1 ତଃବେ, ଏ ଲାଡାର୍‌ମଃନ୍, ଇ ସଃବୁ ସଃୟ୍‌ତ୍‌ ଅଃମିକ୍‌ ସଃୟ୍‌ତ୍‌ କଃରା ଅୟିଆଚେ, ଗଃଗାଳ୍‌ ଆର୍‌ ଆତ୍ମାର୍‌ ସଃବୁ ବିଟାଳ୍‌ ତଃୟ୍‌ହୁଣି ଅଃହ୍‌ଣା ଅଃହ୍‌ଣାକ୍‌ ନିର୍ମୁଳ୍‌ କଃରୁଆଁ, ଆରେକ୍‌ ଇସ୍ୱର୍‌କେ ଡିରିକଃରି ପବିତ୍ର ତଃୟ୍‌ ସିଦ୍‌ ଅଃଉଁଆ ।

2 ତୁମିମଃନାର୍‌ ମଃନେ ଅଃମିମଃନ୍‌କେ ଟାଣ୍ ଦିଆ; ଅଃମିମଃନ୍‌ କାର୍‌ ଅଃନ୍ୟାୟ୍‌ ନଃକେରୁ, କାର୍‌ ନଃସ୍ଟ୍‌ ନଃକେରୁ, କାର୍‌ତଃୟ୍‌ ହୁଣି କାୟିରି ଲାବ୍‌ କଃରୁକେ ଚେସ୍ଟା ନଃକେରୁ । 3 ମୁୟ୍‌ଁ ତୁମିମଃନ୍‌କେ ଦଃସ୍‌ ଦେଉଁକ୍‌ ଇରି ନଃକୟ୍‌ଁ; କାୟିତାକ୍‌ବଃଲେକ୍‌ ମୁୟ୍‌ଁ ହୁର୍ବେ କୟ୍‌ଆଚି, ତୁମିମଃନ୍‌କେ ଅଃମିମଃନାର୍‌ ମଃନ୍‌ବିତ୍ରେ ଇବାନ୍ୟା ଟାଣ୍ ହାୟ୍‌ଁ ଆଚାସ୍‌ ଜେ, ମଃଲେକ୍‌ ଅଃମିମଃନ୍‌ ସଃଙ୍ଗେ ମଃରୁଆଁ, ଆରେକ୍‌ ବାଚ୍‌ଲେକ୍‌ ସଃଙ୍ଗେ ବଚୁଆଁ । 4 ତୁମିମଃନାର୍‌ ତଃୟ୍‌ ମର୍‌ ହୁରାହୁରି ବିସ୍ୱାସ୍‌ ଆଚେ, ତୁମିମଃନାର୍‌ ବିସୟେ ମର୍‌ ବଃଡେ ଗଃର୍ବ୍‌; ମୁୟ୍‌ଁ ସୁସ୍ତାୟ୍‌ ହୁର୍ନ୍‌ ଅୟି ଆଚି, ଅଃମିମଃନାର୍‌ ସଃବୁ କଃସ୍ଟ ତଃୟ୍‌ ମର୍‌ ସଃର୍ଦା ଉଚ୍‌ଳି ଜଃଉଁଲି ।

5 ✝କାୟିତାକ୍‌ବଃଲେକ୍‌ ମାକିଦନିଆ ତଃୟ୍‌ ହଚ୍‌ଲା ହଃଚେ ହେଁ ହଃଦାୟି ମାଡ୍‌ଗଳ୍‌ ଆର୍‌ ବିତ୍ରେ ଡିର୍‌, ଇବାନ୍ୟା ସଃବୁ ହଃର୍କାରେ କଃସ୍ଟ ବୟଃଗ୍ କଃଲାକ୍‌ ଅଃମିମଃନାର୍‌ ଗଃଗାଳ୍‌ ହେଁ ବିସାଉଁକ୍‌ ନଃହାୟ୍‌ଲି । 6 ଅୟିଲେକ୍ ହେଁ ନିରାସ୍‌ ରିଲା ଲକ୍‌କେ ସୁସ୍ତା ଦଃୟ୍‌ଦ୍‌ ଜୁୟି ଇସ୍ୱର୍‌, ସେ ତିତସ୍‌ ଆୟ୍‌ଲାକ୍‌ ଅଃମିମଃନ୍‌କେ ସୁସ୍ତା ଦିଲା । 