1 Bɔŋ ndə ŋgie-shʉəŋ-kə bəliŋ-bɔŋ, vɛʼ ndə bʉʼʉ kə bɛ mɔʼɔ, m̃ɔ kə mə kwə́ʼ tʉ bii ndə ntɛ ndə mɔ kwə́ʼ tʉ bʉə ndə bɔ̂ŋ tʉʼ yʉ́ chu-kəLyʉʉhəNyii fɛ, mɔ nɔ kə kie bə ndə məkwə́ʼ tʉ bii fi nə bii bɛ bʉə-kəwʉʉnəmbi, nə vâambuɔ ndəŋ fia-Klai. 2 Mɔ nɔ kə yúʼ bii nə ŋwɔ̂ŋ, təmə bɛ fɔyu-shʉ́əshʉ́ə-bə fɛ, bʉʼka bii chʉʼ kə kʉ̀ʼnə ndə məyú fɛ. Buŋ təkɔmə nduɔ, bii chʉʼ kʉ̀ʼnə ndə məyú fɛ, 3 bʉʼka bii nɔ bíe chí mbi haʼ ndə bʉə-kəwʉʉnəmbi. Bʉʼka bii tʉʼ túunə bəfyuʼ bɔŋleʼ kə́ mɔ̀ʼ chyuutə, yɔ̄ŋ-yə dʉ̀ʼ mbɔ bii bɛ bʉə-kəwʉʉnəmbi fe, kə́ chìi nubə nə bʉəməsʉʉ fe? 4 Bʉʼka ndʉʉ ndə mbyu wo-imɔʼ tʉʼ ghɔ̀ŋ mbɔ, "Mɔ nɔ tʉʼ gɛ̀ hə bɔ̌ŋ Bɔɔ," ibɛʼ-yə kə́ ghɔ̀ŋ mbɔ, "Mɔ nɔ tʉʼ gɛ̀ hə bɔ̌ŋ Abolo," bii tʉʼ chìi nubə haʼ ndə bʉə-kəwʉʉnəmbi fe?

5 Abolo bɛ nda? Bɔɔ bɛ nda? Baʼa nɔ bɛ haʼ vâafɔʼɔ-Nyii ndə bii bɛ́ŋ Nyii tíŋ bə hə bɔ̌ŋ baʼa. Wo mu baʼa nɔ nə kə́ fɔ̀ʼ haʼ nukə ndə Tiekətʉ kɔ́ tʉ ɔŋ ndə məfɔ̀ʼ. 6 Mɔ nɔ kə bè mbʉ ŋgwie, Abolo tyùtə muu chɔ bɔŋ kə́ chìi Nyii i kóʼ. 7 Nɔ, mbʉ wo ndə ɔ bè, byuunɔ wo ndə ɔ tyùtə muu chɔ, mə bɛ fɔbɛʼkə fɛ, bɔŋ bɛ haʼ Ñyii tətɛʼ ɔ ndə ɔ chìi mbʉ ŋgwie i kóʼ. 8 Wo ndə ɔ̃ bè ghɔŋ wo ndə ɔ̃ tyùtə muu chɔ nɔ bɛ fɔkə imɔʼ, wotəmiyɔŋ mu bɔŋ, bɔŋ bu kie kɛŋbə-i haʼ ghʉə ndə ɔ kə fɔ̀ʼ. 9 Bʉʼka baʼa nɔ bɛ bʉə-fɔʼɔ-Nyii ndə baʼa tʉʼ fɔ̀ʼ ntuo. Bii nɔ bɛ mutɔ-Nyii, kə́ bɛ njaa-ɛ.

10 Nə buuŋjyu-Nyii ndə ɔ dʉ̀ʼ tʉ mɔ, mɔ nɔ tʉʼ fɔ̀ʼ nə wo ndə ɔ kínə ndə məbɔ́ŋ njaa jyujyu. Mɔ mɔ̀ʼ yiesê-e, wokədɔŋ kə́ bɔ́ŋ mbʉ njaa. Bɔŋ wotəmiyɔŋ nɔ kie ndə məláa ndə ntɛ ndə ɔ tʉʼ bɔ́ŋ ndəŋ ghɔ. 11 Bʉʼka wo mə leʼ mɔ̀ʼ yiesê kədɔŋ tə tíŋ yi ndə bə nɔʼ kə fəŋ mɔ̀ʼ fɛ, ndə bɛ Jiso Klai.

