1 तीनी टेमे मीकायेल नावेन मटलु मुख्‌यु, जु तारा माणसेन सात देणे मां उबु हवसे, चु आवसे। तत्‌यार असी गरान टेम आवसे, जसा काहनोक राज्‌य हवसे तीनी टेमे ती हय तक कदी नी हयो, ने नी हवसे; बाकुन तीनी टेमे तारा माणसे मां सी जतरान नाव भगवानेन किताप मां लिखायलो छे, चे बची जासे।✝12:1 मत्‌ती 12:1; मरकुस 13:19; उजेंता बुले 7:14; 12:7 2 जे धरतीन हेटा मसाण मां सुय रवसे, तींद्‌रे मां सी बेसका माणसे उबा हय जासे, कतरा ते जलम जीवतेला रवसे, ने कतरा ते आपसान बदनामी ने जलमका वाटे भगवानेन नींगा मां कुहराय करने वाटे।✝12:2 यसाया 26:19; मत्‌ती 25:46; युहन्‌ना 5:29 3 तत्‌यार सीकाड़ने वाळा सरगेन तारा मंडळीन तसा भबळसे, ने जे बेसका माणसे काजे धरमी बणावसे, चे जलमकात तारान तसा भबळसे।

4 बाकुन ए दानीयल, तु ईनी किताप पर छाप लागाड़ीन ईनु बुल काजे आकरी टेमे तक साताड़ीन राख।✝12:4 उजेंता बुले 22:10 ने बेसका माणसे पुछसे ने अथान-अथा हेरसे, काहाकी तेरेसी अक्‌कल बी आय जासे।

5 जो आखो सामळीन, मेसेक दानीयल भाळीन काय देख्‌यु की अळी दुय अदमी उबा हय रया, एक ते नदीन ईनी धड़े, दीसरु नदीन पली धड़े छे। 6 तत्‌यार चु अदमी सणेन पुथल्‌या पेहरीन नदीन पाणी पर हतलु, तीनु माणसे मां सी काहनुक एक पुछ्‌यु, जे छेलभात्‌या काम कत्‌यार खत्‌तम हवसे।

7 तत्‌यार जु माणुस सणेन पुथल्‌या पेहरीन नदीन पाणी उपर हतलु, चु मारी सामळतेत जेवड़्‌यु हात ने डाखर्‌यु हाय आपसा दुयु हात काजे सरगे भीणी उपर करीन, जलम जीवतेला रह्‌णे वाळान सगुन खायलीन कह्‌यु, "जी हालत साड़े तीन साल तक रह्‌से; ने जत्‌यार चुखला माणसेन दुख झेलनु खत्‌तम हय जासे, ती जी वात आखी पुरी हय जासे।"✝12:7 उजेंता बुले 10:5; 12:14

8 जी वात मे सामळतेलु ते खरु, बाकुन काही नी समजी सक्‌यु। तत्‌यार मे कह्‌यु, "ए मारा मालीक, ईनी वातेन आकरी फळ काय हवसे?"

9 बाकुन चु कह्‌यु, ए दानीयल जाती रव; काहाकी जी वात आकरी टेम लक मुहर लागाड़ीन बंद करली छे। 10 बेसका माणसे आपसा-आपसा काजे चुखला करसे ने धवेळ्‌ळा करसे, ने चुखला हय जासे; बाकुन कुहराय करन्‌या माणसेक कुहरायत करने देवु, कुहर्‌या माणसे मां सी काहनुक जी वात नी समजसे, बाकुन जु अक्‌कल वाळु छे चे समजसे।✝12:10 उजेंता बुले 22:10

11 जत्‌यार सी दाहड़ीन चड़ावणी बादा काजे रुक देसे, तत्‌यार ती हय तक जत्‌यार असी खास बेकार चीज पयदा हवसे चु छाचलीन उजाड़ कराड़ देसे, ने एक हजार दुय सोव नब्‌बे दाहड़ान टेम वीत जासे।✝12:11 दानीयल 9:27; 11:31; मत्‌ती 24:15; मरकुस 13:14 12 वारु छे, चे माणसे बेसका भागवाळा छे, चे एक हजार ने तीन सोव तीस ने पांच दाहड़ा पुरा करसे।

13 "ने ए दानीयल तु आकरी लग भुरसा लायक बणीन रव तु आराम करसी, बाकुन टेमेन आकरी मां आपणो मेहनतेन फळ हात करने वाटे उठीन उबु हय जासी।"