Fɔʼɔ 10

Kɔniliɔ tíi Bita

1 Wobɛʼ nɔ nə bɛ Kasalia yie-e kə́ bɛ Kɔniliɔ. Ɔ kə́ bɛ wokwɛʼtəŋ-bəsɔge ghyʉʉ, kə́ sɔ́ʼ nuɔ bəsɔgebɛʼbə bə kə́ tíi nə Nuɔ Bəsɔge Itali. 2 Ɔ nɔʼ kə kɔ́ ŋwɔŋ-ɛŋ tʉ Nyii. Mbəŋ-ɛŋ ghɔŋbə ŋgwie-wo-e, nɔ nə kə́ fàa Nyii. Ɔ nɔ nə kə́ kɔ́ kɔkə tʉ bʉə-mbʉʼ bɔŋ-kə́-leʼ gháaNyii təvɛʼtəvɛʼ. 3 Kʉ̂ʉ bɛ yɔŋbɛʼ mu bəchî itia ndʉʉnəchî, njəŋ chí ɔ təmə ɔ kə́ bɛ́ŋbɛ́ŋ fɛ, ɔ kɛŋ nyíɛ wontəŋNyii ndə ɔ tʉʼ gwè tʉ ɔŋ nə shʉ-i isúunə. Ɔ tíi ɔ mbɔ, "Kɔniliɔ."

4 Mbʉ Kɔniliɔ lɛ́nə ɔŋ nə faakə, bíʼtə mbɔ, "Bɛ ka, tie-ɔ?"

Mbʉ wontəŋ bə̀ŋhə mbɔ, "MəghaaNyii-aŋ, Nyii nɔʼ yʉ́ bɔŋleʼ nyíɛ kɔkə-a tʉ bʉə-mbʉʼ! 5 Nduɔ, tə́ŋ bʉə bɔ̂ŋ shíʼ gɛ̀ Joba, gɛ̀ gwè nə wo ndə bə tíi ɔ nə Samu Bita. 6 Ɔ nɔ tʉʼ chí ghɔŋ Samu wobɛʼ ndə ɔ núʼ gwohə, fu-i bɔŋ-kə́-leʼ bɛ mbʉə muukwɛʼtəŋmə."

7 Haʼ ndʉʉmɛ, ndə mbʉ wontəŋNyii bʉ̀nə nə wi, Kɔniliɔ tíi vâafɔʼɔ-bi bəbûu leʼnə wo-bəsɔgebɛʼ ndə ɔ nɔʼ kɔ́ ŋwɔŋ-ɛŋ tʉ Nyii bɔŋ-kə́-leʼ bɛ mbyu wo ndə ɔ kə́ chyìi ɔ. 8 Ɔ shyíi bɔŋ nə nubə ndə i nɔʼ fyú inchəŋ, tə́ŋ bɔŋ kɔ́ Joba.

Bita gɛ̀ mətòʼ tʉ Kɔniliɔ

9 Mbi kʉ̂ʉ sɛŋ fíi, mbʉ bʉə-ntəŋ Kɔniliɔ, gɛ̀ tə kə́ kə́ŋhə mbʉə Joba ndʉʉbeʼ, Bita kóʼ kətʉ njaa*10:9 Bʉə-Juu nɔ nə kə́ bɔŋ njaahə-ʉə nɔ bɔ̂ŋ mɔ̀ʼ ghɔ̂ʼ chɔ, lyʉ́ʉ tʉkə-i nə chiabə təmə kwɛ̀ŋkwɛ̀ŋ fɛ. Chìi yuhəbə mbi ndə məkóʼ gɛ̀ kətʉ ghɔ. ndə məgháaNyii, 10 jyʉʉ yɔ́ʼ ɔ, ɔ kə́ kʉ́ʉ ndə məyú fɔkə, bɔŋ ndʉʉ ndə bə kə́ chìi mbʉ bəfɔ, njəŋ chí ɔ təmə ɔ kə́ bɛ́ŋbɛ́ŋ fɛ. 11 Ɔ nyíɛ yuo ndə i ŋɔ́ʼnə, fɔbɛʼkə nə kwii ndyi kə́ shíʼ, bə shíʼhə nə fuuhə-i kwi kəchisê. 12 Mu mbʉ kəfɔ-ghɔ̄ ntɛnyaantɛnyaa kə́ bɛ chɔ. Nyaahə ndə bɔ̂ŋ shyìi ndyʉndyʉ nə yɔhə ghɔŋbə nuɔ-mbi-mə kə́ bɛ muŋgɔ. 13 Ɔ yʉ́ gyʉʉ ndə i ghɔ̀ŋ tʉ ɔŋ mbɔ, "Lɔ̀ hə sê, Bita, yítə fɔbə-ɔ̄ŋ kwó."

