1 Mɔ bɛ fʉə mɛ? Mɔ kaa lɔntəŋNyii fe? Mɔ chʉʼ nyíɛ Jiso Tiekətʉ-yʉʼʉ fe? Bii kaa ghɔ-fɔʼɔ-kə-ɔŋ mu Tiekətʉ fe? 2 Kaʼ bəbɛʼbʉə gòʼ təmə nyíɛ mɔ nə lɔntəŋNyii fɛ təmə bii nɔ kie ndə mənyíɛ mɔ nə lɔntəŋNyii. Bii nɔ bɛ cheʼ-fɔʼɔ-kə-ɔŋ ndə mədʉ̀ʼ mbɔ mɔ nɔ bɛ lɔntəŋNyii bəshʉ Tiekətʉ.

3 Nɔ bɛ ntɛ nɔ ndə mɔ bu túu chu-ɔ tʉ bʉə ndə bɔ̂ŋ tʉʼ kíi mɔ. 4 Baʼa kie ghʉəʼkə ndə məyú bɔŋleʼ nú ghɔ fɛ mɛ? 5 Baʼa Banaba kie ghʉəʼkə ndə məlʉ̀ bəke-baʼa ghɔ ndə bɔ̂ŋ nɔʼ bɛ́ŋ Nyii baʼa bɔŋ kə́ tòʼ mɔʼɔ haʼ ndə bəbɛʼbəlɔntəŋNyii tʉʼ chìi ghɔŋbə bəliŋ-Tiekətʉ leʼnə Bita fe? 6 Byuunɔ, bɛ haʼ baʼa Banaba ndə baʼa ɔ kie ghʉəʼkə ndə məfɔ̀ʼ fɔʼtə ndə mətɔ́ŋtə ŋwɔŋ-yaʼ nə yɔŋ mɛ? 7 Bɛ yɔ̂ŋ-yə wo bəsɔge ndə ɔ tʉʼ fɔ̀ʼ kə́ lɔ̀ʼ ŋwɔŋ-ɛŋ nə mbəŋ-ɛŋ? Bɛ nda ndə ɔ bè tɔ-təlyʉʼ-kə təmə nə yú ntɔŋhə chɔ fɛ? Byuunɔ, bɛ nda ndə ɔ tʉʼ chyìi tia-binjyʉʉhə-kə təmə yi kɔ́ŋ ibɛʼ-yə ŋwɔŋ-yʉə ndə mənú fɛ? 8 Mɔ tʉʼ gìe yɔ̄ŋ-yə nubə nə ŋkwɔʼtə-woməsʉʉ mɛ? Nuʼ-Mushi ghɔŋ ghɔ nɔ fe? 9 Bʉʼka bə nɔ nyɔ̀ʼ mu ŋwɔʼnə-nuʼ-Mushi mbɔ, "Kə a mə chíe naʼ ndə məkwó suu ndʉʉ ndə ɔ tʉʼ bɛ̀nə fɛ." Nduɔ, Nyii kwə́ʼ yɔ̄ŋ-yə kə́ kwɔ̀ʼtə bə haʼ bənaʼa mɛ? 10 Ɔ tʉʼ kwɔ̀ʼtə bʉʼʉ fe? Bə nɔ kə nyɔ̀ʼ kə kwɔ̀ʼtə bʉʼʉ. Bʉʼka w̃o lə̀ŋ kəndəŋ ghɔŋ wo bɛ̀nə suu nɔ fɔ̀ʼ kə́ kwɔ̀ʼtə ndə məkie yʉʉ ndə fɔʼɔ-yʉə.

11 Kaʼ baʼa bè nubə ndə i gwè hə kəghɔ-LyʉʉhəNyiikə mu fyii-bii, i bu yɔ́ŋ daa tʉ baʼa ndə məbíʼtə fɔ-kəwʉʉnəmbi-bə hə kəghɔ-bii ndə sii-yaʼ mɛ? 12 Kaʼ bɛ yəŋ-bəbɛʼbʉə-kə ndə məbíʼtə fɔbə-ɔ̄ŋ hə kəghɔ-bii, bəkɔ mbəŋ-yaʼ buŋ bíʼtə yɔ́ŋyɔ́ŋ fe? Baʼa bɔŋ lʉ̀ yɔ̄ŋ-yə ntɛ kəyəŋ fɛ, baʼa nɔ buŋ leʼ yá bə fyiihə-aʼ ndə nubə inchəŋ bʉʼka məmɔ̀ʼ ŋkyʉʉhəkə ndəŋ fia ndə i tʉʼ gwè nə ntəŋjyujyu te Klai.

