1 Kaʼ wo hə mu bii kie ntɔŋntɔŋ ghɔŋ ibɛʼ-yə wo fàa Nyii, ɔ kie yɔ̂ŋ-yə ghʉəʼkə ndə məlʉ̀ ɔ gɛ̀ nə nɔŋ mu njaafɛ̀ʼ tʉ bʉə ndə bɔ̂ŋ gòʼ təmə bɛ ndyʉndyʉ fɛ, hə ndə məgɛ̀ nə nɔŋ bə tʉ bʉə-Nyii? 2 Byuunɔ, bii kínə mbɔ bu kwɛ̀ bʉə-Nyii kwɛ̀ fɛʼɛ bʉə-kəwʉʉnəmbi fe? Kaʼ bɛ mbɔ bu yi kwɛ̀ bii kwɛ̀ fɛʼɛ bʉə-kəwʉʉnəmbi, i dʉ̀ʼ mbɔ bii kie ghʉəʼkə ndə mətíetə vâa bənu ndə i bɛ mu bii fɛ mɛ? 3 Bii kínə mbɔ bʉʼʉ bu yi kwɛ̀ fɛʼɛ bʉəntəŋNyii fe? Nu-kəwʉʉnəmbi-bə-ɔ̄ŋ ndʉʉmɛ, bu chàa bii təka? 4 Nɔ, kaʼ bii kie ntɛ təfɛʼ-maa-ɔ̄ŋ, chìi ka bii kə́ gɛ̀ nə yɔŋ tʉ bʉə ndə bɔ̂ŋ gòʼ təmə kie ntəŋnəmə mu chɔshi fɛ? 5 Mɔ nɔ tʉʼ gìe yɔ̄ŋ-yə ndə məmɔ̀ʼ tʉvyiikə-i. I dʉ̀ʼ mbɔ wo bɛ ghɔ mu bii ndə ɔ kie mukətʉ-súunə ndə bəkɔ ɔ fíi sɔ́ʼ bəbɛʼbə bʉə-Nyii mu bii fe, 6 tʉ wo-Nyii, kə lʉ̀ ibɛʼ-yə gɛ̀ nə nɔŋ mu njaafɛ̀ʼ tʉ bʉə ndə bɔ̂ŋ gòʼ təmə kínə Nyii fɛ mɛ? 7 Buŋ haʼ mbɔ bii tʉʼ gɛ̀ mu njaafɛ̀ʼ biibə bəbɛʼbʉə-Nyii nɔ dʉ̀ʼ mbɔ bii nɔʼ mɔ̀ʼ ŋwɔŋ-yii sê. Bii mə mɛ̀ʼtə bəbɛʼbʉə mɔ̀ʼ bɛ́ tʉ bii fe? I bʉ̀ʉ mbɔ b̈ə kwò bii fe? 8 Nɔ tʉʼ buŋ leʼ mɔ̀ʼ bii bɛ́ tʉ bəbɛʼbʉə, kə́ chìi ŋkwo buŋ tʉ yii-yə bəliŋ.

9 Bii kínə mbɔ bʉə buuŋbʉə kie yʉʉ mu Sɔ́ʼ-Nyii fɛ fe? Kə bii mə fə́ʼhə ŋwɔŋ-yii fɛ, təkɔmə bəŋghaa-bəsəŋ, təkɔmə bʉə ndə bɔ̂ŋ tʉʼ gháa bənyii kədɔŋ, təkɔmə bʉə ndə bɔ̂ŋ kie lɔŋ kə́ gháa bəsəŋ byuunɔ bələŋ ndə bɔ̂ŋ bɛ bəsɔkʉʉ byuunɔ bələŋ ndə bɔ̂ŋ tʉʼ chí ghɔŋbə bələŋ, 10 təkɔmə bəlʉʼʉ, təkɔmə bʉəməntɔ, təkɔmə bəmbuuməndʉʼ, təkɔmə bʉə ndə bɔ̂ŋ tʉʼ bʉ́əhə yie-bəbɛʼbʉə, təkɔmə bʉə-ŋkwo, bɔ̂ŋ kʉʉ nə kie yʉʉ mu Sɔ́ʼ-Nyii fɛ. 11 Nɔ bɛ fɔkə ndə bəbɛʼbʉə mu bii kə fəŋ bɛ yɔŋ. Bə bɔŋ sʉ̀ bii, chìi bii bɛ tʉ́ʉnə, chìi bii bɛ ndyʉndyʉ tíŋ hə ndəŋ mətíi yie-Jiso Klai Tiekətʉ ghɔŋbə LyʉʉhəNyii-yʉʼʉ-kə.

