1 Yɔ̄ŋ-yə kʉ̂ʉ tíŋ, Jiso kə́ tòʼ, lɔ̀ hə ndəŋ mbyu kəyəŋkwɛʼtəŋ imɔʼ ghɔŋbə lɔʼ-bətə̂ŋ-tə gɛ̀ ndəŋ bəbɛʼbə, kə́ tòʼ lɔ̀ʼ ntəŋjyujyu te Sɔ́ʼ-Nyii. Ɔ gɛ̀ ghɔŋbə bəlɔntəŋ-bi njuɔ bûu nə wuŋ, 2 leʼnə bəkebɛʼbə ndə bə nɔʼ chʉ́ʼ bɔŋ ndəŋ lyʉʉhəbʉəbʉəbə ghɔŋbə yɔʼbə, Mɛli, ndə bə kə́ tíi ɔ nə Matalina, ndə lyʉʉhəbʉəbʉəbə kə fyú hə mbʉə-ɔ təkwiitia, 3 Juana vi Kusa ndə ɔ kə́ lɛ́nə fɔ-Hɛlo-bə, Susana leʼnə bəbɛʼbə. Bəke-bɔ̄ŋ nɔ nə kə́ kwáa tɔ́ŋ bɔŋ nə yʉə-yə ŋkɔɔtəka.

4 Ndʉʉ ndə bʉə buŋmbi kə́nə tə yɔ́ŋ, bʉə bətə̂ŋbətə̂ŋ kə́ gwè tʉ Jiso, ɔ mɔ̀ʼ chəŋkə tʉ bɔŋ mbɔ, 5 "Wo-mutɔbɛʼ nɔ nə gɛ̀ mutɔ ndə məgɛ̀ mɔ̀ʼ ŋgwie-e, ndə ɔ tʉʼ mɔ̀ʼ, bəbɛʼbə gwùtə bətʉghʉʉ, bʉə tòʼtə nə wukə, nuɔ-mbi-mə chʉ́ʼtə. 6 Bəbɛʼbə gwùtə mu ŋgoʼhə, kóʼ məniʼ yə́ŋtə, bʉʼka i kə kie muu fɛ. 7 Ibɛʼ-yə ŋgwie gɛ̀ gwù mu təgyii, mbʉ təgyii kóʼ kwóhə i kwú. 8 Bəbɛʼŋgwie gwùtə ndəŋ chɔʼ-jyujyu-kə kóʼ, mbʉ ŋgwie kə́ kʉ́ʉnə ntɔŋmə nə ghyʉʉ, tíŋ ndə bə kə shùɔ." J̃iso nɔ gìe nubə-ɔ̄ŋ nɔ, ɔ ghɔ̀ŋ mbɔ, "Wotəmiyɔŋ ndə ɔ kie tyunəkə ndə məyʉ́, ɔ̈ yʉ́."

9 Ndʉʉ ndə vâafɔʼɔ-bi bíʼtə tʉ ɔŋ te nukə ndə mbʉ kəchəŋ bɛ yɔŋ, 10 ɔ ghɔ̀ŋ tʉ bɔŋ mbɔ, "Bii nɔ kie ndaa ndə bə kɔ́ tʉ bii, ndə məkínə nubə ndə bə lə̀ŋ te Sɔ́ʼ-Nyii, bɔŋ tʉ bʉəbɛʼbə m̃ɔ nɔ mɔ̀ʼ ndəŋ chəŋkə, mbɔ bɔ̂ŋ chʉʼ kə́ nyíɛ təmə bɔ̂ŋ kə́ chèʼnə fɛ, bɔ̂ŋ chʉʼ kə́ yʉ́ təmə bɔŋ kə́ kínə fɛ.

