1 Mam Zak, mot-mɛsa ɛ Zɛɛb, nɛ Ghɛŋ Yezu Klisto, mɛ eeswos membyak kam nɛ ebá*, di mɛdhik nɛ mɛdhik kɔ ɛko ɛ bɔs djas ɔ.

2 Bɔn-nyɛɛg bam, bi ɛ dhaa tɔ membi mɛ mɛbhowal djas ɔɔ, dika nɛ boo mɛmyaala. 3 Ɛtɛɛ náá, bi nɛ gu, nɛghu ɛdum ɛ koŋ ɛ len nɛ Zɛɛb nɛ kwak mɛbhowal, yɛ waadjɛ bin zii. 4 Bi goka ɛ́ nɛ ɛdi nɛ zii, étɛp bi needi esosoob e bot, tin, sa sonok wat ààwyii tɔ len.

5 É di'enek, mot ngɔt tɔ len ɛ́ di ààbɛ nɛ etsoŋ ɔ, nyɛ goka ɛ́ nɛ ɛwaab yɛ nɛ Zɛɛb, deenek, Zɛɛb waadjɛ nyɛ etsoŋ. Ɛtɛɛ náá, Zɛɛb djɛ yɛ ɛ́ nɛ bot djas ɛ nɛ bum lyem wat, tɔ enɛm nɛ embɛɛ bɛ. 6 Tin, é sok nyɛ di edjaala náá, Zɛɛb djɛ nyɛ dhiiti sonok ɛ, nyɛ goka ɛ́ nɛ ɛdum koŋ nɛ Zɛɛb, sa nyɛ ààwa mɛso. Etɛɛ náá, mot di ewa mɛso ɔ, nyɛ ɛ́ dhatyee bhuuge dii pup di eghɛɛ, kɛghɛɛg yɛ é edi djas ɛ. 7 Deenek, sa kɔkɔ yenɔk mot ààgek náá, nyɛ waabela sonok pɛ daa Ghɛŋ. 8 Etɛɛ náá, nyɛ ɛ́ nɛ mɛso tɔ lyem, nyɛ sa esonok bɛ djas ɛ́, nɛ elyem ebá.

9 Ye goka ɛ́ náá, mɔn-nyɛɛg di tɔ edjel ɔ myaala, etɛɛ náá, Zɛɛb ɛpedjɛ nyɛ mbɛɛ di mɛtaŋ. 10 Tin, mot ekum goka ɛ́ nɛ ɛdi nɛ mɛmyaala é sok Zɛɛb di esil nyɛ ɛ. Etɛɛ náá, dáa mɛzɛm mɛ mɛbhek di ààbɔya ɛ, yɛ ɛ́ tyee wat nɛ mot ekum pe, nyɛ aanàbɔya. 11 Gwyes dyeebawyɛl ɛ́ nɛ boo mɛkas mɛ di esyes mɛbhek ɛ. Tin, zɛm ɛkwyit ɔɔ, enɛm bɛ djas eesi. Yɛ ɛ́ tyee wat, nɛ dáa mot ekum aadiib nɛ ekum bɛ ɛ.

12 Mɛmyaala nɛ mot di epyet ghiŋ tɔ mɛbhowal ɔ. Etɛɛ náá, mot aapyet ghiŋ tɔ mɛbhowal ɔ, nyɛ aabela kɔtɔ duu nɛ tsik na kɔm-kɔm yii Zɛɛb nakɛk nɛ bot ɛ di nɛ kwyɛl nɛ nɛ ɔ. 13 Tin, mot di tɔ mɛbhowal ɔ, sa nyɛ ààke náá: «Yɛ ɛ́ Zɛɛb ɛ di ebowal mɛ.» Etɛɛ náá, Zɛɛb tok nɛ ghwyil ɛbela geka ɛbowal ɛ́ mot, nɛghu ɛpus ɛ mot tɔ ɛbiyo. 14 Tin, mbee ɛkwosak ɛ mot nɛ mot ɛ di edul mot tɔ embee etɛp. 15 É di'enek, wɔ bet náá, ɛkwosak ɛ tak dhaa wɔ ghwyil ɔ, ye kadul wɔ ɛ́ tɔ esyem. Bhii tak, wɔ dyeebagyee tɔ esyem ɔɔ, ye kadul wɔ ɛ́ tɔ ɛsyee. 16 Bɔn-nyɛɛg bam mɛ di ekwyɛl ɔ, nàkɔɔka mɛnyel men. 17 Embɛɛ esonok djas bot di bela ɛ, nɛ mbɛɛ mɛkɛɛ djas bot di ebela ɛ dus ɛ́ tɔ gwoo, ye dus ɛ́ pɛ daa Zɛɛb, kusel esa e mɛkas djas di tɔ gwoo ɛ. Pɛ tɔ lɛ, ye tok nɛ zwoola, ààbɛ-bɛak nɛ kyee wat di nɛ ghwyil ɛdjɛ mɛghomela. 18 Nyɛy nyɛ met ɛ nakwyɛl ɛdjɛ bis tsik'ɛ nɛ mɛkpa mɛ na tsɛɛtsɛ. Etɛɛ náá, bis needi bot ɛsok tɔ esa djas ee nyɛ nakus ɛ.

