1 Mɔ kʉ̀ʉ mbɔ bii bɛ tʉŋkwɔŋ ndə nubə-ɔ̄ŋ fɛ, bəliŋ-bɔŋ, mbɔ, mbɔʼkə nɔ nə kə́ dʉ̀ʼ fia tʉ bətietie-bʉʼʉ ndə i kə gɛ̀ hə bəshʉ-bɔŋ, bɔ̂ŋ bənchəŋ dàa muukwɛʼtəŋmə*. 2 Mu mbʉ kəmbɔʼ ghɔŋbə mbʉ muukwɛʼtəŋ, bɔ̂ŋ bənchəŋ fí muu ndə bʉə ndə bɔ̂ŋ kə́ gɛ̀ hə bɔ̌ŋ Mushi. 3 Bɔ̂ŋ bənchəŋ yú ntɛ bəfɔyu imɔʼ ndə i gwè hə yuo, 4 bɔŋleʼ nú ntɛ muu imɔʼ ndə i gwè hə yuo. Bʉʼka bɔ̂ŋ kə nú hə ndəŋ ŋgoʼ ndə i gwè hə yuo ndə ɔ kə́ gɛ̀ hə bɔ̌ŋ bɔŋ. Mbʉ ŋgoʼ nɔ kə bɛ Klai nə mbəŋ-ɛŋ. 5 Bɔŋ tʉʉ-Nyii kə bʉ̀ʉ ndə njɔŋnjɔŋ yʉə fɛ, nɔ ɔ yítə bɔŋ wɔ̀ʼhə ŋkwubə-ʉə mu kwɔŋkəyəŋnə.

6 Nubə-ɔ̄ŋ nɔ kə fyú ndə fʉʼkənu tʉ bʉʼʉ, mbɔ bʉʼʉ mə kɔ́ fyiihə-ʉə ndəŋ fɔʼ-bʉəbʉə-tə ndə bɔ̂ŋ fɛ. 7 Kə bii mə kə́ gháa bənyii nə bəbɛʼbʉə mu bɔŋ nə kə́ fɔ̀ʼ fɛ, haʼ ndə bə kə nyɔ̀ʼ mbɔ, "Mbʉ bʉə nɔ kə dùʼtə sê ndə məyú, nú bɔŋleʼ kʉ̀ʉ ŋkʉ̂ʉ-bəsəŋ-bə."* 8 Bʉʼʉ kie ndə məkɔ́ʼ ŋwɔŋtə-ʉʼʉ ndə məgháa bəsəŋ ndə bəbɛʼbʉə mu bɔŋ nə kə fɔ̀ʼ fɛ. I nɔ kə chìi bʉə 23,000 gwùtə sê kwútə ndəŋ chîmbikə imɔʼ.

9 Byuunɔ, kə bʉʼʉ mə kə́ mùutə Klai ndə bəbɛʼbʉə mu bɔŋ kə mùutə ɔŋ, yɔhə lə́ŋtə bɔŋ yítə fɛ. 10 Byuunɔ, kə́ luŋtə ndə bəbɛʼbʉə mu bɔŋ kə́ luŋtə, Fɔŋ-kwú yítə bɔŋ fɛ. 11 Nduɔ, nubə-ɔ̄ŋ nɔ kə fyú tʉ bɔŋ ndə fʉʼkənu tʉ bʉʼʉ, bə bɔŋleʼ nyɔ̀ʼ ndə məshyùu tyunəbə-ʉʼʉ ndə bʉʼʉ nɔʼ kə́ŋhə mbʉə mbi ndə məlìʼ.

12 Nɔ, ẅo ndə ɔ kwɔ̀ʼtə mbɔ ɔ tə́nə, lʉ̀ ndaa bʉʼka məgwù. 13 Ntɛ-məntɔ ndə i bɛ fyii-bii ndə məchìi bʉ̂ʼʉ, nɔʼ nə bɛ haʼ fyii bəbɛʼbʉə. Nyii bɔŋ bɛ Nyii gìe shʉəŋ, ɔ kʉʉ mɛ̀ʼtə i gwè tʉ bii tə tíŋ ghʉəʼkə-ii fɛ, bɔŋ ndʉʉ ndə i gwè tʉ bii, ɔ bu dʉ̀ʼ fia tʉ bii ndə mənyʉ́ʉ fyú, bɔŋ ndə mə-leʼ-lyʉ̀ʉtə́nə.

