1 Muhe va Nguluvi ilonga wachiwachi kuva figono fya mwiso vanu vamonga davautaga kutali udikilo, davakuchidikila muhe chechichanga na kugafwata mawulanichi gya Setani. 2 Mawulanichi gya endena gilanduchwa na vanu vafyangu vevichanga, ambavo natilo chawo chifuwe. 3 Vanu avo uwulanicha kuva vanu vabuhile kutola na kuvawulanicha vabihile kulya fitunga fya fyakulya. Ila Nguluvi afiwumbile fyakula ifyo neke vafiwanuke kwa kuhongecha, kwa vala vevakuidikila na kuuchela undakyene. 4 Kwakuva finu fyonda fyeafiwumbilwe na Nguluvi ndi finofu vala kwihela kinu kyokyonda kyekikanilwa ngita kiwanukwe kwa kumlumba Nguluvi, 5 kwakuva king'alichwe suwe kwa luchwi lwa Nguluvi.

6 Ngita ukuvagavila vakolo malagicho aga, dauvecha ndumindumi msanzi va Kilisto Yesu, veuleliwe na njowo cha udikilo na mawulanicho ganofu. 7 Ila uchileke humulilo sechekumginya Nguluvi na cha upufi. Ukele kwikala kwa kumkelisa Nguluvi figono fyonda. 8 Kuugumbanicha mvili kugehe na fwaida lyake, ila kwikala kwa kumkelisa Nguluvi nde unofu hilo. Kwakuva gegitugavila luhuvilo lwa kwikila nondee na kwikala pambele. 9 Luchowo ulu nde luchowo lwa undakyene na ling'ang'wa kwanukwa unofu kwa mawoko gavili. 10 Nefwe tukwigangamicha kugita kasi kwakuva tukumhuvulila Nguluvi yeagehe wumi ambaye nde mlowa va vanu vonda, kwa vala vevadikila hela. 11 Nondee valagiche vagite njowo icho na mawulanicho ago. 12 Ubihile kwidikila munu yeyonda akubede kwakuva veve nde mdimi, Ila uveche mkangafu kuva mufanu kwa kuidikila na kulonga na lugendo lwako na lukelo na udikilo na kwikala unofu. 13 Mufigono fyonda endelela kuvadalikila vanu na kuvawulanicha mbaka pendikwacha. 14 Ubihile kuleka kuchigitila kasi kila kipanji kikihumile kwa Muhe va Nguluvi kuchumbila kwa vavichi va Nguluvi na kwa kuvikwa mawoko na vavaha. 15 Uhoche hilo pakyanya lya ago gyonda na kugagita neke vanu valole namuna kasi chako peukuchigita. 16 Wilolele hilo kwikala kwa veve na mawulanichi gyako. Endelela kugita ago, kwakuva daugita ago dakwilowa yumwene na vala vevakupulikicha mawulanichi gyako.