1 Wɔ gwaa, Yezu baazɛke náá: «Tsɛɛtsɛ nɛ tsɛɛtsɛ, mɛ lɛɛ bin ɛ́ náá, bɛdhiiti bot tɔ sama bi di’aak aanàkwaagwyɛ, bɔɔ ààbee dáa Ɛyoŋ ɛ Zɛɛb aazyɛ nɛ eghɛŋ ɛ.»

2 Bhii ye nadhaa tyee mɛlu mɛtɛn nɛ wat ɛ, Yezu eezɛnɔɔ Pyɛɛd, nɛ Zak zɛnɔɔ Zaŋ, nyɛ zokazɛbyet nɛ nɔɔ kɔ ɛtsok ɛ na vyɛɛg-vyɛɛg pɛ bɛ nadi bɔɔ bɛmet ɛ. Wɔ gwaa, nyɛ zokazɛswoola bhwoob é mis mɔɔ. 3 Ekaad bɛ moo puu ɛkasɛpe, mbi mɛkas mɛ wat di ààbɛ nɛ mbi sonok gekaa nɛ yɛ pɛ kɔ bɔs ɛ. 4 Batsa deenek, bɛdjekel kasɛka ɛ́ Eli bɛ nɛ Moiiz moo elɛɛ elɛŋ nɛ Yezu. 5 Wɔ gwaa, Pyɛɛd zɛke nɛ Yezu náá: «Lyoel, ye goka ɛ́ náá, mena dika wak. Djhoosumka epɛt elɛl: wat yɔ, dhiiti yɛ Moiiz, yak wat kadi ɛ́ yɛ Eli.» 6 Nyɛ nadi ɛ́, ààgu sa nyɛ nadi elii ɛ, etɛɛ náá, bɛbebwol naadyeebamɛt bɛ nɛ bɔn-nyɛɛg ɛlyelɛpe. 7 Eguud zokazɛsul, wɔ gwaa, ye zɛkala kɔ lɔɔ, butal bɛ. Tɔ eguud binek, wɔ gwaa, dhiiti gwood zɛgék, é ɛke náá: «Nwyak ɛ́ mɔn’am mɛ dyeebakwyɛl ɔ. Bi ɛ́ gwak nyɛ!» 8 É di’enek wat, bɛdjekel moo tin egwyák é mengwoob mɔɔ, bɛ kadi ɛ́, ààkabaabee mot. Ye nazokalik ɛ́ Yezu nyɛ ɛmet.

9 Dáa bɛ nadi ewyeed ɛtsok ɛ, Yezu eezɛke nɛ bɛdjekel bɛ náá: «Sa mot ààlɛɛ mot sa bi bee ɛ, kana dwoo lak mos, kɛyaka nɛ dwoo Sɛɛŋɛlɛ Mɔn Mot aagom bhis ɛsyee ɛ.» 10 Bɛ naamɛt mɛkpa menek djas, bɛ moo tin esɔs pak’ɔɔ náá: «Nyɛ kwyɛl ɛlɛɛ yé dum nɛ "ɛgom bhis ɛsyee"?»

11 Bhii tak, bɛ eezɛdji Yezu náá: «Étɛp yé bɛghaŋ ɛ mɛkana mɛ etsi di elɛɛ náá, ye goka ɛ́ Eli pookonyɛl ɛzyɛ ɛsok?» 12 Nyɛ eezɛbɔɔza nɛ nɔɔ náá: «Tsɛɛtsɛ, ye goka ɛ́ náá, Eli pookozyɛ ɛsok étɛp nyɛ neezɛkoobal etɛp djas. Haaa, étɛp yé Ekwyala ɛ Zɛɛb di baalɛɛ náá, ye goka, Sɛɛŋɛlɛ Mɔn Mot zukaa ɛlyelɛpe, náá nyɛ waabhinaa? 13 Yɛ bɛ mam ɔɔ, betka mɛ lɛɛ bin náá, Eli eezezyɛ, kabela ɛ́, bot eesa nyɛ dáa bɛ nakwos ɛ, dáa Mɛkpa ɛ Zɛɛb di kwyala, dum nɛ nɛ ɛ.»

