1 Yɔŋbɛʼ, Bita ghɔŋ Jɔŋ kə́ kóʼ gɛ̀ mu njaafɛ̀ʼndɛŋNyii ndə ndʉʉ ndə bɔ̂ŋ gháaNyii chɔ. Nɔ kə bɛ mu bəchî itia ndʉʉnəchî. 2 Wobɛʼ ndə ɔ kə bɛ lɛŋ lʉ̀ hə bətɔ, bə kə bɛ̀ʼ ɔ, kóʼ gwè nə nɔŋ chulɔŋ-njaafɛ̀ʼndɛŋNyii ndə bə kə́ tíi nə Lɛɛŋ, kəyəŋ ndə bɔ̂ŋ kə́ dùʼhə ɔŋ chɔ, ɔ kə́ gháa kyʉə kəghɔ-bʉə ndə bɔŋ tʉʼ ŋíi mu chunjaafɛ̀ʼndɛŋNyii. 3 Ndʉʉ ndə ɔ kə nyíɛ Bita ghɔŋ Jɔŋ, bɔ̂ŋ kə́ kʉ́ʉ ŋíi mbʉ mu chunjaafɛ̀ʼndɛŋNyii, ɔ gháa kyʉə hə kəghɔ-bɔŋ.

4 Bita ghɔŋ Jɔŋ lɛ́nə mu shʉhə-i, Bita ghɔ̀ŋ tʉ ɔŋ mbɔ, "Lɛ́nə baʼa!" 5 Ndʉʉmɛ, ɔ chɔ̀ʼhə shʉ-i tʉ́ʼ ndəŋ bɔŋ, kə́ kʉ̀ʼ ndə məkie fɔkə kəghɔ-bɔŋ. 6 Ndʉʉmɛ, Bita ghɔ̀ŋ mbɔ, "Mɔ kie kyʉə ndə məkɔ́ tʉ a fɛ, bɔŋ nukə ndə bəkɔ mɔ fɔ̀ʼ, mɔ bu fɔ̀ʼ tʉ a. Yie-Jiso Klai ndə ɔ lɔ̀ hə Nasalɛ, lɔ̀ hə sê tòʼ!"

7 Ɔ jɔ̀ kwiimɔʼnə-i, chɔ̀ʼhə ɔŋ, kwáa ɔ, ɔ lɔ̀ hə sê, haʼ ndʉʉmɛ fʉəŋtə-i ghɔŋ ŋgoʼ-fʉəŋ-hə-i tuŋ shʉ́ə. 8 Ɔ sɛ́ʼ tə́nə ndəŋ fʉəŋtə-i, chʉ́ʉhə kə́ tòʼ. Ndʉʉmɛ, ɔ sʉ́ʉ gɛ̀ ghɔŋ bɔŋ sêfu chunjaafɛ̀ʼndɛŋNyii, kə́ tòʼ, kə́ sɛ́ʼtə bɔŋ-kə́-leʼ lə̀ʼtə Nyii.

9 Ndʉʉ ndə bʉə bənchəŋ nyíɛ ɔŋ, ɔ kə́ tòʼ bɔŋleʼ kə́ lə̀ʼtə Nyii, 10 bɔ̂ŋ chèʼnə mbɔ nɔ bɛ ɔ ndə ɔ̃ kə́ dùʼ chulɔŋ-chunjaafɛ̀ʼndɛŋNyii ndə bə kə́ tíi nə Lɛɛŋ, kə́ gháa kyʉə le, i chíe chu-yʉə, bɔŋleʼ chàa bɔŋ ndə nukə ndə i nɔʼ fyú.

11 Ndə mbʉ lɛŋ-ghɔ̄ kə chyúnə ndəŋ Bita ghɔŋ Jɔŋ, i fɛ̀ŋhə bʉə bənchəŋ, bɔ̂ŋ nyʉ́ʉ gɛ̀ bìatə bɔŋ kəyəŋ ndə bə kə́ tíi nə Chu-Kənjuuhə-Salamu ndə i kə bɛ chunjaafɛ̀ʼndɛŋNyii. 12 Ndʉʉ ndə Bita nyíɛ yɔ̄ŋ-yə, ɔ ghɔ̀ŋ tʉ bɔŋ mbɔ, "Bənaa-bɔŋ, bətie-bɔŋ, bʉə-Isilɛ, chìi ka yɔ̄ŋ-yə chíe chu-yii? Chìi ka bii kə́ lɛ́nə baʼa fi nə fɔ̀ʼ ghʉəʼkə-aʼ byuunɔ məchimbi-yaʼ ndə i tʉʼ kɔ́ kuŋhə tʉ Nyii ndə i chìi wo-ɔ̄, ɔ kə́ tòʼ? 13 Nyii-Ablahaŋ, Aisi leʼnə Jakɔ, Nyii bətietie-baʼa, nɔʼ kóʼhə kwii-Jiso vaafɔ̀ʼ-ɛ ghɔʼ, ndə bii nɔʼ kə chɔ̀ʼhə ɔŋ kɔ́ mbɔ b̈ə yí. Bale nɔʼ kə shʉ̀tə mbɔ b̈ə yɔ̀ʼ ghɔkə ndəŋ ɔŋ ɔ gɛ̀, bii tɛ́ŋ. 14 Bii nɔ kə tɛ́ŋ wo ndə ɔ bɛ ŋkʉʉ bɔŋleʼ bɛ ndyʉndyʉ, séʼ mbɔ b̈ə mɛ̀ʼtə shùɔ wo tʉ bii. 15 Bii nɔ kə yí w̃o ndə ɔ kɔ́ məchímbi, bɔŋ Nyii bʉ̀nə kóʼhə ɔŋ hə ndəŋ kwu, baʼa nyíɛ nə shʉ-yaʼ kə́ fʉ̀ʼtə.

