Fɔʼɔ 28

Bɔɔ ndəŋ kwɔŋ ntəŋntəŋ muu-Maləta

1 Ndʉʉ ndə baʼa kɔ̀ɔtə tə kóʼ kwɔŋlɔʼ ntəŋntəŋ muu, baʼa yʉ́ mbɔ baʼa la bɛ Maləta. 2 Bʉə-lɔʼɔ-ghɔ̄bə dʉ̀ʼ ntɛ nuʼ jyujyu tʉ baʼa təmə baʼa nɔʼ nə nyíɛ fɛ, bɔ̂ŋ dyì viʼi chə̀ŋtə baʼa mbʉə ghɔ bənchəŋ, bʉʼka wyuu nɔ kə chʉ́ʉhə ndə məfyíi kə́ kɔ́ fəʼə.

3 Ndʉʉ ndə Bɔɔ kə́ chə̀ŋtə byʉʉ məŋkɔʼ gɛ̀ tɔ̀ŋ mu kyʉ, bʉʼka məyíʼhə, fɛfɛkə sʉ̀ʉnə fyú hə muŋgɔ chyúnə ndəŋ kwii-i. 4 Ndʉʉ ndə mbʉ bʉə-lɔʼɔ-ghɔ̄bə nyíɛ ndə mbʉ kəfɛfɛ chyúnə ndəŋ kwii-i, bɔ̂ŋ gìe tʉ ŋwɔŋtə-ʉə mbɔ, "Wo-ɔ̄ nɔʼ yí wo. Ɔ kɔ̀ɔtə tə kóʼ hə mu muu le, təmə bɔŋ nyii-yʉʼʉ ndə bə tíi ɔ nə Fɔŋ-Ŋkwɛ-Shʉəŋ bɔŋ mə mɛ̀ʼtə ɔŋ ɔ gɛ̀ fɛ." 5 Bɔɔ ŋwìʼtə mbʉ yɔ, ɔ chóʼnə gwù mu kyʉ təmə lə́ŋhə ɔŋ fɛ. 6 Bɔ̂ŋ kə́ chyìi ndə mənyíɛ mbɔ ɔ bu wùʼ byuunɔ ɔ chóʼnə gwù sê kwú. Bɔŋ ndʉʉ ndə bɔ̂ŋ chyìi kəŋkaa ndə mənyíɛ mbɔ nukə chìi ɔ, bɔ̂ŋ kwɛ́nə ndaahə-ʉə, ghɔ̀ŋ mbɔ ɔ la bɛ nyii.

7 Tɔ̂bɛʼkə nɔ kə bɛ mu lɔʼɔ-ghɔ̄, kə́ bɛ yi-Fɔŋ-lɔʼɔ-ghɔ̄-yə ndə yie-e kə́ bɛ Bublu, ndə ɔ kə́ lʉ̀ baʼa, tía baʼa shʉ́əshʉ́ə ndə chîbə itia. 8 I kwɔnə fyú mbɔ tie-Bublu la nʉ̀ʉ yɔ́ʼyɔ́ʼ nə nchyʉʼkə ghɔŋbə jisaŋtele. Bɔɔ sʉ́ʉ mu njaa ndə mənyíɛ ɔŋ, mɔ̀ʼ ghɔkə-i ndəŋ ɔŋ, gháaNyii, chʉ́ʼ ɔ. 9 Ndʉʉ ndə yɔ̄ŋ-yə fyú, bəʼ-bʉə-bəyɔʼ-bə ndə bɔ̂ŋ bɛ ndəŋ kwɔŋ-ghɔ̄ ntəŋntəŋ muu le, gwè tʉ ɔŋ, ɔ chʉ́ʼ bɔŋ. 10 Bɔ̂ŋ kɔ́ kuŋhə tʉ baʼa yɔ́ŋyɔ́ŋ ghɔ, kʉ̂ʉ bɛ ndʉʉ ndə baʼa bɛ ndə məkóʼ buukwɛʼtəŋkə gɛ̀ nə waʼ, bɔ̂ŋ mɔ̀ʼ fɔbə inchəŋ mu mbʉ kəbuukwɛʼtəŋ ndə baʼa kə́ byúu.