14 Dáa bɛ nakakum é di bɛdhiiti bɛdjekel nalik ɛ, bɛ kabela ɛ́, zukamwaa nɛ mot, nɛ bɛghaŋ ɛ mɛkana mɛ etsi kuku ɛbwak esuu mɛso. 15 Beea bot nabee Yezu ɛ, ye nabɛ ɛ́, bɛ naadyeebadjoka, bɛ eezɛsum ekaab, bɛ neekɛswos nyɛ. 16 Yezu eezɛdji bɛdjekel bɛ náá: «Yɛ ɛ́ mɛso mɛ yé bi di esuu, bi nɛ bɛnɔɔ?» 17 Wɔ gwaa, mot ngɔt tɔ ɛdhuu ɛ bot binɔk zɛke nɛ nɛ náá: «Lyoel, mɛ eezyɛ nɛ mɔn’am, etɛɛ náá, mbee sisim ɛpedhek nyɛ, nyɛ ààlii. 18 Mbee sisim tak zoghɛɛ ɛ nyɛ é edi djas, ghɛɛg nyɛ é bɔs, mɛwyil é nuub, mɔn kwaal mɛtsok, mɔn nyel kaada dáa muu. Mɛ ɛ́ booke nɛ bɛdjekel bɔ náá, bɛ sɔ mbee sisim tak. Bɛ ààpakwak yɛ.»

19 Tin, wɔ gwaa Yezu zɛke nɛ nɔɔ náá: «Biyɔ bot ɛ di ààdum koŋ nɛ Zɛɛb ɔ! Mɛlu mɛdhen kalik nɛ nam é ɛdi tɔ len? Baabela náá, mɛlu mɛdhen mɛ di egoka nɛ ɛmaad bin? Dhaka mɛ nɛ mɔn’enɔk wak.» 20 Bhii tak, bɛ eezɛzyɛ nyɛ nɛ mɔn tak. Beea mbee sisim nabee Yezu ɛ, wɔ gwaa, nyɛ zɛdheeg mɔn’enɔk ɛlyelɛpe bhuku-bhuku. Nyɛ eezɛghaaga si, nyɛ moo eboola si, mɛdheed ewyis é nuub. 21 Tin, Yezu eezɛdji sɛɛg mɔn’enɔk náá: «Mɔn’ak moo nɛ ɛbil ɛbɛ́ ɛlak mos mɛlu mɛdhen?» Sɛɛg mɔn nɛ nɛ náá: «Kana edhɔma bɛ, kɛyaka nɛ dwoo pan mos’ak. 22 É dhiiti tyɛ, mbee sisim ɛpezyeegal nyɛ tɔ du, yak tyɛ tɔ dii étɛp nyɛ neegwyɛ. Iyeee! Geka bis ghoŋ, tsika bis, wɔ di nɛ ghwyil ɛsa ɔ!» 23 Wɔ gwaa, Yezu zɛbɔɔza nɛ nɛ náá: «Étɛp yé wɔ ke náá: "Wɔ di nɛ ghwyil ɛsa ɔɔ"? Ghuna yɛ ɛ́ náá, mot ɛ dum koŋ nɛ Zɛɛb ɔɔ, esa djas nyɛ aawaab ɛ, nyɛ waabela.» 24 É di’enek wat, sɛɛg mɔn’enɔk eezɛtsim ɛlyelɛpe. Nyɛy náá: «Mɛ eedum koŋ. Kwyeea mɛ, etɛɛ náá, mɛ neewa lyem tɔ ɛmyaal ɛnyɔɛpe!»

