1 Ndʉʉ ndə baʼa mɛ̀ʼtə bɔŋ, baʼa lʉ̀ buukwɛʼtəŋkə gɛ̀ ndyʉndyʉ gɛ̀ shùɔ Kos. Mbi kʉ̂ʉ sɛŋ fíi, baʼa dàa Lut, kʉ̂ʉ lɔ̀ hə chɔ gɛ̀ Batala. 2 Baʼa kʉ̂ʉ nyíɛ buukwɛʼtəŋkə ndə i tʉʼ gɛ̀ Fɔnishia, baʼa kóʼ chɔ kə́ gɛ̀.Bɔɔ mu kəbuukwɛʼtəŋ gɛ̀ Jɛlosalɛŋ 3 Ndʉʉ ndə baʼa kə́ dùhə nyíɛ Siblɔ, baʼa tíŋ hə byûumbɔŋ, té gɛ̀ dàa Silia gɛ̀ shùɔ Taa, kə́ bɛ yəŋkə ndə bə kie ndə məfyúhə bɛʼkə chɔ hə mu kəbuukwɛʼtəŋ-baʼa. 4 Baʼa kʉ́ʉ vâafɔʼɔ-Jiso chɔ, nyíɛ, baʼa bɔŋ chí ndə chîbə təkwiitia. LyʉʉhəNyiikə tíŋ hə bɔ̌ŋ vâafɔʼɔ-Jiso, bɔ̂ŋ shyùu tyunə-Bɔɔ-kə mbɔ ɔ mə gɛ̀ Jɛlosalɛŋ fɛ. 5 Ndʉʉ ndə chîbə-aʼ kə mì, baʼa lɔ̀ hə chɔ kə́ bìʼ gɛ̀ nə shʉbə. Mbʉ bʉə ndə bɔ̂ŋ nɔʼ kə bɛ́ŋ Nyii bənchəŋ ghɔŋbə bəke-bʉə leʼnə vâa, gɛ̀ hə bɔ̌ŋ baʼa tʉ baʼa bɔŋ fyú hə mbʉ mu kəyəŋkwɛʼtəŋ. Baʼa kʉ̂ʉ dàa chʉʉ-kəbuukwɛʼtəŋ, bè kweʼtəbə-aʼ sê gháaNyii. 6 Baʼa kʉ̂ʉ tíŋhə ŋwɔŋtə-aʼ, gɛ̀ kóʼ mbʉ mu kəbuukwɛʼtəŋ, bɔ̂ŋ bʉ̀nə chunjaa.

7 Ndʉʉ ndə baʼa lɔ̀ hə Taa, baʼa ŋíi mu kəbuukwɛʼtəŋ tə gɛ̀ shùɔ Tolemi, gɛ̀ gìe tʉ bʉə ndə bɔ̂ŋ nɔʼ bɛ́ŋ Nyii, baʼa bɔŋ chí ndəŋ chîmbikə. 8 Baʼa kʉ̂ʉ sɛŋ lɔ̀ hə chɔ, gɛ̀ dàa Kasalia, ŋíi mu njaa-Fili, kə́ bɛ w̃o ndə ɔ nə kə́ lɔ̀ʼ ŋgieNyiikə bɔŋ-kə́-leʼ bɛ mbyu wo hə mu bʉə təkwiitia ndə chɔshi kə séʼ ndə mə-kə́-gyʉ̀ə fɔyubə. Baʼa chí mu njaa-ɔ. 9 Ɔ kie vâabəke kwii təmə bɔ̂ŋ nɔʼ kie bələŋ fɛ, ndə bɔ̂ŋ kə́ téʼ ntəŋ ndə i gwè hə kəghɔ-Nyii.

