1 Bɔn-nyɛɛg bam, biyɔ bot ɛ di edum koŋ nɛ Ghɛŋ na duu yenaka Yezu Klisto ɔ, bi ààgoka náá, bi wa mbɛk pak bot. 2 Djhoopookonɔɔka geka yak: Kuma mot eeni tɔ zɛɛga yen nɛ ewolo ekaad é nyel, nɛ ɛsum ɛ nasaaa nɛ lɔɔd ɛ é djin. Tin, dhiiti djel mot eebaazɛni nɛ enyaŋela ekaad é nyel. 3 Bi kaduwal ɛ́ mot nabɔt ewolo ekaad ɔ, bi kake nɛ nɛ náá: «Beea tɛtɛ di di egoka nɛ nɔ, dia si.» Bi kake nɛ djel mot ɛ́ náá: «Wɔy, tyaŋa tetel, nɛghu dia si é bɔs é di mɛ kɛl mɛko mam ɔ!» 4 Tin, é ghɛŋ bi di esa deenek ɛ, bi ààpabee náá, bi ɛpewa mbɛk pak'en é? É di'enek, bi kadi ɛ́ bɛmbee bɛtetɛp ɛ na mbee esiiza.

5 Bɔn-nyɛɛg bam gwakeka mɛ, Zɛɛb eezesɛ́ɛ bɛdjel ɛ bot é mis mɛ bot ɛ bɔs'ak. Nyɛ nasɛ́ɛ bɛ ɛ́, étɛp bɛ needi bɛkum ɛ bot, kɔ ɛsu ɛdum ɛ koŋ ɛ lɔɔ nɛ Zɛɛb, bɛ neebela Ɛyoŋ ɛ Zɛɛb nakɛk nɛ bot ɛ di kwyɛl nyɛ ɔ. 6 Tin, biyɔ ɛpepul dék bɛdjel ɛ bot. Ye tok bɛkum ɛ bot di etiig bin é? Ye tok bɔɔ di edul bin nɛ bhel sok bhwoob bɛtetɛp é? 7 Yɛ ɛ́ bɛkum ɛ bot ɛ di elee nɛ ɛnyɛk mbɛɛ din ɛ Klisto yii Zɛɛb djɛ bin ɛ.

8 Tin, Ekwyala Zɛɛb lɛɛ ɛ́ náá: «Kwyɛla sɔ'ɔ mot dáa wɔ di kwyɛl nyel'ɔ met ɛ✝.» Yɛ ɛ́ tin ɛ́ etsi e Ɛyoŋ ɛ Zɛɛb, deenek, bi ɛ́ looba nɛ yɛ ɔɔ, bi eesa ɛnyɔɛpe. 9 Tin, bi ɛ wa mbɛk pak bot ɔɔ, guka náá, bi eesyem é mis ɛ Zɛɛb. É di'enek, tsi yenek eekwyesal bin ndjɛ sɔs, etɛɛ náá, bi ààpalooba nɛ yɛ. 10 Mot di eduwal etsi e Zɛɛb djas, bhii tak, nyɛ kadi ɛ́ ààbaal wat tɔ sama etsi tak ɔɔ, deenek, mot tak ɛ́ nɛ ndjɛ é etsi djas. 11 Etɛɛ náá, Zɛɛb ɛ́ nake náá: «Sa mot ààsa mɛzɔ», yɛ ɛ́ nyɛy ɛ nabaazoke náá: «Sa mot ààgó sɔ mot* nɛ tɔDɛt 5.18; Ɛwy 20.13 nɛ tɔ Dɛt 5.17..» Tin, wɔ gó sɔ'ɔ mot ɔɔ, ye nakoozodi náá, wɔ duwal ɛ́ tsi mɛzɔ, gua náá, wɔ ààpaduwal etsi. 12 Tin, bi goka nɛ ɛlii, nɛ ɛkɛ ɛ́, dáa bot ɛ di egu náá, bɛ waapɛ́ɛaa nɛ etsi ee di enɛɛg bot pɛka ɔ. 13 Guka náá, é ghɛŋ Zɛɛb aapɛ́ɛ bot ɛ, nyɛ aanàkwaagek ghoŋ nɛ bot ɛ nadi ààgek bɛsɔ bɔɔ ghoŋ ɔ. Tin, mot di egek bɛsɔ bɛ ghoŋ ɔ, nyɛ aanàdi nɛ bwoo nɛ epɛ́ɛ e Zɛɛb.

