1 Mbe riwa wa Bulus, ri Sila nga Timoti wa ngan no wa hu Izhi ri Tasalonika, riwa a he wa A ti mbu Izhi nga Bachi Yeso Kristo:

Ame Bulus me bre Izhi no dindi ti nga sisron no he ri yi.

2 Bla vi ki ngɨri ri Izhi ritu mbi wawu, ki yo nde mbi bla vi rimi ibre mbu. 3 Ki kuki ki ri tika mbi nde Bachi nga A ti mbu ri ndu riwa kpanyɨme mbi, ndu mbi a de nyɨme, ri vu sron a he rimi yosron rimi Yeso Kristo. 4 Imiri vayi, ki to ri Izhi nyɨme yi ran chu yi no yi he wa ma. 5 Ritu ki ngɨzhi tre dindi ye ri yi, a ran he tre ri nyu nkankshe ran, ama ri gbengbren nga Yuu Tsitsri ri nyɨme ri jaji wan. Bi to bibi son dindi riwa ki kii wayi. 6 Bi hu bibi ti mbu nga bibi ti riwa Izhi; ka hu ri bibi yaa riwa bi so, bi kpa tre Izhi ri kinklan sron riwa Iyu Tsitsri no yi. 7 Ritu kya riwa bi ti, wa nji Makidoniya ri wa nji Akaya wa hu bibi ti mbi. 8 Aran ri meme Makidoniya nga Akaya nye riwa itre Izhi riwa bi de a kri ri nkankshe ran, ama wa to tre kpanyɨme mbi bla bubu. Ritu ngamba ki ran ri tre kya ritu wan ngaran. 9 Ritu wa nji Makidoniya ri Akaya wa de tre ritu bibi hi mbu riwa ki hi ri yi. Ngha bibi riwa bi ka hu zhi riwa bi ran to-u ran chuwo bi ri kɨma ye ri Izhi ri vri nga ri kpunji, 10 biyi bi gben ye vren Izhi ri shu, riwa a ta shɨme ri kuu, wawu Yeso riwa a kpa ta chuwo ri fu Izhi riwa ari ye.