1 रात के टेम मै खटिया हे सोय रथो,

ऊ टेम मै अपन परान पिरिया के पामै चाहो,

मै उके खोजै लगो, पय ऊ मोके नेहको मिलिस,

मै ओही गोहरायों, पय ऊ जबाब नेहको दइस।

2 अब मै खटिया लग उठके सहर हे,

गली, चउराहा हे घूम-घूम के अपन परान पिरिया के खोजत रहों,

पय नेहको पायों।

3 मोके चउकीदार मिलिन, ऊ सहर हे घूम-घूम के पहिरा देत रहै,

मै उनखर लग पूंछो, "का तुम मोर पिरिया के देखे हबा?"

4 पहिरेदार बालेन लग मै चुटु दुरिहां गयों कि मोके मोर जान मिल गय,

मै उके पकड लयों अउ तब तक जाय नेहको दयों,

जब तक मै उके अपन दाय के घर हे नेहको लइ आनो,

मतलब ऊ डउकी के अपन कोठा हे नेहको लइ आनो,

तब तक उके नेहको जाय दयों।

5 हे यरुसलेम कर टोरिया, मै तुम्हर लग छिगरिन

अउ मइदान के छिगरिन के किरिया धरायके कथो,

कि जब तक माया खुद लग झइ उठै,

तब तक ओही न उकसाबा अउ न जगाबा। दुलही

6 हइ काहिन आय जउन कुहिरा कर खम्भा कर जसना,

गन्धरस अउ गाद लग खुसबू अउ ब्यापारी के सगलू मेर कर महकै बाले धूप

पउडर* लगाय हर पतेरा लग निकड के आथै?

7 देखा, हइ तो राजा सुलेमान के डोली हबै,

इस्राएल के सेना चुने हर साठ योध्दा ओखर संग-संग चलथै।

8 उन सगलू सेना तलबार धरे रथै,

जउन युध्द हे मजबूत हबै,

रात के डर कर मारे हर मनसे कर बगल हे तलबार लटकथै।

9 राजा सुलेमान अपन निता लबानोन रूख के लकडी लग

अक्ठी डोली बनवाय लइस।

10 एखर खम्भा चांदी लग ढके हर हबै,

एखर उप्पर सोन लग कढाई करे हर कपडा हबै,

एखर कुसन बैजनी कपडा लग ढके हर हबै,

जेखर लग यरुसलेम के डउकिन माया लग बनाय हबै।

11 हे सिय्योन कर टोरिया, बाहिर आयके राजा सुलेमान के देखा,

ऊ उस मुकुट के पहिरे हर हबै,

जउन ओखर दाय ओखर काज के रोज

ओखर हिरदय के खुसी दिबस हे ओही पहिनाय रथै।