25 Dáa Yezu nabee ɛdhuu ɛ bot ezyɛ nɛ ekaab pɛ kyee bɛ nadi ɛ, nyɛ eezɛbhɛm mbee sisim. Nyɛy nɛ nɛ náá: «Wɔy sisim di ediyal bot mɛlɔ nɛ enuub ɔ, yɛ ɛ́ mam ɛ di eke nɛ nɔ náá: Wyisa tɔ nyel mɔn’ak. Sa wɔ ààbaabula tɔ lɛ!» 26 Wɔ gwaa, mbee sisim zɛbo boo tsim, zɛdheeg mɔn’enɔk ɛlyelɛpe. É di tak, mbee sisim tak eezɛwyis, mɔn tak moo tin dáa muu, sa náá, bot ɛ nadi tin ɔ, ke náá: «Nyɛ eegwyɛ!» 27 Tin, Yezu eezɛmɛt nyɛ é mbɔ, zɛwyɛl nyɛ, mɔn tak eezɛtyaa tetel. 28 É sok Yezu nazɛni tɔ ndjaa bɛ nɛ bɛdjekel bɛ bɔɔ bɛmet ɛ, bɛdjekel eezɛdji nyɛ náá: «Étɛp yé bis di ààkwak ɛsɔ mbee sisim tak?» 29 Yezu eezɛbɔɔza nɛ nɔɔ náá: «Mbi esisim binek wyis ɛ́, yɛ ɛ́ bɛ náá, wɔ nɛ djaala Zɛɛb ɛbuɛpe ɔ.»

30 Bɛ eezɛdus tin, wɔ gwaa bɛ zɛtsaal kyee dik Ghalile djas. Yezu nabɛ ààkwyɛl náá, bot gu pɛ nyɛ nadi ɛ. 31 Etɛɛ náá, nyɛ nadi elyo bɛdjekel bɛ. Nyɛy nɛ nɔɔ náá: «Sɛɛŋɛlɛ Mɔn Mot ɛ́ waakaaa é mɛmbɔ mɛ bot ɛ mesyem. Bhii tak, bɛ waagó nyɛ. Mɛlu mɛlɛl bhii tak, nyɛ waagom.» 32 Tin, bɛdjekel nabɛ ɛ́, ààmɛt lo etɛp ee nyɛ nadi elɛɛ bɛ ɛ. Bɛ nadi ɛ́, nɛ bwoo ɛdji nyɛ etɛp binek djas.

33 Bɛ eezɛkum pɛ Kapɛlnaum. Dáa bɛ nadi tɔ ndjaŋ ɛ, Yezu eezɛdji bɛdjekel bɛ náá: «Mɛso mɛ yé bi di esuu ze ɛ ze?» 34 Bɔɔ djas kup, ààlii, bela tin náá, ze ɛ ze bɛ nadi esuu mɛso dum nɛ tɛp ɛgu zɛ di boo-mot. 35 Tin, Yezu eezɛdisi, bhii tak, nyɛ eezɛdjóo bɛdjekel bɛ kam nɛ bɛbá. Nyɛy nɛ nɔɔ náá: «Mot ɛ kwyɛl ɛdi mot mɛkɛn ɔɔ, ye goka ɛ́ nyɛ di mot ɛbhis tɔ bɛsɔ djas, nyɛ di mot-mɛsa mɛ bɛsɔ djas.» 36 Bhii tak nyɛ eezɛnɔɔ dhiiti mɔɔ dhyeeb, nɛɛg nyɛ kuku ɛbwak ɛ lɔɔ. Nyɛ eezɛbeedal nyɛ. Bhii tak, nyɛ eezɛke nɛ nɔɔ náá: 37 «Mot aamyaal mɔɔ dhyeeb dáak kɔ ɛsu ɛ kwyɛl nyɛ di nɛ yɛ nɛ nam ɔɔ, yɛ ɛ́ mam mɛ ɛmet ɛ nyɛ myaal. Mot ɛ aamyaal mɛ ɔɔ, nyɛ ààpamyaal mam mɛ ɛmet, nyɛ myaal ɛ́ dɔɔ nɛ mot nadhis mɛ ɔ.»