Bɔɔ dàa Luŋ

11 Bəchî itia kʉ̂ʉ tíŋ, baʼa kóʼ mu kəbuukwɛʼtəŋ ndə i kə lɔ̀ hə Alɛsaŋndia, nɔʼ kə́ chí ndəŋ mbʉ kwɔŋ ntəŋntəŋ muu ndə shyʉʉ-fəʼə, ndə bə kɔ́ŋ tʉ-bənyii-təfɔʼ-bə bəshʉ-ghɔ̄ ndə cheʼkə-i. 12 Baʼa kʉ̂ʉ dàa kəyəŋkwɛʼtəŋbɛʼ bə kə́ tíi nə Silakus, baʼa shíʼ chɔ, chí ndə chîbə itia. 13 Baʼa kʉ̂ʉ lɔ̀ hə chɔ yə̀ŋ gɛ̀ dàa kəyəŋbɛʼ bə kə́ tíi nə Lɛgium. Chîkə imɔʼ kʉ̂ʉ tíŋ fʉʉkə kóʼ byûumbɔŋ, kʉ̂ʉ bɛ biitə-kəchî-kə baʼa dàa Botiuli. 14 Baʼa nyíɛ bəbɛʼbʉə chɔ ndə bɔ̂ŋ nɔʼ bɛ́ŋ Nyii, bɔ̂ŋ yátə baʼa, baʼa chí chɔ ndə chîbə təkwiitia. Ndʉʉmɛ, baʼa lɔ̀ hə chɔ gɛ̀ Luŋ.

15 Bʉə ndə bɔ̂ŋ nɔʼ bɛ́ŋ Nyii chɔ, kʉ̂ʉ yʉ́ mbɔ baʼa tʉʼ gwè, bɔ̂ŋ lɔ̀ tə gwè bìatə baʼa vyii-Abius. Bəbɛʼbʉə gwè bìatə baʼa kəyəŋbɛʼ ndə bə kə́ tíi nə Njəŋ-chí-hə Itia. Baʼa kʉ̂ʉ nyíɛ bɔŋ, Bɔɔ kɔ́ ndɔ tʉ Nyii, kie fyii.

16 Baʼa kʉ̂ʉ gwè dàa mu Luŋ, bə mɛ̀ʼtə Bɔɔ ɔ kə́ chí tətɛʼ ɔ ghɔŋ wo-bəsɔge ndə ɔ kə́ chyìi ɔ.

Bə kə́ chyìi Bɔɔ ndʉʉ ndə ɔ tʉʼ lɔ̀ʼ ŋgieNyiikə

17 Chîbə kʉ̂ʉ tíŋ itia, Bɔɔ chə̀ŋtə bəntəŋbəshʉ-bʉə-Juu, bɔ̂ŋ kʉ̂ʉ chə̀ŋ, ɔ ghɔ̀ŋ tʉ bɔŋ mbɔ, "Bəliŋ-bɔŋ, mɔ kə chìi nu-bʉ̂ʼʉ-kə tʉ bʉə-bʉʼʉ fɛ, byuunɔ mɔ̀ʼ nuʼ-bətietie-bʉʼʉ bɛ́ fɛ, bɔ̂ŋ bɔŋ chɔ̀ʼhə mɔ kɔ́ chaŋ Jɛlosalɛŋ, mu kəghɔ-bʉə-Luŋ. 18 Bɔ̂ŋ kʉ̂ʉ tyúutə mɔ liʼ, kə́ kʉ́ʉ ndə məmɛ̀ʼtə mɔ chɔ bʉʼka mbɔ bɔ̂ŋ kə nyíɛ nukə ndə bəkɔ bə yí mɔ bʉʼka yɔŋ fɛ. 19 Bɔŋ bʉʼka bəntəŋbəshʉ-bʉə-Juu kə tɛ́ŋ, mɔ kie ndə məfʉ̀ʉtə mbɔ b̈ə lʉ̀ fɛʼɛ-ɔ tʉ Fɔŋ-Luŋ, təmə mɔ bɔŋ kə́ kie nubɛʼkə ndə məgìe kətʉ bʉə-lɔʼɔ-baʼa fɛ. 20 Bʉʼka yɔ̄ŋ-yə, ndʉʉmɛ, mɔ kə́ tíi bii ndə mənyíɛ bii bʉʼʉ kwə́ʼ, bʉʼka mbɔ nɔ bɛ bʉʼka mɔ bɛ́ŋ wo ndə bʉə-Isilɛ kə́ yʉ́əʼnə ndəŋ ɔŋ, ndə i chìi mɔ kə́ tə́nə laa fɛ̄ŋ nə bəchaŋ təkwii-mɔ nɔ."

