1 Ndʉʉ ndə Jiso kə kínə mbɔ bʉə-Falasi nɔʼ kə yʉ́ mbɔ ɔ tʉʼ kie vâafɔʼɔ buŋmbi bɔŋ-kə́-leʼ kɔ́ muu tʉ bɔŋ tə chàa Jɔŋ, 2 (bɔŋ nə kə́ kɔ́ Jiso nə mbəŋ-ɛŋ, kɔ́ mbʉ muu fɛ, nɔ nə kə́ kɔ́ vâafɔʼɔ-bi), 3 ɔ mɛ̀ʼtə Judia lɔ̀ bìʼ gɛ̀ mu Galili.

4 Tʉ ɔ bɔŋ nɔ nə kie ndə mətíŋ hə mu Samalia. 5 Ndʉʉmɛ, ɔ gɛ̀ dàa ndə yəŋkwɛʼtəŋbɛʼkə mu Samalia bə kə́ tíi nə Sika, ndə i kə bɛ mbʉə mutɔ ndə Jakɔ nɔʼ kə kɔ́ tʉ vaa-ɛ Jɔsɛ. 6 Byʉʉ*-muu-Jakɔ nɔ nə bɛ chɔ, Jiso nɔʼ kə tòʼ káa, gwè dùʼ mbʉə mbʉ byʉʉ-muu tʉ i nɔʼ tʉʼ gɛ̀ tə kə́ dàa ndʉʉbeʼ.

7 Wokebɛʼ ndə ɔ lɔ̀ hə Samalia gwè ndə mədùu muu. Jiso ghɔ̀ŋ tʉ ɔŋ mbɔ, "Kɔ́ muu m̈ɔ nú."Jiso ghɔŋ woke chu byʉʉ muu 8 Jiso nɔ nə bɛ tətɛʼ ɛ tʉ vâafɔʼɔ-bi nɔʼ lɔ̀ gɛ̀ mu kəyəŋkwɛʼtəŋ ndə məgɛ̀ nyúɔ fɔyubə. 9 Mbʉ woke-Samalia-ghɔ̄ ghɔ̀ŋ tʉ ɔŋ mbɔ, "I bɛ təka mbəŋ-aŋ wo-Juu, kə́ bíʼtə muu kəghɔ-mɔ woke-Samalia ndə mənú?" Bʉʼka bʉə-Juu kə kie nubɛʼkə ndə məchìi ghɔŋbə bʉə-Samalia fɛ. 10 Jiso bə̀ŋhə tʉ ɔŋ mbɔ, "A kʉ̌ʉ kínə kɔ-Nyii-kə ghɔŋbə wo ndə ɔ tʉʼ ghɔ̀ŋ tʉ a mbɔ, ‘Kɔ́ muu tʉ mɔ, m̈ɔ nú,’ təmə a nɔ bíʼtə tʉ ɔŋ, ɔ kɔ́ muu tʉ a ndə ĩ kɔ́ məchímbi."

11 Mbʉ woke-ghɔ̄ ghɔ̀ŋ tʉ ɔŋ mbɔ, "Tie-ɔ, a kie fɔkə ndə mədùu muu nə yɔŋ fɛ, mbʉ byʉʉ bɔŋ dɔ̀ŋnə. A bu kie muu-ghɔ̄-mə fa ndə ĩ kɔ́ məchímbi le? 12 A gʉ́ə chàa Jakɔ tie-yaʼ mɛ? Ɔ nɔ nə kɔ́ mbʉ byʉʉ muu tʉ baʼa bɔŋleʼ nú hə chɔ nə mbəŋ-ɛŋ leʼnə vâa-bi ghɔŋbə nyaahə-i."

13 Jiso bə̀ŋhə mbɔ, "Wotəmiyɔŋ ndə ɔ nú muumə-ɔ̄ŋ, jyʉʉ muu bu bìʼ yɔ́ʼ ɔ. 14 Bɔŋ wotəmiyɔŋ ndə ɔ nú muu ndə mɔ bu kɔ́, jyʉʉ muu bieleʼ nə yɔ́ʼ ɔ fɛ. Mbʉ muu ndə mɔ bu kɔ́ tʉ ɔŋ, i bu bə̀ŋ lʉ̂ʉ-muu mu mbʉə-ɔ ndə ĩ kɔ́ muu ndə i gwè nə məchímbi təmə liʼ-i ghɔ fɛ." 15 Mbʉ woke bə̀ŋhə tʉ ɔŋ mbɔ, "Tie-ɔ, kɔ́ ntɛ muumə-ɔ̄ŋ tʉ mɔ, təmə jyʉʉ muu leʼnə yɔ́ʼ mɔ fɛ byuunɔ mɔ leʼnə gwè fɛ̄ŋ ndə mətʉ́ muu fɛ."

