1 Mɔ nɔ tʉʼ bìʼ nyɔ̀ʼ ŋwɔʼnə tʉ bii ndə vɛʼ bûu, mbʉətə bətieŋkɔŋ-bɔ̄ŋ. Mu mbʉ bəŋwɔʼnə ibûu, mɔ nɔ tʉʼ kʉ́ʉ mbɔ b̈ii kə́ kwɛ́nə mbʉ bənu ndə bə nɔʼ kə dàhə bii nə yɔŋ mbɔ i chʉʼ ŋɔ́ʼhə ndaahə-ii, ndə məchìi bii kie ŋkɛŋ ŋkwɔʼtə. 2 Mɔ nɔ tʉʼ kʉ́ʉ mbɔ b̈ii kə́ kwɛ́nə ŋgiebə ndə Nyii kə kwə́ʼ dɔdɔ tíŋ hə bɔ̌ŋ bʉəyʉkəŋgie-bi ndə bɔ̂ŋ bɛ ŋkʉʉ ghɔŋbə ŋkahə ndə i kə gwè hə kəghɔ-Tiekətʉ ndə ɔ bɛ Ŋkwaa, ndə bə kə kɔ́ tʉ bii tíŋ hə bɔ̌ŋ bəlɔntəŋNyii. 3 Bii nɔ kie ndə mə-fəŋ-kínə mbɔ kʉ̂ʉ bɛ ndə ndyiʼtə-bəchî-bə nɔ, bʉə bu fyú ndə bɛ bʉə dʉ̀ʉhə bənu, kə́ dʉ̀ʉhə bii, bʉə ndə məchimbi-yʉə bu kə́ tòʼ bə ndə mbʉəhə-ʉə tʉʼ gìe tʉ bɔŋ. 4 Bɔ̂ŋ bu kə́ ghɔ̀ŋ mbɔ, "Jiso ba ndə ɔ kə kɔ̀ʼnə ndə məgwè le? Bətie-bʉʼʉ* nɔʼ kə kwútə, nubə-ɔ̄ŋ kə́ bɛ haʼ ndə i nə bɛ lʉ̀ hə ndəŋ ŋgwunə-mbi." 5 Bɔ̂ŋ shʉəŋshʉəŋ lèʼnə mu fyii-bɔŋ mbɔ lʉ̀ hə ŋgʉʼʉ Nyii nɔ nə kàhə nə ŋgie-chu-kə-i, yuo bɛ ghɔ. Bə nɔ nə kóʼhə chisêkə hə mu muu, bə bɔŋleʼ chìi nə muu, 6 bɔŋleʼ bɛ haʼ nɔ ndə Nyii nə lìihə wʉʉnəmbi-bəshʉ-kə ghɔ nə muu-yɔ́ŋyɔ́ŋ-mə, i byʉ́ʼ bɛ́. 7 Bɔŋ yá haʼ mbʉ kəŋgieNyii yá yuo ghɔŋbə chisêkə tʉ́ʼ ndə i bɛ nduɔ tʉ viʼi. Bə nɔ tʉ́ʼ bɔŋ, kə́ chyìi chî-kwɛ̀-fɛʼɛ-kə ndə bə bu bʉ́əhə bʉə ndə məchimbi-yʉə gòʼ təmə kə́ kɔ́ kuŋhə tʉ Nyii fɛ.

8 Kə bii mə lèʼnə mbyu kənu-ɔ̄ŋ fɛ, mbʉətə bətieŋkɔŋ-bɔŋ, mbyu kəchî imɔʼ tʉ Tiekətʉ nɔ bɛ nə ŋgʉʼhə ŋkɔŋ, ŋgʉʼhə ŋkɔŋ kə́ bɛ nə mbyu kəchî imɔʼ. 9 Tiekətʉ chʉʼ tùu ndə məfɔ̀ʼ nukə ndə ɔ nɔʼ kə kɔ̀ʼnə, ndə bəbɛʼbʉə tʉʼ kwɔ̀ʼtə fɛ. Bɔŋ nɔ, ɔ nɔ tʉʼ yá fyii-i bə bʉʼka bii, bʉʼka ɔ kʉ̀ʉ mbɔ mbyu wo kwú bɛ́ fɛ, bɔŋ ɔ nɔ kʉ̀ʉ mbɔ b̈ʉə bənchəŋ shìe liɛŋ ndəŋ bʉ̂ʼtə-ʉə. 10 Bɔŋ chî-Tiekətʉ-kə bu nə bɔ̀ʼtə gwè nə lʉʼ. Yuo dùŋtə shʉ́əshʉ́ə mì, viʼi tɔ̀ŋ fɔbə ndə i bɛ muŋgɔ nchəŋnchəŋ, i kyʉ́ʉ ghɛ́ŋ mì, bə bu kɛ̀ʼ* chisêkə ghɔŋbə fɔbə ndə i bɛ muŋgɔ inchəŋ.