11 "Nduɔ, mbʉ kəchəŋ nɔ bɛ mbɔ mbʉ ŋgwie nɔ bɛ ŋgieNyiikə. 12 Bi ndə bɔ̂ŋ gwùtə bətʉghʉʉ, nɔ bʉə ndə bɔ̂ŋ nɔʼ yʉ́ ŋgieNyiikə, Debulu gwè fyúhə hə mbʉ kəŋgie mu fyii-bɔŋ, bʉʼka bɔ̂ŋ mə bɛ́ŋ mbʉ kəŋgie, i kwáa bɔŋ. 13 Bi ndə bɔ̂ŋ gwùtə mu ŋgoʼhə, nɔ bɛ bʉə ndə bɔ̂ŋ yʉ́ mbʉ ŋgiekə fí nə mu fyii sʉ́ʼnə təmə ghûutə-ʉə dɔ̀ŋnə fɛ, bɔ̂ŋ bɛ́ŋ Nyii haʼ məniʼ, nubə kʉ̂ʉ kə́ shʉ́ə tʉ bɔŋ, bɔ̂ŋ yʉ̀əʼtə liɛŋ-yʉə. 14 Ŋgwie ndə i gwùtə mu təgyii nɔ bɛ bʉə ndə bɔ̂ŋ kə yʉ́, kʉ̂ʉ fyú fia, nubə ndə i tʉʼ chɔ́ŋhə bɔŋ, fʉʼkə ghɔŋbə nu-tʉʉjyu-bə kəwʉʉnəmbi-fɛ̄ŋ kwóhə, i chìi təmə i mə tə̀ŋ mu fyii-bɔŋ fɛ. 15 Ŋgwie ndə i gwùtə ndəŋ ŋkɛŋ sê nɔ bɛ bʉə ndə bɔ̂ŋ kie fyii tʉ́ʉnə ghɔŋbə fyii jyujyu, bɔ̂ŋ bɛ́ŋ ŋgieNyiikə tə́nə chɔ nə shʉəŋ, yá fyiihə-ʉə kə́ kʉ́ʉnə ntɔŋ-jyujyu-mə tə i tə́ŋ.

16 "Wo kə chúʼ kɛʼɛ lə̀ŋ mu kəfɔ fɛ, təmə bɔŋ mətʉ́ʼ tɔʼɔ kəbɔ fɛ. A mɔ̀ʼ ndəŋ kəfɔ kə mbɔ bʉə ndə bɔ̂ŋ tʉʼ sʉ́ʉ mu njaa, bu nyíɛ məbáa-ɛ. 17 Bʉʼka nubɛʼkə kaa ghɔ ndə bə bɔŋ ndə i bu yi gòʼ təmə kɛ̀ʼnə fɛ, byuunɔ ndə i tʉʼ líi təmə bə bu nə kínə, i bɔŋ yi gwè ŋgwʉʉnə fɛ. 18 Kwɔ̀ʼtə tʉkə-a nə ntɛhə ndə a yʉ́ nukə. Bʉʼka mbɔ wo ndə ɔ kie bə bu bìʼ yi-yɔ́ŋyɔ́ŋ-yə chɔ, bɔŋ wo ndə ɔ gòʼ təmə kie fɛ, buŋ vaadyʉʼʉ ndə ɔ kwɔ̀ʼtə mbɔ ɔ kie, bə bu fí hə kəghɔ-ɔ."

19 Ndʉʉmɛ, ŋkwê-Jiso ghɔŋbə bəliŋ-bi gwè ndə mənyíɛ ɔŋ, bɔŋ bʉʼka bʉə kə yɔ́ŋ daa, bɔ̂ŋ chìi kəŋkaa mbɔ bɔ̂ŋ dàa mbʉə ɔ. 20 Wobɛʼ ghɔ̀ŋ tʉ ɔŋ mbɔ, "Naa-aŋ ghɔŋbə bəliŋ-ba nɔ tə́nə mbi kə́ kʉ́ʉ ndə mənyíɛ aŋ."

21 Bɔŋ ɔ bə̀ŋhə mbɔ, "Naa-ɔŋ ghɔŋbə bəliŋ-bɔŋ nɔ bʉə ndə bɔ̂ŋ yʉ́ ŋgieNyiikə kə́ fɔ̀ʼ."

22 Yɔŋbɛʼ, Jiso ghɔ̀ŋ tʉ vâafɔʼɔ-bi mbɔ, "B̈ʉʼʉ dàa muu gɛ̀ ndəŋ ibɛʼ-yə via-kətaanə-kəghəŋ-kə." Bɔ̂ŋ kóʼ mu kəbuu kə́ gɛ̀. 23 Ndə bɔ̂ŋ tʉʼ gɛ̀, ɔ gwù mbɛŋhə. Fʉ̂əŋ shíʼ mu mbʉ taanə-kəghəŋ-kə, mbʉ kəbuu kə́ bə̀ŋtə, muu kə́ ŋíi muŋgɔ, bɔ̂ŋ kə́ tə́nə nduɔ chu-kwú.