12 "Bə nɔʼ kɔ́ ghʉəʼkə tʉ mɔ ndə məchìi nubə inchəŋ," təmə bɔŋ bɛ mbʉ bənu inchəŋ ndə bəkɔ i kwáa bʉʼʉ fɛ. "Bə nɔʼ kɔ́ ghʉəʼkə tʉ mɔ ndə məchìi nubə inchəŋ," təmə mɔ bɔŋ mə bɛ fʉə tʉ nukə təmiyɔŋ fɛ. 13 Bii nɔ ghɔ̀ŋ mbɔ, "Fɔyubə nɔ bɛ tʉ tɔbə, tɔbə kə́ bɛ tʉ fɔyubə." Nɔ bɛ shʉəŋ, bɔŋ yɔŋbɛʼ nɔ, Nyii chìi ibûu inchəŋ mì. Kə bii mə lʉ̀ mbʉəhə-ii ndə bəsəŋ fɛ, i bɔŋ nɔ bɛ tʉ Tiekətʉ, Tiekətʉ kə́ lɛ́nə mbʉə. 14 Nyii bu bʉ̀nə kóʼhə bʉʼʉ ghɔ haʼ nə ntɛ kəghʉəʼ ndə ɔ kə bʉ̀nə kóʼhə Tiekətʉ nə yɔŋ.

15 Bii kínə mbɔ mbʉəhə-ii bɛ yəŋ-mbʉə-Klai-bə fe? Nɔ mɔ lʉ̀ yəŋ-mbʉə-Klai-bə tùotə ghɔŋbə mbʉə-sɔkʉʉ mɛ? I mə nə bɛ nɔ fɛ! 16 Byuunɔ, bii kínə mbɔ wo ndə ɔ tùotə ŋwɔŋ-ɛŋ ghɔŋ sɔkʉʉ bu bɛ mbʉə imɔʼ ghɔŋ ɔŋ fe? Bʉʼka bə nɔ nyɔ̀ʼ mu ŋwɔʼnə-Nyii mbɔ, "Bɔ̂ŋ bəbûu bu bɛ mbyu mbʉə imɔʼ." 17 Bɔŋ wo ndə ɔ tùotə ŋwɔŋ-ɛŋ ghɔŋ Tiekətʉ bu bɛ mbyu kəlyʉʉhə imɔʼ ghɔŋ ɔŋ.

18 Nyʉ́ʉ bəsəŋ. Bʉ̂ʼʉbɛʼ təmiyɔŋ ndə woməsʉʉ tʉʼ chìi, nɔ bɛ mbʉə-ɔ njəŋmbi bɔŋ ŋ̃ghaa bəsəŋ nɔ chìi bʉ̂ʼʉ tʉ yii-yə ŋwɔŋ. 19 Byuunɔ bii kínə mbɔ mbʉəhə-ii bɛ njaafɛ̀ʼndɛŋNyii ndə LyʉʉhəNyiikə tʉʼ chí muŋgɔ ndə bii kie kəghɔ-Nyii fe? Kie bii kie ŋwɔŋ-yii fɛ, 20 bʉʼka bə nɔ kə nyúɔ bii nyúɔ nə chuɔŋ. Nɔ, b̈ii lə̀ʼtə Nyii nə mbʉəhə-ii.