13 Bii kínə mbɔ b̃ʉə ndə bɔ̂ŋ tʉʼ fɔ̀ʼ mu njaafɛ̀ʼndɛŋNyii, nɔ kie fɔyubə-ʉə hə mu njaafɛ̀ʼndɛŋNyii fe, bʉə ndə bɔ̂ŋ tʉʼ fɔ̀ʼ kəyəŋfɛ̀ʼndɛŋNyii kə́ yú hə ndəŋ fɔ-fɛ̀ʼndɛŋ-bə fe? 14 Nɔ bɛ haʼ nɔ ndə Tiekətʉ kàhə mbɔ bʉə ndə bɔ̂ŋ tʉʼ lɔ̀ʼ ntəŋjyujyu nɔ kie ndə məyú hə ndəŋ mbʉ ntəŋjyujyu. 15 Təmə mɔ bɔŋ nɔʼ lʉ̀ nukə imɔʼ ndə nubə-ɔ̄ŋ tə́nə chɔ fɛ, byuunɔ, mɔ tʉʼ nyɔ̀ʼ nubə-ɔ̄ŋ ndə məshʉ̀tə fia tʉ mɔ ndə məkie mbʉ bəfɔ fɛ. Nɔ bʉ̀ʉ mbɔ mɔ kwú tə chàa mbɔ wo byùutə mɔ hə ndə luu ndə mɔ tʉʼ kwɛ̀ŋ fyii-ɔ bʉʼka yɔŋ. 16 Shʉəŋshʉəŋ, mɔ mə-kə́-lɔ̀ʼ ntəŋjyujyu, i kɔ́ luu tʉ mɔ ndə mə-kə́-kwɛ̀ŋ fyii-ɔ fɛ. Bʉʼka nɔ bɛ nukə ndə bə kàhə mɔ ndə məchìi. Ŋgʉəʼ nɔ bɛ kətʉ-mɔ kaʼ mɔ gòʼ təmə lɔ̀ʼ mbʉ ntəŋjyujyu fɛ!

17 Kaʼ mɔ kʉ̌ʉ kə́ fɔ̀ʼ yɔ̄ŋ-yə ndə ŋkʉʉnə-tʉʉ-ɔ, mɔ kie kɛŋbə. Bɔŋ kaʼ gòʼ təmə bɛ bə ŋkʉʉnə-tʉʉ-ɔ fɛ, nɔ kɔ́ Nyii kɔ́ haʼ mbʉ fɔʼɔ mu kəghɔ-mɔ ndə mə-kə́-lɛ́nə. 18 Kɛŋbə-ɔŋ bɛ ka ndʉʉmɛ? Nɔ bɛ fia tʉ mɔ ndə mə-kə́-lɔ̀ʼ ntəŋjyujyu təmə kə́ bíʼtə kɛŋbə fɛ, təmə bɔŋleʼ lʉ̀ yəŋkə-ɔŋ ndə mɔ kie bʉʼka fɔʼɔ-ɔ ndə ntəŋjyujyu fɛ.

