1 Lukololo vangu, tubihile kuvecha vawulanichi volofu. Ngita pemchela kuva nefwe vawulanichi datuhigwa mahigo makomi kuchumba vangi. 2 Nefwe vonda twigumbadula mu makani gyolofu. Ngita munu seakwigumbadula mugala gyealonga, mwene ndi akamilike, awesa kwikanila hilo yumwene abihile kulonga mawofu. 3 Nefwe vanu tuvika fyuma fidodo mumlomo va falasi kyekiwopilwe ndegeyi neke kumlongocha kwetung'ang'a kuhelela. 4 Mulole meli ata ngita mkomi hilo husung'wa na lukala lwelupuga hilo, ila huseduswa kwa pondo ndodo hilo na kuhelela kokonda kweikela yeaguba. 5 Ndeni ndeni, lulimi ndi kinu kidodo hilo muvili, ila kwa ng'asi lyake vanu velonga gya kwigamba hilo.

Ndeni muhoche ata lyoto mdodo hilo ila winyanya litogolo likomi. 6 Ndena, lulimi liwana ngita lyoto. Umemile mawofu molofu, ndi kiwungo kimwi mufiwungo fya mivili, kyekikugita munu kuvecha muwofu mu gyonda gyeihocha na kugagita. Kangi lulimi ndi lyoto weukumnyanya munu na kumhananga wumi vake vonda mu lyoto lyelihuma kumafunde. 7 Munu akuwesa kufuga vang'oko vonda va kudasi na fidege na vang'oko fyefikwavala na vang'oko va mu inyanza, 8 Ila kuhela munu yeawesile kufuga lulimi. Lulimi ndi kinu kiwofu weseuchika lumemile sumu yeyidocha. 9 Kwa lulimi nefwe tukumunjuma na kumhongecha Mtwa na Daada vetu na kwa lulimi lulo tukuvakotola vanu, vevawumbilwe kwa luwano lwa Nguluvi. 10 Makani cha kufunya na kukotola chihuma mu mlomo gumwi. Lukolo vangu, makani aga seging'ang'wa kuvecha ndena. 11 Wuli, mu kilwitu kimwi kiwesa kuhecha malenga manono na malenga gya munyo? 12 Vakolo vangu, wuli libiki lya mukuyu liwesa kubaba linunu lya mubiki lya msabibu? Awu libiki lya msaituni wiwesa kubaba linunu lya libiki lya mkuyu? Mukilwitu kya malenga gya munyo segahuma malenga manono ng'odo.

13 Wuli ndi ani yeagehe na uginyange na luhala mugati lwenu? Suwe, awonese njowo ilyo kwa uwumi vake msanzi na kwa magito gyake geagitile kwa kudedevela na uginyange. 14 Ila ngita numbula chenu chimemile wifu na luvipo na unene, suwe mbihile kwigamba na kulonga udesi badili lya undakyene. 15 Uginyange va ndena sewihuma kuluhano kwa Nguluvi, ila ndi uginyange veuhuma kwa vanu va inyi, kangi gahuma kwa Setani. 16 Kwakuva pepagehe na wifu na unene, pagehe na ndewo na mawofu golofu. 17 Ila uginyange weuhuma kukyanya yikutugita tuveche vanofu pautalo lya Nguluvi, yikutugita tuveche na lutengamaso na vanu vangi na yikutugita tuveche ufokomasi na yikutugita tuvadedekele vanu vangi na yikutugita tuveche na lusungu kwa vanu vangi na yikutugita tuveche na magito manofu, kangi seikutugita tuvabagule vanu vala ufyangu. 18 Vanu vevileta ulutengamaso mugati lya vanu, vivecha ngita vivyala mbeyu cha ulutengamaso, pambele davibena geving'ang'a pautalo lya Nguluvi.