1 Nɔ nyɔ̀ʼ mbəŋ-ɔŋ Bɔɔ nyɔ̀ʼ ŋwɔʼnə-ɔ̄ŋ, ndə Nyii kə séʼ mɔ ndə ŋkʉʉnə tʉʉ-i, ndə məbɛ lɔntəŋ-Klai Jiso, baʼa Timɔti liŋ-yʉʼʉ.

2 Mɔ nɔ tʉʼ nyɔ̀ʼ tʉ bʉə-Nyii ndə bɔ̂ŋ bɛ mu Kolose, ndə bɔ̂ŋ bɛ bʉə-kəŋgie-shʉəŋ baʼa bɔŋ kə́ bɛ bəliŋ mu Klai.

Tə Nyii Tie-yʉʼʉ dʉ̀ʼ buuŋjyu tʉ bii bɔŋleʼ kɔ́ bii nə fyiighʉ́ənə.

3 Baʼa nɔ tʉʼ kɔ́ ndɔ tʉ Nyii mbʉ Tie Jiso Klai Tiekətʉ-yʉʼʉ təvɛʼtəvɛʼ ndʉʉ ndə baʼa tʉʼ gháaNyii tʉ bii, 4 bʉʼka baʼa nɔ yʉ́ ndə bii mɔ̀ʼfyiihə-ii ndəŋ Klai Jiso leʼnə ntɛ ŋkʉ̂ʉ ndə bii kie tʉ bʉə-Nyii bənchəŋ. 5 Bii nɔ chìi yɔ̄ŋ-yə bʉʼka bii nɔ tʉʼ yʉ́əʼnə ndəŋ Nyii te fɔkə ndə bii yi kie ndə bə tʉ́ʼ tʉ bii yuo. Bii nɔʼ kə yʉ́ yɔ̄ŋ-yə hə bəshʉ mu ntəŋjyujyu te Klai, ndə bɛ ŋgie-shʉəŋ-kə. 6 Ntəŋjyujyu-ɔ̄ ndə i kə gwè tʉ bii nɔ tʉʼ kʉ́ʉnə ntɔŋmə mu kəwʉʉnəmbi inchəŋ, kə́ bìʼ yɔ́ŋ gɛ̀ nə shʉbə haʼ ndə i tʉʼ fɔ̀ʼ mu bii, lʉ̀ hə ndəŋ fəŋ kəchî ndə bii kə yʉ́ shʉəŋ bɔŋleʼ nyíɛ nə mbəŋ-yii ndə Nyii tʉʼ dʉ̀ʼ buuŋjyu-i mu mbʉ shʉəŋ.

7 Bii nɔ nə yʉ́ yɔ̄ŋ-yə kəghɔ-Ebafla liŋ-yaʼ mu njaa-Nyii ndə baʼa kə kʉ̀ʉ, ɔ bɔŋleʼ kə́ bɛ vaafɔ̀ʼ ndə baʼa bɔŋ bɛ mɔʼɔ. Ɔ nɔ kə bɛ wo-fɔ̀ʼ Klai ndə ɔ gìe shʉəŋ yie-bii. 8 Ɔ nɔʼ shyíi baʼa nə ntɛ-ŋkʉ̂ʉ ndə LyʉʉhəNyiikə nɔʼ kɔ́ tʉ bii.

9 Nɔ, lʉ̀ hə mbi ndə baʼa yʉ́, baʼa chʉʼ nə káa ndə məgháaNyii tʉ bii fɛ, kə́ fʉ̀ʉtə ɔŋ mbɔ ɔ̈ kɔ́ bii nə mukətʉ-súunə inchəŋ ndə i gwè hə kəghɔ-LyʉʉhəNyiikə leʼnə məkínə nubə inchəŋ, ndə məchìi b̈ii kínə gɛ̀ kùu nukə ndə Nyii tʉʼ kʉ́ʉ mbɔ b̈ii kə́ fɔ̀ʼ. 10 Ndʉʉmɛ, bii bu kə́ chí mbi ndə ntɛ ndə i kʉ̀ʼnə tʉ Tiekətʉ, kə́ fɔ̀ʼ nubə ndə ɔ kʉ̀ʉ, kə́ kʉ́ʉnə ntɔŋmə ndə fɔʼ-jyujyu-tə inchəŋ bɔŋleʼ kə́ kʉ̀ʼ ndə məkínə Nyii.

