1 Ritu ngamba ki ran to vu sron ri ki kankan ngaran, ki ka ki ngambu ri Atina nkshe mbu. 2 Ame Bulus nga Sila ki ti Timoti ndu ri yi, riwa a he vayi mbu ran ri tindu la tre Bachi Kristo ri ta. Ki ti-u ndu no no yi tre ri de gbengbren ri yosron mbi, 3 ritu no njo no ran bru ban gon ritu ya riwa ki to ri hu Izhi ran.Biyi kyumbi bi to ri iya riwa ki ti nyi a he ti Izhi nye ri ta. 4 Riwa ki he wa yi ri, ki la yi ri ki hi bubu so ya. Bi ye to a he ngamba nye. 5 Ritu nganyi nye me ti Timoti ndu ri yi. Me ran to vu sron ran nye me ri ti-u ndu no ye ya kpanyɨme mbi to. Me ti sisri ritu ka meme nji gyuru yi no ndu mbu he kuklu.

6 Ama ngye ngan zizan Timoti a dzu ri yi ye, nga ran la ta tre dindi ritu kpa nyɨme mba nyɨme mbi. A la ta ri bi tika dindi ritu mbu nga wuri wa wu to ta bibi riwa kita ki wa ki ri to-u. 7 Ritu ngamba Imiri vayi won ri bibi yaa riwa ki so-a ritu yo sron mbi ki fe senkpa. 8 Zizan ki he ri si, riwa bi kabru tu ritu Bachi. 9 Ngɨri bibi tan ki ti ri Izhi ritu mbi ritu kinklan sron mbu riwa ki he ri wu ri kusi Izhi ritu mbi? 10 Ri ji ri chu ki bre Izhi bran bran riwa ki bru to yi nga ki ri bru tre tre riwa ari no yi senkpa rimi kpanyɨme mbi. 11 No A ti mbu Izhi kyuwan nga no Bachi Yeso no milan nkon ti ri ta riwa ki ye ri wu. 12 No Bachi no no yi nyɨme ngambi bran nga ngbron nji. Bibi riwa kita ki nyɨme yi bran bran. 13 Ki ibreno Bachi no no sron mbi senkpa riwa wa ran ya yi ka wa meme ti ran nga bi ri he Tsitsri ri kusi Izhi mbu nga A ti mbu chachu riwa Bachi Yeso ri ye ri wa Tsitsri wan wawu.