1 Yɔ̄ŋ-yə kʉ̂ʉ tíŋ, nchəŋtə-bʉə-Juu kə́ gwè, Jiso kóʼ gɛ̀ Jɛlosalɛŋ. 2 Mu Jɛlosalɛŋ, ghəŋbɛʼkə nɔ nə bɛ chɔ, ndə bə kə́ tíi kəŋgie Alamiak* nə Bɛtesada. Njuuhəbə itaa yə̀ŋ mbʉə-e fúu. I kə bɛ mbʉə chulɔŋbɛʼ ndə bə kə́ tíi nə Chulɔŋ-Binjyʉʉhə. 3 Kəyəŋ-fɛ̄ŋ bʉə-bəyɔʼ nɔ kə́ nʉ̀ʉtə chɔ buŋmbi nə bəfʉ̀əŋtəshʉ, bəlɛŋ ghɔŋbə bʉə ndə bɔ̂ŋ nɔʼ kwú kəviakəmɔʼ, [kə́ kʉ̀ʼ ndə mənyíɛ ntɛ məbə̀ŋtəbɛʼ ndə mbʉ muu bu bə̀ŋtə, 4 bʉʼka w̃ontəŋNyii nɔ nə kə́ gwè təvɛʼtəvɛʼ, gwè shíʼ bə̀ŋtə mbʉ muu. Fəŋ wo ndə ɔ shíʼ muŋgɔ nɔ, yɔʼkə-i tíŋ.] 5 Mbyu wobɛʼ nɔ nə bɛ chɔ ndə ɔ nɔʼ kə yɔ́ʼ yɔʼkə ndə ŋgʉʼhə njuɔ fɔŋ nə wuŋ tia. 6 Ndʉʉ ndə Jiso kə nyíɛ ɔŋ bɔŋleʼ kínə mbɔ ɔ nɔʼ kə nʉ̀ʉ chɔ dɔ̀ŋnə, ɔ ghɔ̀ŋ tʉ ɔŋ mbɔ, "A kʉ̀ʉ ndə məkie nchʉʼ mɛ?"

7 Mbʉ wokəyɔʼ bə̀ŋhə tʉ ɔŋ mbɔ, "Tie-ɔ, mɔ kie wo ndə məmɔ̀ʼ mɔ mu mbʉ kəghəŋ fɛ. M̃ɔ nɔ kə́ lɔ̀ mbɔ mɔ shíʼ muŋgɔ ndʉʉ ndə bə bə̀ŋtə mbʉ kəghəŋ nɔ, wokədɔŋ nɔʼ gɛ̀ shíʼ hə bəshʉ mɔ."

8 Jiso ghɔ̀ŋ tʉ ɔŋ mbɔ, "Lɔ̀ hə sê lʉ̀ mbyuukə-a, gɛ̀ nə wa."

9 Haʼ ndʉʉmɛ, mbʉ wo-ghɔ̄ kie nchʉʼ, lʉ̀ mbyuukə-i chʉ́ʉhə kə́ tòʼ gɛ̀ nə wi. Nufinəkə-ɔ̄ŋ nɔ nə fyú ndəŋ Chîlɔʼkə. 10 Bəntəŋbəshʉ-bʉə-Juu gìe tʉ wo-ghɔ̄ ndə ɔ kə kie nchʉʼ le mbɔ, "Nɔ bɛ Chîlɔʼkə, təmə i kʉ̀ʼnə ndə nuʼ mbɔ a bɛ̀ʼ mbyuukə-a kə́ tòʼ nə yɔŋ fɛ." 11 Bɔŋ mbʉ wo-ghɔ̄ bə̀ŋhə tʉ bɔŋ mbɔ, "Mbʉ wo ndə ɔ chʉ́ʼ mɔ, nɔ ghɔ̀ŋ tʉ mɔ mbɔ, ‘Lʉ̀ mbyuukə-a gɛ̀ nə wa.’ "

