1 Yíɛʼsii nɔ nə kə̂ gwè tʉ Jiso nɔʼ kə kínə mbɔ ŋgwɔʼmbi-i la nɔʼ mì ndə məmɛ̀ʼtə wʉʉnəmbikə-ɔ̄ŋ, bʉ̀nə gɛ̀ tʉ Tie-e. Bʉʼka ɔ kə kʉ̀ʉ vâafɔʼɔ-bi mu kəwʉʉnəmbi daa, ɔ kʉ̀ʉ bɔŋ tə gɛ̀ lìʼ. 2 Kʉ̂ʉ bɛ ndʉʉ-bəfɔyu ndʉʉbuumbi, tʉ Debulu nɔʼ kɔ́ mu fyii Juda Iskalo, vaa-Samu ndə məfɛ̀ŋ Jiso. 3 Jiso nɔ kə kínə mbɔ Tie-e nɔʼ kɔ́ fɔbə inchəŋ mu kəghɔ-ɔ bɔŋleʼ kínə mbɔ ɔ nɔ kə gwè hə bəshʉ-Nyii, bɔŋ-bu-leʼ bʉ̀nə gɛ̀ bəshʉ-Nyii. 4 Nɔ, ɔ lɔ̀ hə sê, mɛ̀ʼtə mbʉ bəfɔyu. Kʉ̂ʉ shùɔ ndyi-fəʼə-ɛ mɔ̀ʼ sê, lʉ̀ ŋkəŋkə chyúu kəlyuʼ-ɔ. 5 Ndʉʉmɛ, ɔ véʼ muu mu baŋ gheghe chʉ́ʉhə kə́ sʉ̀ fʉəŋ-vâafɔʼɔ-bi-tə nə yɔŋ, kə́ bɔŋleʼ yʉ̀əʼtə nə mbʉ kəŋkəŋ ndə ɔ chyúu kəlyuʼ-ɔ le. 6 Ɔ kʉ̂ʉ gwè dàa mbʉə Samu Bita, Bita ghɔ̀ŋ tʉ ɔŋ mbɔ, "Tiekətʉ, a tʉʼ kʉ́ʉ sʉ̀ bə fʉəŋtə-ɔŋ mɛ?" 7 Jiso bə̀ŋhə tʉ ɔŋ mbɔ, "Nukə ndə mɔ tʉʼ chìi, a chʉʼ kínə nduɔ fɛ, bɔŋ kʉʉkə məniʼ nɔ a kínə." 8 Bita ghɔ̀ŋ tʉ ɔŋ mbɔ, "A mə nə sʉ̀ fʉəŋtə-ɔŋ fɛ." Jiso bə̀ŋhə tʉ ɔŋ mbɔ, "Kaʼ mɔ gòʼ təmə sʉ̀ a fɛ, təmə bâʼa leʼ kwú nubɛʼkə fɛ." 9 Samu Bita ghɔ̀ŋ tʉ ɔŋ mbɔ, "Tiekətʉ, kaa bə haʼ wubə-ɔŋ fɛ, a bɔŋ-bu-leʼ sʉ̀ kwiitə-ɔŋ ghɔŋbə tʉkə-ɔŋ ghɔ!" 10 Jiso ghɔ̀ŋ tʉ ɔŋ mbɔ, "Wo ndə ɔ nɔʼ sʉ̀ ŋwɔŋ-ɛŋ leʼ kie ndə məbìʼ sʉ̀ fɛ, ɔ nɔʼ kɛŋ tʉ́ʉnə, yaʼkɛŋ mbɔ ɔ sʉ̀ fʉəŋtə-i. Bii bɔŋleʼ kə́ bɛ tʉ́ʉnə təmə bɔŋ kə́ bɛ bii bənchəŋ fɛ." 11 Bʉʼka ɔ nɔ nə kínə wo ndə ɔ bu fɛ̀ŋ ɔŋ, nɔ chìi yɔŋ ɔ ghɔ̀ŋ mbɔ, "Bii kaa tʉ́ʉnə bənchəŋ fɛ."

