1 Kaʼ mɔ kə́ kwə́ʼ ŋgie-bʉəməsʉʉ-bə leʼnə ŋgie-bʉəntəŋNyii-bə, təmə bɔŋ kie ŋkʉ̂ʉ fɛ, təmə mɔ nɔ bɛ ŋgəŋ ndə i tʉʼ bʉ́ʼ byuunɔ gyʉʉ-mənjuu. 2 Kaʼ mɔ kie ghʉəʼkə ndə mətéʼ ntəŋ ndə i gwè hə kəghɔ-Nyii, leʼnə ghʉəʼkə ndə məkínə nubə inchəŋ ndə bə kə lə̀ŋ, leʼ kie ntɛ-ndaa-hə inchəŋ bɔŋleʼ mɔ̀ʼfyii-ɔ ndəŋ Nyii inchəŋ ndə bəkɔ i chìi mɔ mʉ̀ʼ kwɔŋhə, təmə bɔŋ kie ŋkʉ̂ʉ fɛ, təmə mɔ nɔ bɛ wo njʉnjʉ. 3 Kaʼ mɔ gyʉ̀ə fɔbə inchəŋ ndə mɔ kie, kaʼ mɔ buŋ kɔ́ ŋwɔŋ-ɔŋ mbɔ b̈ə tɔ̀ŋ mɔ, təmə bɔŋ kie ŋkʉ̂ʉ fɛ, təmə mɔ sii fɔkə fɛ.

4 Ŋkʉ̂ʉ nɔ bɛ məyá-fyii leʼnə buuŋjyu, ŋkʉ̂ʉ kyinə bàabʉʉ fɛ byuunɔ bʉ́ʼ fyii fɛ, i kaa ŋaʼtəkə fɛ 5 byuunɔ məmɔ̀ʼ tʉ-vyii-wo-kə fɛ. I kyinə lyʉ̀ʉ haʼ ndəŋ yi-yə fɛ, i kyinə chʉʼ yùhə ndə məbàa tʉʉ fɛ, byuunɔ bə́ʼtə tyʉbə ndə mɔ̀ʼmbɛ mɔ̀ʼ fɛ, 6 ŋkʉ̂ʉ kyinə chʉ́əʼtə te nu-bʉəbʉə-kə ndə ibɛʼ-yə wo chìi fɛ, ĩ bɔŋ nɔ chʉ́əʼtə te shʉəŋ. 7 Ŋ̃kʉʉ nɔ bɔ̀ŋtə nubə inchəŋ, bɛ́ŋ nubə inchəŋ, kə́ kie fyii shʉ́əshʉ́ə ndəŋ nubə inchəŋ bɔŋleʼ yá fyii ndəŋ nubə inchəŋ.

8 Ŋkʉ̂ʉ kyinə lìʼ fɛ. Mətéʼ ntəŋ ndə i gwè hə kəghɔ-Nyii bu yi lìʼ, məkwə́ʼ ŋgiebə-ŋkʉʉŋkʉʉ, yi lìʼ, ndaa bu nə lìʼ. 9 Bʉʼka bʉʼʉ nɔ kínə nubə nduɔ kəbəʼ, kə́ téʼ ntəŋ ndə i gwè hə kəghɔ-Nyii kəbəʼ, 10 bɔŋ ndʉʉ ndə nubə bu yi bɛ tə gɛ̀ kùu nɔ, nubə ndə i bɛ kəbəʼ lìʼ.

11 Vɛʼ ndə mɔ kə bɛ vaambuɔ, mɔ kə́ kwə́ʼ nə vaambuɔ kə́ kwɔ̀ʼtə nubə bɔŋleʼ lɛ́nə nə vaambuɔ. Ndʉʉ ndə mɔ kə bɛ woghəŋ, mɔ mɛ̀ʼtə nu-vâambuɔ-bə chɔ. 12 Nduɔ, bʉʼʉ nɔ tʉʼ nyíɛ mu fɔ-lɛ́nə-shʉ-kə ndə i tʉʼ lúhə, bɔŋ mbʉ ndʉʉ kʉ̂ʉ yi gwè nɔ, bʉʼʉ nyíɛnə shʉ̀tə. Nduɔ mɔ nɔ kínə kəbəʼ, mbʉ ndʉʉ kʉ̂ʉ yi gwè nɔ, mɔ kínə gɛ̀ kùu, haʼ ndə bə kínə mɔ nduɔ gɛ̀ kùu. 13 Nɔ, nubə nɔ bɛ ghɔ itia ndə i káa, kə́ bɛ məmɔ̀ʼfyii ndəŋ Nyii, məyʉ́əʼnə ndəŋ Nyii leʼnə ŋkʉ̂ʉ, ŋkʉ̂ʉ kə́ bɛ fɔŋ ɛŋ.