12 Bɔ̂ŋ bíʼtə tʉ ɔŋ mbɔ, "Wo-ghɔ̄ bɛ nda ndə ɔ ghɔ̀ŋ tʉ a mbɔ, ‘Lʉ̀ mbyuukə-a gɛ̀ nə wa le’?"

13 Mbʉ wo ndə ɔ kə kie nchʉʼ le, leʼ kínə wo ndə ɔ kə gìe tʉ ɔŋ fɛ, bʉʼka Jiso nɔʼ kə fyú bʉʼka nuɔ-bʉə-buŋmbi nɔ kə bɛ chɔ. 14 Kʉ̂ʉ bʉ̀nə bɛ vɛʼbɛʼ, Jiso nyíɛ ɔŋ mu chunjaafɛ̀ʼndɛŋNyii ghɔ̀ŋ tʉ ɔŋ mbɔ, "Nyíɛ! Mbʉə-a nɔʼ tíŋ! Kə a mə leʼ bìʼ chìi bʉ̂ʼʉ fɛ, bʉʼka ibɛʼ-yə nukə ndə i shʉ́ə daa mə yi fyú tʉ a." 15 Mbʉ wo-ghɔ̄ fyú gɛ̀ nə wi, gɛ̀ shyíi bəntəŋbəshʉ-bʉə-Juu mbɔ Jiso la bɛ wo ndə ɔ kə chʉ́ʼ ɔ.

16 Nɔ bɛ nukə nɔ ndə i kə chìi bəntəŋbəshʉ-bʉə-Juu kə́ chɔ́ŋhə Jiso bʉʼka ɔ nɔ kə́ fɔ̀ʼ nubə-ɔ̄ŋ ndəŋ Chîlɔʼkə. 17 Bɔŋ Jiso bə̀ŋhə tʉ bɔŋ mbɔ, "Tie-ɔ nɔ tʉʼ fɔ̀ʼ tə gwè dàa nduɔ, mbəŋ-ɔŋ bɔŋ-kə́-leʼ fɔ̀ʼ." 18 Nɔ bɛ luu-i nɔ ndə bəntəŋbəshʉ-bʉə-Juu kə́ bìʼ kʉ́ʉ fia yɔ́ŋyɔ́ŋ ndə məyí ɔ, bʉʼka ɔ nɔ kə́ bə́ʼ bə haʼ Chîlɔʼkə fɛ, ɔ nɔ nə leʼ tíi Nyii nə Tie-e, i kə́ dʉ̀ʼ mbɔ ghɔŋ Nyii bɛ ndyʉndyʉ.

19 Jiso ghɔ̀ŋ tʉ bɔŋ mbɔ, "M̈ɔ kɛŋ shyíi bii nə shʉəŋ mbɔ mbʉ Vaa mə chìi nubɛʼkə nə yi-yə ghʉəʼkə fɛ, ɔ nɔ tʉʼ chìi haʼ nukə ndə ɔ nyíɛ hə kəghɔ-mbʉ-Tie. Bʉʼka nukə ndə mbʉ Tie tʉʼ chìi, nɔ bɛ haʼ yɔŋ ndə mbʉ Vaa tʉʼ chìi. 20 Bʉʼka mbʉ Tie nɔ kʉ̀ʉ mbʉ Vaa, dʉ̀ʼ nubə tʉ ɔŋ nchəŋnchəŋ-ɛŋ ndə ɔ tʉʼ fɔ̀ʼ. Ɔ bɔŋ-bu-leʼ dʉ̀ʼ fɔʼtə tʉ ɔŋ ndə i gʉ́ə chàa yɔ̄ŋ-yə, i chʉʼ chìi chutə-ii chíe. 21 Bʉʼka ndə mbʉ Tie kie ghʉəʼkə ndə məbʉ̀nə kóʼhə bʉə ndə bɔ̂ŋ nɔʼ kwútə, kɔ́ məchímbi tʉ bɔŋ, nɔ bɛ haʼ nɔ, mbʉ Vaa nɔ kie ghʉəʼkə ndə məkɔ́ məchímbi tʉ bʉə ndə ɔ kʉ̀ʉ. 22 Mbʉ Tie kyinə kwɛ̀ fɛʼɛ wo fɛ, ɔ bɔŋ nɔʼ kɔ́ ghʉəʼkə nchəŋnchəŋ tʉ mbʉ Vaa ndə məkwɛ̀ fɛʼtə inchəŋ, 23 mbɔ bʉə bənchəŋ chʉʼ kɔ́ kuŋhə tʉ mbʉ Vaa haʼ ndə bɔ̂ŋ kɔ́ kuŋhə tʉ mbʉ Tie. Wotəmiyɔŋ ndə ɔ gòʼ təmə kə́ kɔ́ kuŋhə tʉ mbʉ Vaa fɛ, tʉʼ kɔ́ kuŋhə tʉ mbʉ Tie-e ndə ɔ tə́ŋ ɔŋ fɛ.