12 Ndʉʉ ndə ɔ nɔʼ kə sʉ̀ fʉəŋtə-ʉə liʼ, mɔ̀ʼ ndyi-fəʼə-hə-i mbʉə-ɔ bʉ̀nə gɛ̀ dùʼ ndəŋ yəŋkə-i, ghɔ̀ŋ tʉ bɔŋ mbɔ, "Bii kínə nukə ndə mɔ fɔ̀ʼ tʉ bii nɔ mɛ? 13 Bii nɔ tʉʼ tíi mɔ nə Chicha leʼnə Tiekətʉ, bii nɔ chìi i kʉ̀ʼnə bʉʼka mɔ nɔ bɛ nɔ. 14 Kaʼ mɔ ndʉʉghɔfii, ndə mɔ bɛ Tiekətʉ-yii bɔŋleʼ kə́ bɛ Chicha-yii, sʉ̀ wubə-ii, bii nɔ kie ndə mə-kə́-sʉ́tə wubə-ii haʼ nɔ. 15 Mɔ nɔʼ dʉ̀ʼ fʉʼkənu tʉ bii mbɔ b̈ii kə́ fɔ̀ʼ haʼ ndə mɔ nɔʼ fɔ̀ʼ tʉ bii. 16 M̈ɔ kɛŋ shyíi bii nə shʉəŋ mbɔ vaafɔ̀ʼ mə gʉ́ə chàa tiefɔʼ-ɛ fɛ, təmə wo téʼ ntəŋ mə gʉ́ə chàa wo ndə ɔ tə́ŋ ɔŋ fɛ. 17 Kaʼ bii kínə nubə-ɔ̄ŋ, bii kie tʉʉjyu, kaʼ bii kə́ fɔ̀ʼ. 18 Mɔ tʉʼ kwə́ʼ te bii bənchəŋ fɛ, mɔ nɔ kínə bʉə ndə mɔ nɔʼ séʼ. Bɔŋ ŋwɔʼnə-Nyii bu fyú shʉəŋ ndə i ghɔ̀ŋ mbɔ, ‘Wo ndə ɔ tʉʼ kwó bele-ɔ̄ bu kíahə kʉʼ mɔ.’ 19 Mɔ nɔ tʉʼ shyíi bii nə yɔ̄ŋ-yə nduɔ i buŋ yi fyú sê, mbɔ i kʉ̂ʉ yi fyú nɔ, bii bɛ́ŋ mbɔ, mɔ nɔ bɛ wo ndə mɔ bɛ yɔŋ. 20 M̈ɔ kɛŋ shyíi bii nə shʉəŋ mbɔ wotəmiyɔŋ ndə ɔ lʉ̀ wo ndə mɔ tə́ŋ kɔ́ mbʉə-ɔ nɔ lʉ̀ mɔ kɔ́ mbʉə-ɔ, bɔŋ wo ndə ɔ leʼ lʉ̀ mɔ kɔ́ mbʉə-ɔ nɔ lʉ̀ wo ndə ɔ tə́ŋ mɔ kɔ́ mbʉə-ɔ."

21 Ndʉʉ ndə Jiso nɔʼ kə gìe nubə-ɔ̄ŋ liʼ, mu fyii-i chɔ́ŋhə ɔŋ, ɔ ghɔ̀ŋ mbɔ, "M̈ɔ kɛŋ shyíi bii nə shʉəŋ mbɔ mbyu wo mu bii bu fɛ̀ŋ mɔ."

22 Mbʉ vâafɔʼɔ-bi lɛ́nə shʉtə-ʉə, təmə kínə wo ndə ɔ tʉʼ kwə́ʼ te ɔ fɛ. 23 Ibɛʼ-yə mbyu vaafɔ̀ʼ ndə Jiso kʉ̀ʉ ɔ, nɔ nə dùʼ kə́ŋhə mbʉə-Jiso tiɛŋ tebele. 24 Ndʉʉmɛ, Samu Bita mɔ̀ʼ ghɔkə-i tʉ ɔŋ ndə məbíʼtə tʉ Jiso nə wo ndə ɔ tʉʼ kwə́ʼ te ɔ. 25 Mbʉ mbyu vaafɔ̀ʼ yʉ́əʼnə gɛ̀ mbʉə-Jiso, ghɔ̀ŋ tʉ ɔŋ mbɔ, "Tiekətʉ, bɛ nda?"