10 Ndʉʉ ndə baʼa chí chɔ ndə mbyu-bəchî-hə, yʉkəŋgieNyiibɛʼ ndə bə kə́ tíi ɔ nə Agabu shíʼ gwè hə Judia. 11 Ɔ kʉ̂ʉ gwè bìatə baʼa, lʉ̀ kwɔ-Bɔɔ-kə, kɔ́ʼ yi-yə kwiitə ghɔŋbə fʉəŋtə-i nə yɔŋ-yə, ghɔ̀ŋ mbɔ, "LyʉʉhəNyiikə nɔʼ ghɔ̀ŋ mbɔ, ‘Wo ndə bɛ kwɔkə-i nɔ, bəntəŋbəshʉ-bʉə-Juu ndə bɔ̂ŋ bɛ mu Jɛlosalɛŋ bu kɔ́ʼtə ɔŋ haʼ mənɔ, kɔ́ tʉ bʉə ndə bɔ̂ŋ gòʼ təmə bɛ bʉə-Juu fɛ.’ " 12 Ndʉʉ ndə baʼa yʉ́ yɔ̄ŋ-yə, baʼabə bʉə ndə bɔ̂ŋ bɛ chɔ, fʉ̀ʉtə Bɔɔ mbɔ ɔ mə kóʼ gɛ̀ Jɛlosalɛŋ fɛ.

13 Bɔɔ bə̀ŋhə mbɔ, "Bɛ ka bii kə́ gwía, bə́ʼtə fyii-ɔ? Mɔ nɔʼ shʉ̀tə ŋwɔŋ-ɔŋ bə haʼ ndə məgɛ̀ chaŋ Jɛlosalɛŋ fɛ, bɔŋ ndə mə-buŋ-kwú yie-Jiso Tiekətʉ ghɔ." 14 Ndʉʉ ndə baʼa byùutə ɔŋ kəŋkaa, baʼa yʉ́ʼnə ghɔbə-aʼ ndəŋ ɔŋ, ghɔ̀ŋ mbɔ, "Tə Tiekətʉ fɔ̀ʼ ŋkʉʉnə tʉʉ-i."

15 Chîbə-ɔ̄ŋ kʉ̂ʉ tíŋ, baʼa shʉ̀tə ŋwɔŋ-yaʼ, kóʼ gɛ̀ Jɛlosalɛŋ. 16 Vâafɔʼɔ Jiso-bɛʼbə lɔ̀ hə Kasalia bìa baʼa, lʉ̀ baʼa, baʼa bɔŋ gɛ̀ mu njaa-Mason ndə ɔ lɔ̀ hə Siblɔ, kə́ bɛ vaafɔ̀ʼ-Jiso lʉ̀ hə mbibɛʼ, ndə baʼa kə kie ndə məchí fu-ɔ. 17 Ndʉʉ ndə baʼa kə dàa Jɛlosalɛŋ, bʉə ndə bɔ̂ŋ nɔʼ kə bɛ́ŋ Nyii fí baʼa chɔ nə tʉʉjyu.

18 Mbi kʉ̂ʉ sɛŋ fíi, baʼabə Bɔɔ gɛ̀ ndə mənyíɛ Jɛŋ. Bəntəŋbəshʉ bənchəŋ nɔ nə bɛ chɔ ghɔ. 19 Bɔɔ kʉ̂ʉ gìe tʉ bɔŋ liʼ, fʉ̀ʼtə nubə tʉ bɔŋ imɔʼimɔʼ ndə Nyii nɔʼ fɔ̀ʼ tíŋ hə bɔ̌ŋ ɔŋ, tʉ bʉə ndə bɔ̂ŋ gòʼ təmə bɛ bʉə-Juu fɛ.

20 Bɔ̂ŋ kʉ̂ʉ yʉ́ yɔ̄ŋ-yə, lə̀ʼtə Nyii, gìe tʉ ɔŋ mbɔ, "A nyíɛ mɛ, liŋ, bɛ ntyʉʉ ŋkɔŋ-bʉə-Juu-hə bəsɛʼɛ ndə bɔ̂ŋ nɔʼ bɛ́ŋ Nyii bɔŋ kie jyʉʉ ndə mətʉ́ʼ nuʼ-Mushi? 21 Bə bɔŋ nɔʼ shyíi bɔŋ mbɔ a la tʉʼ dàhə bʉə-Juu ndə bɔ̂ŋ tʉʼ chí mu bʉə ndə bɔ̂ŋ gòʼ təmə bɛ bʉə-Juu fɛ, mbɔ bɔ̂ŋ la shìe liɛŋtə-ʉə hə ndə nuʼ-Mushi, bɔŋ-kə́-leʼ shyíi bɔŋ mbɔ bɔ̂ŋ mə fɔ̀ʼ vâa-bʉə byuunɔ tʉ́ʼ nuʼ-yaʼ fɛ. 22 Bʉʼʉ bu bɛ təka? Bɔ̂ŋ bu yaʼ yʉ́ mbɔ a la bɛ fɛ̄ŋ.