24 "M̈ɔ kɛŋ shyíi bii nə shʉəŋ mbɔ wotəmiyɔŋ ndə ɔ̈ yʉ́ ŋgiekə-ɔŋ bɔŋleʼ bɛ́ŋ wo ndə ɔ tə́ŋ mɔ nɔʼ kie məchímbi təmə liʼ-i ghɔ fɛ. Bə bieleʼ nə chʉ̀ə ŋkwɛ-ɛ bʉəbʉə fɛ, ɔ nɔʼ tíŋ hə ndəŋ kwú gɛ̀ ndə məchímbi.

25 "M̈ɔ kɛŋ shyíi bii nə shʉəŋ mbɔ ndʉʉ tʉʼ gwè, bɔŋ-nɔʼ-leʼ buŋ gwè, ndʉʉ ndə bʉə ndə bɔ̂ŋ nɔʼ kə kwútə bu yʉ́ gyʉʉ VaaNyii, bʉə ndə bɔ̂ŋ yʉ́ bɔŋleʼ fɔ̀ʼ mbʉ kənu, bu kie məchímbi. 26 Bʉʼka mbɔ haʼ ndə mbʉ Tie kie məchímbi kəghɔ-ɔ, nɔ bɛ haʼ ndə ɔ nɔʼ kɔ́ ghʉəʼkə tʉ mbʉ Vaa ndə məkie məchímbi kəghɔ-ɔ. 27 Bə nɔʼ kɔ́ ghʉəʼkə tʉ ɔŋ inchəŋ ndə məchʉ̀ə ŋkwɛ bʉə bənchəŋ bʉʼka ɔ nɔ bɛ Vaa-Woməsʉʉ. 28 Kə bii məyʉ́ yɔ̄ŋ-yə i chàa bii fɛ, bʉʼka ndʉʉ nɔ tʉʼ gwè ndə bʉə ndə bɔ̂ŋ nɔʼ kwútə bɛ mu sě bu yʉ́ gyʉʉ-i, 29 kóʼ, bʉə ndə bɔ̂ŋ nɔʼ fɔ̀ʼ nu-jyujyu-bə bu kóʼ ndə məkie məchímbi təmə liʼ-i ghɔ fɛ, bʉə ndə bɔ̂ŋ nɔʼ kə fɔ̀ʼ bʉ̂ʼʉ bu kóʼ bə chìi bɔ̂ŋ gwù fɛʼɛ. 30 Mɔ mə chìi nubɛʼkə nə ghʉəʼkə-ɔŋ fɛ, mɔ nɔ tʉʼ sɔ́ʼ haʼ ndə mɔ yʉ́, sɔ́ʼ-ɔ bɔŋ-kə́-leʼ bɛ ndyʉndyʉ, bʉʼka mɔ tʉʼ fɔ̀ʼ bə yɔŋ-yə ŋkʉʉnə tʉʉ fɛ, mɔ nɔ tʉʼ fɔ̀ʼ ŋkʉʉnə-tʉʉ-wo ndə ɔ tə́ŋ mɔ.