16 Jiso gìe tʉ ɔŋ mbɔ, "Gɛ̀, tíi ləŋ-aŋ bʉ̀nə gwè fɛ̄ŋ."

17 Mbʉ woke bə̀ŋhə tʉ ɔŋ mbɔ, "Mɔ kie woləŋ fɛ." Jiso bə̀ŋhə mbɔ, "A nɔ gìe i kʉ̀ʼnə ndə məghɔ̀ŋ mbɔ, ‘Mɔ kie woləŋ fɛ.’ 18 Bʉʼka a nɔʼ kə lɔ́ŋ tʉ bələŋ bətaa, bɔŋ yi-yə ndə a kie nduɔ kaa ləŋ-aŋ fɛ. Nukə ndə a gìe nɔ bɛ shʉəŋ." 19 Mbʉ woke ghɔ̀ŋ tʉ ɔŋ mbɔ, "Tie-ɔ, mɔ nɔ nyíɛ mbɔ a nɔ bɛ yʉkəŋgieNyii. 20 Bətie-baʼa nɔ nə kə́ lə̀ʼtə Nyii ndəŋ kwɔŋ-fɛ̄ŋ, bii bɔŋ ghɔ̀ŋ mbɔ, bə la kie ndə mə-kə́-lə̀ʼtə Nyii bə haʼ Jɛlosalɛŋ."

21 Jiso ghɔ̀ŋ tʉ ɔŋ mbɔ, "Naa, bɛ́ŋ nukə ndə mɔ tʉʼ gìe, ndʉʉ tʉʼ gwè ndə bii kʉʉ leʼ lə̀ʼtə mbʉ Tie ndəŋ kwɔŋ-fɛ̄ŋ fɛ, təkɔmə Jɛlosalɛŋ. 22 Bii nɔ tʉʼ lə̀ʼtə fɔkə ndə bii gòʼ təmə kínə fɛ, baʼa bɔŋ kə́ lə̀ʼtə fɔkə ndə baʼa kínə, bʉʼka ŋkwaa nɔ gwè tíŋ hə bɔ̌ŋ bʉə-Juu. 23 Bɔŋ ndʉʉ tʉʼ gwè, i bɔŋ-nɔʼ-leʼ buŋ kʉ̀ʼnə, ndə ghʉəʼ-kəLyʉʉhəNyii-kə, ŋkɛŋ bʉə-Nyii bu lə̀ʼtə Nyii ndə wo ndə ɔ kɛŋ bɛ yɔŋ shʉəŋ, bʉʼka mbʉ Tie nɔ tʉʼ kʉ́ʉ ntɛ bʉə-maa-bɔ̄ŋ ndə mələ̀ʼtə ɔŋ. 24 Nyii nɔ bɛ Lyʉʉhəkə, bɔŋ-kə́-leʼ bɛ haʼ nə ghʉəʼ-kəLyʉʉhəNyii-kə ndə bəkɔ bʉə-bi lə̀ʼtə ɔŋ ndə wo ndə ɔ kɛŋ bɛ yɔŋ shʉəŋ."

25 Mbʉ woke-ghɔ̄ ghɔ̀ŋ tʉ ɔŋ mbɔ, "Mɔ nɔ kínə mbɔ mbʉ Wo ndə Nyii Kùŋ Tə́ŋ tʉʼ gwè, Wo ndə bə tíi ɔ nə Klai. Ndʉʉ ndə ɔ bu gwè nɔ, ɔ bu shyíi baʼa nə nubə inchəŋ."

