1 Kwitova kwihumila kwiya? Fihuma mu ludoboko chenu chihafu ambacho chikwitova figono fyonda ngajila mwisho mugati lyenu. 2 Mwidoboka kuvecha na finu na kwakuva semupata mwidocha vanu na mwidoboka hilo kuvecha na finu ila semupata, ndena muvecha na ndewo na kwitova. Semupata kila kyemng'ang'a kwakuva semukumsuka kwa Nguluvi. 3 Na pemukumsuka semupata kwakuva semusuka unofu, mwisuka neke mufitumile kwa ludoboko gyenu. 4 Nyenye vanu vesemudikilwa ndi ngita vagoni, semuchela kuva kuvecha vaganja va makani gya inyi ndi kuvecha mchindwama va Nguluvi? Munu yeyonda yeisaka kuva mganja va makani gya inyi akwigita mchindwama va Nguluvi. 5 Mbihile kuhocha kuva masimbo gya Nguluvi galonga hela, "Muhe yeavikilwe na Nguluvi mugati lyenu agehe na wifu mkomi." 6 Ila usanzi wetugavilwe na Nguluvi ugehe na ludali hilo, ngita pegalonga masimbo gya Nguluvi, "Nguluvi huvapinja vevagehe na kidada ila vanu vevidedeva akuvanemela."

7 Suwe, mumpulikiche Nguluvi, mumpinje Setani na mwene daavanyila. 8 Mumwegelele Nguluvi na mwene daakuvahegelela. Nyenye vemugehe na sambi muleke sambi chenu na mugite manofu na nyenye vemugehe na natilo chivili muleke mahocho gyenu mawofu na muhoche manofu. 9 Musugwime kwa kuva mgitile mawofu na muvembe kwa kukivilicha, kuhekelela kwenu kuveche ngita kukivilicha. 10 Mumwidikile Nguluvi na mwene dakuvanamula.

11 Vakolo, mbihile kwilongela makani mawofu nyenye kwa nyenye, yeakumlonga unganganifu lukolo vake na kumhiga uyo yeakulonga unjanganifu malagilicho lya Nguluvi. Ngita ukuihiga lagilicho, suwe veve seukwidikila lagilicho, ila ukwihiga malagilicho. 12 Nguluvi weka hela ndi munya kuvika malagilicho na kuhiga. Nde weka hela yeawesa kulowola na kudocha. Suwe, veve ndi ani ata umhige muyago?

13 Nondee, mupulike unofu nyenye yemulonga, "Neng'uli awu kilawu datuhelela mu mwani tunga na kwikala ukoya umwaka umwi petugucha na kugula na kupata sendi chongofu." 14 Nyenye semuchela gyedagihumila kilawu. Uwumi venu ndi liki? Nyenye ndi litungu weuwoneka chipindi hela baho huyaga. 15 Ila ngamng'ang'ilwe kulonga, "Mtwa dapeikela, datusigale wumi, datugita kinu kila na kila" 16 Ila nondee mukwigamba na kwinjuma. Kwinjuma kwa ndeni sekunofu.

17 Suwe, munu yoyonda yeachela makani nofu ila seakuligita, igita sambi.