26 Jiso bə̀ŋhə mbɔ, "Nɔ bɛ mbəŋ-ɛŋ ndə mɔ bu kɔ́ mbəʼ-bele-kə-ɔ̄ŋ ndə mɔ nɔʼ chùo nɔ tʉ ɔŋ." Ɔ kʉ̂ʉ chùo mbʉ kəmbəʼ bele, kɔ́ tʉ Juda, vaa-Samu Iskalo. 27 Haʼ ndʉʉmɛ ndə ɔ kwó mbʉ bele, Sata ŋíi mu mbʉə-ɔ. Jiso ghɔ̀ŋ tʉ ɔŋ mbɔ, "Nukə ndə a bɛ ndə məchìi, chìi nəndʉʉnəndʉʉ." 28 Mbyu wo ndə ghɔŋ bɔŋ kə dùʼ ndəŋ tebele, kə kínə luu-i ndə ɔ kə gìe yɔ̄ŋ-yə tʉ ɔŋ fɛ. 29 Bəbɛʼbʉə nɔ nə kwɔ̀ʼtə yʉə-yə mbɔ bʉʼka Juda kə́ bɛ̀ʼ kwo-kyʉə, Jiso nɔ kə́ ghɔ̀ŋ tʉ ɔŋ mbɔ, "Nyúɔ fɔbə ndə bʉʼʉ bu yú ndəŋ mbʉ nchəŋtə," byuunɔ ɔ̈ kɔ́ fɔkə tʉ bʉə-kəbyuu. 30 Ndʉʉ ndə ɔ kwó mbʉ bele, ɔ fyú mbi haʼ ndʉʉmɛ, kə́ bɛ ndʉʉbətyuʼ.

31 Ndʉʉ ndə ɔ nɔʼ kə fyú mbi, Jiso ghɔ̀ŋ mbɔ, "Vaa-Woməsʉʉ nɔʼ kie məgʉ́ə nduɔ, Nyii bɔŋ-nɔʼ-leʼ kie məgʉ́ə mu mbəŋ-ɛŋ. 32 Kaʼ Nyii kie məgʉ́ə mu ɔŋ, i dʉ̀ʼ mbɔ Nyii bu kɔ́ kuŋhə ghɔ tʉ ɔŋ mu mbəŋ-ɛŋ, Nyii bɔŋleʼ kɔ́ kuŋhə tʉ ɔŋ haʼ ndʉʉmɛ. 33 Vâaŋgeŋge, bʉʼʉ bu bɛ mɔʼɔ ndə vaa kəkʉʉ məniʼ. Bii bu kʉ́ʉ mɔ, bɔŋ haʼ ndə mɔ kə ghɔ̀ŋ tʉ bəntəŋbəshʉ-bʉə-Juu, mɔ nɔ tʉʼ shyíi bii ghɔ nduɔ mbɔ, ‘Yəŋkə ndə mɔ tʉʼ gɛ̀ chɔ, bii mə gwè chɔ fɛ.’ 34 Nduɔ, nɔʼ m̈ɔ kɔ́ ŋkahə fefe tʉ bii. B̈ii kʉ̀ʉ ŋwɔŋtə-ii, haʼ ndə mɔ nɔʼ kʉ̀ʉ bii, mbəŋ-yii ghɔ nɔ kie ndə məkʉ̀ʉ ŋwɔŋtə-ii. 35 Kaʼ bii kʉ̀ʉ ŋwɔŋtə-ii, i chìi wʉʉnəmbikə kínə mbɔ bii nɔ bɛ vâafɔʼɔ-bɔŋ."

36 Samu Bita bíʼtə tʉ ɔŋ mbɔ, "Tiekətʉ, a tʉʼ gɛ̀ fa?" Jiso bə̀ŋhə tʉ ɔŋ mbɔ, "Yəŋkə ndə mɔ tʉʼ gɛ̀ chɔ, a mə gwè hə bɔ̌ŋ mɔ nduɔ fɛ, bii bɔŋ bu yi shi gwè hə bɔ̌ŋ." 37 Bita ghɔ̀ŋ tʉ ɔŋ mbɔ, "Tiekətʉ, chìi ka təmə mɔ mə gwè hə bɔ̌ŋ aŋ nduɔ fɛ? Mɔ bu kɔ́ tʉkə-ɔŋ bʉʼka a." 38 Jiso bə̀ŋhə mbɔ, "A bu kɔ́ tʉkə-a bʉʼka mɔ la? M̈ɔ kɛŋ shyíi a nə shʉəŋ, ŋkʉəʼə bu yi kə̂ tʉ́ʉ nɔ tʉ a nɔʼ kɔ́tuu a vɛʼ tia mbɔ a la kínə mɔ fɛ."