11 Bʉʼka nchəŋnchəŋ bəfɔ-ɔ̄ bu ghɛ́ŋ mì ndə ntɛ fia-ɔ̄, bii kie ndə məbɛ ntɛ bʉə ka? Məchimbi-yii nɔ kie ndə məbɛ ŋkʉʉ, b̈ii kə́ chí mbi ndə ntɛ ndə i bu kɔ́ kuŋhə tʉ Nyii, 12 ndə bii tʉʼ chyìi Chî-Nyii-kə, kə́ kɔ̀ɔtə ndə nyíɛ mbɔ Chî-ghɔ̄-kə buŋ chʉʼ gwègwè, chîkə ndə yuo bu kyʉ́ʉ chɔ mì, viʼi ghɛ́ŋhə fɔbə ndə i bɛ chɔ i lʉ́ʉ mì. 13 Bɔŋ bʉʼʉ nɔ tʉʼ chyìi nukə ndə Nyii kə kɔ̀ʼnə tʉ bʉʼʉ, kə́ bɛ yuo fefe leʼnə chisê-fefe-kə yəŋkə ndə məchímbi ndyʉndyʉ bu bɛ chɔ.

14 Nɔ, mbʉətə bətieŋkɔŋ-bɔŋ, ndə bii tʉʼ chyìi nubə-ɔ̄ŋ, b̈ii kɔ̀ɔtə shʉ́əshʉ́ə ndə məbɛ tʉ́ʉnə, təmə kie kwɔtəkə mbʉə-bii fɛ, b̈ii dùʼ biibə Nyii nə fyiighʉ́ənə.

15 B̈ii lʉ̀ məyá fyii ndə Tiekətʉ tʉʼ yá fyii-i, nə saa tʉ bii ndə məkie ŋkwaa, haʼ ndə mbʉətə liŋ-yʉʼʉ Bɔɔ kə nyɔ̀ʼ tʉ bii ghɔ, nə mukətʉ-súunə ndə Nyii kə kɔ́ tʉ ɔŋ. 16 Nɔ bɛ nubə nɔ ndə ɔ tʉʼ nyɔ̀ʼ mu bəŋwɔʼnə-bi nchəŋnchəŋ ndʉʉ ndə ɔ tʉʼ nyɔ̀ʼ te nubə-ɔ̄ŋ. Nu-shʉ́əshʉ́əbɛʼ-bə nɔ bɛ mu bəŋwɔʼnə-bi ndə bʉə ndə bɔ̂ŋ gòʼ təmə kie ndaa fɛ, ghɔŋbə bʉə ndə bɔ̂ŋ gòʼ təmə kə́ yá ŋwɔŋ-yʉə fɛ, tʉʼ fʉ̀ʼtə mɔ̀ʼ bɛ́, haʼ ndə bɔ̂ŋ tʉʼ chìi mu bəbɛʼyəŋbə mu ŋwɔʼnə-Nyii. Yɔ̄ŋ-yə bu gwè nə məbyʉʼ-yʉə.

17 Bɔŋ bii nɔʼ kínə nubə-ɔ̄ŋ, mbʉətə bətieŋkɔŋ-bɔŋ. B̈ii láa, ndʉʉmɛ, bʉʼka bʉə ndə bɔ̂ŋ gòʼ təmə kə́ tʉ́ʼ nuʼ fɛ, mə-yi-fə́ʼhə bii nə nu-mbii-bə ndə bɔ̂ŋ tʉʼ dàhə, b̈ii gwù ndəŋ yʉʉ-yii ndə bii kə fəŋ tə́nə chɔ. 18 B̈ii bɔŋ kə́ chí mbi nə nuʼ jyujyu gɛ̀ nə shʉbə mbɔ Jiso Klai Tiekətʉ-yʉʼʉ ndə ɔ bɛ Ŋkwaa-yʉʼʉ chʉʼ kə́ dʉ̀ʼ buuŋjyu yɔ́ŋyɔ́ŋ tʉ bii. B̈ii bɔŋ-kə́-leʼ bìʼ kínə ɔŋ gɛ̀ nə shʉbə.

M̈əgʉ́ə bɛ yi-yə lʉ̀ hə nduɔ gɛ̀ nə shʉbə təmə liʼ-i bɛ ghɔ fɛ. Ï bɛ haʼ nɔ.