24 Vâafɔʼɔ-bi gɛ̀ yə̀ŋ ɔŋ ghɔ̀ŋ mbɔ, "Tiefɔʼ, Tiefɔʼ, baʼa tʉʼ nə bɛ́ muu!"

Ɔ gwùʼtə, sɔ́ʼ mbʉ kəfʉʉ ghɔŋbə mbʉ muu ndə i kə́ bə̀ŋtə, mbʉ kəfʉʉ tə́nə, yəŋbə líitə. 25 Ɔ bíʼtə tʉ vâafɔʼɔ-bi mbɔ, "Məmɔʼfyii-yii-yīŋ ndəŋ mɔ ba?"

Bɔ̂ŋ fàa, i chàa bɔŋ, bɔ̂ŋ kə́ bíʼtə tʉ ŋwɔŋtə-ʉə mbɔ, "Bɛ nda nɔ? Ndə ɔ kàhə fʉʉkə ghɔŋbə muu, bɔ̂ŋ yʉ́ chu-i."

26 Ndʉʉmɛ, bɔ̂ŋ té buukə gɛ̀ shùɔ lɔʼɔ Galasa ndə i bɛ ndəŋ ibɛʼ-yə via-kətaanə-kəghəŋ-Galili-kə. 27 Ndʉʉ ndə Jiso kə kóʼ mu kəbuu ŋgwuu mbʉ kəghəŋ, ɔ fə́nə ghɔŋ wo ndə ɔ kie lyʉʉhəbʉəbʉəbə, lɔ̀ hə kəyəŋkwɛʼtəŋ. I nɔʼ dɔ̀ŋnə təmə wo-ghɔ̄ mɔ̀ʼ ndyi bɔŋleʼ chí mu njaa fɛ. Ɔ kə́ chí bə haʼ mu sětə ndə bə sáa ndəŋ ŋgoʼ. 28 Ndʉʉ ndə ɔ nyíɛ Jiso, ɔ gwía gwù bəshʉ ɔ, tíi nə gyʉʉ dədə, ghɔ̀ŋ mbɔ, "A tʉʼ kʉ́ʉ yì ka nə mɔ, Jiso, VaaNyii ndə ɔ Chaabəfɔŋ? Mɔ nɔ tʉʼ fʉ̀ʉtə a, kə a mə chɔ́ŋhə mɔ fɛ!" 29 Ɔ nɔ kə gìe yɔ̄ŋ-yə bʉʼka Jiso nɔʼ kə kàhə mbʉ kəlyʉʉhəbʉəbʉə ndə məfyú hə mbʉə-wo-ghɔ̄. Ɔ nɔʼ kə́ yá ɔ vɛʼ buŋmbi mɔ̀ʼ sê. Buŋ ndə bə nɔʼ kə kɔ́ʼtə fʉəŋtə-i ghɔŋbə kwiitə-i nə bəchaŋ, bɔ̂ŋ kə́ chyìi ɔ, ɔ nɔ nə kə́ chètə mbʉ bəchaŋ, mbʉ kəlyʉʉhəbʉəbʉə tʉ́ʉhə ɔŋ, ɔ gɛ̀ bəyəŋ təmə bʉə kə́ chí chɔ fɛ.

30 Jiso bíʼtə tʉ ɔŋ mbɔ, "Yie-a bɛ nda?"

Ɔ bə̀ŋhə tʉ ɔŋ mbɔ, "Yie-ɔ nɔ bɛ Nuɔ," bʉʼka nuɔ-bəlyʉʉhəbʉəbʉə buŋmbi nɔʼ kə sʉ́ʉ mu mbʉə-ɔ. 31 Bɔ̂ŋ fʉ̀ʉtə ɔŋ təvɛʼtəvɛʼ mbɔ kə ɔ mə tə́ŋ bɔŋ mu byʉʉ ndə i gòʼ təmə kie liʼ fɛ. 32 Nuɔ-bəŋkwunyaa-buŋmbi nɔ kə́ yú mbʉ mbʉə kwɔŋ-ghɔ̄. Mbʉ bəlyʉʉhəbʉəbʉə fʉ̀ʉtə Jiso ndə məmɛ̀ʼtə bɔŋ, bɔ̂ŋ sʉ́ʉ mu mbʉ bəŋkwunyaa-ghɔ̄bə, ɔ kɔ́ fia tʉ bɔŋ. 33 Ndʉʉmɛ, ndə mbʉ bəlyʉʉhəbʉəbʉə fyú hə mu mbʉə-wo-ghɔ̄, bɔ̂ŋ gɛ̀ ŋíi mu mbʉ bəŋkwunyaa. Bɔ̂ŋ nyʉ́ʉ shíʼ ndəŋ ŋgwuu-mbʉ-kətaanə-kəghəŋ, gwùtə mbʉ mu muu kwútə.