26 Ndʉʉmɛ, Jiso ghɔ̀ŋ tʉ ɔŋ mbɔ, "Mɔ nɔ bɛ mbəŋ-ɛŋ ndə ɔ tʉʼ kwə́ʼ tʉ a nɔ."

27 Haʼ ndʉʉmɛ, mbʉ vâafɔʼɔ-bi ŋíi. I chàa bɔŋ ndə ɔ tʉʼ kwə́ʼ ghɔŋ mbʉ woke, bɔŋ təmə wo bíʼtə mbɔ, "A tʉʼ kʉ́ʉ ka?" fɛ byuunɔ, "A kwə́ʼ bii ɔ mbuka?" fɛ. 28 Ndʉʉmɛ, mbʉ woke mɛ̀ʼtə fɔ-muu-kə-i, gɛ̀ mu mbʉ kəyəŋkwɛʼtəŋ gìe tʉ bʉə mbɔ, 29 "B̈ii gwè nyíɛ wobɛʼ ndə ɔ shyíi mɔ nə nubə inchəŋ ndə mɔ nɔʼ nə chìi. Bəkɔ ɔ bɛ mbʉ Wo ndə Nyii Kùŋ Tə́ŋ mɛ?" 30 Bɔ̂ŋ fyú hə mu mbʉ kəyəŋkwɛʼtəŋ kə́ gwètə tʉ ɔŋ.

31 Bɔŋ, tə vâafɔʼɔ-bi kə́ fʉ̀ʉtə ɔŋ mbɔ, "Chicha, yú fɔkə." 32 Bɔŋ ɔ ghɔ̀ŋ tʉ bɔŋ mbɔ, "Mɔ nɔ kie fɔyubə ndə məyú ndə bii gòʼ təmə kínə fɛ."

33 Ndʉʉmɛ, vâafɔʼɔ-bi kə́ bíʼtə tʉ ŋwɔŋtə-ʉə mbɔ, "Wo nɔʼ gwè nə fɔkə tʉ ɔŋ mbɔ ɔ̈ yú mɛ?"

34 Jiso ghɔ̀ŋ tʉ bɔŋ mbɔ, "Fɔyubə-ɔŋ nɔ bɛ məfɔ̀ʼ ŋkʉʉnə-tʉʉ-wo ndə ɔ tə́ŋ mɔ bɔŋleʼ ndə məlìʼ fɔʼɔ-ɛ. 35 Bii ghɔ̀ŋ mbɔ, ‘Nɔ gòʼ bəchi kwi ndʉʉ lʉ̀ ŋgwiehə mutɔ kʉ̀ʼnə’ fe? B̈ii nyíɛ! M̈ɔ shyíi bii, b̈ii chɔ̀ʼhə shʉ-yii, nyíɛ ndə ntɔŋmə nɔʼ bùu mutɔ ndə məkwɛ̀tə. 36 Nyii nɔ tʉʼ lɔ̀ʼ wo kwɛ̀tə məntɔŋ, ndə bɛ məgwè nə bʉə, bɔ̂ŋ kie məchímbi təmə liʼ-i ghɔ fɛ, mbɔ wo ndə ɔ tʉʼ shùɔ yi-yə shùɔ bu yi kie tʉʉjyu ghɔŋbə wo kwɛ̀tə mɔʼɔ. 37 Bʉʼka i bu chìi ŋgiekə-ɔ̄ŋ fyú shʉəŋ mbɔ, ‘W̃o nɔ shùɔ, ibɛʼ-yə wo kwètə.’ 38 Mɔ nɔ nə tə́ŋ bii ndə məgɛ̀ kwɛ̀tə ntɔŋmə ndə bii kə gòʼ təmə fɔ̀ʼ fɛ. Bʉə-kədɔŋ nɔʼ fɔ̀ʼ, bii kə́ yú hə ndəŋ fɔʼtə-ʉə."

39 Bʉə-Samalia buŋmbi ndə bɔ̂ŋ kə bɛ mu kəyəŋkwɛʼtəŋ-ghɔ̄, bɛ́ŋ Jiso bʉʼka nukə ndə mbʉ woke-ghɔ̄ kə gìe te ɔ mbɔ, "Ɔ nɔ nə shyíi mɔ nə nubə inchəŋ ndə mɔ nɔʼ nə chìi." 40 Ndʉʉ ndə bʉə-Samalia kə gwè bìatə ɔŋ, bɔ̂ŋ fʉ̀ʉtə ɔŋ mbɔ ɔ̈ chí ghɔŋ bɔŋ, ɔ chí chɔ ndə chîbə ibûu. 41 Bʉə buŋmbi bìʼ bɛ́ŋ ɔŋ bʉʼka ŋgiekə-i. 42 Bɔ̂ŋ ghɔ̀ŋ tʉ mbʉ woke-ghɔ̄ mbɔ, "Leʼ chìi bə ŋgiekə-a nduɔ baʼa buŋ bɛ́ŋ ɔŋ fɛ, nɔ chìi bʉʼka baʼa nɔʼ yʉ́ hə kəghɔ-ɔ nə mbəŋ-yaʼ, baʼa nɔ kínə nduɔ nə mbəŋ-yaʼ mbɔ, ɔ nɔ bɛ Ŋkwaa kəwʉʉnəmbi leʼ shʉəŋ."

