1 Etsi ɛ Moiiz nazobɛ ɛ́ mbaŋa-mbaŋa di elyaal mena embɛɛ esa aasael djɛmɛn ɛ. Tin, yɛ ààlyaal etsɛɛtsɛ etɛp e tak dáa ye di ɛ. Étɛp tak ɛ́ di náá, ɛkeka mbi buwa wat membu nɛ membu tok nɛ ghwyil ɛdis edhuud e bot ɛ di esaa ɛkunaa nɛ Zɛɛb ɔ. 2 Yɛ ɛpedi ɛ́ náá, kwaambi yenek ɛdjaala ɛ Zɛɛb ɛpedis bot edhuud nɛ tsɛɛtsɛ ɔɔ, pe bɛ aanàkabaadi nɛ esiiza nɛ mesyem mɔɔ. Tin, bot ɛ́ waakat ɛbaakeka buwa. 3 Tin, ebuwa binek ɛ́ di esa náá, mot gheetetaala mesyem mɛ nyɛ nadi esa membu nɛ membu ɛ. 4 Etɛɛ náá, ghiya ngom ngɔmbɛ nɛ yii ngom taa tok nɛ ghwyil ɛdis mesyem mɛ bot.

5 Dum nɛ tɛp tak, é sok Klisto nadi ezyɛ kɔ ɛko ɛ bɔs ɛ, nyɛ naake nɛ Zɛɛb náá:

«Wɔ nabɛ ɛ́ ààbɛ nɛ gwyes ebuwa,

ààbɛ nɛ gwyes esa e ɛgwyena.

Tin, wɔ naasa náá, mɛ di nɛ nyel.

6 Wɔ nabɛ ɛ́ ààmyaala nɛ ebuwa nadikaaa wɔ kɔ mesa-ebuwa ɛ,

nɛghu ebuwa nakaaa wɔ étɛp ɛpel mesyem mɛ bot ɛ.

7 É di’enek, mɛ naazɛke náá, "Zɛɛb’am, mɛ eezyɛ pɛ daa lɔ mam mɛ ɛmet,

étɛp ɛsa ɛkwosak ɛ lɔ,

dáa ye nakwyalaa dum nɛ nam tɔ mɛkana mɛ na dɛɛ ɛ✝."»

8 Tin, nyɛ nakan ɛke sok ɛ́ náá: «Wɔ ààpakwyɛl ebuwa, nɛghu esa e ɛgwyena, wɔ ààpakwyɛl bɛtit zedikaaa kɔ mesa-ebuwa ɛ, nɛghu ebuwa dikaaa étɛp ɛpel ɛ mesyem mɛ bot ɛ, wɔ nabɛ ɛ́ ààmyaala nɛ sa wat.» Dhi ebuwa binek di ekaaa dáa etsi di elɛɛ ɛ. 9 Bhii tak, nyɛ eezɛke náá:

«Beea mɛ, mam mɛ ɛmet eezyɛ zɛsa ɛkwosak ɛ lɔ.»

Deenek, Klisto eedis ebuwa na mwa, nyɛ eedjila nɛ buwa yɛ. 10 Yezu Klisto naasa ɛkwosak ɛ Zɛɛb, deenek, nyɛ naaka nyel’ɛ met buwa sok wat kɔm-kɔm sii nɛ kɔm. Tin, nyɛ naasa náá, mena dika bot ɛ edɛɛ.

11 Ghaa-Zɛɛb djas dyeebadi ɛ́ tetel mɛlu djas étɛp ɛsa mɛsa mɛ, étɛp ɛka ebuwa e tak wat mɛlu djas. Bela náá, ebuwa tak tok nɛ ghwyil ɛdis mot mesyem. 12 Tin, Klisto nyɛ ɛmet nazoka buwa ɛ́ sok wat étɛp ɛdis ɛ bot mesyem, bhii tak, nyɛ moo ɛ́ ndiindel pɛ mbɔ eghɛŋ ɛ Zɛɛb. 13 Nenak, yɛ ɛ́ tin ɛ nyɛ di ebwood náá, Zɛɛb sa náá, bot ɛ mɛbhuka mɛ di dáa poba bɛ di ekɛl mɛko ɛ. 14 Deenek, nɛ buwa tak wat, nyɛ naadis bot edhuud disak wat ekeekeee étɛp bot needi dɛɛ.

