1 हे मोर पिरिया, तै सुंदर हबस,

मुंह ढंकनहा कर भित्तर तोर आंखी परेवा कर जसना दिखथै,

तोर चूंदी गिलाद परदेस के ढाल लग तरी उतरत छेडिन

कर झुंड के जसना लगथै।

2 तोर दांत उन गेडरन कर जसना चरका हबै,

जउन अबे-अबे नहायके निकडे होय।

ऊ सगलू जोडधा छउना के जनम दय करथै,

अउ उनखर छउना नेहको मरे हबै।

3 तोर बिबडा बोहत सुन्दर लाल रंग के सूत के मेर हबै,

अउ तोर मुंह बोहत सुन्दर हबै,

तोर गाल ओढनी कर तरी अनार के आधा खंडा जसना दिखथै।

4 तोर नटेरी दाऊद के मीनार कर जसना हबै,

जउन हथियार के निता बने होय,

अउ जेखर उप्पर हजार ढाल टंगे हर होय, ऊ सगलू ढाल योध्दा कर आय।

5 तोर दोनो छाती छिगरी के दुइठे जोडधा लरकन के बरोबर हबै,

जउन सोसन फूलन के बीच हे चरत होंय।

6 मै गन्धरस कर डोंगर हे जइहों

अउ ऊ डोंगर हे जउन लोबान कर हबै,

जब दिन अपन आखरी सांस लेथै

अउ ओखर छांया बोहत लम्बा हुइके लुक जथै।

7 हे मोर जान, तै पूरा के पूरा सुंदर हबस,

तोर हे कउनो धब्बा नेहको आय।

8 हे मोर दुलही, तै मोर संग लबानोन डोंगर लग,

मोर संग लबानोन डोंगर लग चले आ,

जउन अमाना के डोंगर के फुंलगी लग,

सनीर डोंगर अउ हेर्मोन डोंगर के फुंलगी लग,

बघवा कर माडा लग,

चितुवा के डोंगर लग नजर लग।

9 हे मोर अति पिरिया, हे मोर दुलही,

तै मोर मन के चोर लय हबै,

तै अपन आंखी के अक्ठी नजर लग,

अउ अपन नटेरी के अक्ठी हीरा लग

मोर दिल के चोर लय हबै।

10 हे मोर साथी, हे मोर दुलही, तोर माया केतका मीठ हबै,

तोर माया अंगूर के रस लग निक्खा हबै,

अउ तोर महकनी तेल कर खुसबू सब मेर के मसालन के जादा खुसबू हबै।

11 हे मोर दुलही, तोर बिबडा लग सहद टपकथै,

तोर जीभ कर तरी सहद अउ दूध कर मिटास हबै,

तोर कपडा कर खुसबू माना कि लबानोन कर खुसबू हबै।

12 हे मोर संगी, हे मोर दुलही, तै असना हबस जसना कउनो लुके हर बगिया होय,

तै ओसनेन हबस, जसना कउनो रुके हर सोता होय या बंद करे हर झरना होय।

13 तोर पउधा अच्छा फडुहा बाले अनार

कर बगिया के बरोबरी हबै,

जेहमा मेंहदी अउ महकै बाले तेल,

14 महकै बाले तेल अउ केसर, लोबान कर सगलू मेर के रूख,

मुस्क अउ दालचीनी, गन्धरस,

अगर हइ सगलू खास-खास सुगन्धित चीज हबै।

15 तै बगिया कर सोता हबस

फटत पानी कर कुंवा अउ

लबानोन डोंगर लग बहत धार हबै।

16 हे उतरी हवा आ,

तै उतरी हवा आ, मोर बगिया हे बह,

जेखर लग ओखर खुसबू फइलै,

मोर पिरिया अपन बगिया हे आइस,

अउ ओखर निक्खा-निक्खा फडुहा खाय।