7 ଆର୍‌ ସେ ଅଃବ୍‌କା ଆୟ୍‌ଲାକ୍‌ ନାୟ୍‌, ମଃତର୍‌ ଜୁୟି ସୁସ୍ତା ତଃୟ୍‌ ସେ ତୁମିମଃନାର୍‌ ହାକ୍‌ ଜୁୟି ଜୁୟି ସୁସ୍ତା ହାୟ୍‌ରିଲା, ସେ ହେଁ ସୁସ୍ତା ଦିଲା, ବଃଲେକ୍‌ ମର୍‌ ଗିନେ ତୁମାର୍‌ କଃତେକ୍‌ ଦୁକ୍‌ ମରବାଟ୍ୟା ଅଃଉଁକେ କଃଡେକ୍‌ ସଃର୍ଦା ସେତାକ୍‌ ଜଃବର୍‌ ସଃର୍ଦା ଅୟି ଆଚି ।

8 ଜୁୟ୍‌ତାର୍‌ ଗିନେ ମର୍‌ ଚିଟି ତୁମିମଃନ୍‌କେ ଦୁକ୍‌ ଦିଲି ଅୟିଲେକ୍ ହେଁ, ମୁଁୟ୍‌ଁ ସେତାର୍‌ଗିନେ ଦୁକ୍‌ ନଃକେରି; ସେ ଚିଟି ତୁମିମଃନ୍‌କେ ଅଃଳକ୍‌ କାଳ୍‌ ହଃତେକ୍‌ ଦିଲେ । 9 ଅଃବେ ସଃର୍ଦା ଅଃଉଁଲେ, ତୁମିମଃନ୍‌ ଜେ ଦୁକ୍‌ କଃଲାସ୍‌, ସେତାର୍‌ଗିନେ ନାୟ୍‌, ମଃତର୍‌ ତୁମିମଃନାର୍‌ ଦୁକ୍‌ ଜେ ତୁମିମଃନ୍‌କେ ବାଦ୍‌ଲାୟ୍‌ଲି, ସେତାର୍‌ଗିନେ; ଜୁୟ୍‌ତାର୍‌ ଗିନେ ଅଃମାର୍‌ ତଃୟ୍‌ ତୁମାର୍‌ ଜଃନ୍‌କଃରି କାୟିରି ଉଣା ନଃହେଳ ସେତାକ୍‌, ତୁମିମଃନ୍‌କେ ଇସ୍ୱରାର୍‌ ଇଚା ହଃର୍କାରେ ଦୁକ୍‌ ହାୟ୍‌ଲାସ୍‌ । 10 କାୟିତାକ୍‌ବଃଲେକ୍‌ ଇସ୍ୱରାର୍‌ ଇଚା ହଃର୍କାରେ ଜୁୟି ଦୁକ୍‌, ସେରି ମୁକ୍ଳାଉତା ଗିନେ ଇବାନ୍ୟା ମଃନ୍‌ ବାଦ୍‌ଲାଉତାର୍‌ ଆଣେଦ୍‌, ଜୁୟ୍‌ତାର୍‌ ଗିନେ ମଃନ୍‌ ଦୁକ୍‌ନାୟ୍‌; ମଃତର୍‌ ଜଃଗତାର୍‌ ଦୁକ୍‌ ମଃର୍ନ୍‌ ଆଣେଦ୍‌ । 11 ଦଃକା ଜୁୟ୍‌ତାର୍‌ ଗିନେ, ଇସ୍ୱରାର୍‌ ଇଚା ହଃର୍କାରେ ତୁମିମଃନ୍‌ ଇ ଦୁକ୍‌ ହାୟ୍‌ଲାସ୍‌, ସେରି ତୁମିମଃନାର୍‌ ତଃୟ୍‌ କଃତେକ୍‌ ସଃର୍ଦାର୍‌ କଃତା, କଃତେକ୍‌ ବିରୁଦେ କୟ୍‌ ବାଙ୍ଗାଉତାର୍‌, କଃତେକ୍‌ ରିସାକଃତା, କଃତେକ୍‌ ଡିର୍‌, କଃତେକ୍‌ ଇଚା, କଃତେକ୍‌ ଉଦ୍‌ଜଗି, କଃତେକ୍‌ ବାଦୁଲ୍‌ତାର୍‌ ଆଣିଆଚେ । ଇ ବିସୟେ ତୁମିମଃନ୍‌ ହୁରାହୁରି ନିର୍ଦସି ବଃଲି ଟିକ୍‌ ହଃର୍ମାଣ୍‌ ଦଃୟି ଆଚାସ୍‌ ।

