Daniel 1

नबुकदनेस्‌सरेन राजान दरबार मां जुवान अदमी

1 यहुदान राजु यहोयाकीमेन राजेन तीसरे साल मां बेबीलोन राजा, नबुकदनेस्‌सर, राजा ने यरुसलेम सहर पर, उपर चहड़ीन तीनाक घेरवी लेदु।✝1:1 2 राजा 24:1; 2 ईतीहास 36:5-7 2 यहोवा भगवान हीना राजा यहोयाकीम काजे धरने ने मंदीरेन थुड़ाक ठाहरा काजे धरने देदु ने चु थुड़ाक केद्‌या काजे आपणे साते बेबीलोन मां आपणा देवतान मंदीर मां ली गुयु, ने धरीन लावला ठाहरा काजे मंदीरेन भंडार घर मां मेक देदु।

3 तत्‌यार राजु आपसा खास मुख्‌या असपनज काजे हुकुम आप्‌यु की, तु इस्‌राएली राज घराणा ने मटली कुळीन थुड़ाक माणसे काजे मारी चाकरी करने करीन ली आव;✝1:3 2 राजा 20:17 4 जे असा जुवान्‌या हवणु चाहजे तींद्‌रेम कांय बी खुड़ नी हवणु चाहजे, घाटाळा हवणु चाहजे, आखी वात सीकणेन ताकत हवणु चाहजे, वारु माहती राखण्‌या हवणु चाहजे, बाकुन समजणे वाळा हवणु चाहजे। ने राजान बंगला मां सेवा करे असा हवणु चाहजे, चु तीनुक बुलाय लायु, ने मुख्‌या काजे हुकुम आप्‌यु की तुहुं हीनुक बाबुल मां रवण्‌यान बुली ने आखी भातीन लिखा पुड़ी करन्‌यु सीकाड़्‌यु। 5 ने राजु हुकुम आप देदु की, तीनुक खाणे ने पीणे वाटे अंगुरेन रस मां सी तीनुक दाहड़ीन खाणे पीणे वाटे देणु चाहजे। तेरेसी तीन साल लग तीनुक सीकाड़तु रवे, ती पछेन चे राजा अगळ हजुर हवे। 6 तींद्‌रेम यहुदान अवल्‌यातेम सी नेवाड़ला हतला, चे जे छे, दानीयल, हनन्‌याह, मीसाएल, ने अजर्‌याह नावेन यहुदी माणसे हतला।