛwyisal nyɛ kaab, ye nakoozodi dwoo saba?» 6 Bɛ nabɛ ɛ́, ààbɛ nɛ ɛkpa ɛbɔɔza nɛ nyɛ.

7 Yezu eezɛbee dáa bot ɛ nadjóoaa ɔ nadi esaa ɛdisi kɔ mɛbhóó mɛ di pɛ sok ɛ. Deenek nyɛ eezɛlii nɛ nɔɔ tɔ kana náá: 8 «Mot ɛ djóo wɔ é ɛbyoŋ ɛ ɛba ɔɔ, sa wɔ ààsuu ɛdi kɔ mɛbhóó mɛ di pɛ sok ɛ, ekaab náá, nɛghu bɛ naadjóo dhiiti dhil mot dhaa wɔy, 9 da mot djóo biyɔ bɛbá ɔ ɛ́ ke nɛ nɔ náá: "Djɛa nyɛ di’ak." Tin, sen waasa wɔ étɛp ɛkɛsaa di ɛkɛdisi pɛ bhis. 10 Ye nyɔ ɛ́ náá, wɔ djóoaa é ɛbyoŋ ɔ, wɔ goka ɛ́ nɛ ɛdi ɛ́ kɔ bóó di pɛ bhis ɛ, etɛɛ náá, é sok nakuma ɛbyoŋ aatuula ɛ, nyɛy aapake nɛ nɔ náá: "Sɔ’am, wyɛla, dha zɛdisi kɔ bóó di pɛ sok ɛ." Deenek wɔ waabela duu é mis mɛ bot ɛ bi nɛ bɛnɔɔ aadi kɔ mesa ɔ. 11 Mot ɛ di ekwyɛl ɛghɛɛ nyel nɛ ɛbet ɔɔ, nyɛ waasilaa. Mot ɛ di esil nyel, nyɛ ɛ di ààbɛ nɛ ɛbet ɔɔ, nyɛ waabenaa.»

12 Tin, Yezu eezɛke nɛ mot nadjóo nyɛ ɔ náá: «Wɔ di edjɛ bot edee é mwos, nɛghu bikoko ɔɔ, sa wɔ ààdjóo bɛsɔ bɔ, bɔn-nyoog, bot ɛ mɛbyel mɔ, ààdjóo bɛkum ɛ bot ɛ bi nɛ bɛnɔɔ di ɛkunaaɛpe ɔ, ekaab náá, bɛ ɛzɛkɛdjóo wɔ dhiiti dwoo. Da bɛ ɛ́ bulal dáa wɔ nasa nɛ nɔɔ ɛ. 13 Ye nyɔ ɛ́, wɔ djóo ɛbyoŋ ɔɔ, wɔ goka nɛ ɛdjóo ɛ́ bɛdjel ɛ bot, bɛ na edjam, eboka, nɛ bɛ na edhim. 14 Mɛnyɔ nɛ nɔ é di’enek, etɛɛ náá, bɛ tok nɛ ghwyil ɛbulal wɔ yɛ ɛ. Zɛɛb ɛ́ waabulal wɔ yɛ é ghɛŋ bot ɛ epiki aagom tɔ ɛsyee ɛ.»

15 Bhii bɛ nazegwak etɛp binek djas ɛ, mot ngɔt pak bot ɛ nadi edɛ bɛ nɛ Yezu kɔ mesa ɔ zokake náá: «Mɛnyɔ nɛ mot aadɛ edee tɔ Ɛyoŋ ɛ Zɛɛb ɔ!» 16 Yezu eezɛlɛɛ nyɛ kana yak: «Dhiiti mot naazɛdjóo ɛbyoŋ. Nyɛ eezɛdjóo bot ɛbuɛpe. 17 É sok ɛwala ɛdɛ edee nakadjala ɛ, nyɛ eezɛlwom mot-mɛsa mɛ, nyɛ kɛdjóo bot da ke nɛ nɔɔ náá: "Dha dɛka, etɛɛ náá, edee eezebée." 18 Tin, bot ɛ nadjóoaa ɔ, moo tin, mot nɛ mot edjɛ yɛ gham, étɛp ɛpeeba. Mot ɛsok eezɛke nɛ mot-mɛsa náá: "Mɛ eebɔm pyeeb na bes. Ye goka ɛ́, mɛ tɔ́ kɛbee yɛ, pela mɛ mɔn-nyɛɛg." 19 Nwyak mot náá: "Ye nabɛ ɛ́, mɛ eebɔm engɔmbɛ kam, edjasla bɛtɛn, nɛ eswooz etɛn. Mɛ pookokɛgek mɛghwyil mɔɔ. Pela mɛ mɔn-nyɛɛg." 20 Nwyak tak eezɛzyɛ yɛ, nyɛy náá: "Mɛ ààloo nɛ beeb ghɔɔd’am. Étɛp tak ɛ di náá, mɛ tok nɛ ghwyil ɛzyɛ."