19 Bɔn-nyɛɛg bam mɛ di ekwyɛl ɔ, bi goka ɛ́ nɛ ɛmɛt ɛnyɔɛpe sa mɛ di elɛɛ bin'aak: Mot nɛ mot kwyɛs nɛ ɛgwak. Yɛ ààgoka náá, mot kwyɛs ɛlii, nɛ ɛkwyɛs nɛ ɛbela ɛbuk. 20 Etɛɛ náá, é sok mot di nɛ ɛbuk ɛ, nyɛ tok nɛ ghwyil ɛkɛ tɔ epiki é mis ɛ Zɛɛb. 21 Deenek, mwaska mendi nɛ embee mɛsa men djas di ezyɛ tɔ ɛbuk ɛ. Myaalka nɛ mɛsila djas, Mɛkpa ɛ Zɛɛb di ebɛ, tyee bhek tɔ ebhum elyem bin ɛ, etɛɛ náá, bi neebela tsik.

22 Nàkɔɔka mɛnyel men, ye goka ɛ́ náá, é sok bi di egwak Mɛkpa ɛ Zɛɛb ɛ, bi goka ɛ́ nɛ ɛkɛ tyee mɛkpa mɛ tak di elɛɛ ɛ. 23 Etɛɛ náá, mot di egwak Mɛkpa ɛ Zɛɛb, da nyɛ kadi ààkɛ tyee mɛkpa mɛ tak di elɛɛ ɛ́, nyɛ ɛ́ dhatyee mot di ebee ɛbhwoob ɛ lɛ tɔ ɛnyen ɛ. Nyɛ zobee ɛ́ dáa nyɛ di ɛ. 24 Bhii tak, dáa nyɛ bee ɛbhwoob ɛ lɛ, é ɛwala ɛlenek, nyɛ eetɔ́, djisa dáa ɛbhwoob ɛ lɛ di ɛ. 25 Bela náá, mot ɛ gwak nɛ ɛsiiza ɛsuk ɛ tɛtɛ etsi e Zɛɛb di epɛk bot ɔɔ, mot tak ɛ di egwak Mɛkpa ɛ Zɛɛb tɔ esosoob ɔɔ, ààbɛ náá, nyɛ gwak ɛ́ étɛp nyɛ neeghisa yɛ djɛmɛn ɔ, tin, nyɛ kɛ tyee mɛkpa mɛ tak di elɛɛ ɔ. Mbi yenɔk mot aadi ɛ́ tɔ mɛmyaala dum nɛ esa djas nyɛ di esa ɛ.

26 Mot ɛ ke náá, nyɛ ɛ́ mot di edjaala Zɛɛb ɛnyɔɛpe ɔɔ, bela náá, nyɛ ɛ́ mot di ekwyɛs nuub ɔɔ, nyɛ eekɔɔ nyel'ɛ, mendjaala mɛ ɛ́ toto. 27 Beeka tɛtɛ mbi mendjaala Zɛɛb Sɛɛg'ena di emyaala nɛ yɛ ɛ: Ɛkwyee bɔn nyel nɛ bɛkus ɛ boa tɔ mezuk mɔɔ, nɛ ɛbaabaal nyel tɔ embee esonok djas di kɔ ɛko ɛ bɔs ɛ.