34 Ndʉʉ ndə mbʉ bənchyii-bəŋkwunyaa nyíɛ nukə ndə i nɔʼ fyú, bɔ̂ŋ nyʉ́ʉ gɛ̀ nə wʉə, gɛ̀ fʉ̀ʼtə mbʉ bəsɔʼka mu kəyəŋkwɛʼtəŋ ghɔŋbə mu lɔʼɔ. 35 Mbʉ bʉə-ghɔ̄bə fyútə gɛ̀ ndə mənyíɛ nukə ndə i nɔʼ fyú. Bɔ̂ŋ kʉ̂ʉ gwè tʉ Jiso, nyíɛ mbʉ wo-ghɔ̄ ndə mbʉ bəlyʉʉhəbʉəbʉə kə fyú hə mu mbʉə-ɔ, ɔ kə́ dùʼ mbʉə təfʉəŋ Jiso, bə nɔʼ mɔ̀ʼ ndyihə mbʉə-ɔ, ndaa-ɛ bɔŋ-nɔʼ-leʼ tə́nə, faakə yá bɔŋ. 36 Bʉə ndə bɔ̂ŋ kə nyíɛ, fʉ̀ʼtə tʉ bəbɛʼbʉə ntɛhə ndə bə kə chʉ́ʼ wo-ghɔ̄ ndə lyʉʉhəbʉəbʉəbə kə bɛ mu mbʉə-ɔ le. 37 Bʉə bənchəŋ ndə bɔ̂ŋ kə bɛ lɔʼɔ Galasa, fʉ̀ʉtə Jiso mbɔ ɔ̈ la lɔ̀ hə mu bie-bɔŋ, bʉʼka mbɔ faa-kwu-kə nɔʼ kə fí fyiihə-ʉə.

Ndʉʉghɔfii, Jiso kóʼ mu kəbuu gɛ̀ nə wi. 38 Wo-ghɔ̄ ndə mbʉ bəlyʉʉhəbʉəbʉə kə fyú hə mu mbʉə-ɔ fʉ̀ʉtə Jiso ndə məgɛ̀ ghɔŋ ɔŋ mɔʼɔ, bɔŋ Jiso téʼ tʉ ɔŋ mbɔ ɔ̈ la gɛ̀ nə wi, ghɔ̀ŋ mbɔ, 39 "Bʉ̀nə gɛ̀ chunjaa-a, gɛ̀ shyíi bʉə-ba nə nukwɛʼtəŋbə ndə Nyii nɔʼ chìi tʉ a." Ɔ gɛ̀ lɔ̀ʼ yə̀ŋ mu kəyəŋkwɛʼtəŋ te nukwɛʼtəŋkə ndə Jiso nɔʼ chìi tʉ ɔŋ.

40 Ndʉʉ ndə Jiso bʉ̀nə Galili, bʉə buŋmbi fí ɔ, bʉʼka bɔ̂ŋ bənchəŋ nɔ kə́ chyìi ɔ. 41 Ndʉʉghɔfii, mbyu wokwɛʼtəŋbɛʼ gwè, bə kə́ tíi ɔ nə Jalu, ɔ kə́ bɛ wokwɛʼtəŋ-mu-njaagháaNyii. Ɔ gwè kwíʼtə bəshʉ Jiso, fʉ̀ʉtə ɔŋ mbɔ, ɔ̈ gwè mu njaa-ɔ, 42 bʉʼka ɔ nɔ kə kie mbyu vaabəke-e imɔʼ, ɔ kə́ bɛ nə ŋgʉʼhə njuɔ bûu nə wuŋ, nɔʼ yɔ́ʼ tə kə́ kwú.

