1 Nondee, mupulikiche nyenye vamosi! Muvembe na kukivilicha kwakuva lya utumama daveukuwachila. 2 Umosi venu uwolile na myenda gyenu gililwe na mehe. 3 Sahabu chenu na madini gya fesa chigehe na kutu na kutu ilyo ivecha uswida pakyanya lwenu na mivili gyenu giyanangika ngita lyoto. Nyenye mwikong'asiye finu mufigono ifi fya mwiso. 4 Semukavahombile vachulila mahombo gyawo vevagitile kasi mumigunda gyenu. Mupulikiche kuvemba kwawo, kivembo cha avo vevabena migunda gyenu kifikile mumasigicha gya Mtwa va vapuga. 5 Mukalile kukehekelela umosi venu mkomi muinyi iyi, mwidutuve suwe kwakuva lwa kigono kya kuhiga ngita mng'oko yeadutuve yeandaliswe kwakuva lya kigono kya kuhinjwa. 6 Mumhigile na kumdocha munu yeahela nogwa, mwene seakavapinjile.

7 Vakolo vangu, muhuvilile kuno muchindila mbaka Yesu dapeiwuya kangi. Mulole mgima peihuvilila na kuchindila mimelo gyake giheche mabenelo molofu gyene fwayida. Mwene huchindila ndonya cha kwanja na cha mwiso. 8 Ndena, nyenye mwing'ang'wa kuva na luchindilo, mugangamale munumbula chenu, kwakuva kigono kya kuwuya Mtwa Yesu kigehe pepi.

9 Vakolo vangu, mbihile kung'ong'oleka nyenye kwa nyenye mbihile kuhigwa na Nguluvi. Mulole muhiga Yesu agehe pepi kuwuya. 10 Lukolo, muvalole vavichi vakalongile ngita Mtwa peavalongie valonge, neke vaveche uwano va uhuvilo mumagodo. 11 Ngita pemuchela tukuvakemela avo vafunyilwe kwakuva vahuviliye. Mupulike makani gya kuhuvilila kwa Ayubu na muchela gala gyeagitilwe na Mtwa kumwiso. Mtwa amemile lusungu na usanzi.

12 Kuchumba ago, vakolo vangu mbihile kwilapa kwa luhano vala kwa inyi, vala kwa kinu kyokyonda, ngita pemulonge, "Ena" Ngita mana lyenu ndi ena na "Hamu" Ngita mana lyenu ndi, pemugita ndena dasemuhigwa na Nguluvi.

13 Wuli, agehe munu pagati lyenu yeagehe na utumama? Suwe, ang'ang'wa kumsuka Nguluvi. Awu agehe munu yeagehe na lukeduko? Suwe asosomole misambo gya kunjuma Mtwa. 14 Wuli, agehe munu mtamwa mugati lyenu? Ang'ang'wa kuvakemela filongochi va lipinga lya vanu vevamwidikiye Kilisito neke vamsukile na kumbaka mafuta kwa litawa lya Mtwa. 15 Dapevisuka kwa ludikilo kula kusuka kwa ludikilo mtamwa dainana na Mtwa daakumgavila wumi na ata ngita agitile sambi daavecha ahecheliwe. 16 Suwe, mwilongele vavene sambi chenu na mwisukile mwavene, neke munanichwe. Kusuka kwa munu yeigita gyegakumkelesa Nguluvi kugehe na ludali hilo. 17 Elia akali munu ngita nefwe. Akasukile kwa kugangamala ndonya ibihile kutonya, seikatonyile muinyi kwa chipindi kya myaka midatu na mwechi sita. 18 Baho, akasukile kangi, ndonya ikatonyile kuhuma kuluhano na inyi ikameliche mimelo gyake.

19 Lukolo vangu, yumwi venu peayagile kwa kuleka undakyane na pambele muyage peakumupilusa, 20 muchele kuva, mwene yeakumpilusa munya sambi kuhuma mung'asi lyake wofu, daakuyiwokola muhe lya yula mwene sambi na daihechelwa sambi chake.