1 Ndʉʉ ndə mɔ kə gwè tʉ bii bəliŋ-bɔŋ, ndə məgwè lɔ̀ʼ nu-shʉəŋ-bə te Nyii ndə i nɔʼ kə fəŋ líi, mɔ kə gwè kə́ kwə́ʼ nə ŋgiekwɛʼtəŋbə fɛ, byuunɔ, nə ŋgie-mukətʉ-súunəkwɛʼtəŋ-bə fɛ. 2 Bʉʼka ndʉʉ ndə mɔ kə gwè bɛ bʉʼʉ, mɔ lʉ̀ ŋwɔŋ-ɔŋ mbɔ mɔ kə kínə nubɛʼkə fɛ, yaʼkɛŋ Jiso Klai leʼnə məkwɛ̀ŋ ndə bə kə kwɛ̀ŋ ɔŋ yí. 3 Nɔ, ndʉʉ ndə mɔ kə gwè tʉ bii, mbʉə ɔ nɔ kə lʉ́ʉtə, kə́ gwònə nə faa-kwu-kə. 4 Nubə ndə mɔ kə́ dàhə ghɔŋbə ntəŋ ndə mɔ kə́ lɔ̀ʼ tʉ bii, mɔ kə kie mukətʉ-súunə woməsʉʉ ndə məlóʼtə bii nə yɔŋ fɛ, Nyii bɔŋ nɔ kə dʉ̀ʼ tʉ bii ntaa mbɔ i nɔ kə gwè hə ndəŋ ghʉəʼ-kəLyʉʉhəNyii-kə. 5 Mbɔ məmɔʼfyiihə-ii chʉʼ yʉ́əʼnə ndəŋ ghʉəʼ-Nyii-kə, təmə bɛ ndəŋ mukətʉ-súunə woməsʉʉ fɛ.

6 Mɔ bɔŋ kə́ dàhə nubə ndə i kie ntɛ mukətʉ-súunəbɛʼ tʉ bʉə ndə bɔ̂ŋ nɔʼ tə̀ŋ ndəŋ fia-Nyii. Təmə bɔŋ bɛ mukətʉ-súunə ndə i gwè hə kəwʉʉnəmbi fɛ byuunɔ hə kəghɔ-bʉə shʉ́əshʉ́ə ndə bɔ̂ŋ tʉʼ sɔ́ʼ wʉʉnəmbikə fɛ, kə́ bɛ bʉə shʉ́əshʉ́ə ndə ghʉəʼkə-ʉə bu yi mì. 7 Mukətʉ súunə ndə mɔ tʉʼ lɔ̀ʼ, nɔ mukətʉ súunə-Nyii ndə i kə líi hə kəghɔ-woməsʉʉ, ndə ɔ nɔʼ nə séʼ wʉʉnəmbikə buŋ nə chʉ́ʉhə, ndə məgʉə-yʉʼʉ. 8 Wo mu bʉə ndə bɔ̂ŋ tʉʼ sɔ́ʼ wʉʉnəmbikə nduɔ, chʉʼ nə kínə yɔ̄ŋ-yə fɛ, bʉʼka mbɔ kaʼ bɔ̂ŋ kʉ̌ʉ nɔʼ nə kínə, təmə bɔ̂ŋ kə mə kwɛ̀ŋ Tiekətʉ ndə ɔ kie məgʉ́ə fɛ. 9 Bɔŋ haʼ ndə bə nyɔ̀ʼ mu ŋwɔʼnə-Nyii mbɔ,

"Nukə ndə shʉ nɔʼ nə nyíɛ fɛ, təmə tyunəkə nɔʼ nə yʉ́ fɛ,

təmə fyii nɔʼ nə kwɔ̀ʼtə fɛ,

nɔ bɛ nubə ndə Nyii nɔʼ nə shʉ̀tə tʉ́ʼ

tʉ bʉə ndə bɔ̂ŋ kʉ̀ʉ ɔ."*

10 Bɔŋ Nyii nɔʼ kɛ̀ʼ nubə-ɔ̄ŋ tʉ bʉʼʉ, tíŋ hə bɔ̌ŋ Lyʉʉhəkə-i. Bʉʼka mbʉ k̃əLyʉʉhəNyii nɔ tyúutə nubə inchəŋ, tə buŋ kɔmə nubə ndə Nyii lə̀ŋ i dɔ̀ŋnə. 11 Kínə nda kínə ŋkwɔʼtə-woməsʉʉ yaʼkɛŋ haʼ lyʉʉhəkə-i ndə i bɛ mu mbʉə-ɔ? Nɔ bɛ haʼ nɔ, wo kínə ŋkwɔʼtə-Nyii fɛ, yaʼkɛŋ Lyʉʉhə-mbʉ-Nyii-kə. 12 Lyʉʉhəkə ndə bʉʼʉ kie, kaa lyʉʉhə-kəwʉʉnəmbi-kə fɛ, bʉʼʉ nɔ kie Lyʉʉhəkə ndə i gwè hə kəghɔ-Nyii, mbɔ bəkɔ bʉʼʉ kínə nubə inchəŋ ndə Nyii nɔʼ kɔ́ tʉ bʉʼʉ yɔ̀ʼ ghɔkə-i.

13 Nɔ ndʉʉmɛ, bʉʼʉ tʉʼ kwə́ʼ nə ŋgiebə ndə bʉʼʉ yétə ndə mukətʉ-súunə woməsʉʉ fɛ, bʉʼʉ nɔ tʉʼ kwə́ʼ nə ŋgiebə ndə bʉʼʉ yétə kəghɔ-LyʉʉhəNyiikə ndə bʉʼʉ tʉʼ fʉ̀ʼtə nu-shʉəŋ-bə-ɔ̄ŋ ndə i gwè hə kəghɔ-LyʉʉhəNyiikə tʉ bʉə ndə bɔ̂ŋ kie LyʉʉhəNyiikə. 14 Wo ndə ɔ gòʼ təmə kie LyʉʉhəNyiikə fɛ, mə bɛ́ŋ shʉəŋ ndə i gwè hə kəghɔ-LyʉʉhəNyiikə fɛ bʉʼka i nɔ bɛ bənɔ̌ʼɔ tʉ ɔŋ, təmə ɔ mə kínə fɛ, b̃ʉʼka nɔ kɔ́ LyʉʉhəNyiikə kɔ́ ghʉəʼkə ndə məkínə. 15 Wo ndə ɔ kie LyʉʉhəNyiikə nɔ kie ghʉəʼkə ndə mətyúutə nubə inchəŋ, təmə wo bɔŋ mə tyúutə ɔŋ fɛ. 16 Bɔŋ,

"Bɛ nda ndə ɔ nɔʼ kínə ŋkwɔʼtə-Tiekətʉ?

Bəkɔ dàhə nda dàhə ɔŋ?"*

Bʉʼʉ bɔŋ kie haʼ ntɛ ŋkwɔʼtə Klai.