23 "Fɔ̀ʼ haʼ nukə ndə baʼa bu kə́ gìe tʉ a. Baʼa nɔ kie bələŋ kwi ndə bɔ̂ŋ nɔʼ gwìa ŋkaamə. 24 Gɛ̀ lʉ̀ bʉə-bɔ̄ŋ, b̈ii bɔŋ gɛ̀ sʉ̀ ndɔŋ kətʉ-bii bɔŋ, bɔŋleʼ lɔ̀ʼ chuɔŋ-ɛŋ, bɔ̂ŋ chʉʼ chètə tʉbə-ʉə kə mbɔ bʉə bənchəŋ bu kínə mbɔ nubə ndə bə gìe kətʉ-a la bɛ lɛɛŋkə, bɔŋ mbɔ ya mbəŋ la tʉʼ leʼ tʉ́ʼ nuʼ-Mushi.

25 "Tʉ bʉə ndə bɔ̂ŋ nɔʼ bɛ́ŋ Nyii ndə bɔ̂ŋ gòʼ təmə bɛ bʉə-Juu fɛ, baʼa nɔʼ nyɔ̀ʼ nubə tʉ bɔŋ ndə baʼa nɔʼ shyʉ̀ʉ gyʉʉ chɔ mbɔ b̈ɔ̂ŋ la nyʉ́ʉ fɔbə ndə bə nɔʼ fɛ̀ʼ bənyii nə yɔŋ, ghɔŋbə mənú fɔbʉəkə leʼnə məkwó mbɔʼ nyaa ndə ɔ lʉ́ʉlʉ́ʉ leʼnə bəsəŋ."

26 Mbi kʉ̂ʉ sɛŋ fíi, Bɔɔ lʉ̀ bɔŋ ghɔŋ bɔŋ kʉ̂ʉ sʉ̀ ŋwɔŋ-yʉə bɔŋ, gɛ̀ mu njaafɛ̀ʼndɛŋNyii gɛ̀ chìi bə kínə chîkə ndə ŋkaamə-ʉə bu lìʼ chɔ, bə bɔŋleʼ kɔ́ kɔkə ndə məfɛ̀ʼndɛŋ chɔ yie-bɔŋ.

27 Ndʉʉ ndə mbʉ bəchî təkwiitia kə gwè ndə məmì, bʉə-Juubɛʼbə ndə bɔ̂ŋ lɔ̀ hə Esia nyíɛ ɔŋ mu njaafɛ̀ʼndɛŋNyii. Bɔ̂ŋ kɔ́ buuŋ bʉə, bɔ̂ŋ yá ɔ, 28 kə́ tíitə ghɔ̀ŋ mbɔ, "Bʉə-Isilɛ, b̈ii kwáa baʼa! Nɔ bɛ wo nɔ ndə ɔ tʉʼ dàhə bʉə bənchəŋ ndəŋ yəŋbə inchəŋ, nə nu-bʉəbʉə-bə te bʉə-bʉʼʉ ghɔŋbə nuʼ-yʉʼʉ leʼnə yəŋkə-ɔ̄ŋ. Ndə məbìʼ chɔ, ɔ nɔʼ gwè nə bʉə-Gili, bɔ̂ŋ bʉ́əhə njaafɛ̀ʼndɛŋNyii-ɔ̄ŋ ndə i bɛ ŋkʉʉ." 29 Bʉʼka mbɔ bɔ̂ŋ nɔʼ kə nyíɛ Tolofimu ndə ɔ lɔ̀ hə Ɛfɛso, bɔ̂ŋ kə́ kwɔ̀ʼtə mbɔ Bɔɔ la nɔʼ gwè nə nɔŋ mu njaafɛ̀ʼndɛŋNyii.

