1 Bɔn-nyɛɛg bam, sa biyɔ djas ààsaa náá, bi needi bɛlyoel. Etɛɛ náá, bisɔ bɛlyoel aapɛ́ɛaa ɛ́ ɛlyelɛpe dhaa bot djas.

2 Menabɛlka djas nɛ bu ɛdjak. Tin, mot ɛ di ààbɛ nɛ ɛdjak tɔ lii yɛ ɔɔ, nyɛ ɛ́ piki mot, nyɛ ɛ́ nɛ ghwyil ɛgu ɛdil ɛ nyel'ɛ. 3 Yɛ ɛ́ tyee wat nɛ é ghɛŋ mena di ewaka mɔɔ gwooz tɔ nuub eyaaga étɛp bɛ neelooba nɛ nena ɛ, yɛ ɛ́ deenek ɛ, mena di nɛ ghwyil ɛdjɛɛd mɛnyel mɔɔ. Sa bɛ di etiŋal yaaga é nuub ɛ, étɛp ɛpem nyɛ ɛ

4 Yɛ ɛ́ dhatyee elɛɛd, ye nakoozobɔk dáa, boo pup ɛ di etiidal yɛ. Tin, ye kadi ɛ́ ba mɔɔ wul ɛ di edjɛɛd yɛ, ye kadu-du ɛ́ pɛ kyee mot di ebe yɛ ɔ di epem ɔ. 5 Yɛ ɛ́ tyee wat nɛ djem, Yɛ ɛ́ mɔɔ kyes ɛtɔɔlɛpe é nyel mot, yɛ ɛ́ nɛ ghwyil ɛdiig bet náá, yɛ waasa eboo etɛp.

Beeka: mɔɔ du ɛ́ nɛ ghwyil ɛsa náá, boo dik dyak djas. 6 Yɛ ɛ́ deenek, djem ɛ́ dáa du. Yɛ ɛ́, di embee esesɛɛ dyeebadi ɔ, yɛ ɛ́ ba mɔɔ kyes ɛtɔɔlɛpe é nyel mot, yɛ ɛ́ nɛ ghwyil ɛpul tu nyel mot. Djem mot ɛ́ nɛ ghwyil ɛdik tsik mot, kana ɛbyel ɛ lɛ nɛ kɛkum dwoo ɛsyee ɛ lɛ. Du tak dus ɛ tɔ du na kɔm-kɔm di ààdim ɛ.

7 Mot ɛ nɛ ghwyil ɛsa náá, bɛtit ɛ dik djas, bɛsu, enen dɔɔ nɛ bɛnyɔ looba nɛ nɛ. Tin, nyɛ naazesa náá, nyɛ di nɛ ghwyil ɛdjɛɛd bɛ. 8 Yɛ kabɛ djem ɔɔ, mot tok nɛ ghwyil ɛdjɛɛd yɛ. Etɛɛ náá, yɛ ɛ́ mbee sonok di ààdi gwyem ɛ, yɛ ɛ́ tɔɔɔ nɛ nea di egó bot ɔ. 9 Mena duwal Ghɛŋ Sɛɛg'enaka ɛ́ nɛ edjem bina. Deenek, yɛ ɛ́ nɛ djem tak wat ɛ, mena di ebaakal bot ɛ Zɛɛb nakus, di enɔŋel nɛ nɛ ɔ. 10 Tin, mɛkpa mɛ duu nɛ ekɛlok zodus ɛ́ tɔ nuub tak wat. Bɔn-nyɛɛg bam, yɛ ààgoka nɛ ɛdi ɛ́ deenek. 11 Ye tok nɛ sɔɔgɔ wat di edjɛ tɛtɛ mɛdii nɛ ɛ́ baadjɛ mɛdii mɛ na gwyee-gwyee. 12 Bɔn-nyɛɛg bam, le fiigh tok nɛ ghwyil ɛ́ ɛdjɛ bhum zaboka. Kel sɛŋ tok nɛ ghwyil ɛ́ ɛdjɛ bhum fiigh. Yɛ ɛ́ tyee wat, sɔɔgɔ di ewyisal mɛdii mɛ di egwom ɛ, ye tok nɛ ghwyil ɛbaawyisal tɛtɛ mɛdii.

13 Dhiiti mot pak'en ɛpegek náá, nyɛ ɛ́ nɛ etsoŋ nɛ mɛtselal é? Tin, nyɛ ɛ́ goka nɛ ɛtel yɛ ɛ́, tɔ mɛsa mɛ ghwyikwyee, nɛ tɔ mɛsila mɛ nyel nɛ etsoŋ. 14 Tin, bi ɛ di nɛ bhyen, ààbɛ nɛ lyem ɛ ɛgwakel ɔɔ, betka ɛghɛɛ mɛnyel, etɛɛ náá, bi ààlɛɛ etsɛɛtsɛ. 15 Kwaambi yenek etsoŋ ààdus pɛ ɛko, yɛ ɛ́ etɛp e bot ɛ bɔs'ak, yii bot ɛ epuud, yɛ ɛ́ yii Satan. 16 É di bhyen nɛ mbee lyem di ɔ, tin, bi ɛ́ waabaabela ɛzɛm nɛ ekɔkɔ e mbee etɛp djas.

17 Tin, etsoŋ ee di edus pɛ tɔ gwoo ɛ, pookodi sok ɛ́ dɛɛ. Bhii tak etsoŋ e tak kadjɛ ɛ́ mɛtela mɛ lyem, egwyem nɛ ɛgu ɛlii, nyɛ nɛ gek bɔɔ bɛsɔ ghoŋ, nyɛ ɛ́ nɛ bu enɛm nɛ embɛɛ. Nyɛ ààsa mbɛk pak bot, nyɛ ààgu mɛkɔŋ. 18 Bot ɛ di ewa egwyem pak'ɔɔ, bɛ ɛ́ dáa bot ɛ di ebɛ see ɔ. Deenek, bot ɛ tak ɛ́ waabɔ́k bhum, bhum tak ɛ́ mɛsa mɛ bot ɛ epiki.