14 Bita bə̀ŋhə mbɔ, "Mbee Tiekətʉ, mɔ chʉʼ nə kwó fɔ-nchʉʉhə-kə fɛ."

15 Mbʉ gyʉʉ bìʼ kwə́ʼ mbɔ, "Kaʼ Nyii nɔʼ chóʼ fia mbɔ b̈ə yú fɔkə kə a mə tíi nə fɔ-nchʉʉhə-kə fɛ." 16 Ntɛ kənu-ghɔ̄ bìʼ chìi ɔ tə bɛ vɛʼ tia, ndʉʉmɛ mbʉ kəfɔ-ghɔ̄ ndə i bɛ nə kwii ndyi le, bə bʉ̀nə dùu kóʼhə, gɛ̀ nə yɔŋ-yə yuo.

17 Nu-ɔ̄-kə chɔ́ŋhə Bita daa, ɔ kə́ kwɔ̀ʼtə mbɔ bəkɔ yɔ̄ŋ-yə bɛ ŋgwɔ kənu ka. Kə nyíɛ, bʉə-bīŋ ndə Kɔniliɔ kə tə́ŋ le kə́ bíʼtə njaa ndə Samu chí chɔ, kʉ̂ʉ nyíɛ mbʉ njaa tə́nə mbi chulɔŋ, 18 tíi kə́ bíʼtə mbɔ, "Bɛ yəŋkə nɔ ndə Samu Bita tʉʼ chí chɔ mɛ?" 19 Ndə Bita tʉʼ kwɔ̀ʼtə te nu-ghɔ̄-kə, LyʉʉhəNyiikə ghɔ̀ŋ tʉ ɔŋ mbɔ, "Nyíɛ! Bələŋ bətia nɔ tʉʼ lɛ́nə aŋ. 20 Lɔ̀ hə sê, shíʼ gɛ̀ bìatə bɔŋ, bii bɔŋ gɛ̀, kə a mə tɛ́ŋ fɛ. Nɔ tə́ŋ mɔ tə́ŋ bɔŋ."

21 Ndʉʉmɛ, Bita shíʼ gɛ̀ bìatə bɔŋ, ghɔ̀ŋ mbɔ, "Mɔ nɔ bɛ wo ndə bii tʉʼ kʉ́ʉ le, bii tʉʼ gwè yì ka?"

22 Bɔ̂ŋ ghɔ̀ŋ mbɔ, "Nɔ tə́ŋ Kɔniliɔ mbyu wokwɛʼtəŋ-bəsɔge ghyʉʉ tə́ŋ baʼa. Nɔ bɛ wo ndə ɔ bɛ ndyʉndyʉ kə́ fàa Nyii, bʉə-Juu bɔŋleʼ kə́ kɔ́ kuŋhə tʉ ɔŋ. Wontəŋ ndə ɔ lɔ̀ hə bəshʉ-Nyii nɔ kə téʼ tʉ ɔŋ mbɔ ɔ tə́ŋ tíi a, ä gwè shyíi ɔ nə nukə." 23 Ndʉʉmɛ, Bita tíi bɔŋ ndə məbɛ bʉə-mətòʼ-bi ndʉʉŋkʉʼ-ghɔ̄. Mbi kʉ̂ʉ sɛŋ fíi, ɔ lɔ̀ gɛ̀ ghɔŋ bɔŋ ghɔŋbə bəbɛʼbʉə ndə bɔ̂ŋ nɔʼ kə bɛ́ŋ Nyii mu Joba.

24 Mbi kʉ̂ʉ sɛŋ kə bìʼ fíi, bɔ̂ŋ dàa Kasalia. Kɔniliɔ nɔʼ kɔ̀ʼnə bʉə-bi ghɔŋbə bʉə-kətoʼ-bi, ghɔŋ bɔ̂ŋ kə́ chyìi Bita. 25 Ndə Bita ŋíi chunjaa-ɔ, Kɔniliɔ bʉ́ʉnə yʉ̀əʼ shʉbə-i ndə mələ̀ʼtə ɔŋ. 26 Bɔŋ Bita chɔ̀ʼhə ɔŋ sê ghɔ̀ŋ mbɔ, "Mɔ nɔ bɛ haʼ woməsʉʉ ndə a." 27 Ndʉʉmɛ, Kɔniliɔ lɔ̀ hə sê, ghɔŋ ɔŋ kə́ kwə́ʼ, sʉ́ʉ gɛ̀ mu njaa, gɛ̀ bìatə bəbɛʼbʉə ndə bɔ̂ŋ kə dùʼtə chɔ.