21 Bɔ̂ŋ gìe tʉ ɔŋ mbɔ, "Baʼa chʉʼ kie ŋwɔʼnə ndə i lɔ̀ hə Judia, gwè tʉ baʼa mbɔ a nɔʼ chìi bʉ̂ʼʉ fɛ, byuunɔ təmə mbyu liŋ-yʉʼʉ bɔŋ-nɔʼ-leʼ gwè fɛ̄ŋ nə ntəŋ yie-a byuunɔ tíi yie-a bʉəbʉə fɛ. 22 Baʼa bɔŋ kə́ kʉ́ʉ ndə məyʉ́ kəghɔ-a nukə ndə i bɛ mu fyii-a, bʉʼka mbɔ bʉə bənchəŋ nɔ tʉʼ ghɔ̀ŋ mbɔ nuɔ-ɔ̄ŋ ndə a tə́nə chɔ nɔ la kaa nuɔ jyujyu fɛ."

23 Bɔ̂ŋ kʉ̂ʉ tʉ́ʼ chîkə tʉ ɔŋ, gwè kəyəŋ ndə ɔ tʉʼ chí chɔ, kɛŋ nuɔ yɔ́ŋyɔ́ŋ. Lʉ̀ hə ndʉʉsɛŋkə tə gɛ̀ dàa ndʉʉbuumbi, ɔ kə́ fʉ̀ʼtə nubə tʉ bɔŋ te Sɔ́ʼ-Nyii, kə́ kɔ̀ɔtə ndə məlóʼtə bɔŋ te Jiso hə mu ŋwɔʼnə-nuʼ-Mushi leʼnə ŋwɔʼnə-bʉəyʉkəŋgieNyii. 24 Bɔŋ bʉəbɛʼbə leʼ bɛ́ŋ nukə ndə ɔ kə gìe, bəbɛʼbə tɛ́ŋ. 25 Bɔ̂ŋ kʉ̂ʉ kə́ túŋ bəŋʉʉ nə mbəŋtə-ʉə, bɔ̂ŋ wɔ̀ʼtə ndʉʉ ndə Bɔɔ gìe mbyu kəŋgie-ɔ̄ mbɔ, "LyʉʉhəNyiikə nɔ nə gìe shʉəŋ tʉ bətietie-bii tíŋ hə bɔ̌ŋ Adaya yʉkəŋgieNyii mbɔ,

26 ‘Gɛ̀ tʉ bʉə-bɔ̄ŋ gɛ̀ ghɔ̀ŋ tʉ bɔŋ mbɔ,

bii bu kɛŋ kə́ yʉ́ haʼ yʉ́ təmə bɔŋ kə́ kínə fɛ,

bii bɔŋ-bu-leʼ kɛŋ kə́ nyíɛ haʼ nyíɛ təmə bɔŋ kə́ chèʼnə fɛ.

27 Bʉʼka bɔ̂ŋ nɔʼ chíe fyiihə-ʉə,

təmə kə́ yʉ́ nə tyunəbə-ʉə jyujyu fɛ,

bɔ̂ŋ nɔʼ kwétə shʉtə-ʉə,

mbɔ bɔ̂ŋ mə nyíɛ nə shʉtə-ʉə

bɔŋleʼ yʉ́ nə tyunəbə-ʉə

kínə nə fyiihə-ʉə,

kíahə ŋwɔŋ-yʉə, mɔ chʉʼ yi chʉ́ʼ bɔŋ fɛ.’*28:27 Adaya 6:9-10.

28 Nduɔ, b̈ii kínə mbɔ ŋkwaaNyii-ɔ̄ŋ, bə nɔʼ tə́ŋ kɔ́ tʉ bʉə ndə bɔ̂ŋ gòʼ təmə bɛ bʉə-Juu fɛ, bɔ̂ŋ bu yʉ́." 29 [Ndʉʉ ndə ɔ gìe nubə-ɔ̄ŋ, mbʉ bʉə-Juu wɔ̀ʼnə gɛ̀ kə́ tòʼ túŋ bəŋʉʉ nə mbəŋtə-ʉə.]

30 Ndə ŋgʉʼhə ibûu, Bɔɔ kə́ chí chɔ mu yi-yə njaa ndə ɔ kə́ lɔ̀ʼ. Bʉə kə́ gwètə mətòʼ chɔ tʉ ɔŋ. 31 Ɔ kə́ kwə́ʼ tʉ bɔŋ te Sɔ́ʼ-Nyii bɔŋ-kə́-leʼ dàhə bɔŋ te Jiso Klai Tiekətʉ nə fyii tə̀ŋnə təmə nukə kə́ tìahə ɔŋ fɛ.