14 Nɔ, mbʉətə bətieŋkɔŋ-bɔŋ, b̈ii nyʉ́ʉ hə ndə məgháa bənyii. 15 Mɔ nɔ tʉʼ kwə́ʼ tʉ bʉə ndaa, b̈ii kwɔ̀ʼtə nə mbəŋ-yii mbɔ nukə ndə mɔ tʉʼ gìe bɛ shʉəŋ mɛɛ. 16 Ndʉ̂ʉ bəfɔyú-Tiekətʉ ndə bʉʼʉ tʉʼ kɔ́ ndɔ chɔ nú, kaa fɔbʉə-Klai-kə ndə bʉʼʉ tùo mɔʼɔ ndə mənú fe? Mbʉ bele ndə bʉʼʉ tʉʼ bə́ʼtə, bɛ mbɔʼ-mbʉə-Klai ndə bʉʼʉ tùo mɔʼɔ ndə məkwó fe? 17 Bʉʼka bɛ mbyu bele imɔʼ ndə bʉʼʉ tʉʼ gyʉ̀ə, kwó, buŋ ndə bʉʼʉ bɛ yɔ́ŋyɔ́ŋ nɔ, bʉʼʉ bɔŋ kə́ bɛ mbʉə imɔʼ. 18 B̈ii lɛ́nə bʉə-Isilɛ nyíɛ. Ndʉʉ ndə bɔ̂ŋ kə́ yú fɔbə ndə bə nɔʼ fɛ̀ʼndɛŋ nə yɔŋ mu kəyəŋfɛ̀ʼndɛŋNyii, bɔ̂ŋ fúu ŋwɔŋ-yʉə bɛ mbyu wo-imɔʼ mu mələ̀ʼtə-Nyii.

19 Mɔ tʉʼ ghɔ̀ŋ mbuka ndʉʉmɛ? Mbɔ fɔyubə ndə bə nɔʼ fɛ̀ʼndɛŋ nə yɔŋ tʉ bənyii bɛ fɔbɛʼkə mɛ, byuunɔ mbɔ mbʉ bənyii bɛ fɔbɛʼkə mɛ? 20 Mbee, i mə nə bɛ nɔ fɛ. Mɔ nɔ tʉʼ ghɔ̀ŋ mbɔ f̃ɔbə ndə bʉə ndə bɔ̂ŋ gòʼ təmə kínə Nyii fɛ fɛ̀ʼndɛŋ nə yɔŋ, bə nɔ tʉʼ kɔ́ bə tʉ lyʉʉhəbʉəbʉəbə, kaa tʉ Nyii fɛ. Mɔ kʉ̀ʉ mbɔ b̈ii kie njunə biibə lyʉʉhəbʉəbʉəbə fɛ. 21 Kə bii mə nú hə ndʉ̂ʉ-Tiekətʉ bʉ̀nə gɛ̀ nú ndʉ̂ʉ-bəlyʉʉhəbʉəbʉə fɛ. Kə bii mə yú hə ndəŋ tebele-Tiekətʉ bʉ̀nə gɛ̀ yú ndəŋ tebele-bəlyʉʉhəbʉəbʉə fɛ. 22 Bʉʼʉ bu ŋɛ̀hə bəfyuʼ-Tiekətʉ mɛ? Bʉʼʉ shʉ́ə chàa ɔ mɛ?

23 Bəbɛʼbʉə nɔ ghɔ̀ŋ mbɔ, "Bə nɔʼ kɔ́ ghʉəʼkə tʉ baʼa ndə məchìi nubə inchəŋ," təmə mbʉ bənu inchəŋ bɔŋ mə kwáa bʉə fɛ. Bəbɛʼbʉə nɔ ghɔ̀ŋ mbɔ, "Bə nɔʼ kɔ́ ghʉəʼkə tʉ mɔ ndə məchìi nubə inchəŋ," təmə bɔŋ mbʉ bənu inchəŋ mə bɔ́ bʉə fɛ. 24 Kə wo mə-kə́-kʉ́ʉ nu-jyujyu-bə haʼ tʉ ŋwɔŋ-ɛŋ fɛ, ɔ bɔŋ kie ndə məkʉ́ʉ tʉ wo-kətoʼ-e.

