1 Vasutu vonda vevagehe vadikila ving'ang'wa kuvaginya vakomi vao, neke kubihile kuvecha na luchowo lwa vanu kuliliga litawa lya Nguluvi na mawulanicho gyetu. 2 Vasutu ambavo vakomi vao nde lipinga lya vanu vevamudikiye Kilisito, vabihile kuvabeda kwakuva nde vadikila vayawo. Ila vingang'wa kuvagumbanikila kwa unofu hilo, kwakuva avo vipata fayida kuhuma mukasi chao, nde vadikila vayao vevakuvakela.

Ung'ang'wa kuwulanicha na kulanducha njowo ichi. 3 Munu yeyonda yeiwulanicha udesi va njowo ichi na ambaye seikwidikila na njowo cha undakyene cha Mtwa vetu Yesu Kilisito na mawulanichi gyegitigila maisa ga kumukelisa Nguluvi. 4 Munu uyo akwijuma na vala seichela kinu kyokyonda. Nde munu va kukela kidada na ndewo ng'ani pakyanya lya lichwi lye lihela kinu. Ilyo igita kuhumile na wifu na ndewo na maligo na kuvahochela vanu manjanganifu, 5 na kidada kye kihela mwiso kuhuma kwa vanu ambavo luhala chihocha unjanganifu na ambawo sevihela kangi undakyene. Vihocha kuva kugita kasi cha Nguluvi nde ng'asi lya kwipatila umosi.

6 Ndakyene kwikala kwa kumukelisa Nguluvi ikumgita munu aveche na umosi hilo. Akiva igwita na finu fyeanafyo. 7 Kwakuva setuletile kinu kyokyonda baha mu inyi, vala dasetunyamula kinu kyokyonda baha mu inyi.

8 Ila ngita tugehe na kyakuliya na myenda gya kufwala, tung'ang'wa kugwita fyetunafyo. 9 Ila vala vevisaka kuvecha na umosi, hugwilila mumagecho na vagomiye mumitego lwa ludoboko cholofu hilo cha upufi, ambacho chikuvakwega mbaka kwene unjanganifu na uhanangilo. 10 Kwakuva kukela sendi nde umwandi va uwofu vonda. Vanu vangi vadobwike kuvecha na sendi, ata vailekile udikilo na vaidenyile numbula chawo kwa luswigimo wolofu.

11 Ila veve nde munu va Nguluvi, uganyile makani ago gya unjanganifu. Ugite njowo cheching'ang'wa pautalo lya Nguluvi na kwikala kwa kumkelisa Nguluvi na udikilo na lukelo na uhuvililo na pamwi na ufokomasi. 12 Uvitove finofu fita fya udikilo lwako, neke upatile fupo lya uwumi va mbepali veukemelilwe chipindi pemdikile Nguluvi pautalo lya vaswida valofu. 13 Pautalo lya Nguluvi yeaigavila finu fyonda uwumi na pautalo lya Kilisito Yesu yeahumiche uswida va udikilo lwake na kulonga undakyene pautalo lya mtavala va Ponito Pilato, ndikukuswitilicha, 14 ukolele malagilicho aga na kugadikila kwa undakyene mbaka kigono kila peahumila Mtwa vetu Yesu Kilisito. 15 Kuhumila kwa mwene dakivecha chipindi cha Nguluvi chinofu na Nguluvi yeafunyilwe na yeagehe Mtavala weka hela, Ng'achale va vang'achale na Mtwa va vatwa. 16 Yumwene weka hela akwikala mbepali muwelu seuwesa kuhanangwa na munu. Kwihela munu yeamuwene awu dayeiwesa kumulola. Kwa mwene iveche uginyange na umwimike va mbepali! Ndakyene.

17 Vaswitiliche vanu vevagehe vamosi mu inyi iyi, vabihile kwidumba, vabihile kuhuvilila mali chawo, ila vamuhuvilile Nguluvi. Mali sechiwesa kuhuvilwa, ila Nguluvi akutugumbanikila kwa unofu mkomi na akutugavila finu fyonda neke tukeduke. 18 Vaswitiliche vagite manofu, vaveche vamosi mu magito manofu na vaveche vevikwanuka vanu na mu kuvatanga vanu vangi. 19 Kwa kugita ndeni davakwivikila lusanja ambavo daivecha msingi mnofu kwa chipindi chekikwacha. Baho davawesa kwipatila uwumi va undakyene.

20 Timotewo, uvike unofu gyonda gala gyeugavilwe. Ganyile na malongano segakumkelesa Nguluvi na makani gya upufi, ila vanu vangi vakuchikemela, "Uchelo." 21 Kwakuva vanu vangi vakwinjuma kuva na iyo uchelo na mahumulilo gyake vayagiche udikilo.

Ndikuvang'ang'ila kwa Nguluvi vonda avagavile usanzi vake.