19 Buŋ ndə mɔ gòʼ təmə bɛ fʉə tʉ wotəmiyɔŋ fɛ, mɔ bɔŋ nɔʼ lʉ̀ ŋwɔŋ-ɔŋ ndə məbɛ vaafɔ̀ʼ tʉ bʉə bənchəŋ, mbɔ mɔ chʉʼ bɔŋ gwè nə buŋmbi tʉ Klai ndə bəkɔ mɔ gwè nə yɔŋ. 20 Tʉ bʉə-Juu, mɔ kə́ chìi nubə ndə wo-Juu ndə mə-chʉʼ-gwè nə bʉə-Juu tʉ Nyii. Tʉ bʉə ndə bɔ̂ŋ kie nuʼ-Mushi mɔ kə́ chìi nə wo ndə ɔ kie nuʼ-Mushi (təmə mɔ bɔŋ bɛ tɔʼɔ nuʼ nə mbəŋ-ɔŋ fɛ) mbɔ mɔ chʉʼ gwè nə bʉə ndə bɔ̂ŋ kie nuʼ tʉ Jiso Klai. 21 Ndʉʉ ndə mɔ tʉʼ fɔ̀ʼ baʼabə bʉə ndə bɔ̂ŋ gòʼ təmə bɛ bʉə-Juu fɛ, mɔ kə́ chìi nə wo ndə ɔ gòʼ təmə bɛ wo-Juu fɛ, wo ndə ɔ gòʼ təmə bɛ tɔʼɔ nuʼ-bʉə-Juu fɛ, ndə məgwè nə bʉə ndə bɔ̂ŋ gòʼ təmə bɛ bʉə-Juu fɛ tʉ Klai. Yɔ̄ŋ-yə kaa mbɔ mɔ gòʼ təmə kə́ tʉ́ʼ nuʼ-Nyii fɛ, mɔ nɔ kɛŋ bɛ tɔʼɔ nuʼ-Klai.

22 Tʉ bʉə ndə bɔ̂ŋ lʉ́ʉtə ndə məmɔʼfyiihə-ʉə ndəŋ Nyii, mɔ nɔ kə lʉ́ʉtə nə mbyu wo mu bɔŋ mbɔ mɔ chʉʼ gwè nə bʉə ndə bɔ̂ŋ lʉ́ʉtə tʉ Klai. Mɔ nɔʼ mɛ̀ʼtə nubə inchəŋ tʉ bʉə bənchəŋ, mbɔ tíŋ hə bɔ̌ŋ fiatə inchəŋ, mɔ chʉʼ gwè nə bʉəbɛʼbə tʉ Klai. 23 Mɔ nɔ fɔ̀ʼ nchəŋnchəŋ-ɛ̄ŋ bʉʼka ntəŋjyujyu mbɔ mɔ chʉʼ yi lʉ̀ yʉʉ baʼa bɔŋ ndə biʼbə ndə ĩ gwè hə chɔ.

24 Bii kínə mbɔ bə nyʉ́ʉ ndʉʉ nɔ, bʉə bənchəŋ nyʉ́ʉ, bɔŋ yi lʉ̀ mbyu wo-imɔʼ lʉ̀ lɔʼɔbə fe? Nɔ, b̈ii nyʉ́ʉ ndə ntɛ ndə bii bu yi lʉ̀ lɔʼɔbə. 25 B̃ʉə ndə bɔ̂ŋ nyʉ́ʉ ndʉʉ, nɔ yá ŋwɔŋ-yʉə ndə nubə inchəŋ. Bɔ̂ŋ nɔ chìi mbɔ b̈ə fùɔ ŋgʉʼʉ kətʉ-bɔŋ ndə i bu nə mì, bʉʼʉ bɔŋ kə́ nyʉ́ʉ yʉʼʉ-yə ndʉʉ ndə məfùɔ ŋgʉʼʉ ndə i mə nə mì fɛ. 26 Mbəŋ-ɔŋ tʉʼ nyʉ́ʉ ndʉʉ ndʉʉghɔfii njʉnjʉ fɛ, təmə kə́ kwɔ̀ŋ fʉəŋbə nə wo ndə ɔ tʉʼ kwɔ̀ŋ wʉʉnəmbikə fɛ. 27 Mɔ tʉʼ gwúu bə mbʉə-ɔ, kə́ yá ɔ tʉ́ʼ ndə fʉə-ɔ, kaʼ byuunɔ, təmə mɔ bu lɔ̀ʼ ntəŋjyujyu tʉ bəbɛʼbʉə yi kəliʼ, bə mɛ̀ʼ mɔ bɔ̌ŋ nə mbəŋ-ɔŋ.