25 Yú fɔkə təmiyɔŋ ndə bə tʉʼ fɛ̀ŋ vyii-mbɔʼ təmə kə́ bíʼtə mbiʼtə fɛ, bʉʼka ŋkwɔʼtə-a. 26 Bʉʼka ŋwɔʼnə-Nyii nɔ ghɔ̀ŋ mbɔ, "Chisêkə nɔ bɛ yi-Tiekətʉ-yə, ghɔŋbə fɔbə inchəŋ ndə i bɛ muŋgɔ."

27 Kaʼ wo ndə ɔ gòʼ təmə kə́ fàa Nyii fɛ kɔ̀ʼnə bii, bii kʉ̀ʉ ndə məgɛ̀, fɔkə təmiyɔŋ ndə bə tʉ́ʼ bəshʉ bii, b̈ii yú təmə kə́ bíʼtə mbiʼtə ndə i bu kə́ chɔ́ŋhə ŋkwɔʼtə-yii te nu-kʉ̀ʼnə-kə ghɔŋbə nukə ndə i gòʼ təmə kʉ̀ʼnə fɛ. 28 (Bɔŋ kaʼ wo ghɔ̀ŋ tʉ bii mbɔ, "Bə nɔʼ fɛ̀ʼ bənyii nə yɔ̄ŋ-yə," kə bii mə yú fɛ, bʉʼka mbʉ wo-ghɔ̄ ndə ɔ kɛ̀ʼ tʉ bii ghɔŋbə ŋkwɔʼtə nu-kʉ̀ʼnə-kə ghɔŋbə nukə ndə i gòʼ təmə kʉ̀ʼnə fɛ. 29 Mɔ tʉʼ te ya-yə ŋkwɔʼtə te nu-kʉ̀ʼnə-kə ghɔŋbə nukə i ndə gòʼ təmə kʉ̀ʼnə fɛ, mɔ nɔ tʉʼ te bə yi-yə ŋkwɔʼtə te nu-kʉ̀ʼnə-kə ghɔŋbə nukə ndə i gòʼ təmə kʉ̀ʼnə fɛ.)

Bɔŋ bu chìi ka, kaʼ tʉkə-ɔŋ lʉ́ʉ mɔ ndə məchìi nukə, kə́ dʉ̀ʼ bɛ ŋkwɔʼtə ibɛʼ-yə wo tʉ mɔ ndə ntɛ ndə mɔ kie ndə məchìi? 30 Kaʼ mɔ kɔ́ ndɔ Nyii ndə məyú mbʉ bəfɔyu, bu chìi ka bəbɛʼbʉə kə́ dʉ̀ʉhə mɔ ndə fɔyubə ndə mɔ nɔʼ kɔ́ ndɔ Nyii chɔ?

31 Nɔ, kə bii yú fɔkə, byuunɔ nú fɔkə, byuunɔ chìi nukə, b̈ii fɔ̀ʼ nchəŋnchəŋ-ɛŋ ndə məkɔ́ məgʉ́ə tʉ Nyii. 32 Məchimbi-yii nɔ kie ndə məbɛ ntɛ ndə i kʉʉ mɔ̀ʼ ŋkyʉʉhəkə tʉ bʉə-Juu fɛ, byuunɔ tʉ bʉə ndə bɔ̂ŋ gòʼ təmə bɛ bʉə-Juu fɛ, byuunɔ bʉə-chɔshi-Nyii fɛ, 33 haʼ ndə mɔ tʉʼ chìi. Mɔ nɔ tʉʼ kɔ̀ɔtə ndə məchìi tʉʉbʉə bənchəŋ bʉ̀ʉ, ndə nubə inchəŋ ndə mɔ tʉʼ chìi, təmə kə́ kʉ́ʉ bə mbɔ bʉ̀ʉ yɔŋ-yə fɛ, bɔŋ kə́ kʉ́ʉ yi-bʉə-buŋmbi-yə mbɔ bɔ̂ŋ chʉʼ kie ŋkwaaNyii.