38 Zaŋ eezɛke nɛ Yezu náá: «Lyoel, bis eebee dhiiti mot esɔ embee esisim nɛ din ɛ lɔ. Bis eekoolyak nyɛ, etɛɛ náá, nyɛ ààkɛ lɔɔg wat mena nɛ bɛnɔɔ.» 39 Tin, Yezu eezɛbɔɔza nɛ nɔɔ náá: «Sa mot ààlyak nyɛ, etɛɛ náá, ye tok nɛ mot aasa endem e mɛbwala nɛ din ɛ lam é di’enek wat, da nyɛ lii ɛbiyoɛpe nɛ nam mɛ. 40 Etɛɛ náá, mot ɛ di ààbhina mena ɔɔ, nyɛ ɛ́ mot’ena. 41 Tsɛɛtsɛ nɛ tsɛɛtsɛ, mɛ lɛɛ bin ɛ́ náá: Nɛ mot aazodjɛ bin djɛak nɛghu bɛɛlɛ mɛdii mɛ wat, etɛɛ náá, bi ɛ́ bot ɛ Klisto ɔ, nyɛ waabela efute bɛ.»

42 «Mot aakwyesal mɔn ngɔt tɔ sama bɔn zedum koŋ nɛ nam tɔ mesyem ɔɔ, ye goka ɛ́ náá, bɛ tsel nyɛ boo ɛkok é tsuŋ, da bɛ ɛ́ lóo nyɛ tɔ boo dii mɛsɔn. 43 Yɛ bɛ náá, mbɔ’ɔ di esa náá, wɔ gheekwyekwyɛ tɔ mesyem ɔɔ, tsaala yɛ. Ɛnyɔ náá, mot ni tɔ tsik na kɔm-kɔm nɛ mbɔ tsaala. Ɛbiyo kabɛ ɛ́ náá, wɔ di nɛ mɛmbɔ mɛmbá, da wɔ ɛ́ su tsik, da wɔ ɛ́ tɔ́, kɛdyak tɔ du na kɔm-kɔm di ààdim ɛ. [ 44 Pɛ tɔ di di náá, elum ààgwyɛ ɛ, é di di náá, ngel du ààdim ɛ.] 45 Yɛ bɛ náá, ko’ɔ di esa náá, wɔ gheekwyekwyɛ tɔ mesyem ɔɔ, ye goka ɛ́, wɔ tsaal yɛ. Ɛnyɔ náá, mot ni tɔ tsik na kɔm-kɔm nɛ ko tsaala. Ɛbiyo kabɛ ɛ́ náá, wɔ di nɛ mɛko mɛmbá, da wɔ ɛ́ su tsik, da wɔ ɛ́ tɔ́, kɛdyak tɔ du na kɔm-kɔm. [ 46 *] 47 Yɛ bɛ náá, dis ɛ lɔ ɛ́ di esa náá, wɔ gheekwyekwyɛ tɔ mesyem ɔɔ, ye goka ɛ́, wɔ piid yɛ. Ɛnyɔ náá, mot ni tɔ Ɛyoŋ ɛ Zɛɛb nɛ dis wat. Ɛbiyo kabɛ ɛ́ náá, wɔ di nɛ mis mɛmbá, da wɔ ɛ́ su Ɛyoŋ ɛ Zɛɛb, da wɔ ɛ́ tɔ́, kɛdyak tɔ du na kɔm-kɔm. 48 Pɛ tɔ di di náá, elum ààgwyɛ ɛ, é di di náá, ngel du ààdim ɛ. 49 Tin, bot djas ɛ́ waadhaa tɔ du mezuk, tin bɛ aakadi ɛ́, bɛ moo gwom dáa mɛsɔn.

50 Mɛsɔn ɛ́ mbɛɛ sonok. Yɛ bɛ náá, mɛsɔn moo ɛ́, ààkagwom ɔɔ, haaa yɛ aasaa dáa, étɛp ye neebaagwom? Dika nɛ mɛsɔn tɔ len, da bi ɛ́ gwakel nɛ bot djas.»