14 Bɔn-nyɛɛg bam, yɛ ɛ́ étɛp yé mot aake náá: «Mɛ nɛ ɛdum ɛ koŋ nɛ Zɛɛb», nyɛ ɛ di ààtel yɛ tɔ mɛsa ɔɔ? Kɔkɔ mbi yenek ɛdum ɛ koŋ nɛ Zɛɛb ɛ nɛ ghwyil ɛtsik nyɛ? 15 Tin, yɛ bɛ náá, bɔn-nyɛɛg bin tɔ Yezu Klisto tok nɛ kaad ɛbɔt, ààbɛ nɛ sa dek mɛlu djas ɔɔ, 16 bi ɛ di ààdjɛ bɛ esa ee di egoka nɛ tsik ɔɔ, étɛp yé bi di elɛɛ nɛ nɔɔ náá: «Tɔ́ka tɔ egwyem, betka mɛnyel men ɛnyɔɛpe, da bi ɛ́ dɛ djil»? Yɛ ɛ́ yii toto. 17 Yɛ ɛ́ tyee wat nɛ tɛp ɛdum koŋ nɛ Zɛɛb. Embɛɛ mɛsa ɛ di ààkɛ lɔɔg wat nɛ ɛdum ɛ koŋ nɛ Zɛɛb ɔɔ, yenek djas ɛ́ toto.

18 Mot ɛ́ nɛ ghwyil ɛke náá: «Wɔy ɛ́ nɛ ɛdum ɛ koŋ nɛ Zɛɛb, mam nɛ embɛɛ mɛsa!» Mɛ waabɔɔza nɛ nɛ náá: «Wɔ ɛ́ nɛ ghwyil ɛlyaal mɛ ɛdum ɛ koŋ ɛ lɔ nɛ Klisto, dhi wɔy ààbɛ nɛ embɛɛ mɛsa? Tin, mam ɛ́ waalyaal wɔ ɛdum koŋ ɛ lam tɔ embɛɛ mɛsa mam.» 19 Wɔ nɛ myaal náá, Zɛɛb ɛ ngɔt é? Deenek, dɔɔ nɛ embee esisim pe nɛ baamyaal yɛ, bela náá, bɛ nɛ pwak nɛ bwoo. 20 Wɔ ɛ́ nɛ egeka tɔ mɛsel mɔ? Wɔ ɛ́ ɛpekwyɛl ɛbee esa ee di elyaal náá, ɛdum ɛ koŋ ɛ di àànyen tɔ mɛsa ɛ, yɛ ɛ́ yii toto? 21 Bhaab yenaka Abalaam nasa dáa, nyɛ neebela di ɛdi mot epiki é mis ɛ Zɛɛb? Ye nabɛ ɛ́ dum nɛ embɛɛ mɛsa mɛ? Yɛ ɛ́ é sok nyɛ nanɔɔ mɔn'ɛ Izak, ka nyɛ buwa kɔ mesa-ebuwa ɛ? 22 Wɔ eebee nyɛ, ɛdum ɛ koŋ ɛ lɛ nɛ Zɛɛb nadi ekɛ ɛ́ sama nɛ mɛsa mɛ. Yɛ ɛ́ mɛsa mɛ di elyaal etsɛɛtsɛ náá, nyɛ eedum koŋ nɛ Zɛɛb ɛ. 23 Tin, sa Ekwyala e Zɛɛb di elɛɛ eebela ɛsuk: «Abalaam naadum koŋ nɛ Zɛɛb, Zɛɛb naadjɛ nyɛ di epiki* nɛ tɔ Eza 41.8; Dh2 20.7..» Tin ɛ́ Zɛɛb nadjóo nyɛ sɔ'ɛ. 24 Bi eebee biyɔ bɛmet náá, Zɛɛb bee mot piki ɛ́, dum nɛ mɛsa mɛ nyɛ di esa ɛ, ààkabɛ dum nɛ ɛdum ɛ koŋ nɛ ɛdum ɛ koŋ toto.

25 Dhiiti geka ɛ́ náá, ye nazobaasael ɛ́ deenek nɛ moma mɛzɔ nadi edjóoaa Layaab ɛ. Nyɛ naabeeaa piki é mis ɛ Zɛɛb, etɛɛ náá, bot ɛ, bot ɛ mbyak Yisalaɛl nalwom sok náá, bɛ kɛbala dɛl ɔ, nazɛsulal ɛ́ pɛ daa lɛ. Tin, nyɛ naabaazɛkwyee bɛ nɛ ɛlyaal ɛ bɛ mbɛɛ ze bɛ aasik é tak ɛ. 26 Tin, tyee wat nɛ, nyel mot, yɛ di ààbɛ nɛ eswos ɔ, yɛ ɛ́ muu, deenek yɛ ɛ́ tyee wat nɛ ɛdum ɛ koŋ, yɛ di àànyen tɔ mɛsa ɔ, yɛ ɛ́ yii toto.