16 "Nɔ bɛ bʉʼka baʼabə wo-ɔ̄, ndə bii kínə ɔŋ, nɔʼ mɔ̀ʼfyiihə-aʼa-bɔŋ-hə ndəŋ Nyii yie-Jiso, bii buŋ nyíɛ ɔŋ, ɔ kə́ tə́nə laa fɛ̄ŋ shʉ́əshʉ́ə nɔ.

17 "Nduɔ, bəliŋ-bɔŋ, mɔ nɔ kínə mbɔ bii nɔ kə fɔ̀ʼ nə tʉŋkwɔŋ haʼ ndə bəntəŋbəshʉ-bii. 18 Nɔ bɛ ntɛ nɔ ndə Ñyii fɔ̀ʼ nubə, ndə ɔ kə gìe lʉ̀ hə bəshʉ tíŋ hə bɔ̌ŋ bʉəyʉkəŋgie-bi mbɔ Wo ndə ɔ Kùŋ Tə́ŋ bu nyíɛ ŋgʉəʼ. 19 B̈ii shìe liɛŋtə-ii hə ndəŋ bʉ̂ʼtə-ii, bʉ̀nə gwè tʉ Nyii, ɔ chʉʼ sʉ̀fyii hə ndəŋ bʉ̂ʼtə-ii, Tiekətʉ chʉʼ chìi b̈ii kie ŋgwɔʼmbi ndə fyiihə-ii bu ghʉ́ə bʉʼka bii bɔŋ bɛ mɔʼɔ, 20 kə mbɔ ɔ bu bʉ̀nə bìʼ tə́ŋ mbʉ Wo ndə ɔ kə Kùŋ Tə́ŋ tʉ bʉʼʉ, kə́ bɛ Jiso ndə ɔ nɔʼ kə séʼ tʉ bʉʼʉ. 21 Ɔ bu káa yuo tə ndʉʉ yi kʉ̀ʼnə ndə Nyii bu bʉ̀nə shʉ̀tə nubə ï tə́nə ndyʉndyʉ, haʼ ndə ɔ nɔʼ kə kɔ̀ʼnə tíŋ hə bɔ̌ŋ bʉəyʉkəŋgie-bi ndə bɔ̂ŋ bɛ ŋkʉʉ lʉ̀ hə ŋgʉʼʉbɛʼ. 22 Ndə fʉʼkənu, Mushi nɔ nə kwə́ʼ te mbʉ Wo ndə Nyii kə Kùŋ Tə́ŋ mbɔ, ‘Nyii mbʉ Tiekətʉ-yii bu chìi woyʉkəŋgie-e fyú hə mu ŋgwie-yii nə mɔ, ndə ɔ bu kə́ yʉ́ hə kəghɔ-Nyii fʉ̀ʼtə tʉ bii. Bii nɔ kie ndə məyʉ́ nubə inchəŋ ndə ɔ bu gìe tʉ bii. 23 Wotəmiyɔŋ ndə ɔ gòʼ təmə kə́ yʉ́ hə kəghɔ-ɔ fɛ, bə bu chʉ̀ə ɔ fyúhə hə mu bʉə-Nyii, bʉ́əhə ɔŋ.’

24 "Kɛŋ leʼ shʉəŋ, bʉəyʉkəŋgieNyii bənchəŋ lʉ̀ hə kəghɔ-Samuɛ tə gwè dàa tʉ bʉə ndə bɔ̂ŋ kə gwè hə bɔ̌ŋ ɔŋ, nɔʼ kə kwə́ʼ te chîmbibə-ɔ̄ŋ. 25 Bii bɔŋ kə́ bɛ nju-bʉəyʉkəŋgieNyii-hə, ghɔŋbə ŋkaamə ndə Nyii nɔʼ kə gwìa ghɔŋbə bətietie-bii. Ɔ nɔ nə gìe tʉ Ablahaŋ mbɔ, ‘Tíŋ hə bɔ̌ŋ ŋgwie-wo-a, biʼbə bu ŋíi chu-fu-tə inchəŋ kəchisê.’ 26 Ndʉʉ ndə Nyii kə séʼ vaafɔ̀ʼ-ɛ, ɔ fəŋ tə́ŋ ɔŋ tʉ bii mbɔ ɔ bìʼ bii, tíŋ hə bɔ̌ŋ məkíahə wotəmiyɔŋ mu bii hə ndəŋ fia-bʉəbʉə-tə."