1 Luvangilo lwa makani gonda, ndikuvalongela hilo mumlumbe Nguluvi kwa fila fyevikela vanu na mumlumbe Nguluvi na muvalumbile vanu vangi na kuhongecha na aga gonda gagitwe kwa ajili lya vanu vagi vonda, 2 kwajili lya vang'chale na vonda vene umwimike, neke tupatile kwikala maisa gya kuchika na lutengamaso pamwi na kwikala maisa ambagyo yegigehe na uginyange na kyanda nofu. 3 Lukani ulu nde lunofu na lukumkelisa Mtwa Nguluvi Mlowa vetu, 4 yeikela vanu vonda valowolwe na vauchele undakyene. 5 Kwakuva agehe Nguluvi yumwi na agehe munu yumwi yeiwesa kuvavika pamwi Nguluvi na vanu, munu uyo nde Kilisito Yesu, 6 yeajihechile yumwene kwajili lya kuvakombola vanu vonda. Uswida va lukani ulo ukahumichwe chipindi chinofu pechifikile, kuva Nguluvi ikela kuvalowa vanu vonda, 7 kwakuva nene ndikahagulilwe kuvecha mdalika na mnjagila, ndilonga undakyene vala se udesi ndiveche muwulanichi va vanu se Vayawudi, ndivawulaniche udikilo na undakyene.

8 Suwe, poponda pemwitang'ana kumlumba Nguluvi ndisaka vagosi vevavihaguwe kugita fila fye fikumwonesa Nguluvi, vanamule mawoko gyao gyegiwogofichwe pevakumlumba bila luvipo vala kwipinja. 9 Ndeni ndeni ndikela vadala vave na uginyange pevifwala mwenda gyao na vaveche na kyanda nofu na vala se kwa kwilembecha kwa kubota fwili na kwilembecha kwa sahabu awu lulu awu myenda gya sendi ngomi, 10 ila vayilembeche na kuyovelecha kwa magito manofu ngita peing'ang'wa kwa vadala vevakumwidikila Nguluvi. 11 Vadala ving'ang'wa kuchika hela na kuva vahuvilila chipindi peviwulanichwa njowo cha Nguluvi. 12 Nene sendidikila mdala amuwulaniche awu amkang'ale kumtuwe mgosi, ing'ang'wa kuchika hela. 13 Kwakuva akawumbilwe tandi Adamu na pambele akawumbilwe Hawa. 14 Ndena, Adamu seyeachangilwe, ila mdala yeachangilwe, nave akagitile sambi. 15 Nondee vadala davalowelwa kwa kubaba vana, ngita akwikala muudikilo na lukelo na kuva vanu vevahaguliwe kajili lya Nguluvi na kwikala unofu na vanu.