11 Baʼa nɔ tʉʼ gháaNyii ghɔ mbɔ ɔ chìi bii shʉ́ə, nə ghʉəʼkə nchəŋnchəŋ ndə i gwè hə ndəŋ fɔŋ kəghʉəʼ-məgʉə-e mbɔ bii chʉʼ lyʉ̀ʉtə́nə ndə ntɛhə inchəŋ, kə́ yá fyii nə tʉʉjyu, 12 kə́ kɔ́ ndɔ tʉ mbʉ Tie ndə ɔ nɔʼ chìi bii kʉ̀ʼnə ndə məlʉ̀ yi-yə yʉʉ ndə fɔ-bʉə-Nyii-bə ndə ɔ nɔʼ shʉ̀tə tʉ́ʼtə tʉ bʉə-bi mu kɛʼɛ ndə i lɔ̀ hə kəyəŋ ndə ɔ bɛ chɔ. 13 Nɔ bɛ mbəŋ-ɛŋ ndə ɔ nɔʼ kwáa tʉkə-ʉʼʉ ndə ghʉəʼ-mu-kənjəŋ-kə lʉ̀ bʉʼʉ kɔ́ mu sɔ́ʼ Vaa-ɛ ndə ɔ kʉ̀ʉ daa, 14 ndə bʉʼʉ kie chʉʼ-kətʉ-bə kəghɔ-ɔ, kə́ bɛ məsʉ̀fyii hə ndəŋ bʉ̂ʼtə-ʉə.

15 Ɔ nɔ bɛ finə-Nyii ndə bə mə nyíɛ ɔŋ fɛ. Ɔ nɔ chàa fɔbə inchəŋ ndə i bɛ kəwʉʉnəmbi.

16 Bʉʼka Nyii nɔ kə chìi fɔbə inchəŋ tíŋ hə bɔ̌ŋ-ɔŋ, fɔbə ndə i bɛ yuo, ghɔŋbə bī-kəchisê-bə, bìbə ndə bə tʉʼ nyíɛ, ghɔŋbə bìbə ndə bə gòʼ təmə kə́ nyíɛ fɛ, kə bɛ yetəbə loo, kə bɛ bətiekətʉ loo, kə bɛ bʉə ndə bɔ̂ŋ tʉʼ sɔ́ʼ loo, byuunɔ, bəntəŋbəshʉ ndə bɔ̂ŋ tʉʼ sɔ́ʼ loo, Nyii nɔ kə chìi fɔbə inchəŋ tíŋ hə bɔ̌ŋ Klai bɔŋleʼ chìi tʉ ɔŋ. 17 Fɔbə inchəŋ nɔ nə kə bɛ ghɔ, tʉ ɔ nɔʼ kə bɛ ghɔ. Tíŋ hə bɔ̌ŋ mbəŋ-ɛŋ bə nɔ yá fɔbə inchəŋ ghɔŋbə nubə inchəŋ tʉ́ʼ haʼ ndə mə-kə́-fɔ̀ʼ ndəŋ yəŋ-bʉə.

18 Ɔ nɔ bɛ tʉ-mbʉ-mbʉə-kə ndə bɛ chɔshi, kə́ bɛ nchʉʉhə bɔŋleʼ mu bʉə ndə bɔ̂ŋ nɔʼ nə kwú bʉ̀nə kóʼ ɔ nɔ chàa bɔŋ bənchəŋ, mbɔ ɔ chʉʼ kie ghʉəʼkə ndə məgìe kətʉ fɔbə inchəŋ.

