1 Mɛwɔ nɛ ezyaala dus wo pak'en? Ye dus ɛ́ tɔ ɛkwosak ɛ di eswak tɔ mɛnyel men ɛ. 2 Bi ɛ́ nɛ gwyes ɛbela dhiiti sonok, tin, bi ààbela yɛ. Ye kalwom bin ɛ́ náá, bi gó mot. Bi ɛ́ nɛ gwyes dhiiti sonok, tin, bi tok nɛ ghwyil ɛbela yɛ. Ye kalwom bin ɛ́, bi di tɔ mɛwɔ nɛ ezyaala pak'en. É di'enek, bi ɛ di ààbela sa bi di ekwyɛl ɛwaab ɔɔ, yɛ ɛ́ etɛɛ náá, bi ààgu ɛwaab ɛ yɛ pɛ daa Zɛɛb. 3 É sok bi di ewaab dhiiti sonok nɛ Zɛɛb, da bi kadi ɛ́ ààbela ɛ, yɛ ɛ́, etɛɛ náá, bi ɛ́ nɛ embee mɛgham. Esonok bi di ewaab nɛ Zɛɛb ɛ, yɛ ɛ́ étɛp ɛsa mɛkwosak mɛ elyem bin. 4 Biyɔ bot ɛ mɛzɔ, bi ààgu náá, ɛkwyɛl ɛ esa e bɔs saŋ ɛ́ náá, bi di bot ɛ mɛbhuka ɛ Zɛɛb é? Tin, guka náá, mot di ekwyɛl esa e bɔs'ak ɔ, nyɛ ɛ́ mot mɛbhuka ɛ Zɛɛb. 5 Deenek, sa bi ààgek náá, yɛ ɛ́ yii toto, sa Ekwyala e Zɛɛb di elɛɛ ɛ́ náá: «Zɛɛb nɛ kwyɛl Sisim nyɛ nawa tɔ les ɛ ɛbuɛpe.» 6 Tin, enɛm nɛ embɛɛ ee Zɛɛb sa nɛ nes ɛ eedhaa mɛbu. Etɛɛ náá, Ekwyala e Zɛɛb nɛ baalɛɛ náá: «Zɛɛb nɛ byen bot ɛ ɛghɛɛ nyel, tin, nyɛ sa enɛm nɛ embɛɛ bɛ ɛ nɛ bot ɛ di etela ɔ*..» 7 Tin, bi goka ɛ́ nɛ ɛlooba nɛ Zɛɛb, da bi ɛ́ byen esesɛɛ e dim mot mɛkɔŋ, nyɛ waakaab tɔ́ ɛtsetaɛpe nɛ nen. 8 Kunaaka nɛ Zɛɛb, tin, nyɛ aakunaa nɛ nen. Biyɔ bot ɛ mesyem, gwyiika mɛmbɔ men, diska edhuud e ebhum elyem bin, biyɔ bot mɛdjhaaz pɛ ɛko, bhimis pɛ si. 9 Dika tɔ ghoŋ, djeka, bɔtka ekaad e ɛpum. Tin, egɔ bin waaliiza mɛgwyɛ, mɛmyaala men ɛ́ waaliiza ghoŋ. 10 Dika nɛ mɛsila é mis mɛ Ghɛŋ, tin, nyɛ waadjɛ bin duu.

11 Bɔn-nyɛɛg bam, sa mot ààpɛ́ɛ mɔn-nyɛɛg. Etɛɛ náá, mot di ebyak mɔn-nyɛɛg, nɛghu ɛpɛ́ɛ nyɛ ɔ, nyɛ byak ɛ́ etsi e Zɛɛb. Deenek, nyɛ pɛ́ɛ ɛ́ etsi e Zɛɛb. É di'enek, wɔ kasaŋ ɛ́ náá, wɔ di tetɛp etsi e Zɛɛb. Wɔ ààpakasaa náá, wɔ kɛ dáa etsi di elɛɛ. 12 Tin, Zɛɛb nyɛy ɛmet mot di edjɛ etsi, nyɛy mot di egoka nɛ ɛpɛ́ɛ ɔ. Nyɛ ɛmet ɛ́ di egó nɛ ɛtsik ɛ́ bot. Wɔ bee tin náá, wɔ moo zɛ, wɔy mot di epɛ́ɛ mɔn-nyoog ɔ?

13 Gwakeka mɛ, biyɔ bot ɛ di eke náá: «Bis ɛpetɔ́ bɛdjoŋ mos, nɛghu djɛmɛn pɛ dhiiti ghaada sis, kɛsa tu mbu, étɛp ɛkɛbɔmsa esa, tin bot waabela epata» ɔ. 14 Ghuna bi ààgu sa aasa bin djɛmɛn ɛ. Bi ɛ́ tin ɛ́, dáa ba bɔɔ eguud di ewyis, ààbɔya batsa, yɛ ɛ́ diib ɛ. 15 Gwakeka etɛp ee bi di egoka nɛ ɛke ɛ́: «Ghɛŋ ɛ kwyɛl ɔɔ, mena dika nɛ tsik ɔɔ, deenek, mena aasaka tɛp sis, tɛp kɛl.» 16 Tin, guka náá, bi nɛ kwyɛl ɛghɛɛ mɛnyel nɛ ɛbet. Mbi mɛfulu menek àànyɔ. 17 Yɛ bɛ náá, mot di egu ɛsa mɛnyɔ, nyɛ kadi ɛ́ ààsa yɛ ɔɔ, mot yenɔk ɛ́ tɔ mesyem.