30 Mbyuutəmbyuutə gwù mu mbʉ kəyəŋkwɛʼtəŋ, mbʉ bʉə bənchəŋ nyʉ́ʉ gɛ̀ yá Bɔɔ, dùu ɔ, fyúhə ɔŋ hə mu njaafɛ̀ʼndɛŋNyii. Haʼ ndʉʉmɛ, bə fʉ̀əŋ chulɔŋ. 31 Ndə bɔ̂ŋ kə́ kʉ̂ʉ ndə məyí ɔ, ntəŋ gwè tʉ ntəŋbəshʉ-bʉəkwɛʼtəŋ-bəsɔge mbɔ ntɔŋntɔŋ la bɛ mu Jɛlosalɛŋ. 32 Haʼ ndʉʉmɛ, ɔ lɔ̀ hə sê lʉ̀ bəbɛʼbʉəkwɛʼtəŋ bəsɔge ghyʉʉ ghɔŋbə bəbɛʼbəsɔge ghɔŋ bɔŋ, nyʉ́ʉ shíʼ, gɛ̀ bìatə bɔŋ. Ndʉʉ ndə bɔ̂ŋ nyíɛ mbʉ ntəŋbəshʉ-bʉəkwɛʼtəŋ-bəsɔge ghɔŋbə mbʉ bəsɔge, bɔ̂ŋ mɛ̀ʼtə ndə məgwúu Bɔɔ. 33 Mbʉ ntəŋbəshʉ-bʉəkwɛʼtəŋ-bəsɔge kwɛ̀ʼtə gɛ̀ mbʉə Bɔɔ, kàhə mbɔ b̈ə la yá ɔ, kɔ́ʼtə ɔŋ nə bəchaŋ ibûu, ɔ bíʼtə wo ndə ɔ bɛ yɔŋ ghɔŋbə nukə ndə ɔ nɔʼ chìi. 34 Bəbɛʼbʉə kə́ tíitə gìe mbyu kənu imɔʼ nɔ, bəbɛʼbə kə́ tíitə gìe yi-kədɔŋ-yə. Ndʉʉ ndə ɔ chìi kəŋkaa ndə məkínə nukə ndə bə tʉʼ gìe bʉʼka kwə́ʼ yɔ́ŋyɔ́ŋ, ɔ kàhə mbɔ b̈ə la lʉ̀ ɔ, gwè nə nɔŋ mu njaa-bəsɔge. 35 Ndʉʉ ndə ɔ gwè dàa chu-bəyuhə ndə məkóʼ gɛ̀ kweghɔʼ, bəsɔge bɛ̀ʼ ɔ bʉʼka ntɛ ntɔŋntɔŋ ndə mbʉ nuɔ-bʉə kə bɛ nə yɔŋ, 36 bʉʼka bʉə buŋmbi nɔ kə kə́ gwè hə bɔ̌ŋ, kə́ tòʼ tíitə ghɔ̀ŋ mbɔ, "B̈ii lʉ̀ ɔ, kwɛ̀ʼtə nə nɔŋ hə fɛ̄ŋ."

37 Ndʉʉ ndə bə bɛ̀ʼ Bɔɔ ndə məgwè nə nɔŋ mu njaa-bəsɔge, ɔ gìe tʉ mbʉ ntəŋbəshʉ-bʉəkwɛʼtəŋ-bəsɔge mbɔ, "Bəkɔ mɔ gìe nukə tʉ a mɛ?"

Ɔ bə̀ŋhə mbɔ, "Ã kwə́ʼ ŋgie-Gili-kə mɛ? 38 A kaa wo-Iji ndə ɔ kə bíe ŋɛ̀hə ntɔŋntɔŋ ŋɛ̀hə le fe? Ndə a ghɔ́ŋ nuɔ, biibə ŋkɔŋ-bʉə-hə kwi ndə bɔ̂ŋ kie fɔ-chɔ̂-bə, bii bɔŋ fyú gɛ̀ mu kwɔŋkəyəŋnə le fe?"

39 Bɔɔ bə̀ŋhə mbɔ, "Mɔ nɔ bɛ wo-Juu, lɔ̀ hə Taashuʼ mu Silisia, təmə kə́ bɛ vaa kəyəŋ tîetîe fɛ. Mɔ nɔ tʉʼ fʉ̀ʉtə a, mɛ̀ʼtə mɔ, mɔ kwə́ʼ tʉ mbʉ bʉə." 40 Ndʉʉ ndə ɔ kɔ́ fia tʉ ɔŋ, Bɔɔ kóʼ tə́nə kweghɔʼ, chètə mbʉ bʉə nə ghɔkə-i. Ndʉʉ ndə yəŋbə yùtə, ɔ kwə́ʼ tʉ bɔŋ kəŋgie bʉə-Juu mbɔ,