28 Bita ghɔ̀ŋ tʉ bɔŋ mbɔ, "Bii nɔ kínə mbɔ nɔ nu-bʉə-kə ndə nuʼ bʉə-Juu tʉ mɔ ndə məyúnə byuunɔ məŋíi mu njaa wo təmə kə́ bɛ wo-Juu fɛ. Nyii bɔŋ nɔʼ dʉ̀ʼ tʉ mɔ mbɔ, mɔ mə nə tíi wo nə wo ndə ɔ nɔʼ bʉ́əhə ŋwɔŋ-ɛŋ bəshʉ-Nyii byuunɔ bɛ nə məfɛ̀ mbʉə-ɔ fɛ. 29 Nɔ chìi yɔŋ mɔ gwè haʼ ndʉʉghɔfii ndə bə tə́ŋ tíi mɔ. Nduɔ, shyíi mɔ nə nukə ndə a kə́ tíi mɔ chɔ."

30 Kɔniliɔ bə̀ŋhə mbɔ, "Nɔ bɛ chîbə kwi laa ndə mɔ kə́ gháaNyii mu njaa-mɔ haʼ ndə ndʉʉ-ɔ̄ mənɔ, bəchî itia ndʉʉnəchî, kə kwɔnə nyíɛ, wobɛʼ nə ndyi-kəfyuʼ-chɛŋ-hə kə́ tə́nə bəshʉ mɔ. 31 Ɔ ghɔ̀ŋ mbɔ, ‘Kɔniliɔ, Nyii nɔʼ yʉ́ gwia-a, bɔŋleʼ nyíɛ kɔkə-a tʉ bʉə-mbʉʼ. 32 Nduɔ tə́ŋ bʉə-Joba tíi Bita, ɔ nɔ tʉʼ chí fu Samu ndə ɔ tʉʼ núʼ gwohə bɔŋ-kə́-leʼ chí mbʉə muukwɛʼtəŋmə.’ 33 Nɔ chìi yɔŋ mɔ tə́ŋ tíi a haʼ ndʉʉghɔfii, i nɔ bʉ̀ʉ ndə a gwè nɔ. Baʼa nɔ tə́nə fɛ̄ŋ bəshʉ-Nyii, kə́ chyìi ndə məyʉ́ ntəŋ ndə a gwè nə yɔŋ-yə kəghɔ-Tiekətʉ."

Bʉə ndə bɔ̂ŋ gòʼ təmə bɛ bʉə-Juu fɛ yʉ́ ntəŋjyujyu

34 Ndʉʉmɛ, Bita bə̀ŋhə mbɔ, "Mɔ nɔʼ nyíɛ nduɔ shʉəŋ mbɔ Nyii kyinə túhə shʉ fɛ." 35 Mu lɔʼ-bətə̂ŋ-tə inchəŋ ɔ nɔ tʉʼ bɛ́ŋ bʉə ndə bɔ̂ŋ tʉʼ fàa ɔ bɔŋ-kə́-leʼ fɔ̀ʼ nubə ndə i kʉ̀ʼnə. 36 Bii nɔʼ kə yʉ́ ntəŋjyujyu ndə i gwè hə kəghɔ-Nyii tʉ bʉə-Isilɛ, mbɔ f̃yiighʉ́ənə nɔ gwè hə kəghɔ-Nyii tíŋ hə bɔ̌ŋ Jiso Klai, ndə ɔ bɛ Tiekətʉ bʉə bənchəŋ. 37 Bii bɔŋleʼ kínə nukə ndə i kə fyú mu Judia inchəŋ chʉ́ʉhə mu Galili, ndʉʉ ndə Jɔŋ nə kə́ lɔ̀ʼ mbɔ bʉə la shìe liɛŋ ndəŋ bʉ̂ʼtə-ʉə ɔ kɔ́ muu tʉ bɔŋ. 38 Bii nɔ kínə ntɛ ndə Nyii kə kùŋ Jiso ndə ɔ lɔ̀ hə Nasalɛ nə LyʉʉhəNyiikə ghɔŋbə ghʉəʼkə, kínə ntɛ ndə ɔ kə tòʼ yə̀ŋ yəŋbə fɔ̀ʼ nu-jyujyu-bə bɔŋleʼ chʉ́ʼ bʉə bənchəŋ ndə Debulu tʉʼ chɔ́ŋhə bɔŋ bʉʼka ghɔŋ Nyii nɔ nə bɛ mɔʼɔ.