19 Bʉʼka Nyii nɔ kə kʉ̂ʉ mbɔ ntɛhə-i inchəŋ bɛ mu Klai, 20 bɔŋleʼ tíŋ hə bɔ̌ŋ ɔŋ ndə məbʉ̀nə gwè nə fɔbə inchəŋ tʉ ŋwɔŋ-ɛŋ, kə bɛ fɔ-kəchisê-bə-ɔ̄ŋ, kə bɛ fɔbə mu yuo, ndə mə-leʼ-lìʼ ntuu tíŋ hə ndəŋ fɔbʉəkə-i ndə i fyú ndəŋ tyʉntɔɔnəkə. 21 Bɔŋ mbəŋ-yii, ndə bii kə leʼ dɔ̀ŋnə mbʉə Nyii vɛʼbɛʼ, kə́ bɛ bʉə-bàa-bi mu fyii-bii bʉʼka nu-bʉəbʉə-bə ndə bii nə kə́ fɔ̀ʼ 22 bɔŋ nduɔ, Nyii nɔʼ lìʼ ntuu-yʉʼʉ nə mbɔʼ-mbʉə-Klai tíŋ hə ndəŋ kwu-i ndəŋ tyʉntɔɔnəkə, ndə məchìi bii bɛ ŋkʉʉ, bɛ tʉ́ʉnə bɔŋleʼ bɛ təmə kwɔtəkə fɛ, ndʉʉ ndə bii bu yi bɛ bəshʉ ɔ. 23 Bii nɔ kie ndə mə-yaʼ-kə́-mɔ̀ʼ ŋgie-shʉəŋ-kə-ɔ̄ŋ mu fyii-bii, tə́nə chɔ shʉ́əshʉ́ə təmə fɔkə mə ŋɛ̀hə bii fɛ. Kə bii mə kwɛ̀ʼtə ndəŋ yəŋkə ndə bii kə yʉ́əʼnə chɔ ndʉʉ ndə bii kə yʉ́ mbʉ ntəŋjyujyu fɛ. Bə nɔʼ lɔ̀ʼ mbʉ ntəŋjyujyu tʉ bʉə bənchəŋ mu kəwʉʉnəmbi, bə bɔŋ nɔ kə leʼ chóʼ mbəŋ-ɔŋ Bɔɔ ndə məbɛ vaafɔ̀ʼ-Nyii ndə məlɔ̀ʼ mbʉ ntəŋjyujyu.

24 Nduɔ, tʉʉ-ɔ nɔ tʉʼ bʉ̀ʉ ndə ŋgʉəʼ ndə mɔ tʉʼ nyíɛ yie-bii, bʉʼka ŋgʉəʼ ndə mɔ tʉʼ nyíɛ ndə mbɔʼ-mbʉə-ɔ, nɔ tʉʼ mìʼtə bəʼ-ŋgʉəʼ-Klai-kə yie-mbʉə-e ndə bɛ mbʉ chɔshi, 25 Nyii ndə ɔ kə chìi mɔ ndə məbɛ wo-fɔ̀ʼ tʉ chɔshi, nɔ kə kɔ́ tʉ mɔ ndə bʉʉ-yii. Nɔ bɛ fɔ̀ʼ ndə mə-kɛŋ-lɔ̀ʼ ŋgieNyiikə tə gɛ̀ lìʼ. 26 Kə́ bɛ nukə ndə ɔ nɔʼ kə lə̀ŋ ndə ŋgʉʼŋgʉʼhə kəghɔ-bʉəməsʉʉ bənchəŋ, bɔŋ nɔʼ séʼ ndə məkɛ̀ʼ nduɔ tʉ yi-yə bʉə. 27 Nyii nɔ kə shʉ̀tə ndə məkɛ̀ʼ nukə-ɔ̄ŋ ndə bə kə lə̀ŋ tʉ bʉə ndə bɛ yi-yə, nukə ndə i kie fɔŋ-məgʉ́ə ndə ɔ kie tʉ bʉə ndə bɔ̂ŋ gòʼ təmə bɛ bʉə-Juu fɛ. Nu-shʉəŋ-kə-ɔ̄ŋ nɔ bɛ mbɔ Klai nɔ bɛ mu mbʉə-bii, nɔ, b̈ii yʉ́əʼnə ndəŋ ɔŋ mbɔ bii chʉʼ yi lʉ̀ yʉʉ ghɔ ndə məgʉ́ə ndə Nyii kie.

28 Bʉʼʉ nɔ tʉʼ lɔ̀ʼ ntəŋjyujyu te Klai tʉ bʉə bənchəŋ, kə́ shyùu tyunə-bʉə-bənchəŋ-bə, bɔŋleʼ dàhə bɔŋ bənchəŋ nə ntɛ-mukətʉ-súunə-hə inchəŋ mbɔ bʉʼʉ chʉʼ lʉ̀ wotəmiyɔŋ gwè nə nɔŋ bəshʉ-Nyii ndə wo ndə ɔ nɔʼ tə́ŋ mu Klai. 29 Ndə məlìʼ fɔʼɔ-ɔ̄, mɔ nɔ tʉʼ kìi lyʉʼnə bɔŋleʼ kɔ̀ɔtə, nə fɔŋ kəghʉəʼ ndə Jiso Klai tʉʼ kɔ́ tʉ mɔ, i kə́ fɔ̀ʼ mu mbʉə-mɔ.