15 Tin, dɔɔ nɛ Sisim na Dɛɛ ɛpebaalɛɛ mena náá, yɛ ɛ́ etɛp e tsɛɛtsɛ. Etɛɛ náá, nyɛ pookoke ɛ́ náá:

16 «Ghɛŋ ke ɛ́ náá:

Beeka ɛbhɛŋ ɛ mɛ aasa nɛ nɔɔ ɛ,

bhii mɛlu menek.

Mɛ waakwyal mɛtiŋ mam ɛ́ tɔ ebhum elyem bɔɔ,

mɛ waasɔn yɛ tɔ esiiza bɔɔ.»

17 Bhii tak, nyɛ eebaazɛke náá: «Mɛ aanàbaataala ɛdjak ɛ lɔɔ, nɛghu mesyem mɔɔ.» 18 Ghuna, é di mesyem di epelaa ɛ, bot tokapɛ nɛ ghwyil ɛbaaka buwa étɛp mesyem.

19 É di’enek, bɔn-nyɛɛg bam, menaka ɛ́ nɛ ɛbwaalel náá, mena waanika tɔ Di na Dɛɛ dhaa nyel, kɔ ɛsu ɛ ghiya ɛ Yezu naso tyee buwa ɛ. 20 Nyɛ naazedii mena ze na bes di nɛ tsik ɛ, nyɛy nyɛ ɛmet ɛ́ nadhaa é ze boo lɛmbɛ na pip-pip ndjaa-Zɛɛb, ye kwyɛl ɛlyaal ɛ́ nyel’ɛ met. 21 Tin, menaka ɛ́ nɛ boo ghaa-Zɛɛb, mot di kukuma di edjɛɛd ndjaa-Zɛɛb ɔ. 22 Djhookunaaka nɛ Zɛɛb, nɛ lyem wat, nɛ ɛdum ɛ koŋ nɛ Zɛɛb zepyet ɛ, etɛɛ náá, ghiya ɛ Yezu eezegwyii embee esiiza ee di tɔ bhum elyem bena ɛ, dɔɔ nɛ mɛnyel mena eezegwyiiel nɛ tɛtɛ mɛdii. 23 Djhoobaalka ɛlyelɛpe ɛbwaalel ɛ mena di egoolaka ɛ, etɛɛ náá, Zɛɛb ɛ́ sosoob tɔ ekɛk bɛ. 24 Djhookwyɛɛgelka pak’enaka étɛp ɛdjɛel mɛghaaz tɔ kwyɛl nɛ ɛsa enɛm esa. 25 Sa mena ààkatka ɛtɔ́ pɛ ndjaa mendjaala, dáa bɛdhiiti bot moo nɛ mɛfulu mɛ ɛsa yɛ mos ɛ. Tin, mena goka ɛ́ nɛ ɛdjɛel mɛghaaz pak’enaka, etɛɛ náá, bi ɛpebee biyɔ bɛmet náá, ɛlu ɛ Ghɛŋ eezekunaa.