39 "Mbəŋ-yaʼ, bəlɔntəŋ Jiso, nɔ nyíɛ nubə-ɔ̄ŋ nə shʉ-yaʼ ndə ɔ kə fɔ̀ʼ mu lɔʼɔ bʉə-Juu leʼnə Jɛlosalɛŋ inchəŋ. Bɔ̂ŋ nɔ nə kwɛ̀ŋ ɔŋ kwɛ̀ŋ yí ndəŋ tyʉntɔɔnəkə, 40 bɔŋ chîbə kʉ̂ʉ tíŋ itia Nyii bʉ̀nə kóʼhə ɔŋ. Ndʉʉmɛ, ɔ chìi ɔ kɛ̀ʼ ŋwɔŋ-ɛŋ bə nyíɛ ɔŋ ntaa. 41 Ɔ kə kɛ̀ʼ ŋwɔŋ-ɛŋ bə tʉ bʉə buŋmbi fɛ, ɔ nɔ nə kɛ̀ʼ haʼ tʉ mbəŋ-yaʼ ndə Nyii nɔʼ kə séʼ hə bəshʉ mbɔ baʼa shyíi bʉə nə ŋgiekə-i, tʉ mbəŋ-yaʼ ndə baʼa bɔŋ nə kə́ yú bɔŋleʼ nú mɔʼɔ, ndʉʉ ndə ɔ kə bʉ̀nə kóʼ hə ndəŋ kwu. 42 Ɔ nɔ nə kàhə baʼa mbɔ baʼa gɛ̀ lɔ̀ʼ bɔŋleʼ shyíi bʉə mbɔ Jiso la bɛ kuŋ Nyii ndə ɔ bu sɔ́ʼ bʉə bənchəŋ, bʉə ndə bɔ̂ŋ bíe mbi ghɔŋbə bʉə ndə bɔ̂ŋ nɔʼ kwútə. 43 Nɔ bɛ mbəŋ-ɛŋ ndə bʉəyʉkəŋgieNyii bənchəŋ nə kwə́ʼ te ɔ, kə́ ghɔ̀ŋ mbɔ wotəmiyɔŋ ndə ɔ bɛ́ŋ ɔŋ, bə bu sʉ̀fyii ndə bʉ̂ʼʉ-e tíŋ hə bɔ̌ŋ ɔŋ."

Bʉə ndə bɔ̂ŋ gòʼ təmə bɛ bʉə-Juu fɛ kie LyʉʉhəNyiikə

44 Ndə Bita tʉʼ kwə́ʼ ŋgiebə-ɔ̄ŋ, LyʉʉhəNyiikə shíʼ ndəŋ bʉə bənchəŋ ndə bɔ̂ŋ kə́ yʉ́.

45 Bʉə-Juu ndə bɔ̂ŋ nɔʼ kə bɛ́ŋ Nyii ndə ghɔŋbə Bita kə gwè mɔʼɔ i chàa bɔŋ ndə bəkɔ kɔ-kəLyʉʉhəNyii-kə ghɔ shíʼ ndəŋ bʉə ndə bɔ̂ŋ gòʼ təmə bɛ bʉə-Juu fɛ. 46 Bʉʼka bɔ̂ŋ nɔ kə yʉ́ ndə bɔ̂ŋ kə kə́ kwə́ʼ ŋgie-bətə̂ŋ-kədɔŋ-bə bɔŋ-kə́-leʼ lə̀ʼtə Nyii.

Ndʉʉmɛ, Bita ghɔ̀ŋ mbɔ, 47 "Nduɔ ndə LyʉʉhəNyiikə nɔʼ shíʼ ndəŋ bɔŋ haʼ ndə ɔ kə shíʼ ndəŋ bʉʼʉ nɔ, bəkɔ wo leʼ tɛ́ŋ mbɔ bɔ̂ŋ mə fí muu fɛ mɛ?" 48 Ndʉʉmɛ, Bita kàhə bɔŋ mbɔ bɔ̂ŋ fí muu yie-Jiso Klai. Kʉ̂ʉ kə́ liʼ, bɔ̂ŋ fʉ̀ʉtə ɔŋ mbɔ ɔ chí ghɔŋ bɔŋ ndə mbyu-bəchî-hə.