1 Ubihile kuvalakila vavaha vagosi, ila muvalongele ngita wiywanga na daada vako na vagitile vadimi ngita vakolo vako, 2 vadala vagogolo vagitile ngita maye vako na vahinja vagitile ngita vahacha vako, kwa uginyange vonda.

3 Vaginyange kwaajili lya kuvatanga vagane vevagehe vagane ndakyene. 4 Ila mgane yeagehe na vana awu vachukulu, avo ving'ang'wa kwiwulanicha kugagita gala gyeving'ang'wa vagagite vaganja vawo na ndeni kuvahomba vasasi vawo na vagogolo vawo, kwakuva ilyo nde luchowo lwa kukelisa pautalo pa Nguluvi. 5 Mdala mgane ndakyene, yeihela munu va kumtanga, amvikile luhuvilo lyake kwa Nguluvi na iendelela kumlumba Nguluvi amtange pamunyi na pamiye. 6 Ila mgane yeakwikala kwa kwitagalicha sendi, uyo afuwe ata ngita agehe uwumi. 7 Uvagavile malagilocho aga, vabihile kuvecha na lulogani. 8 Ila ngita munu seakuvalela vanu va vaganja vake, unofu hilo avalele va kukaye lyake, ngita sevagita ago davavecha sedikila gala gyetudikila. Davavecha vanjanganifu kuchumba vala sevadikila.

9 Ubihile kumvika mulula nda lwa vagane, mgane yeyonda yeseagehe na miyaka kyumi sita. Kangi aveche atolilwe mala yimwi hela, 10 na aveche mwene njuma nofu, yeavalelile vana vake unofu, yeiwanuka vagenji pakaye lyake na yeavaogofiche magulu gya vanu va Nguluvi na avatangile vanu sevakali na umwimike na yeihechile kugita magito manofu.

11 Ubihile kuvavika wagane se vavaha mulipinga kwakuva ludoboko lwao lwa mvili chikilutala kuva na ludali hilo kuchumba kumjuma Kilisito, davisaka kutauka kangi, 12 nondee davionekana vihela uginyange lya liagano lyao lya pamwandi. 13 Vagane ngita avo vikwanja kuyacha vakati vawo vakiyuvayuva mukaye cha vanu, seunofu hilo vikwanja kuvaheha vanu, na kwitasa mu makani gya vanu vangi, kuno vakulonga makani seving'ang'wa kulonga. 14 Nondee ngandisakile vagane se vavaha vatauke, vapate vana na kuchivika unofu kaye chawo neke vachwindama vetu vabihile kuvesa kulonga mawofu pakyanya lya nefwe. 15 Kwakuva vagane vangi vilekile kumdikila Nguluvi na kuhelela kwa Setani. 16 Ila ngita mdala yeyonda yeamdikiye Kilisito anavagane mukaye lyake, ing'ang'wa avatange, se kulilekela lipinga lya vanu va Nguluvi vevamudikiye Kilisito mchigo ugo, neke lipinga lya vanu va Nguluvi vevamudikiye Kilisito vawese kuvatanga vagane vala vavesigiye weka hela.

17 Filongochi va lipinga lya vanu va Nguluvi vevamudikiye Kilisito, yevakuvalongocha vanu unofu, ving'ang'wa uginyange ukomi vala vevidalika na kuwulanicha njowo cha Nguluvi. 18 Kwakuva masimbo ga Nguluvi gilonga, ubihile kumudinda mlomo ng'ambako peitova mabenelo, ndeni ndeni masimbo gilonga, "Mnyigendwa ing'ang'wa agavilwe sendi chake." 19 Ubihile kwanuka nongwa cha vagogolo chechi bihile kulolwa na vaswida vavili awu vadatu. 20 Vala vevigita sambi uvakane pawelu, neke vangi vawese kwogopa.

21 Na kuvaswitilicha pautalo lya Nguluvi, pautalo lya Kilisito Yesu na pautalo lya ndumindumi va kuluhano kwa Nguluvi ugafwate malagicho aga bila kuleka ata limwi, vala kumumwilila munu yeyonda kwa kila kyeagita. 22 Ubihile kugita kisatu kuvikila munu yeyonda mawoko kwajili lya kumgumbanikila Mtwa vala kwiwunga mu sambi cha vanu vangi, wikale kwa kumkelisa Nguluvi.

23 Ubihile kunyuwa malenga hela, ila nyuwe na difwayi ludodo kwajili lya lileme lyako, kwakuva witamika hilo.

24 Sambi cha vanu vangi chiwonekana wachiwachi, nacho chikuvalongola mulihigo, ila sambi cha vangi dachiwoneka pambele hela. 25 Ndeni ndeni, magito manofu gioneka wachiwachi na ata gale gyegifyamile kigono kimwi dagiwoneka.