1 Vakolo vangu, kwakuva mumwidikila Mtwa Yesu Kilisito, Mtwa va ukomi, mbihile kuvavagula vanu. 2 Tulonge munu yumwi yeafwalile peti lya sahabu na myenda mnofu akwingila pono pemutanganile pamwi na kangi ikwingila munu muhangala yeafwalile myenda yeisakiye. 3 Ngita, nyenye mkumwanuka kwa uginyange yula yeafwalile myenda mnofu na kumulongela, "Wikale baha panofo," Na kumlongela yula muhangala, "Veve wime pala," Awu "Wikale baha panyi pepi lyangu." 4 Wuli, uwo seubagulo pagati lwenu? Wuli, uwo ulamulo venu seuhumile mumahocho mawofu?

5 Vakolo vangu, Munipulikiche! Nguluvi avahaguwe vahangala va inyi iyi neke vapatile kuvecha vamosi muludikilo na kuwanuka ung'achale vevajangilwe vala vevakumkela. 6 Ila nyenye mukuvabeda vanu vahangala! Wuli, vamosi sendevakuvawonela na kuvasindika pautalo lya ludamo? 7 Wuli, sevawo yevakuliliga litawa linofu lya Mtwa vetu?

8 Ngita mukuyikolela lagilicho lya ung'achale ngita peisimbilwe mumasimbo gya Nguluvi, "Mukele vapepi vako ngita pewikwikela yumwene" Damwivecha mwigita unofu. 9 Ila pemukuvabagula vanu, suwe mgitile sambi na malagilicho gakuvahiga nyenye mgitile nogwa. 10 Yealeka kukolela lulagilicho lumwi lwa malagilicho, avecha agitilwe nogwa kwa kuleka kukolela malagilicho gyonda. 11 Kwakuva yula Nguluvi yealongile, "Ubihile kugita ugoni," Akalongile kangi, "Bihile kudocha." Ndena ata ngita seugitile ugoni ila udochile, veve udenyile lulagilicho. 12 Ndena, muveche mukugalonga na kugita ngita vanu davihigwa kwa malagilicho ga Nguluvi yeyikuvavika pekesu. 13 Nguluvi daseihongecha munu yeyonda yeseakuvahongecha vanu vangi. Ila ata mukuhiga Nguluvi agehe na lusungu.

14 Vakolo vangu, ikutanga liki munu pealonga agehe na ludikilo, ila seawonesa kwa magito? Ulo ludikilo luwesa wuli, kumulowola? 15 Ngita maama awu mhacha munya myenda gyegisakiye na ihela kyakuliya. 16 Mmonga venu akamlongela, "Muhelele kwa lutengamaso, mkulota lyoto na kugwita," Ngajila kuvagavila finu fyemuhela, ago gakumtanga liki? 17 Makani ago ndi ngita munu kuvecha na ludikilo ngajila magito.

18 Ila munu awesa kulonga, "Veve ugehe na ludikilo na nene ndigehe na magito." Suwe, daalonga, ndiwonese ludikilo lwako ngajila magito na nene dandikuwonesa ludikilo lwangu kwa magito. 19 Wuli, veve widikila kuva Nguluvi yumwi? Ena! Ila ata mahoka ukwidikila makani aga na kutetema kangi kwa kuwogofya hilo. 20 Mpufi veve! Wuli, wing'ang'a ndikuwonese kuva ludikilo ngajila magito yifuwe? 21 Ibulahimu mgogolo vetu awesile wuli, kudikilwa kuva msanzi? Kwa magito gyake masanzi, chipindi peamhechile usembe mwana vake Isaka pakindangavala kya maganga kya kunyanyila usembe. 22 Wilola, ludikilo lwake lwali pamwi na magito gyake, ludikilo lwake lwatimiye kwa magito ng'asi lya magito gyake. 23 Kwa ng'asi iyo kagatimiye gala masimbo gegalongile, "Ibulahimu akamdikila Nguluvi na kwa kudikila kwa mwene akadikilwa kuva munu yeadikilwe na Nguluvi, ndena, Ibulahimu akakemeliwa mganja va Nguluvi." 24 Suwe, munu huvalilwa kuva msanzi pautalo lya Nguluvi kwa magito gyake vala sekwa kudikila hela.

25 Ndeni ndeni, kutigila Lahabu yeakali mgoni, mwene akadikilwe msanzi pautalo lya Nguluvi kwa kuva akavawanuke valolesa na kuvatanga vahege kwa kuchumbila ng'asi yingi.

26 Suwe, ngita mvili ngajila muhe ufuwe, ndeni kudikila ngajila magito yifuwe.