26 Etɛɛ náá, bhii bot aazegu etsɛɛtsɛ ɛ, mena baasyemka nɛ ɛkwosak ɛ lena ɔɔ, ye tokapɛ nɛ buwa étɛp ɛpelak mesyem mɛ tak. 27 Ye kalik mena ɛ́, ɛgwaal tɔ mɛnyɛnyɛ epɛ́ɛ e Zɛɛb nɛ boo du na goo-goo yii aadik bot ɛ mɛbhuka mɛ ɛ. 28 Mot ɛ di ààlooba nɛ etsi ɛ Moiiz ɔɔ, nyɛ waagóa ààbɛ nɛ ghoŋ, yɛ ɛ́ bɛ náá, bɛtyaasɛs ebá nɛghu bɛlɛl eemyaal sa nyɛ sa ɛ. 29 É di’enek, yɛ aakadi tin dáa nɛ mot di ebhina Mɔn ɛ Zɛɛb ɔ, nɛ mot di ebee ghiya ɛbhɛŋ ɛ nasa náá, ɛgwakel baabula pak bot nɛ Zɛɛb é mis toto ɔ, nɛ mot di elee Sisim di ɛsuk ɛ enɛm nɛ embɛɛ ɔ? Bi eepookogek mbi feŋ yenɔk mot di egoka nɛ ɛbela ɛ? 30 Tin, mena nɛ guka mot nalɛɛ náá:

«Yɛ ɛ́ mam ɛ di egoka nɛ ɛbulal ɛbiyo bɛ sa bin ɛ, mam ɛ di edjɛ mot nɛ mot yɛ efute.»

Nyɛ naabaalɛɛ náá:

«Ghɛŋ ɛ́ waapɛ́ɛ bot ɛ mbyak’ɛ✝.»

31 Yɛ ɛ́ àànyɔ náá, mot di nɛ ndjɛ é mis ɛ Zɛɛb mot di nɛ tsik ɔ.

32 Pookotaalaka nɛ sa bi naboma nɛ yɛ é ghɛŋ sok, é sok Zɛɛb nabɛɛ bin mis étɛp bin neegu etsɛɛtsɛ ɛ. Bi naasa mɛghaaz tɔ eboo mezuk mɛ bi naboma nɛ yɛ ɛ. 33 Bɛdhiiti bot pak’en naaleeaa, tiigaa é mis mɛ bot, bela náá, bɛdhiiti bot nabɛ ɛ́ nɛ lyem ɛkwyee bot ɛ nadi ezuk nɛ ɛtiigaa dáa bɔɔ ɔ. 34 Bi naazuk lɔɔg wat nɛ bot ɛ membok. Bi nadi ɛ́ tɔ mɛmyaala, é sok bɛ nadɛk mɛvu men ɛ. Etɛɛ náá, bi nɛ gu náá, bi ɛ́ nɛ tɛtɛ mɛvu di kɔm-kɔm sii nɛ kɔm ɛ. 35 Sa bi ààbulal lyem bhis dum nɛ ɛbwaalel bi di nɛ yɛ ɛ, etɛɛ náá, bi aabela boo efute. 36 Ye goka ɛ́ náá, bi wa zii étɛp bi neesa ɛkwosak ɛ Zɛɛb, étɛp bi neebela sa nyɛ nakɛk bin ɛ. 37 Tin, Ekwyala lɛɛ ɛ́ náá:

«Tɔ mɔɔ ɛwala, tɔ ba mɔɔ pes ɛwala,

mot di egoka nɛ ɛzyɛ ɔ, nyɛ waazyɛ,

ɛzyɛ ɛ lɛ eezekunaa.

38 É di’enek, Zɛɛb ke ɛ́ náá, mot di tɔ epiki é mis mam tɔ ɛdum ɛ koŋ ɛ lɛ nɛ Zɛɛb ɔ, nyɛ waatsak.

Tin, nyɛ bula bhis ɔɔ, mɛ aanàkwaamyaala nɛ nɛ✝.»

39 Mena tokeka bot ɛ di ebula bhis tɔ ɛdum ɛ koŋ nɛ Zɛɛb, da wo ze ɔ. Menaka ɛ́ bot ɛ di tɔ ɛdum ɛ koŋ nɛ Zɛɛb, bot ɛ di tɔ ze tsik na kɔm-kɔm ɔ.