1 Nduɔ, te fɔyubə ndə bə nɔʼ fɛ̀ʼndɛŋ nə yɔŋ tʉ bənyii, nɔ bɛ shʉəŋ mbɔ, "Bʉʼʉ bənchəŋ nɔ kie ndaa," te nubə-ɔ̄ŋ inchəŋ. Bɔŋ ntɛ ndaa-ɔ̄, nɔ chìi wo kie tʉʉ gʉ́ənə. Ŋkʉ̂ʉ nɔ bɛ fɔkə ndə i kwèʼhə bʉə. 2 Kaʼ wo kwɔ̀ʼtə mbɔ ɔ kínə nukə, təmə ɔ chʉʼ kínə tə daa ndə ɔ kie ndə məkínə fɛ. 3 Bɔŋ kaʼ wo kʉ̀ʉ Nyii təmə Nyii nɔ kínə ɔŋ.

4 Nɔ, te məyú fɔbə ndə bə nɔʼ fɛ̀ʼndɛŋ chɔ tʉ bənyii, bʉʼʉ nɔ kínə mbɔ fɔbɛʼkə bɛ ghɔ kəwʉʉnəmbi nə bənyii fɛ yaʼ kɛŋ mbyu Nyii imɔʼ. 5 Kaʼ buŋ fɔkə bɛ ghɔ ndə bə tʉʼ tíi nə bənyii, kə bɛ yuo kə bɛ kəchisê (buŋ ndə nɔ, ntɛ "bənyii-bɔ̄ŋ" ghɔŋbə ntɛ "bətiekətʉ-bɔ̄ŋ" nɔ bɛ ghɔ buŋmbi), 6 bɔŋ nɔ bʉʼʉ bɔŋ kie Nyii ndə ɔ bɛ haʼ mbyu imɔʼ, kə́ bɛ mbʉ Tie, ndə ɔ bɔ́ŋ fɔbə inchəŋ, bʉʼʉ bɔŋleʼ kə́ chí mbi bʉʼka ɔ, mbyu Tiekətʉ bɔŋ-kə́-leʼ bɛ ghɔ haʼ imɔʼ, ndə bə chìi fɔbə inchəŋ tíŋ hə bɔ̌ŋ ɔŋ, kə́ bɛ Jiso Klai, bʉʼʉ bɔŋleʼ kə́ chí mbi tíŋ hə bɔ̌ŋ mbəŋ-ɛŋ.

7 Bɔŋ kaa bʉə bənchəŋ ndə bɔ̂ŋ kie ntɛ ndaa-ɔ̄ fɛ. Bəbɛʼbʉə nɔʼ kə fəŋ kɔ́ fyiihə-ʉə ndə bənyii yɔ́ŋyɔ́ŋ, mbɔ tə gwè dàa laa ndʉʉ ndə bɔ̂ŋ yú fɔkə ndə i lɔ̀ hə ndə ntɛ kəyəŋ-maa-ɔ̄ nɔ, bɔ̂ŋ kə́ yú fi nə bɛ fɔbə ndə bə nɔʼ kɛŋ fɛ̀ʼndɛŋ nə yɔŋ tʉ bənyii, bʉʼka i nɔ shʉ́ə tʉ bɔŋ ndə mətúhə nə ŋkwɔʼtə kətʉ-yʉə nu-kʉ̀ʼnə-kə ndə nukə ndə i gòʼ təmə kʉ̀ʼnə fɛ, bɔ̂ŋ nyíɛ fi nə bɔ̂ŋ nɔʼ bʉ́əhə ŋwɔŋ-yʉə bəshʉ-Nyii. 8 Fɔyubə mə chìi bʉʼʉbə Nyii kə́ yúnə jyujyu fɛ. Bʉʼʉ mə bɛ́ fɔbɛʼkə kaʼ bʉʼʉ gòʼ təmə yú fɔkə fɛ, təmə bɔŋ mə sii fɔkə fɛ kaʼ bʉʼʉ yú.

9 B̈ii bɔŋ láa mbɔ ghʉəʼ-maa-kə-ɔ̄ŋ ndə məyú fɔbə inchəŋ ndə bii kie nɔ mə buŋ leʼ bɛ ŋkʉʼ tʉ bʉə ndə bɔ̂ŋ lʉ́ʉtə ndə məmɔ̀ʼfyii ndə məwɔ̀tə chɔ gwù mu bʉʼʉ fɛ. 10 Bʉʼka kaʼ wotəmiyɔŋ nyíɛ aŋ ndə a kínə shʉəŋ, a kə́ yú fɔbə chunjaa-nyii, i kʉʉ kɔ́ fyii tʉ ɔŋ ndə ŋkwɔʼtə kətʉ-e gòʼ təmə shʉ́ə fɛ, ndə məyú fɔbə ndə bə nɔʼ fɛ̀ʼndɛŋ nə yɔŋ tʉ bənyii fe? 11 Nɔ bʉʼka ya-yə ndaa, liŋ-aŋ ndə ɔ lʉ́ʉtə, ndə Klai kə kwú yie-ɔ, yi byʉ́ʼ. 12 Nɔ, məchìi bʉ̂ʼʉ tʉ bəliŋ-ba, kə́ mɔ̀ʼ dyʉʼkə ndəŋ ŋkwɔʼtə-yʉə ndə bɔ̂ŋ gòʼ təmə kínə shʉəŋ fɛ, təmə a nɔ tʉʼ kɛŋ chìi bʉ̂ʼʉ tʉ Klai. 13 Ndʉʉghɔfii, kaʼ bɛ mbɔ bəkɔ fɔyubə chìi liŋ-ɔŋ ɔ gwù mu bʉ̂ʼʉ, təmə mɔ kʉʉ leʼnə kwó mbɔʼ sɛ̀ʼnə fɛ, bʉʼka məchìi liŋ-ɔŋ ɔ gwù mu bʉ̂ʼʉ.