21 Mot-mɛsa menɔk eezɛsik pɛ daa kukuma yɛ, kɛlɛɛ nyɛ dáa bot binɔk djas lɛɛ ɛ. Nakuma ndjaŋ eezɛkpaa lyem ɛlyelɛpe. Nyɛ ɛ́ booke nɛ mot-mɛsa mɛ náá: "Lela, tɔ́a kɔ mɛbɛsɛɛ mɛ dɛl nɛ kɔ egba. Tɔ́a, kɛdjóo bɛdjel ɛ bot, eboka e bot, bɛ na edjam, nɛ bɛ na edhim. Dha mɛ nɛ nɔɔ wak." 22 Bhii tak, mot-mɛsa eezɛlɛɛ nɛ kukuma yɛ náá: "Ghɛŋ, sa wɔ lwom náá, mɛ sa ɛ, yɛ eezesael. Kabela ɛ́ náá, edi dinaa tak tɔ ndjaa." 23 Tin, kukuma eezɛke nɛ mot-mɛsa mɛ náá: "Tɔ́a egba nɛ egba, nɛ kɔ bɔɔ mɛl pɛ ze epyeeb. Mot nɛ mot wɔ aaboma nɛ nɛ ɔ, besela nyɛ, nyɛ zyɛ. Etɛɛ náá, mɛ kwyɛl ɛ́, ndjaŋ’am lwood." 24 Nɛ tsɛɛtsɛ mɛ lɛɛ bin ɛ́ náá: "Tɔ bot djas mɛ nadjóo sok ɔ, ye tok nɛ mot aadɛ edee é ɛbyoŋ ɛ lam!"»

25 Zukamwaa nɛ mot nadi ekɛ lɔɔg wat bɛ nɛ Yezu. Yezu zokazɛliig mis, nyɛ eezɛke nɛ nɔɔ náá: 26 «Mot ɛ kwyɛl ɛdu mɛ ɔɔ, ye goka ɛ́ nyɛ byen sɛɛg nɛ nyɛɛg, nɛ myɛl nɛ bɔn, nɛ bɔn-nyɛɛg nɛ bɛkɛl. Nyɛ goka ɛ́ nɛ ɛbyen-byenak tsik’ɛ met. Yɛ di ààdi deenek ɔɔ, nyɛ aanàkwaakwak ɛdi djekel’am. 27 Mot ɛ di ààbɛp mɛlaaba mɛ, da bhii tak, nyɛ ɛ du mɛ ɔɔ, yenɔk tok nɛ ghwyil ɛdi djekel’am. 28 Mot ngɔt pak’en ɛ kwyɛl ɛsum boo ndjaa na vyɛɛg-vyɛɛg ɔɔ, ye goka ɛ́, nyɛ pookodisi, étɛp ɛval nɛghu mɛtaŋ mɛ nyɛ goka nɛ ɛwyisal étɛp ɛsum ndjaa tak ɛ́ waadjala. 29 É kaab náá, nyɛ ɛ́ zɛkɛkan mɛsa, da nyɛ ɛ́ sik é ze. Tin, ekpaa-goŋ ɛ bee deenek ɔɔ, bɛ ɛzɛkɛgɔ nyɛ. 30 Deenek bɛ aakeke ɛ́ náá: "Mot tak eekan ɛsum ndjaa ɛnyɔɛpe. Nyɛ ààpakakwak ɛsilal zumal."

31 Yɛ ɛ́ tyee wat nɛ dhiiti mɛkoozi di ekwyɛl ɛkɛlumla dɛɛb, bɛ nɛ nwyak dhiiti mɛkoozi ɔ. Ye goka ɛ́ nyɛ pookodisi sok, étɛp ɛdjek nɛghu, nɛ esodja bɛmil-kam, nyɛ ɛ́ nɛ ghwyil ɛkwak ɛlumla dɛɛb nɛ sɔ mot zekɛghɛɛ nɛ esodja bɛmil mɛkam-mɛmbá ɔ. 32 Yɛ bɛ náá, nyɛ aanàkwaakwak ɔɔ, nyɛ waakyeed engoola-ngoola nɛ mɛbhaadal pɛ daa sɔ mɛkoozi, nyɛ dinaa ɛtsetaɛpe, étɛp ɛdji nyɛ sa nyɛ di ekwyɛl ɛ, etɛɛ náá, egwyem needi pak’ɔɔ.» 33 Deenek bhii tak Yezu eebaazɛbil ɛkpa náá: «Ye tok nɛ mot ngɔt pak’en aakwak ɛdi djekel’am, nyɛ di ààbet esa bɛ djas ɔɔ.»

34 «Mɛsɔn ɛ́ mbɛɛ sonok. Yɛ bɛ náá, mɛsɔn moo ɛ́, ààkagwom ɔɔ, bot aakasa dáa étɛp mɛgwom mɛ tak neebaabula? 35 Yɛ aanàkabaakoval sonok, ye nakoozobɛ étɛp ɛkoobal bɔs nɛghu mɛbhek. Yenek aakagoka ɛ́ nɛ ɛmwasaa pɛ kel. Mot di nɛ mɛlɔ mɛ ɛgwak ɔ, nyɛ gwak!»