Jiso kʉ̂ʉ kə́ gɛ̀, bʉə kə́ bɛ bɔ̌ŋ ɔŋ yɔ́ŋ daa, kə́ fíanə ɔŋ. 43 Wokebɛʼ nɔ kə bɛ chɔ ndə ɔ nɔʼ kə nyíɛ ŋgʉəʼ nə mbʉʼtəkə-i ndəŋ ŋgʉʼhə njuɔ bûu nə wuŋ, nɔʼ fɛ̀ŋ fɔbə-i inchəŋ kɔ́ tʉ bədota, bə chʉ́ʼ ɔ kəŋkaa. 44 Ɔ gwè hə bɔ̌ŋ liɛŋ-ɔŋ kə̀ŋ tiɛŋ-ndyi-i, haʼ ndʉʉghɔfii, mbʉ kəmbʉʼtə chə̀nə.

45 Jiso bíʼtə mbɔ, "Kə̀ŋ nda kə̀ŋ mɔ?"

Bʉə bənchəŋ kʉ̂ʉ kɔ́tuu-yʉə, Bita ghɔ̀ŋ mbɔ, "Tiefɔʼ-ɔ, nɔ yɔ́ŋ bʉə kə́ fíanə a."

46 Mbʉ Jiso ghɔ̀ŋ mbɔ, "Wobɛʼ nɔʼ kə̀ŋ mɔ, bʉʼka mɔ nɔʼ yʉ́ ndə ghʉəʼkə fyú hə mbʉə-mɔ." 47 Woke-ghɔ̄ kʉ̂ʉ nyíɛ mbɔ ɔ mə líi fɛ, ɔ gwònə gwè gwù bəshʉ Jiso, núhə mu bʉə nukə ndə i chìi ɔ, ɔ kə̀ŋ Jiso leʼ shyíi bɔŋ ndə yɔʼkə-i tíŋ haʼ ndʉʉghɔfii. 48 Jiso ghɔ̀ŋ tʉ ɔŋ mbɔ, "Ŋaʼ, məmɔʼfyii-a ndə a mɔ̀ʼ ndəŋ mɔ, nɔʼ chìi yɔʼkə-a tíŋ. Tòʼ jyu."

49 Ndə ɔ kə́ bíe kwə́ʼ, wobɛʼ gwè hə fu-Jalu, ndə ɔ bɛ wokwɛʼtəŋ-mu-njaagháaNyii, ghɔ̀ŋ tʉ ɔŋ mbɔ, "Vaa-a nɔʼ kwú, kə a mə leʼ kɔ́ ŋgʉəʼ tʉ chicha fɛ."

50 Jiso kʉ̂ʉ yʉ́ nukə ndə ɔ tʉʼ gìe, bə̀ŋhə tʉ ɔŋ mbɔ, "Kə a mə leʼ fàa fɛ, kə́ mɔ̀ʼ haʼ fyii-a ndəŋ mɔ, vaa-a bu bìi."

51 Ndʉʉ ndə bɔ̂ŋ gɛ̀ tə dàa chunjaa-ghɔ̄, Jiso kɔ́tuu mbɔ kə wo mə sʉ́ʉ mu njaa fɛ yaʼkɛŋ Bita, Jɔŋ leʼnə Jɛŋ nə mbʉ tie-vaa ghɔŋ ŋkwê-i. 52 Mbʉ mu njaa kə́ bɛ ilə́ŋnə nə bʉə kə́ gwía mbʉ vaa gwù fɛ̄ŋ gwù fɛ̄ŋ. Jiso ghɔ̀ŋ tʉ bɔŋ mbɔ, "Kə bii mə leʼ gwía fɛ, ɔ chʉʼ kwú fɛ, mbʉ vaa nɔ tʉʼ bɛ́ŋbɛ́ŋ."

53 Bɔ̂ŋ chʉ́əʼ ɔ, kə́ kínə mbɔ mbʉ vaa nɔʼ kwú.Jiso bʉ̀nə kóʼhə vaabəke ndə ɔ nɔʼ kwu 54 Jiso yá kwii-i, gìe nə ghʉəʼkə mbɔ, "Lɔ̀ hə sê, ŋaʼ!" 55 Haʼ ndʉʉghɔfii, lyʉʉhəkə-i bʉ̀nə, ɔ lɔ̀ hə sê. Jiso gìe tʉ bɔŋ mbɔ, "B̈ii kɔ́ fɔbə, ɔ̈ yú." 56 I chàa bətie-bi daa, Jiso shyùu tyunəkə-ʉə mbɔ, bɔ̂ŋ mə shyíi wo chɔ fɛ.