12 ଇତାର୍‌ ଗିନେ ମୁୟ୍‌ଁ ତୁମିମଃନାର୍‌ ଚଃମେ ସେ ଚିଟି ଲେକ୍‌ଲେ, ଅୟିଲେକ୍ ହେଁ ଜେ ଅଃନ୍ୟାୟ୍‌ କଃରିଆଚେ, ଆର୍‌ ଜେ ଅଃନ୍ୟାୟ୍‌ ସଃମ୍ବାଳି ଆଚେ, ତାର୍‌ ଗିନେ ଲେକ୍‌ଲେ, ସେରି ନାୟ୍‌, ମଃତର୍‌ ଅଃମିମଃନାର୍‌ ଗିନେ ତୁମିମଃନାର୍‌ ଇଚା ଜଃନ୍‌କଃରି ଇସ୍ୱରାର୍‌ ତଃୟ୍‌ ତୁମିମଃନାର୍‌ ବିତ୍ରେ ଜାଣା ହଃଳେଦ୍‌, ସେତାର୍‌ଗିନେ ଲେକ୍‌ଲେ । ତଃବେ ଅଃମିମଃନ୍‌ ସୁସ୍ତା ହାୟ୍‌ଆଚୁ । 13 ଆରେକ୍‌ ଅଃମିମଃନାର୍‌ ସୁସ୍ତାୟ୍‌ ଅଃମିମଃନ୍‌ ତିତସାର୍‌ ସଃର୍ଦାର୍‌ ଗିନେ ଆରେକ୍‌ ଅଃଦିକ୍‌ ସଃର୍ଦା କଃଲୁ, କାୟିତାକ୍‌ବଃଲେକ୍‌ ତାର୍‌ ଆତ୍ମା ତୁମି ସଃବୁ ଲକାର୍‌ ତଃୟ୍‌ ଜିବନ୍ ଅୟିଆଚେ । 14 ଜୁୟ୍‌ତାର୍‌ ଗିନେ ଜଦି କୁୟି କଃତାୟ୍‌ ତିତସାର୍‌ ଚଃମେ ତୁମିମଃନାର୍‌ ବିସୟେ ମୁୟ୍‌ଁ ଗଃର୍ବ୍‌ କଃରି ଆଚି, ତଃବେ ଲାଜ୍‌ ନଃକେରି, ମଃତର୍‌ ଜଃନ୍‌କଃରି ଅଃମିମଃନ୍‌ ସଃବୁ କଃତାୟ୍‌ ତୁମିମଃନଃକ୍‌ ସଃତ୍‌ କୟ୍‌ରିଲୁ, ସେବାନ୍ୟା ତିତସାର୍‌ ମୁଏଁ ଅଃମିମଃନାର୍‌ ଗଃର୍ବ୍‌ ହେଁ ସଃତ୍‌ ବଃଲି ଜାଣା ଜଃଉଁଲି । 15 ଆର୍‌ ଜଃନ୍‌କା ଡିର୍‌ ଆର୍‌ ବେମ୍‌ରି ତଃୟ୍‌ ତୁମିମଃନ୍‌କେ ତାକେ ଆଗଳି କଃରି ସଃବୁ ଲକ୍‌ ତାର୍‌ କଃତା ମାନ୍‌ଲାସ୍‌, ଇରି ଏତାୟ୍‌ କଃରି ତୁମାର୍‌ ହାକ୍‌ ତାର୍‌ ମଃନ୍‌ବିତ୍ରାର୍‌ ଲାଡ୍‌ ଅଃଦିକ୍‌ ବାଡୁଲି । 16 ମୁୟ୍‌ଁ ଜେ ସଃବୁ କଃତାୟ୍‌ ତୁମିମଃନାର୍‌ ତଃୟ୍‌ ହୁରାହୁରି ବିସ୍ୱାସ୍‌ କଃରୁ ହାରି, ଇତାର୍‌ ଗିନେ ସଃର୍ଦା କଃରୁଲେ ।