43 Mbʉ bəchî-ghɔ̄ kʉ̂ʉ tíŋ ibûu, ɔ lɔ̀ gɛ̀ Galili. 44 Bʉʼka Jiso nɔ nə ghɔ̀ŋ mbɔ yʉkəŋgieNyii la mə nə kie kuŋhə mu yi-yə lɔʼɔ fɛ. 45 Ndʉʉ ndə ɔ kə gwè Galili, bʉə-Galili lʉ̀ ɔ mu bɔŋ bʉʼka bɔ̂ŋ nɔ nə bɛ Jɛlosalɛŋ ndə nchəŋtə-Yíɛʼsii, nyíɛ nufinəbə nchəŋnchəŋ ndə ɔ kə chìi.

46 Ɔ bʉ̀nə bìʼ gwè Kana mu Galili, kəyəŋ ndə ɔ nə kíahə muu chɔ i bə̀ŋ ndʉʼmə le. Wokwɛʼtəŋbɛʼ ndə ɔ kə́ fɔ̀ʼ tʉ Fɔŋ mu Kabanu, vaa-ɛ vaabələŋ nɔ nə kə́ yɔ́ʼyɔ́ʼ. 47 Ndʉʉ ndə wo-ɔ̄ kə yʉ́ mbɔ Jiso nɔʼ lɔ̀ hə Judia gwè Galili ɔ gɛ̀ bìatə ɔŋ, fʉ̀ʉtə ɔŋ, gìe tʉ ɔŋ mbɔ ɔ̈ shíʼ gwè chʉ́ʼ vaa-ɛ bʉʼka mbʉ vaa nɔ nə bɛ chu-kwú.

48 Ndʉʉmɛ, Jiso ghɔ̀ŋ tʉ ɔŋ mbɔ, "Bii yaʼ nyíɛ nubəcheʼbə ghɔŋbə nuchíechubə fɛ, bii bɛ́ŋ fɛ mɛ?"

49 Mbʉ wokwɛʼtəŋ-ghɔ̄ ghɔ̀ŋ tʉ ɔŋ mbɔ, "Tie-ɔ, shíʼ gwè vaa-ɔŋ buŋ kwú."

50 Jiso ghɔ̀ŋ tʉ ɔŋ mbɔ, "Gɛ̀, vaa-a bu bìi." Mbʉ wo-ghɔ̄ bɛ́ŋ ŋgiekə ndə Jiso gìe tʉ ɔŋ gɛ̀ nə wi.

51 Ndə ɔ kə́ shíʼ gɛ̀, vâafɔʼɔ-mu-njaa-bi bìatə ɔŋ ghɔ̀ŋ tʉ ɔŋ mbɔ mbʉ vaa la tʉʼ búɔnə. 52 Ɔ bíʼtə tʉ bɔŋ ndʉʉ ndə mbʉ vaa chʉ́ʉhə məbúɔnə chɔ, bɔ̂ŋ ghɔ̀ŋ mbɔ, "Nɔ kə bɛ yɔ̂ŋ ndʉʉnəchî ndə chí imɔʼ mbʉ kənchyʉʼ fyú hə mbʉə-ɔ." 53 Mbʉ tie-vaa kínə mbɔ la bɛ haʼ ndʉʉ ndə Jiso kə gìe tʉ ɔŋ mbɔ, "Vaa-a bu bìi." Mbəŋ-ɛŋ ghɔŋbə nchinjaa-ɛ inchəŋ mɔ̀ʼfyiihə-ʉə ndəŋ Jiso. 54 Jiso nɔʼ kə chìi fəŋ kəcheʼ bʉ̀nə bìʼ bìitə nə yɔ̄ŋ-yə vɛʼ ndə ɔ kə lɔ̀ hə Judia gwè Galili.