31 "Kaʼ mbəŋ-ɔŋ tətɛʼ mɔ kə́ kwə́ʼ nu-jyujyu-bə te mɔ, bə nyíɛ kwəʼ-ɔ ndə məbɛ shʉəŋ fɛ. 32 Ibɛʼ-yə wo nɔ bɛ ghɔ ndə ɔ tʉʼ kwə́ʼ te mɔ, mɔ bɔŋleʼ kínə mbɔ nukə ndə ɔ tʉʼ kwə́ʼ te mɔ nɔ bɛ shʉəŋ. 33 Bii nɔ nə tə́ŋ bʉə tʉ Jɔŋ, ɔ bɔŋleʼ kwə́ʼ shʉəŋ te mɔ tʉ bɔŋ. 34 Kaa bɛ mbɔ mɔ tʉʼ yʉ́əʼnə ndəŋ yie jyujyu ndə i gwè hə kəghɔ-woməsʉʉ fɛ, mɔ bɔŋ nɔ gìe nubə-ɔ̄ŋ mbɔ bii chʉʼ kie ŋkwaaNyii. 35 Jɔŋ nɔ nə bɛ nə kɛʼɛ ndə i kə́ kyʉ́ʉ bɔŋleʼ báa, tʉʉ-yii bʉ̀ʉ ndə məgɛ̀ mbʉə mbʉ kɛʼɛ ndə kʉʉkə məniʼ. 36 Mɔ bɔŋ kie nukə ndə i tʉʼ kwə́ʼ te yie-ɔ jyujyu tə chàa ndə Jɔŋ kə kwə́ʼ te mɔ. Bʉʼka fɔʼtə ndə Tie-ɔ kɔ́ tʉ mɔ ndə məmìʼtə, fɔʼtə-ɔ̄ŋ ndə mɔ tʉʼ fɔ̀ʼ, nɔ tʉʼ dʉ̀ʼ mbɔ nɔ tə́ŋ Tie-ɔ tə́ŋ mɔ. 37 Mbʉ Tie ndə ɔ tə́ŋ mɔ nɔ tʉʼ kwə́ʼ te mɔ nə mbəŋ-ɛŋ. Təmə bii bɔŋ nɔʼ leʼnə yʉ́ gyʉʉ-i fɛ byuunɔ nyíɛ mbʉə-e fɛ. 38 Ŋgiekə-i káa mu bii fɛ bʉʼka bii bɛ́ŋ wo ndə ɔ tə́ŋ ɔŋ fɛ.

39 "Bii nɔ tʉʼ tyúutə mu ŋwɔʼnə-Nyii bʉʼka bii nɔ kwɔ̀ʼtə mbɔ bii bu kie məchímbi chɔ təmə liʼ-i ghɔ fɛ, bɔŋleʼ kə bɛ ŋwɔʼnə-ɔ̄ŋ ndə i tʉʼ kwə́ʼ te mɔ. 40 Bii bɔŋ kə́ tɛ́ŋ ndə məgwè tʉ mɔ chʉʼ kie məchímbi.

41 "Mɔ tʉʼ kie məgʉ́ə bə hə kəghɔ-bʉə fɛ. 42 Mɔ bɔŋ kínə mbɔ bii kie ŋkʉ̂ʉ-Nyii mu fyiihə-ii fɛ. 43 Mɔ nɔ gwè yie-Tie-ɔ təmə bii bɔŋ lʉ̀ mɔ mu bii fɛ. Kaʼ ibɛʼ-yə wo gwè yie mbəŋ-ɛŋ, bii lʉ̀ ɔ mu bii. 44 Bəkɔ bii bɛ́ŋ təka kə́ kʉ́ʉ məgʉ́ə haʼ hə mu bii, təmə kə́ kʉ́ʉ məgʉ́ə ndə i gwè hə kəghɔ-wo ndə ɔ bɛ Nyii tətɛʼ ɔ fɛ.

45 "Kə bii mə kə́ kwɔ̀ʼtə mbɔ mɔ bu tíi yietə-ii bʉəbʉə bəshʉ mbʉ Tie-ɔ fɛ. Wo nɔ ghɔ ndə ɔ bu tíi yietə-ii bʉəbʉə, kə́ bɛ Mushi ndə bii yʉ́əʼnə ndəŋ ɔŋ. 46 Bii kʉ̌ʉ nɔʼ kə bɛ́ŋ Mushi, təmə bii nɔʼ bɛ́ŋ mɔ, bʉʼka ɔ nɔ nə nyɔ̀ʼ te mɔ. 47 Bɔŋ kaʼ bii gòʼ təmə bɛ́ŋ nubə ndə ɔ nyɔ̀ʼ fɛ, bii bɛ́ŋ ŋgiebə-ɔŋ təka?"