12 Nɔ, kaʼ wo kə́ bɔ́ŋ njaa ndəŋ mbʉ yiesê nə goo, təŋkə, ŋgoʼ ndə chuɔŋ-ɛŋ chyʉ́ʉ daa, ŋkɔʼmə, ŋkɔ yə́ŋnə byuunɔ ŋkɔ, 13 təmə ntɛ fɔʼɔ-wotəmiyɔŋ bu dʉ̀ʼ ŋwɔŋ-ɛŋ, ndʉʉ ndə Chî-Klai-kə bu kɛ̀ʼ nə viʼi, bʉʼka viʼi bu yúotə ntɛ fɔʼɔ ndə wotəmiyɔŋ nɔʼ kə fɔ̀ʼ. 14 Kaʼ fɔʼɔ wo ndə ɔ bɔ́ŋ ndəŋ mbʉ yiesê tə́nə, təmə ɔ bu kie kɛŋbə. 15 Kaʼ fɔʼɔ wo kyʉ́ʉ, ɔ bɛ́. Mbəŋ-ɛŋ bu kie ŋkwaaNyii, bɔŋ nə wo ndə ɔ nyʉ́ʉ fyú hə mu viʼi.

16 B̈ii kínə mbɔ bii bɛ njaafɛ̀ʼndɛŋNyii fe? LyʉʉhəNyiikə kə́ chí mu mbʉə-bii fe? 17 Kaʼ wo bʉ́əhə njaafɛ̀ʼndɛŋNyii, Nyii bʉ́əhə ɔŋ, bʉʼka njaafɛ̀ʼndɛŋNyii nɔ bɛ ŋkʉʉ, mbəŋ-yii kə́ bɛ mbʉ njaafɛ̀ʼndɛŋNyii ghɔ.

18 Kə wo mə fə́ʼhə ŋwɔŋ-ɛŋ fɛ. Kaʼ wo mu bii kwɔ̀ʼtə mbɔ ɔ kie mukətʉ-súunə kəwʉʉnəmbi-fɛ̄ŋ, ɔ nɔ kie ndə məlʉ̀ ŋwɔŋ-ɛŋ ndə nɔ̌ʼ mbɔ ɔ chʉʼ kɛŋ kie tʉ-súunə-kə. 19 Bʉʼka mbɔ mukətʉ-súunə kəwʉʉnəmbi-ɔ̄ nɔ bɛ bənɔ̌ʼɔ tʉ Nyii. Haʼ ndə bə nɔ nyɔ̀ʼ mu ŋwɔʼnə-Nyii mbɔ,

"Ñyii nɔ fʉ̀ə bʉə-mukətʉ-súunə

ndə məyá bɔŋ ndə ndaahə-ʉə."*

20 Ndə məbìʼ chɔ,

"Tiekətʉ nɔ kínə ŋkwɔʼtə-bʉə-ndaa,

mbɔ i nɔ bɛ njʉnjʉ."*

21 Nɔ, kə wo mə kə́ kwɛ̀ŋ fyii-i mbɔ ɔ bɛ tʉ wo fɛ, bʉʼka fɔbə inchəŋ nɔ bɛ tʉ bii, 22 kə bɛ Bɔɔ, kə bɛ Abolo, kə bɛ Bita, kə bɛ wʉʉnəmbikə, kə bɛ məchímbi, kə bɛ kwu, kə bɛ nubə ndə i bɛ nduɔ, kə bɛ nubə ndə i bɛ bəshʉ gwè, nchəŋnchəŋ-ɛŋ nɔ bɛ tʉ bii, 23 bii nɔ bɛ tʉ Klai, Klai kə́ bɛ tʉ Nyii.